Kutengwa kwa ajili ya Roho Mtakatifu

KUTENGWA KWA ROHO MTAKATIFU

“Basi katika kanisa lililokuwako Antiokia palikuwa na manabii na waalimu; kama vile Barnaba, na Simeoni aitwaye Nigeri, na Lukio wa Kirene, na Manaeni . . . na Sauli.

“Nao walipokuwa wakimfanyia Bwana ibada na kufunga, Roho Mtakatifu akasema, Nitengeeni Barnaba na Sauli kwa kazi ile niliyowaitia.

“Basi walipokwisha kufunga na kuomba, na kuweka mikono yao juu yao, wakawaacha waende zao. Hivyo hawa, wakiisha kupelekwa na Roho Mtakatifu, wakatelemkia Seleukia” (Matendo 13:1-4).

Katika habari ya andiko letu tutapata mawazo ya thamani yatakayotuongoza kuhusu jambo ambalo Mungu angependa kutoka kwetu, na jambo ambalo Mungu angetutendea. Somo kuu la mistari iliyonukuliwa ni hili: Roho Mtakatifu ndiye mwongozi wa kazi ya Mungu duniani. Na jambo tunalopaswa kufanya, kama tutamtumikia Mungu kwa haki, na kama Mungu atabariki kazi yetu, ni kuhakikisha kwamba tunasimama katika uhusiano sahihi na Roho Mtakatifu, kwamba kila siku tunampa nafasi ya heshima impasayo, na kwamba katika kazi yetu yote na (zaidi ya hayo) katika maisha yetu yote ya ndani ya faragha, Roho Mtakatifu daima awe na nafasi ya kwanza. Niwaonyeshe baadhi ya mawazo ya thamani ambayo andiko letu linadokeza.

Kwanza kabisa, twaona kwamba Mungu ana mipango yake mwenyewe kuhusu ufalme wake.

Kanisa lake huko Antiokia lilikuwa limekwisha kuanzishwa. Mungu alikuwa na mipango na makusudi fulani kuhusu Asia, na kuhusu Ulaya. Alikuwa ameyabuni; yalikuwa yake, naye akayajulisha kwa watumishi wake.

Jemadari wetu mkuu hupanga kila vita, na majenerali wake na maofisa wake hawaijui sikuzote mipango mikuu. Mara nyingi hupokea amri zilizotiwa muhuri, na wanapaswa kumngoja yeye kwa yale awapayo kama amri. Mungu aliye Mbinguni ana matakwa, na mapenzi, kuhusu kila kazi ipasayo kufanywa, na kuhusu jinsi inavyopaswa kufanywa. Heri mtu aingiaye katika siri za Mungu na kufanya kazi chini ya Mungu.

Miaka kadhaa iliyopita, huko Wellington, Afrika Kusini, ninakoishi, tulifungua Chuo cha Umisionari—jengo linalohesabiwa huko kuwa kubwa na zuri. Katika ibada zetu za ufunguzi mkuu wa chuo alisema jambo ambalo sijawahi kulisahau. Alieleza:

“Mwaka uliopita tulikusanyika hapa kuweka jiwe la msingi, na wakati ule kulikuwa na nini cha kuonekana? Hakuna ila takataka, na mawe, na matofali, na magofu ya jengo la zamani lililokuwa limebomolewa. Hapo tuliweka jiwe la msingi, na ni wachache sana waliojua jengo lililotarajiwa kuinuka lingekuwaje. Hakuna aliyelijua kikamilifu kwa kila undani ila mtu mmoja, yule mbunifu wa ujenzi. Akilini mwake yote yalikuwa dhahiri, na wakati mkandarasi na mwashi na seremala walipofika kazini kwao walipokea amri kutoka kwake, na mfanyakazi wa hali ya chini kabisa ilimpasa kutii amri, na jengo likainuka, na jengo hili zuri limekamilika. Na vivyo hivyo,” akaongeza, “jengo hili tunalolifungua leo si kitu ila kuweka msingi wa kazi ambayo Mungu peke yake ndiye ajuaye itakavyokuwa.”

Lakini Mungu ana watumishi wake na mipango yake iliyochorwa waziwazi, na nafasi yetu ni kungoja, ili Mungu atujulishe kadiri ya mapenzi yake kama inavyohitajika kila wakati.

Yatupasa tu kuwa waaminifu katika utii, tukitekeleza amri zake. Mungu ana mpango kwa ajili ya Kanisa lake duniani. Lakini, ole! mara nyingi mno sisi hutunga mpango wetu wenyewe, nasi hudhani kwamba twajua yapasayo kufanywa. Twamwomba Mungu kwanza abariki jitihada zetu dhaifu, badala ya kukataa kabisa kwenda isipokuwa Mungu atutangulie. Mungu ameipangia kazi na kuenea kwa ufalme wake. Roho Mtakatifu amekabidhiwa kazi hiyo. “Kazi ile niliyowaitia.” Basi, Mungu na atusaidie sote tuogope kuligusa “sanduku la Mungu” isipokuwa tunapoongozwa na Roho Mtakatifu.

Kisha wazo la pili —Mungu yu radhi na aweza kuwafunulia watumishi wake mapenzi yake ni nini.

Naam, Mungu na ahimidiwe, ujumbe bado unashuka kutoka Mbinguni! Kama tusomavyo hapa yale Roho Mtakatifu aliyoyasema, ndivyo Roho Mtakatifu atakavyolisema bado Kanisa lake na watu wake. Katika siku hizi za mwisho amekwisha kufanya hivyo mara nyingi. Amewajia watu mmoja mmoja, na kwa mafundisho yake ya kimungu amewaongoza kutoka nje kwenye mashamba ya kazi ambayo wengine hawakuweza mwanzoni kuyaelewa wala kuyakubali, katika njia na mbinu ambazo hazikujipendekeza kwa walio wengi. Lakini Roho Mtakatifu bado katika wakati wetu huwafundisha watu wake. Ahimidiwe Mungu, katika vyama vyetu vya umisionari wa nchi za nje na katika misheni zetu za nyumbani, na katika namna elfu za kazi, uongozi wa Roho Mtakatifu unajulikana, lakini (nadhani sote tu tayari kukiri) unajulikana kidogo mno. Hatujajifunza vya kutosha kumngoja yeye, na hivyo yatupasa kutoa tangazo zito mbele za Mungu: Ee Mungu, twataka kukungoja zaidi utuonyeshe Mapenzi yako.

Usimwombe Mungu nguvu tu. Mkristo mwingi ana mpango wake mwenyewe wa kufanya kazi, lakini Mungu ndiye lazima apeleke nguvu. Mtu hufanya kazi kwa mapenzi yake mwenyewe, na Mungu ndiye lazima atoe neema—sababu pekee inayomfanya Mungu mara nyingi kutoa neema kidogo sana na mafanikio kidogo sana. Lakini sote na tuchukue nafasi yetu mbele za Mungu na kusema:

“Lifanyalo katika mapenzi ya Mungu, nguvu za Mungu hazitazuiliwa kwalo; lifanyalo katika mapenzi ya Mungu sharti liwe na baraka kuu ya Mungu.”

Basi shauku yetu ya kwanza na iwe kufunuliwa mapenzi ya Mungu.

Kama utaniuliza, Je! ni jambo rahisi kupata ujumbe huu kutoka Mbinguni, na kuuelewa? Naweza kukupa jibu. Ni rahisi kwao walio katika ushirika sahihi na Mbingu, na waelewao ustadi wa kumngoja Mungu katika maombi.

Mara ngapi twauliza: Mtu awezaje kuyajua mapenzi ya Mungu? Nao watu hutaka, wanapokuwa katika mashaka, kuomba kwa bidii sana ili Mungu awajibu mara moja. Lakini Mungu aweza kuyafunua mapenzi yake tu kwa moyo ulio mnyenyekevu na mpole na mtupu. Mungu aweza kuyafunua mapenzi yake katika mashaka na magumu ya pekee tu kwa moyo uliojifunza kumtii na kumheshimu kwa uaminifu katika mambo madogo na katika maisha ya kila siku.

Hilo lanileta kwenye wazo la tatu—Angalia hali ya moyo ambao kwao Roho huyafunua mapenzi ya Mungu.

Twasoma nini hapa? Palikuwa na watu kadhaa waliokuwa wakimfanyia Bwana ibada na kufunga, na Roho Mtakatifu akaja akasema nao. Watu wengine huelewa fungu hili kama vile ambavyo wangelielewa kwa habari ya kamati ya umisionari ya siku zetu. Twaona kuna shamba lililo wazi, nasi tumekwisha kuwa na misheni zetu katika mashamba mengine, nasi twakwenda kuingia katika shamba lile. Kwa hakika tumekwisha kuliamua hilo, nasi twaliombea. Lakini hali ilikuwa tofauti sana katika siku zile za kale. Nina shaka kama yeyote miongoni mwao aliifikiria Ulaya, kwani baadaye hata Paulo mwenyewe alijaribu kurudi Asia, hata maono ya usiku yalipomwita kwa mapenzi ya Mungu. Watazame watu wale. Mungu alikuwa amefanya maajabu. Alikuwa amelipanua Kanisa hata Antiokia, naye alikuwa ametoa baraka tele na kubwa. Basi, hapa walikuwa watu hawa wakimfanyia Bwana ibada, wakimtumikia kwa maombi na kufunga. Waina imani gani iliyo na kina—“Yote sharti yaje moja kwa moja kutoka Mbinguni. Tu katika ushirika na Bwana aliyefufuka; sharti tuwe na muungano wa karibu naye, na kwa namna fulani atatujulisha atakalo.” Nao walikuwako hapo, watupu, wasio na maarifa, wasio na msaada, wenye furaha na shangwe, lakini wamenyenyekea sana.

“Ee Bwana,” waonekana kusema, “sisi tu watumishi wako, na katika kufunga na kuomba twakungoja wewe. Mapenzi yako kwetu ni nini?”

Je! haikuwa hivyo hivyo kwa Petro? Alikuwa juu ya dari ya nyumba, akifunga na kuomba, wala hakufikiri hata kidogo juu ya maono na amri ya kwenda Kaisaria. Hakujua kazi yake ingekuwa nini.

Ni katika mioyo iliyojisalimisha kabisa kwa Bwana Yesu, katika mioyo ijitengayo na ulimwengu, na hata na mazoezi ya kawaida ya kidini, na kujitoa katika maombi makali ili kumtazama Bwana wao—ni katika mioyo kama hiyo ambamo mapenzi ya mbinguni ya Mungu yatadhihirishwa.

Wajua ya kwamba neno lile kufunga latokea mara ya pili (katika mstari wa tatu): “Walifunga na kuomba.” Uombapo, wapenda kuingia chumbani mwako cha faragha, kwa mujibu wa amri ya Yesu, na kufunga mlango. Wafunga nje shughuli na wenzako na anasa na kila kitu kiwezacho kukuvuta akili, nawe wataka kuwa peke yako na Mungu. Lakini kwa namna moja hata ulimwengu wa vitu unakufuata huko. Sharti ule chakula. Watu hawa walitaka kujifungia nje ya mvuto wa vitu na vinavyoonekana, nao wakafunga. Walichokula kilikuwa cha kutosha tu kukidhi mahitaji ya asili, na katika ukali wa nafsi zao walidhani kuonyesha kuachilia kwao kila kitu duniani katika kufunga kwao mbele za Mungu. Oh, Mungu na atupe ukali huo wa shauku, kujitenga huko na kila kitu, kwa sababu twataka kumngoja Mungu, ili Roho Mtakatifu atufunulie mapenzi ya Mungu yaliyobarikiwa.

Wazo la nne —Ni yapi sasa mapenzi ya Mungu kama Roho Mtakatifu ayafunuavyo? Yamo katika kifungu kimoja: Kutengwa kwa ajili ya Roho Mtakatifu. Hiyo ndiyo dhamira kuu ya ujumbe utokao Mbinguni.

“Nitengeeni Barnaba na Sauli kwa kazi ile niliyowaitia. Kazi ni yangu, nami naijali, nami nimewachagua watu hawa na kuwaita, nami nataka ninyi mnaowakilisha Kanisa la Kristo duniani mniwatenge kwa ajili yangu.”

Uangalie ujumbe huu wa mbinguni katika sura zake mbili. Watu hao walipaswa kutengwa kwa ajili ya Roho Mtakatifu, na Kanisa lilipaswa kuifanya kazi hii ya kutenga. Roho Mtakatifu angeweza kuwaamini watu hawa kuifanya kwa roho iliyo sahihi. Hapo walikuwa wakikaa katika ushirika na yaliyo ya mbinguni, na Roho Mtakatifu angeweza kuwaambia, “Fanyeni kazi ya kuwatenga watu hawa.” Nao hawa walikuwa watu ambao Roho Mtakatifu alikuwa amewaandaa, naye angeweza kusema juu yao, “Na watengwe kwa ajili yangu.”

Hapa twafika kwenye shina lenyewe, kwenye uhai wenyewe wa hitaji la watumishi wa Kikristo. Swali ni: Ni nini kinachohitajika ili nguvu za Mungu zikae juu yetu kwa uweza zaidi, ili baraka ya Mungu imwagwe kwa wingi zaidi miongoni mwa watu hao maskini, wenye taabu na wenye dhambi wanaoangamia ambao twafanya kazi miongoni mwao? Na jibu litokalo Mbinguni ni:

“Nataka watu waliotengwa kwa ajili ya Roho Mtakatifu.”

Hilo lamaanisha nini? Wajua ya kwamba kuna roho mbili duniani. Kristo alisema, aliponena juu ya Roho Mtakatifu: “Ulimwengu hauwezi kumpokea” (Yohana 14:17). Paulo alisema: “Hatukuipokea roho ya dunia, bali Roho itokayo kwake” (1 Wakorintho 2:12). Hilo ndilo hitaji kuu katika kila mtumishi—roho ya ulimwengu kutoka nje, na Roho wa Mungu kuingia ndani ili kuumiliki uhai wa ndani na nafsi nzima.

Nina hakika wako watumishi ambao mara nyingi humlilia Mungu ili Roho Mtakatifu awajilie kama Roho wa nguvu kwa ajili ya kazi yao, na wanapohisi kiasi kile cha nguvu, na kupata baraka, humshukuru Mungu kwalo. Lakini Mungu ataka kitu zaidi na kitu cha juu zaidi. Mungu ataka tumtafute Roho Mtakatifu kama Roho wa nguvu ndani ya moyo wetu wenyewe na maisha yetu, ili kuushinda ubinafsi na kuitupa nje dhambi, na kuufanya mfano wa Yesu uliobarikiwa na mzuri ndani yetu.

Kuna tofauti kati ya nguvu za Roho kama karama, na nguvu za Roho kwa ajili ya neema ya maisha matakatifu. Mtu aweza mara nyingi kuwa na kiasi cha nguvu za Roho, lakini kama hakuna kiasi kikubwa cha Roho kama Roho wa neema na utakatifu, kasoro itadhihirika katika kazi yake. Aweza kufanywa njia ya kuongoa watu, lakini kamwe hatawasaidia watu kufikia kiwango cha juu zaidi cha maisha ya kiroho, na atakapoondoka, sehemu kubwa ya kazi yake yaweza kuondoka pia. Lakini mtu aliyetengwa kwa ajili ya Roho Mtakatifu ni mtu aliyejitoa kusema:

“Baba, Roho Mtakatifu na awe na mamlaka kamili juu yangu, nyumbani mwangu, katika tabia yangu, katika kila neno la ulimi wangu, katika kila wazo la moyo wangu, katika kila hisia kwa wenzangu; Roho Mtakatifu na awe na umiliki kamili.”

Je! hilo ndilo limekuwa shauku na agano la moyo wako na Mungu wako—kuwa mwanamume au mwanamke aliyetengwa na kujitoa kwa ajili ya Roho Mtakatifu? Nakusihi usikilize sauti ya Mbinguni. “Nitengeeni,” akasema Roho Mtakatifu. Naam, kutengwa kwa ajili ya Roho Mtakatifu. Mungu na akubali kwamba Neno liingie hata vilindini kabisa vya nafsi zetu ili kutuchunguza, na kama tukigundua kwamba hatujatoka katika ulimwengu kabisa, kama Mungu akitufunulia kwamba maisha ya nafsi, mapenzi ya nafsi, kujitukuza kwa nafsi vimo, na tujinyenyekeze mbele zake.

Mwanamume, mwanamke, ndugu, dada, wewe ni mtumishi uliyetengwa kwa ajili ya Roho Mtakatifu. Je! hilo ni kweli? Je! hiyo imekuwa shauku yako? Je! hicho ndicho kujisalimisha kwako? Je! hilo ndilo ulilolitarajia kwa njia ya imani katika nguvu za Bwana wetu Yesu aliyefufuka na mwenye uwezo wote? Kama sivyo, huu hapa ndio mwito wa imani, na huu hapa ndio ufunguo wa baraka—kutengwa kwa ajili ya Roho Mtakatifu. Mungu na aliandike neno hilo mioyoni mwetu!

Nilisema Roho Mtakatifu alilinena lile kanisa kama kanisa lililo na uwezo wa kufanya kazi hiyo. Roho Mtakatifu aliliamini. Mungu na akubali kwamba makanisa yetu, vyama vyetu vya umisionari, na vyama vya watumishi wetu, kwamba wakurugenzi wetu wote na mabaraza na kamati waweze kuwa wanaume na wanawake walio wanaofaa kwa kazi ya kuwatenga watumishi kwa ajili ya Roho Mtakatifu. Twaweza kumwomba Mungu hilo pia.

Kisha huja wazo langu la tano, nalo ni hili—Ushirika huu mtakatifu na Roho Mtakatifu katika kazi hii huwa jambo la utambuzi na la tendo.

Watu hawa, walifanya nini? Waliwatenga Paulo na Barnaba, kisha imeandikwa juu ya hao wawili kwamba wao, wakiisha kupelekwa na Roho Mtakatifu, wakatelemkia Seleukia. Oh, ushirika ulioje! Roho Mtakatifu aliye Mbinguni akifanya sehemu ya kazi, watu duniani wakifanya sehemu nyingine. Baada ya kuwekwa wakfu kwa watu hao duniani, imeandikwa katika Neno la Mungu lililovuviwa kwamba walipelekwa na Roho Mtakatifu.

Nawe ona jinsi ushirika huu uitavyo maombi mapya na kufunga. Kwa muda fulani walikuwa wakimfanyia Bwana ibada na kufunga, labda kwa siku kadhaa; na Roho Mtakatifu ananena, nao wanapaswa kuifanya kazi na kuingia katika ushirika, na mara moja wanakusanyika pamoja kwa maombi zaidi na kufunga. Hiyo ndiyo roho ambamo wanaitii amri ya Bwana wao. Na hilo latufundisha kwamba si mwanzoni tu mwa kazi yetu ya Kikristo, bali njia yote twahitaji kuwa na nguvu zetu katika maombi. Kama liko wazo moja kuhusu Kanisa la Kristo, ambalo nyakati fulani hunijia na huzuni nyingi kunilemea; kama liko wazo moja kuhusu maisha yangu mwenyewe ambalo naliionea aibu; kama liko wazo moja ambalo nahisi Kanisa la Kristo halijalikubali wala kulishika; kama liko wazo moja linalonifanya nimwombe Mungu: “Oh, tufundishe kwa neema yako, mambo mapya”—ni ile nguvu ya ajabu ambayo maombi yamekusudiwa kuwa nayo katika ufalme. Tumejinufaisha nayo kidogo mno.

Sote tumesoma maneno ya Mkristo katika kitabu kikuu cha Bunyan, alipogundua kwamba alikuwa na ufunguo kifuani mwake uliopaswa kufungua gereza. Sisi tunao ufunguo uwezao kufungua gereza la kutokuamini Mungu na la ukafiri. Lakini, oh! sisi tumeshughulika zaidi sana na kazi yetu kuliko tulivyoshughulika na maombi. Twaamini zaidi katika kunena na watu kuliko tuaminivyo katika kunena na Mungu. Jifunzeni kutoka kwa watu hawa kwamba kazi ambayo Roho Mtakatifu aiamuru sharti ituite kwenye kufunga na kuomba kupya, kwenye kujitenga kupya na roho na anasa za ulimwengu, kwenye kujiweka wakfu kupya kwa Mungu na kwa ushirika wake. Watu wale walijitoa kwa kufunga na kuomba, na kama katika kazi yetu yote ya kawaida ya Kikristo kungekuwa na maombi zaidi, kungekuwa na baraka zaidi katika maisha yetu wenyewe ya ndani. Kama tungehisi na kuthibitisha na kuushuhudia ulimwengu kwamba nguvu yetu pekee ilikuwa katika kudumu kila dakika katika mguso na Kristo, kila dakika tukimruhusu Mungu afanye kazi ndani yetu—kama hiyo ingekuwa roho yetu, je! kwa neema ya Mungu, maisha yetu yasingekuwa matakatifu zaidi? Je! yasingekuwa yenye matunda kwa wingi zaidi?

Sijui onyo zito zaidi katika Neno la Mungu kuliko lile tulipatalo katika sura ya tatu ya Wagalatia, ambapo Paulo aliuliza:

“Mkiisha kuanza katika Roho, mwakamilishwa sasa katika mwili?” (Wagalatia 3:3).

Je! wafahamu maana yake? Hatari ya kutisha katika kazi ya Kikristo, kama vile katika maisha ya Kikristo yanayoanzwa kwa maombi mengi, yaliyoanzwa katika Roho Mtakatifu, ni kwamba yaweza taratibu kugeuzwa na kuwekwa kwenye njia za mwili; na neno huja: “Mkiisha kuanza katika Roho, mwakamilishwa sasa katika mwili?” Katika wakati wa mashaka yetu ya kwanza na kukosa msaada tulimwomba Mungu sana, naye Mungu akajibu na Mungu akabariki, na shirika letu likakamilika, na kundi letu la watumishi likawa kubwa; lakini taratibu shirika na kazi na haraka vimetumiliki hata kiasi kwamba nguvu za Roho, ambazo kwazo tulianza tulipokuwa kikundi kidogo, karibu zimepotea. Oh, nakusihi, liangalie vyema! Ni kwa maombi mapya na kufunga, kwa maombi zaidi na kufunga, ndipo kikundi hiki cha wanafunzi kilipotekeleza amri ya Roho Mtakatifu, “Ee nafsi yangu, umngoje Mungu peke yake.” Hiyo ndiyo kazi yetu iliyo ya juu na ya maana zaidi. Roho Mtakatifu huja kama jibu la maombi ya kuamini.

Wajua Yesu aliyetukuzwa alipokuwa amepaa hata kwenye kiti cha enzi, kwa siku kumi kile kiti cha kuwekea miguu cha enzi kilikuwa mahali ambapo wanafunzi wake waliokuwa wakingoja walimlilia. Na hiyo ndiyo sheria ya ufalme—Mfalme juu ya kiti cha enzi, watumishi juu ya kiti cha kuwekea miguu. Mungu na atukute hapo bila kukoma!

Kisha huja wazo la mwisho —Baraka ya ajabu ilioje ijayo Roho Mtakatifu anaporuhusiwa kuiongoza na kuielekeza kazi, na inapoendeshwa kwa utii kwake!

Waijua habari ya utume ambao Barnaba na Sauli walipelekwa. Wajua kulikuwa na nguvu gani pamoja nao. Roho Mtakatifu aliwatuma, nao wakaendelea mahali hata mahali kwa baraka kubwa. Roho Mtakatifu alikuwa kiongozi wao mbele zaidi. Wakumbuka jinsi ilivyokuwa kwa Roho ndipo Paulo alipozuiwa asiende tena Asia, na akaongozwa mbali hata Ulaya. Oh, baraka iliyokaa juu ya kikundi kile kidogo cha watu, na juu ya utumishi wao kwa Bwana!

Nakusihi, na tujifunze kuamini kwamba Mungu ana baraka kwa ajili yetu. Roho Mtakatifu, ambaye Mungu ameiweka kazi mikononi mwake, ameitwa “mtekelezaji wa Utatu Mtakatifu.” Roho Mtakatifu hana nguvu tu, bali ana Roho wa upendo. Anautamani ulimwengu huu wa giza na kila uwanja wa kazi ndani yake, naye yu radhi kubariki. Na kwa nini hakuna baraka zaidi? Hakuwezi kuwa na jibu ila moja tu. Hatujamheshimu Roho Mtakatifu kama tulivyopaswa kufanya. Je! yuko yeyote awezaye kusema kwamba hilo si kweli? Je! si kila moyo wenye fikira uko tayari kulia: “Mungu nisamehe kwamba sikumheshimu Roho Mtakatifu kama nilivyopaswa kufanya, kwamba nimemhuzunisha, kwamba nimeuruhusu ubinafsi na mwili na mapenzi yangu mwenyewe kutenda kazi pale ambapo Roho Mtakatifu alipaswa kuheshimiwa! Mungu na anisamehe kwamba nimeuruhusu ubinafsi na mwili na mapenzi kwa kweli kuwa na nafasi ile ambayo Mungu alitaka Roho Mtakatifu awe nayo.”

Oh, dhambi ni kubwa kuliko tujuavyo! Si ajabu kwamba kuna udhaifu na kushindwa kwingi hivyo katika Kanisa la Kristo!