Desemba

Desemba 1

“Kama yeye alivyo, ndivyo tulivyo na sisi katika ulimwengu huu” (1 Yohana 4:17).

Yesu ataingia katika moyo uliojisalimisha na kujiunga nao, akiupa uhai wake mwenyewe na hali yake, na kuwa upya siku baada ya siku, riziki ya mahitaji yake ya kiroho na mbadala wa kutokuweza kwake.

Sehemu yetu ni kujitoa tu kwa ukamilifu, tukikiri ubatili wetu wenyewe, kisha kumtwaa Yesu mwenyewe aishi ndani yetu na kuwa, dakika baada ya dakika, nguvu yetu, usafi wetu na ushindi wetu.

Mmoja katika mauti yake msalabani, Mmoja kama alivyofufuka kutoka kwa wafu; Mimi nimekombolewa na laana Kama alivyo Kichwa changu kitukufu. Mmoja katika sifa zake nasimama, Mmoja niombapo kwa jina lake, Yote uwezao ustahili wake kudai Naweza kuyadai kwa ujasiri. Mmoja penye Kiti cha Enzi kando yake, Mmoja katika Uana wake wa kimungu, Mmoja kama Bwana-arusi na Bibi-arusi, Mmoja kama Tawi na Mzabibu. Yote aliyo nayo yatakuwa yangu, Yote alivyo nitakuwa; Nikiwa nimevikwa utukufu wake wa kimungu, Nitakuwa kama alivyo yeye.

Desemba 2

“Mkiangalia sana mtu asiipungukiwe na neema ya Mungu” (Waebrania 12:15).

Si kupoteza yote, bali kupungukiwa ndilo tunalopaswa kuogopa. Twaweza tusipoteze nafsi zetu, lakini twaweza kupoteza kitu cha thamani zaidi ya uhai—kibali chake kamili, uchaguzi wake wa juu, na taji yetu isiyoharibika iliyopambwa kwa nyota. Ni ile daraja moja zaidi ihesabuyo, na kuleta tofauti yote kati ya maji ya moto—yasiyo na nguvu ndani ya boilaa—na mvuke—uliojaa uhai na nguvu, ukibeba mzigo wake wa thamani kuvuka bara.

Nataka, katika maisha haya yangu mafupi, Kadiri iwezavyo kubanwa Ya utumishi wa kweli kwa Mungu na mwanadamu, Nisaidie niwe bora wangu. Nataka kusimama Kristo atokeapo Na kusikia jina langu likikiriwa, Nikihesabiwa miongoni mwa wale waliofichwa, Watakatifu wake na bora wake. Nataka, miongoni mwa umati wa washindi, Jina langu likiriwe; Na kumsikia Bwana wangu akisema mwishoni, Vema, umefanya bora wako. Nipe, Ee Bwana, uchaguzi wako wa juu; Wengine wachukue yaliyobaki: Vitu vyao vizuri havina haiba kwangu, Kwa maana nimepata bora wako.

Desemba 3

Mawazo yako ni ya kina sana (Zaburi 92:5).

Askari Mrumi mmoja alipoambiwa na kiongozi wake kwamba kama angesisitiza kufanya safari fulani yamkini ingekuwa ya kumuua, akajibu, “Ni lazima kwangu kwenda, si lazima kwangu kuishi.” Huo ulikuwa ni ukina. Tunapothibitishwa hivyo tutafikia jambo fulani.

Asili ya juujuu huishi katika misukumo yake, hisia zake, ufahamu wake wa ndani, silika zake, na kwa kiasi kikubwa katika mazingira yake. Tabia yenye kina hutazama zaidi ya haya yote na kusonga mbele kwa uthabiti, ikipita dhoruba na mawingu yote hata katika mwangaza safi wa jua ulio daima upande wa pili, na kungoja yale ya baadaye ambayo daima huleta malipo ya huzuni na ushindwaji na kufeli kunakoonekana.

Mungu atakapotutia kina, ndipo aweza kutupa kweli zake za ndani zaidi, siri zake za kina kabisa, na dhamana zake zenye uweza zaidi.

Bwana, niongoze katika vilindi vya uhai wako na uniokoe na uzoefu wa juujuu.

Mbele hata mashamba mapana zaidi ya maono matakatifu; Mbele hata vilele virefu zaidi vya imani na upendo; Endelea, panda juu, ukishika kabisa Yote ambayo kwayo yeye akuitia kutoka juu.

Desemba 4

“Matunda yako yapatikana kwangu mimi” (Hosea 14:8).

Hakuna kitu kituzuiacho tusiendelee mbele kama mifereji na mikondo, na nyayo za magurudumu ambamo magari yetu huviringika kisha kusonga katika mstari mwembamba kwa uchoshaji usiobadilika, mikondo katika mto wa maisha ambayo juu yake tunachukuliwa katika mwelekeo wa kale hata sheria ya mazoea karibu ifanye kuendelea mbele kuwe jambo lisilowezekana. Dawa halisi ya hili ni kuanza katika hali ya sifuri; tukimtwaa Kristo upya awe Alfa na Omega kwa uzoefu wa kina zaidi, wa juu zaidi, wa kimungu, tukingoja hata dhana yake ya fikira, hamu, maombi, na kuogopa isije fikira yetu ya juu kabisa ikawa chini ya mpango wake mkuu wa hekima na upendo.

Ee Mfariji mpole na mwororo, Ee Njiwa mtakatifu wa mbinguni, Tunautoa moyo wetu katika kujisalimisha, Twangoja kuuthibitisha utimilifu wako. Ee njoo kama moto uchunguzao moyo, Ee njoo kama gharika isafishayo dhambi; Tuteketeze kwa hamu takatifu, Ututue kwa utimilifu wa Mungu. Utupake mafuta ya furaha na uponyaji; Utubatize kwa nguvu kutoka juu; Ee njoo na ujazo na muhuri Tulalapo chini penye kiti cha miguu yako.

Desemba 5

“Kwa moyo mkamilifu kumfanya Daudi kuwa mfalme” (1 Mambo ya Nyakati 12:38).

“Ni kusudi gani kuu la maisha yetu? Wote walikuwa na moyo mmoja kumfanya Daudi kuwa mfalme.” Je, hili ni kusudi letu, kumtayarisha Bibi-arusi, kuutayarisha ulimwengu, kuiandaa njia yake? Je, hulidunisha na kulififisha kila tamaa nyingine, kila jambo lingine la kujali? Je, hukijaza na kukiridhisha kila uwezo, kila nguvu, kila hamu? Je, humeza kila dakika, kila nishati, kila rasilimali? Je, huupa mwelekeo na sauti kila mpango na kazi ya maisha? Je, hutuamulia elimu ya watoto wetu, uwekezaji wa mali yetu, urafiki na mahusiano ya maisha, utendaji wote, hamu na mtazamo wa utu wetu? Je, tumo ndani yake, roho, nafsi na mwili, yote tulivyo, yote tufanyayo, yote tunayoyatumaini—kwa moyo mmoja kumfanya Yesu kuwa Mfalme?

Twaenenda tukiwa tumeungana Kwa moyo na mkono wa uaminifu, Kuibeba bendera yake ya kifalme Juu ya kila nchi. Kutoka kila kabila na taifa Tutaharakisha kumleta Bibi-arusi wake. Na Ee, kwa karibisho la furaha jinsi gani Tutamfanya Yesu wetu kuwa Mfalme.

Desemba 6

“Basi nyenyekeeni chini ya mkono wa Mungu ulio hodari, ili awakweze” (1 Petro 5:6).

Upinzani ni wa lazima kwa uwiano halisi wa nguvu. Nguvu ya kuvutia kitovuni na nguvu ya kukimbia kitovuni zikitenda kwa kupingana, huishika sayari yetu katika mzunguko wake. Moja ikisukuma, na nyingine ikisukumizia mbali, hutenda na kuitikia hivi, hata badala ya kufagiliwa mbali angani katika njia ya ukiwa na uharibifu, sayari huufuata mzunguko wake sawia kuzunguka kitovu chake cha jua.

Ndivyo Mungu aiongozavyo maisha yetu. Haitoshi kuwa na nguvu ya kusukuma—twahitaji sawasawa nguvu ya kusukumizia mbali, na hivyo yeye hutuzuia nyuma kwa majaribu ya maisha, kwa shinikizo la jaribu na dhiki, kwa mambo yaonekanayo kuwa dhidi yetu, lakini hasa yanaendeleza njia yetu na kuthibitisha hatua zetu. Na tumshukuru kwa yote mawili, na tuchukue mizigo pamoja na mbawa, na hivyo tukisukumwa kimungu, na tusonge mbele kwa imani na saburi katika wito wetu wa juu na wa mbinguni.

Bwana, nisaidie kujifunza kutoka katika yote yanijiayo leo mapenzi yako ya juu.

Bwana, nisaidie leo kuzama chini ya mkono wako mbarikiwa, ili upate kuwa na njia yako na mapenzi yako kwangu.

Desemba 7

“Kaa nasi, kwa kuwa kumekuchwa” (Luka 24:29).

Katika ujumbe wake wa mwisho kwa wanafunzi katika sura ya 14 na 15 ya Yohana, Bwana Yesu hutufundisha waziwazi kwamba kiini chenyewe cha utakatifu wa juu kabisa ni, “Kaeni ndani yangu, nami ndani yenu, kwa maana pasipo mimi ninyi hamwezi kufanya neno lo lote.”

Kusudi hasa la Roho Mtakatifu aliyemwahidi lilikuwa kumfunua yeye, ili “siku ile, mtajua ya kuwa mimi ni ndani ya Baba, nanyi ndani yangu, nami ndani yenu,” na mwangwi wa mwisho wa maombi yake ya maombezi ulikumbatiwa katika maneno haya matatu madogo lakini yasiyo na mwisho, “Mimi ndani yao.”

Je, ni kwangu kutakaswa kwa nguvu yake Kutoka katika unajisi wa dhambi? Je, ni kwangu kulindwa kila saa Kwa kukaa kwake ndani? Je, ni kwangu kuwa mzima kabisa Kwa kupakwa kwake mafuta ya kimungu; Nikidai katika mwili, na roho, na nafsi, Utimilifu wake wote kuwa wangu? Ahadi ya ajabu iliyojaa na iliyo huru, Mwokozi wa ajabu, Ee, yawezekanaje, Utakaso na msamaha na rehema kwangu? Naam, ni kwangu, kwangu.

Desemba 8

“Je! hakuna zeri katika Gileadi? Hakuna tabibu huko?” (Yeremia 8:22).

Uponyaji wa kimungu ni uhai wa kimungu tu. Ni ukichwa wa Kristo juu ya mwili. Ni uhai wa Kristo katika kiwiliwili. Ni muungano wa viungo vyetu na mwili wenyewe wa Kristo na uhai wa Kristo uingiao ndani ya viungo vyetu vilivyo hai. Ni halisi kama vile mwili wake uliofufuliwa na kutukuzwa. Ni jambo la busara kama ule ukweli kwamba alifufuliwa kutoka kwa wafu na ni mtu aliye hai mwenye mwili wa kweli na nafsi yenye akili leo, mkono wa kuume wa Mungu. Kristo huyo aliye hai ni wetu katika sifa na nguvu zake zote. Sisi ni viungo vya mwili wake, nyama yake na mifupa yake, na kama tukiweza kuamini na kupokea, twaweza kuishi kwa uhai wenyewe wa Mwana wa Mungu.

Bwana, nisaidie kumjua “Bwana kwa ajili ya mwili na mwili kwa ajili ya Bwana.”

Kuna uponyaji katika ahadi, Kuna uponyaji katika damu, Kuna nguvu kwa udhaifu wetu wote Katika Mwana wa Mungu aliyefufuka. Na aliye dhaifu kuliko wote wa watoto wake, Aweza kushiriki uhai wake wote mtukufu; Ana zeri ya uponyaji katika Gileadi, Yeye ndiye Tabibu Mkuu huko.

Desemba 9

“Tweka mpaka kilindini” (Luka 5:4).

Moja ya alama za pekee za Roho Mtakatifu katika Kanisa la Kimitume ilikuwa roho ya ujasiri. Moja ya sifa za lazima kabisa za imani ile itakayothubutu mambo makuu kwa ajili ya Mungu na kutarajia mambo makuu kutoka kwa Mungu, ni ujasiri mtakatifu. Pale tunaposhughulika na Mtu asiye wa kawaida, na kutwaa kutoka kwake vitu visivyowezekana kibinadamu, ni rahisi zaidi kutwaa vingi kuliko vichache; ni rahisi zaidi kusimama mahali pa kutumaini kwa ujasiri kuliko mahali pa kung’ang’ania ufuoni kwa uangalifu na woga. Kama mabaharia wenye hekima katika maisha ya imani, na tweke mpaka kilindini, na kuona kuwa mambo yote yawezekana kwa Mungu, na mambo yote yawezekana kwake aaminiye.

Na tuthubutu leo mambo makuu kwa ajili ya Mungu, tuitwae imani yake na kuyaaminia, na nguvu yake ili kuyatimiza.

Rehema ya Mungu ni bahari ya kimungu, Gharika isiyo na mipaka wala kina; Tweka kilindini, kata kamba ya ufuoni, Ukapotee katika utimilifu wa Mungu. Ee, na tweke katika bahari hii pana hivyo, Ambako mafuriko ya wokovu yafurika, Ee, na tupotee katika rehema ya Mungu, Hata tujue kina cha utimilifu wake.

Desemba 10

“Kwa kadiri ya kipimo cha kanuni Mungu aliyotugawia” (2 Wakorintho 10:13).

“Kwa kadiri ya imani yako iwe kwako” ilikuwa sheria kuu ya Kristo ya uponyaji na baraka katika huduma yake ya duniani. Ndilo alilomaanisha aliposema, “Kwa kipimo kile mpimacho ndicho mtakachopimiwa.” Vipimo hivi vyenye uweza vinawekewa mpaka na vile vipimo tuvyoleta. Mungu hutugawia hazina zake za mbinguni katika vyombo hivi vitukufu, lakini kila mmoja wetu ni lazima alete kikombe chake cha kunywea, na kwa kadiri ya kipimo chake tutajazwa.

Lakini hata kipimo cha imani yetu chaweza kuwa cha kimungu. Ashukuriwe Mungu, kikombe kidogo kimepanuliwa kupitia neema ya Yesu, hata kutoka chini yake hutiririka bomba mpaka bahari kuu, na kama muunganiko huo ukiwekwa wazi tutaona kuwa kikombe chetu ni kikubwa kama bahari na hakiwezi kamwe kufyonzwa hata chini. Kwa maana ametuambia, “Mwe na imani ya Mungu,” na bila shaka hiki ni kipimo kisicho na mipaka.

Na tuidai ahadi yenye uweza, Na tuziwashe mienge iliyofifia; Na tujiunge na kwaya tukufu, Hakuna gumu lisilowezekana kwake.

Desemba 11

“Siuombei ulimwengu, bali nawaombea hao” (Yohana 17:9).

Mara ngapi twasema tungependa kupata roho fulani hodari atuombee, na kujisikia tumesaidiwa sana tunapofikiri kuwa wanatuchukua katika imani yao. Lakini kuna Mmoja ambaye maombi yake hayakosi kamwe kutimizwa na aliye tayari kutupa zaidi ya rafiki yeyote wa kibinadamu. Kazi yake moja mkono wa kuume wa Mungu ni kufanya maombezi kwa ajili ya watu wake, na sisi tunaingia tu katika mstari wa uteuzi wake mwenyewe na ahadi na maandalizi yake dhahiri, tunapoiweka mizigo yetu juu yake na kudai utetezi wake bila shaka wala woga. “Basi, kwa kuwa tunaye kuhani mkuu aliyeingia mbinguni, Yesu, Mwana wa Mungu, na tuukaribie kwa ujasiri kiti cha enzi cha neema ili tupate kupata msaada wakati wa haja.”

Kama chetezo cha dhahabu kingaacho, Kilichojaa manukato yawakayo adimu, Moyo wangu wote watiririka juu, Katika wingu la maombi yasiyokoma. Ukiinama juu ya madhabahu ya mbinguni, Yesu asimama akiombea, Maombi yetu yote yapandayo mbinguni, Yamfikia Baba kwa mikono yake.

Desemba 12

“Kudumu katika mwili kwahitajiwa zaidi kwa ajili yenu, na kwa kuwa nasadiki hayo, najua nitakaa” (Wafilipi 1:24, 25).

Moja ya mambo yaliyobarikiwa zaidi juu ya uponyaji wa kimungu ni kwamba nguvu iletayo ni nguvu takatifu, na hupata mtiririko wake wa asili na unaofaa katika matendo na mazoezi matakatifu.

Nguvu ya asili tu hutafuta kuridhika kwake katika anasa na shughuli za asili, lakini nguvu ya Kristo hutuongoza kutenda kama Kristo angetenda, na kutafuta ajira yetu ifaayo katika utumishi wake mtakatifu.

Uhai wa Kristo katika mwili wa kibinadamu huuokoa na majaribu elfu ya kujifurahisha nafsi na dhambi, na si tu hutupa nguvu kwa utumishi wa juu zaidi, bali pia hamu kwa ajili yake, na huutia ndani yake shauku na uchangamfu unaompa nguvu maradufu.

Bwana, tusaidie leo kudai uhai wako kisha kuutoa kwa msaada wa wengine.

Je, umelipata tawi la uponyaji? Lipeleke mbele. Je, umehisi muhuri wa Roho, Upeleke mbele. Ni kwa hili rehema yake ilikutafuta, Na kwa utimilifu wake wote ikakuleta, Kwa damu ya thamani iliyokununua, Upeleke mbele.

Desemba 13

“Yeye akaaye ndani yangu, nami ndani yake, huyo huzaa sana; kwa maana pasipo mimi ninyi hamwezi kufanya neno lo lote” (Yohana 15:5).

Mzabibu na matawi ni vitu vinavyofahamika sana, kiasi kwamba si lazima kueleza; ila tu matawi na mzabibu ni kitu kimoja. Mzabibu hausemi, Mimi ni shina la kati lipandalo juu nanyi ni matawi madogo; bali, Mimi ni kila kitu, nanyi ni kila kitu. Hutuhesabu kuwa washiriki wa asili yake. “Pasipo mimi ninyi hamwezi kufanya neno lo lote.” Mume na mke, na mifano mingine mingi zaidi huchangia katika fundisho hili la ajabu la Kristo, ambalo halina kifani, wala mfano wa kutangulia katika fundisho lingine lolote chini ya jua; kwamba Kristo ni uhai wa watu wake, na kwamba sisi tumeunganishwa kabisa naye na kutegemea juu yake. Mifumo mingine yote hufundisha jinsi mwanadamu alivyo mkubwa na awezavyo kuwa. Ukristo huonyesha jinsi mtu apaswavyo kuyapoteza yote aliyo nayo kama akitaka kuingia katika umoja kamili na Kristo katika uhai wake.

Bwana, nisaidie siku hii kukaa ndani yako.

Ee! mahali pa ajabu kama nini Yesu amenipa mimi! Nikiokolewa kwa neema yake tukufu, Naweza kuwa kama alivyo yeye.

Desemba 14

“Badala ya mwiba utamea msonobari” (Isaya 55:13).

Magumu na vipingamizi ni changamoto za Mungu kwa imani. Vizuizi vinapotukabili katika njia ya wajibu, tunapaswa kuvitambua kuwa vyombo kwa imani ili kuvijaza kwa utimilifu na utoshelevu-wote wa Yesu, na tunaposonga mbele, tukimtumaini kwa unyofu na ukamilifu, twaweza kujaribiwa, twaweza kulazimika kungoja na kuiacha saburi iwe na kazi yake kamili, lakini bila shaka tutaona mwishoni jiwe limevingirishwa, na Bwana akingoja kutulipa maradufu kwa wakati wetu wa kujaribiwa, na kutimiza ahadi, “Badala ya mwiba utamea msonobari, badala ya mbigili utamea mhadasi; nao utakuwa kwa Bwana ishara, ishara ya milele isiyokatika.”

Mara nyingi huja ujumbe wa ajabu Wakati matumaini yangu yanapofifia; Naweza kuusikia katika giza, Kama wimbo fulani mtamu wa mbali. Hakuna gumu lisilowezekana kwa Yesu, Hakuna mtu awezaye kutenda kama yeye. Njia yangu inapofungwa katika giza Na adui zangu wakali na wa kutisha, Bado waimba juu ya mapambano Kama wimbo fulani wa furaha, wa ushindi: Hakuna gumu lisilowezekana kwa Yesu, Hakuna mtu awezaye kutenda kama yeye.

Desemba 15

“Moyo wangu uzimiapo, uniongoze mpaka mwamba ulio juu kuliko mimi” (Zaburi 61:2).

Mwisho wa nafsi ni mwanzo wa Mungu. “Hesabu ya matofali inapoongezwa maradufu ndipo huja Musa.” Hiyo ndiyo namna ya kale ya Kiebrania ya kulieleza. “Ukomo wa mwanadamu ni fursa ya Mungu.” Ndivyo msemo wa methali ulivyo. “Moyo wangu uzimiapo, uniongoze mpaka mwamba ulio juu kuliko mimi.” Ndiyo namna ya Daudi ya kulieleza. “Sisi hatuna nguvu juu ya jeshi hili kubwa lijalo juu yetu; wala hatujui tufanyalo.” Hatuna nguvu, hatuna nuru—“lakini macho yetu yanakuelekea wewe,” huo ulikuwa uzoefu wa Yehoshafati juu yake. “Macho yangu yamechoka kwa kutazama juu. Nimeonewa, Bwana, unitetee.”

“Nilipokuwa na taabu kubwa daima nilimwendea Mungu nami nikachukuliwa kwa ajabu; lakini katika dhiki zangu ndogo nilizoea kujaribu kuzitatua mimi mwenyewe, na mara nyingi nikafeli kwa dhahiri kabisa.” Ndivyo Bibi Havergal alivyoueleza uzoefu wa Mkristo mwingi. Mungu hututaka “penye ukomo wa akili zetu,” ndipo atakapoonyesha hekima yake, upendo na nguvu. Mara ngapi twamwomba Mungu atusaidie, kisha twaanza kuhesabu uwezekano wa kibinadamu! Baraka zenyewe za Mungu huwa kizuizi kwetu kama tukitazama kutoka kwake kuzielekea.

Desemba 16

“Nami nitawarudishia miaka ile iliyoliwa na nzige, na parare, na madumadu, na tunutu, jeshi langu kubwa nililotuma kati yenu” (Yoeli 2:25).

Rafiki mmoja aliniambia siku moja: “Ni lazima nivune nilichopanda, kwa maana Mungu amesema: ‘Cho chote apandacho mtu, ndicho atakachovuna.’ Basi mbona husilitumie hili katika ulimwengu wa kiroho, na kumlazimisha mwenye dhambi kulipa adhabu ya dhambi zake?”

Kristo ameibeba adhabu hii, na Kristo yule yule ameibeba adhabu za asili pia, na kutuokoa kutoka katika hukumu kwa kila namna. Mateso ya kimwili hutujia, lakini si chini ya sheria ya malipizi, bali kama nidhamu ya kimungu tu. Kila adhabu imetimizwa na Kristo na kila sheria imeridhishwa, na kwa kadiri tuwezavyo kuwa tumefufuka pamoja naye hata katika uwanja wa uhai wa kiroho na wa milele, tumeinuliwa juu ya uwanja wa sheria tu, nasi twaingia katika matokeo kamili ya utoshelezaji wake kamili wa kila dai dhidi yetu. Basi ni kweli kwamba hata uharibifu ambao dhambi imeleta juu ya maisha yetu ya kimwili na ya muda huondolewa kwa upatanisho wake mkuu, na ahadi hufanywa halisi kwetu, “Nami nitawarudishia miaka ile iliyoliwa na nzige.”

Desemba 17

“Msijisumbue kwa neno lo lote” (Wafilipi 4:6).

Ni ipi njia ya kuuweka chini mzigo wako? “Jitieni nira yangu, mjifunze kwangu; kwa kuwa mimi ni mpole na mnyenyekevu wa moyo; nanyi mtapata raha nafsini mwenu.”

“Kwa maana nira yangu ni laini, na mzigo wangu ni mwepesi.” Ndiyo njia ya kuuchukua mzigo wake. Utaona kuwa mzigo wake ni mwepesi daima. Wako ni mzito sana. Siku ya furaha kama umebadilishana mizigo na kuiweka chini mizigo yako penye miguu yake mibarikiwa ili kuuchukua wake badala yake. Mungu ataka kuwapumzisha wafanyakazi wake, naye ni mwenye fadhili mno kuweka mzigo wake juu ya mioyo iliyoinama tayari chini ya uzito wa mahangaiko yao wenyewe.

Je, unaogopa, kuhangaika au kunung’unika? Huwezi kamwe kuijua amani kamili ya Mungu. Ukiegemeza uzito wako wote kifuani pake, Shaka zako zote za wasiwasi na mahangaiko ni lazima yakome. Je, ungependa kuijua amani aliyoitoa Mungu? Je, ungependa kuipata furaha yenyewe ya mbinguni? Usijisumbue kwa neno lo lote, Uwe na maombi kwa kila jambo, Uwe na shukrani kwa lo lote, Na amani ya Mungu ipitayo akili Itailinda nia yako na moyo wako.

Desemba 18

“Imani ya Mwana wa Mungu” (Wagalatia 2:20).

Imani huzuiwa zaidi ya yote na kile tukiitacho “imani yetu,” na juhudi zisizozaa matunda za kuivumbua imani ambayo ni kujifanya tu na kujaribu kwa kukata tamaa kumtumaini Mungu, ambako lazima kusipungukiwe daima na ahadi zake kubwa na tukufu. Ukweli ni kwamba imani pekee ilingayo na ahadi kubwa mno za Mungu na mahitaji yasiyopimika ya maisha yetu, ni “imani ya Mungu” mwenyewe, ule utumaini wenyewe atakaouvuvia moyoni ambao kwa akili humtarajia yeye kuwa nguvu yake ya kuamini, kama vile nguvu yake ya kupenda, kutii, au kutenda zoezi lingine lolote la uhai mpya.

Libarikiwe jina lake! Hakutupa mnyororo ufikao ndani ya kiungo kimoja tu cha moyo wetu maskini usio na msaada, ila kiungo kile kimoja cha mwisho ni cha kuharibu mnyororo wote. La, kiungo cha mwisho, kile kifungacho upande wa kibinadamu ni cha kimungu kama kiungo kifungacho mnyororo wa ahadi mbinguni. “Mwe na imani ya Mungu,” ndiyo amri yake kuu. “Ninaishi kwa imani ya Mwana wa Mungu” ndio ushuhuda wa ushindi wa yule aliyeuthibitisha kuwa kweli.

Bwana, nifundishe kuwa na imani ya Mwana wa Mungu.

Desemba 19

“Mungu huwapa wanyenyekevu neema” (Yakobo 4:6).

Moja ya alama za thamani ya juu kabisa ni unyenyekevu wa kina. Asili ya juujuu, ikijua udhaifu na upungufu wake, daima hujaribu kujitangaza na kujihakikishia kwamba inathaminiwa. Asili yenye nguvu, ikijua nguvu yake, iko tayari kungoja na kuiacha kazi yake idhihirishwe kwa wakati wake. Naam, asili zilizo za kweli kabisa hazina kabisa kujijali nafsi na kujiwazia hata lengo lao si kuthaminiwa, kueleweka au kulipwa, bali kuutimiza utume wao wa kweli na kuikamilisha kazi halisi ya maisha.

Mojawapo ya maneno yenye kudokeza zaidi yaliyotumiwa kumhusu Bwana Yesu yametolewa na mwinjilisti Yohana katika sura ya kumi na tatu ya Injili yake, ambapo twasoma, “Yesu, hali akijua ya kuwa ametoka kwa Mungu, na kwamba anakwenda kwa Mungu, aliondoka chakulani, akaanza kuwaosha wanafunzi miguu.” Ni kwa sababu alijua hadhi yake ya juu na hatima yake ya juu ndipo alipoweza kuinama hata mahali pa chini kabisa na mahali hapo pasiweze kumdunisha.

Mungu na atupe nishani za kimungu za cheo cha mbinguni, kichwa kilichoinama, roho ya upole na unyenyekevu.

Desemba 20

“Ili niwe mhudumu wa Yesu Kristo kwa Mataifa, nikiitumikia Injili ya Mungu” (Warumi 15:16).

Hii ni dhana nzuri na yenye vitendo ya kazi ya umisionari. Kuna tofauti kubwa katika kuwa tumewekwa wakfu kwa Mungu wetu. Twaweza kuwa tumewekwa wakfu kwa kazi yetu na kuwekwa wakfu kwa Mungu wetu. Twaweza kuwa tumewekwa wakfu na kufaa kufanya kazi ya umisionari, na kufeli kabisa, kama angetuita kufanya jambo tofauti. Lakini tunapowekwa wakfu kwake, tutakuwa tayari kwa lo lote atakalotutaka, na kufaa vivyo hivyo kumtumikia kando ya kitanda cha mgonjwa cha ndugu, au hata katika wajibu wa kawaida wa nyumbani, kama vile kusimama mimbarani au kumwongoza nafsi kwa Kristo.

Dhana ya Paulo ni kazi takatifu, au dhabihu ya pekee, na moja kwa moja kwa Kristo, na Kristo peke yake; naye alisimama kama mtu apaswavyo kusimama penye madhabahu ya uvumba, akiinua kwa mikono mitakatifu mataifa ya watu wa Mataifa kwa Mungu, na kuiweka kazi yake yote kama uvumba wenye harufu nzuri mbele ya kiti cha enzi, akiridhika tu na yale yatakayompendeza Bwana wake, na kustahimili kipimo cha ukaguzi wake, na muhuri wa kibali chake katika siku ile tukufu.

Hii ndiyo roho ya utumishi wa kweli.

Desemba 21

“Utupe siku kwa siku riziki yetu” (Luka 11:3).

Ni vigumu sana kuishi maisha yote mara moja, au hata mwaka mmoja, lakini ni rahisi kwa furaha kuishi siku moja kwa wakati mmoja. Siku kwa siku mana ilianguka, ndivyo siku kwa siku twaweza kuishi kwa mkate wa mbinguni, na kuyaishi maisha yetu kwa ajili yake. Na tukae ndani yake, pumzi kwa pumzi, dakika kwa dakika, hatua kwa hatua, na, kama vile tunavyozitunza siku, yeye atatunza miaka.

Mungu ametoa ahadi mbili za thamani kwa ajili ya siku. “Kama zilivyo siku zako, ndivyo zitakavyokuwa nguvu zako,” ndilo agano lake la kale, na tafsiri halisi ya maneno ya Bwana wetu ya kuaga kwa wanafunzi wake ni, “Tazama, mimi nipo pamoja nanyi siku zote, hata ukamilifu wa dahari.”

Kama yule buibui mdogo wa maji ashukaye chini ya maji ya bwawa akiwa amefungwa katika kiputo cha hewa, na huko hujenga kiota chake na kulea wadogo wake, na kuishi maisha yake madogo katika ulimwengu ule ung’aao chini ya bwawa lenye utelezi, ndivyo na tujifungie sisi katika ulimwengu huu wa giza pamoja na Kristo katika duara ndogo ya kila siku irudiyo, na hivyo kukaa ndani yake, tukivuta hewa ya mbinguni na kuishi katika upendo wake.

Desemba 22

“Tena ulimi wangu utaisimulia haki yako mchana kutwa” (Zaburi 71:24).

Ni sheria rahisi ya asili, kwamba hewa daima huingia kujaza pengo. Waweza kuzalisha mkondo wa hewa wakati wo wote, kwa kupasha hewa moto hata ipande, ndipo hewa ya baridi ikimbilia ndani kujaza mahali pake. Na hivyo twaweza kujazwa daima na Roho Mtakatifu kwa kutengeneza pengo. Pumzi hii hutegemea kuimaliza pumzi ya awali kabla ya kuvuta mpya. Na hivyo ni lazima tuutoe moyoni pumzi ya mwisho ya Roho Mtakatifu tuliyoipokea, kwa maana huisha mara tu tuipokeapo, nasi twahitaji utoaji mpya, ili kuzuia kukosa hewa kiroho.

Ni lazima tujifunze siri ya kupumua nje, kama vile kupumua ndani. Basi, kupumua ndani kutaendelea kama sehemu ile nyingine ikitendwa vema. Mojawapo ya njia bora za kumfanyia nafasi Roho Mtakatifu ni kuyatambua mahitaji yajayo maishani kuwa mapengo kwake ili ayajaze, nasi tutaona mahitaji tele pande zote zetu ya kujazwa, na tunapomimina maisha yetu katika utumishi mtakatifu, yeye atamimina yake ndani—kwa kipimo kilichojaa.

Yesu, niondolee vitu ndani yangu unijaze Kwa utimilifu wako hata ukingoni.

Desemba 23

“Katika nyara walizoteka vitani, waliweka wakfu ili kuidumisha nyumba ya Bwana” (1 Mambo ya Nyakati 26:27).

Nguvu ya kimwili imehifadhiwa katika matumbo ya nchi, katika migodi ya makaa, iliyotoka katika ule moto mkali uliochoma misitu mikubwa katika enzi za kale. Na hivyo nguvu ya kiroho imehifadhiwa katika vilindi vya utu wetu, kupitia mateso yenyewe tusiyoweza kuyaelewa. Siku moja tutaona kuwa ukombozi tuliouata kutoka katika dhiki hizi ulikuwa ukitutayarisha kuwa “Mioyo Mikuu” halisi katika Safari ya Msafiri ya maisha, na kuwaongoza wasafiri wenzetu kwa ushindi kupitia dhiki hata mji wa Mfalme.

Lakini tusisahau kamwe kwamba chanzo cha kuwasaidia watu wengine ni lazima kiwe mateso ya ushindi. Maumivu ya kunung’unika na kulalamika hayamfaidii mtu ye yote kamwe. Paulo hakubeba makaburi pamoja naye, bali kwaya ya sifa za ushindi, na kadiri dhiki ilivyokuwa ngumu zaidi, ndivyo alivyozidi kutumaini na kufurahi, akipaza sauti kutoka penye madhabahu yenyewe ya dhabihu, “Naam, hata kama namiminwa juu ya dhabihu na huduma ya imani yenu, nafurahi, tena nafurahi pamoja nanyi nyote.”

Bwana, nisaidie siku hii kuvuta nguvu kutoka katika yote yanijiayo.

Desemba 24

“Nawe je, unajitafutia mambo makuu? Usiyatafute; kwa maana, tazama, nitaleta uovu juu ya wote wenye mwili, asema Bwana; lakini uhai wako nitakupa uwe nyara mahali po pote uendako” (Yeremia 45:5).

Ahadi iliyotolewa kwa mahali pagumu, na ahadi ya usalama na uhai katikati ya shinikizo kubwa mno, uhai uwe nyara.

Yaweza kujipatanisha vema na nyakati zetu wenyewe, zinazozidi kuwa ngumu tunapokaribia mwisho wa dahari, na nyakati za dhiki.

Ni nini maana ya “uhai uwe nyara”? Yamaanisha uhai ulionyakuliwa kutoka katika taya za mharibifu, kama Daudi alivyomnyakua mwana-kondoo kutoka kwa simba. Yamaanisha si mahali pa usalama, au pa kuondolewa katika kelele za vita na uwepo wa adui zetu, bali yamaanisha meza katikati ya adui zetu, kimbilio dhidi ya dhoruba, ngome katikati ya adui, uhai uliohifadhiwa mbele ya shinikizo la daima, uponyaji wa Paulo alipolemewa kupita kiasi hata akakata tamaa ya kuishi, msaada wa kimungu wa Paulo wakati mwiba ulipobaki, lakini nguvu ya Kristo ikamkalia na neema ya Kristo ikatosha.

Bwana, nipe uhai wangu uwe nyara, na mahali pagumu kabisa nisaidie leo kuwa mshindi.

Desemba 25

“Nawaletea habari njema” (Luka 2:10).

Roho ya Krismasi yapaswa kuwa roho ya utu wa kibinadamu. Kando ya fundisho lile zuri la Hori, Utoto, na mtoto mdogo mnyenyekevu, ni moyo gani wa Kikristo uwezao kamwe kutaka kuwa na kiburi? Ni roho ya furaha. Ni haki kwamba hizi ziwe habari njema, kwa maana, “Tazama, nawaletea habari njema ya furaha kuu itakayokuwa kwa watu wote.”

Ni roho ya upendo. Yapaswa kuwa furaha itokayo katika kuwapa wengine furaha. Jambo kuu la Krismasi ni Kristo aliyetupenda, akaja kuishi kati yetu na kufa kwa ajili yetu, na yeye au yule aishiye kwa ajili yake mwenyewe peke yake hana haki ya kushiriki furaha zake.

Upendo daima ni wa kidhabihu, na hivyo roho ya Krismasi itatuita kwenye kujisalimisha kwa furaha na kwa ukamilifu, kwanza kwa Mungu, kisha dhabihu ya furaha ya kile tukiitacho chetu wenyewe kwa utukufu wake na wema wa wengine.

Roho ya Krismasi ni roho ya ibada. Huwakuta Mamajusi penye miguu yake wakiwa na dhahabu na uvumba na manemane. Na itukute sisi pia hapo.

Roho ya Krismasi ni roho ya umisionari. Habari zake njema ni kwa ajili ya watu wote.

Desemba 26

“Roho akaaye ndani yetu hututamani hata kuona wivu” (Yakobo 4:5).

Fungu hili zuri limefasiriwa kwa masikitiko katika Tafsiri yetu Iliyorekebishwa: “Roho akaaye ndani yetu hututamani hata kuona wivu.” Yapaswa kuwa, “Roho akaaye ndani yetu hutupenda hata kuona wivu.” Ni mfano wa upendo uteswao kwa sababu ya kujali kwake sana kile kipendwacho.

Roho Mtakatifu ana shauku kubwa kiasi cha kutimiza ndani yetu na kwa ajili yetu mapenzi ya juu kabisa ya Mungu, na kupokea kutoka kwetu upendo wa kweli kabisa kwa Kristo, Mume wetu wa kimungu, hata huingiwa na wivu tunapomkatisha tamaa kwa namna yo yote, au kuugawa upendo wake na wengine.

Kwa hiyo, imenenwa katika fungu litangulialo, “Enyi wazinzi na wazinifu, hamjui ya kuwa urafiki wa dunia ni uadui na Mungu?”

Ee, je, tumhuzunishe Rafiki mwenye fadhili namna hii? Je, tumkatishe tamaa Mume mwenye upendo namna hii? Je, hatutamlaki Roho Mtakatifu mbarikiwa kwa upendo autuletao, na kutoa kwa kurudisha upendo wetu usiogawanyika na usio na mipaka?

Je, alipata kuwapo Bwana-arusi mwenye upendo namna hii akiutafuta moyo wetu ili auteke?

Desemba 27

“Akamtoa yule njiwa, wala hakumrudia tena” (Mwanzo 8:12).

Kwanza, twamwona njiwa akitoka katika safina, na kutopata mahali pa kupumzika juu ya ukiwa wa mwitu na uteleao wa dhambi na hukumu. Hii huwakilisha kipindi cha Agano la Kale, labda, wakati Roho Mtakatifu alipoutembelea ulimwengu huu wenye dhambi, lakini hakuweza kupata mahali pa kupumzika, akarudi kifuani kwa Mungu.

Pili, twamwona njiwa akitoka na kurudi na jani la mzeituni kinywani mwake, ishara na dhamana ya amani na upatanisho, alama kwamba hukumu imepita na amani ilikuwa ikirudi. Bila shaka hii yaweza kuwakilisha kwa uzuri hatua ifuatayo ya udhihirisho wa Roho Mtakatifu, akitoka katika huduma na mauti ya Yesu Kristo, kutangaza upatanisho kwa ulimwengu wenye dhambi.

Kuna hatua ya tatu, ambapo, hatimaye, njiwa hutoka katika safina na kutorudi tena; bali huufanya ulimwengu kuwa nyumba yake, na kujenga kiota chake kati ya makao ya wanadamu. Hii ndiyo hatua ya tatu na ya sasa ya kazi mbarikiwa ya Roho Mtakatifu. Na tumkaribishe Njiwa kwenye kiota mioyoni mwetu.

Desemba 28

“Roho Mtakatifu, ambaye Mungu amewapa watu wanaomtii” (Matendo 5:32).

Twaweza tu kujua na kuthibitisha utimilifu wa Roho tunapotoka nje na kuingia katika makusudi na mipango mikubwa zaidi ya Kristo kwa ajili ya ulimwengu.

Labda sababu kuu inayofanya Roho Mtakatifu awe amewekewa mpaka hivyo katika kazi yake mioyoni mwa Wakristo, ni ule uzembe wa aibu kwa ulimwengu usiookolewa na usiohubiriwa Injili kwa upande wa wingi wa wanaodai kuwa wafuasi wa Kristo. Kuna mamilioni ya wanaodai kuwa Wakristo—na, labda, Wakristo halisi—ulimwenguni, ambao hawajawahi kutoa hata fikira moja halisi, ya bidii, juu ya kuhubiriwa Injili kwa ulimwengu wa wapagani.

Mungu hatampa Roho Mtakatifu katika utimilifu wake kwa ajili ya kujifurahisha kwa ubinafsi kwa Mkristo ye yote. Nguvu yake ni dhamana kubwa, ambayo ni lazima tuitumie kwa faida ya wengine na kwa kuhubiriwa Injili kwa ulimwengu uliopotea na wenye dhambi. Hata watu wa Mungu watakapoamka kuelewa kusudi lake halisi la wokovu wa watu, Kanisa halitajua kamwe utimilifu wa Pentekoste yake. Nguvu aliyoahidi Mungu ni lazima ilale kando ya njia ya wajibu, na tunapoitii amri, tutaipokea ahadi yake katika utimilifu wake.

Bwana, nisaidie kuelewa mpango wako.

Desemba 29

“Sikujiepusha na kuwahubiria habari ya kusudi lote la Mungu” (Matendo 20:27).

Yamkini Mungu huruhusu kila binadamu, apitaye njia yetu, akutane nasi, ili tupate nafasi ya kuacha baraka fulani katika njia yake, na kudondosha moyoni na maishani mwake mvuto fulani utakaomsogeza karibu zaidi na Mungu. Ingekuwa baraka, kwa kweli, kama tungeweza kukutana na kila nafsi isiyokufa, mwishowe, ambayo tumepata kuigusa katika njia ya maisha, na kusema kwa kweli, “Mimi ni safi na damu ya watu wote.”

Mpendwa, je, ni hivyo? Mtumishi afanyaye kazi nyumbani mwako; mtu aliyeketi kando yako garini; kibarua aliyekufanyia kazi, na, zaidi ya yote, watu wa nyumbani na jamaa yako, mfanyakazi mwenzako dukani au kiwandani, je, umefanya bora wako kuwaongoza kwa Kristo?

Wakristo wa kwanza waliihesabu kila hali kuwa nafasi ya kumshuhudia Kristo. Hata walipoletwa mbele ya wafalme na maliwali, haikuwahi kuwajia kwamba wapaswa kujaribu kuwa huru, bali ujumbe wa Bwana kwao ulikuwa, “Itawageukia kuwa ushuhuda.” Ilikuwa ni fursa tu ya kuhubiri kwa wafalme na watawala, ambao vinginevyo wasingeweza kuwafikia.

Desemba 30

“Ili Mungu awatimizie kila haja njema ya wema wake, na kazi ya imani kwa nguvu” (2 Wathesalonike 1:11).

Mungu wetu anatafuta leo watu wa kigezo, na apatapo sampuli ya kweli, ni rahisi sana kuizalisha katika machapisho elfu, na kuizidisha katika maisha mengine bila kikomo.

Uzoefu wote wa maisha hutujia kama vipimo, na tunapovikabili, Baba yetu mwenye upendo hutuangalia kwa upendo mkali na wa wivu, ili kutuona tukishinda, na kama tukifeli hukatishwa tamaa sana, na adui yetu hujazwa furaha.

Sisi ni kioja cha kutazamwa daima na malaika na enzi, na kila hatua tuipigayo ni ya maamuzi na ya kuamua jambo fulani katika hatima yetu ya milele.

Ibrahimu alipotoka asubuhi ile kwenda Mlima Moria, ilikuwa saa ya jaribu la dhati, na aliporudi alikuwa mmoja wa watu wa Mungu waliojaribiwa, akiwa na chapa ya kibali chake cha milele. Mungu aliweza kusema, “Namjua yeye, ya kwamba atawaamuru watoto wake na wamfuatao, watunze njia ya Bwana, wafanye haki na hukumu; ili Bwana amletee Ibrahimu hayo aliyomwambia.”

Mungu anatafuta watu kama hao leo. Bwana, nisaidie kuwa mtu wa namna hiyo.

Desemba 31

“Siombi kwamba uwatoe katika ulimwengu, bali uwalinde na yule mwovu” (Yohana 17:15).

Anatutaka hapa kwa kusudi fulani la juu zaidi kuliko kuwako tu. Kusudi hilo si jingine ila kumwakilisha yeye kwa ulimwengu, kuwa wajumbe wa Injili yake na mapenzi yake kwa wanadamu, na kwa maisha yetu kuwaonyesha uhai wa kweli, na kuwafundisha jinsi ya kuuishi wenyewe.

Yeye anatuwakilisha kule, na kazi yetu moja ni kumwakilisha yeye hapa. Tumetumwa katika ulimwengu huu kumwakilisha kwa hakika kama vile tungekuwa tumekwenda China kama balozi wa Serikali ya Marekani.

Tunaposhughulika na mambo ya kawaida ya maisha, ni ili tu tupate kumwakilisha yeye humo, kuendeleza biashara yake, na kuwa na njia za kutumia kwa mambo yake. Alikuja hapa kutoka ulimwengu mwingine, na kwa ujumbe wa pekee, na kazi yake ilipokwisha aliitwa kwenda nyumbani kwa makao ya Baba yake na yake mwenyewe.

Bwana, nisaidie kukuwakilisha ipasavyo.

Na tuchukue muziki mioyoni mwetu Kupitia mtaa wenye shughuli na soko lenye ugomvi; Tukifanya kazi yetu ya kila siku kwa miguu yenye shughuli zaidi, Kwa sababu nafsi zetu hurudia wimbo wa mbinguni.