Neno kwa Wahubiri

Kama wote wanaofanya kazi ya kuziteka nafsi wangetafuta kuzishinda kwa moyo, wakiziongoza kwanza kabisa kwenye maombi na kwenye maisha ya ndani, wangeona uongofu mwingi na wa kudumu. Lakini maadamu wanajishughulisha na mambo ya nje tu, na badala ya kuwavuta watu kwa Kristo kwa kuijaza mioyo yao Naye, wanawapa tu maagizo elfu ya kushika mambo ya nje, wataona matunda machache tu, nayo hayatakuwa ya kudumu.

Mara moyo unaposhindwa, dosari nyingine hurekebishwa kwa urahisi. Ndiyo sababu Mungu huutaka moyo hasa. Kwa njia hii peke yake ndipo ungezuiliwa ulevi, kufuru, uasherati, uadui, na wizi vinavyoenea ulimwenguni. Yesu Kristo angetawala kila mahali, na Kanisa kila pahali lingehuishwa.

Uongo huimiliki nafsi tu pale imani na maombi vinapokosekana. Kama watu wangeweza kufundishwa kuamini kwa unyofu na kuomba, badala ya kubishana wao kwa wao, wangeongozwa kwa upole kwa Kristo.

Ee, jinsi hasara ilivyo isiyopimika ya wale wanaoyapuuza maisha ya ndani! Ee, ni hesabu gani watakayopaswa kumtolea Mungu wale walio na uangalizi wa nafsi, kwa kutokuwafunulia hazina hii iliyofichika wale wote wanaowatumikia katika huduma ya Neno!

Udhuru unaotolewa ni kwamba kuna hatari katika njia hii, au kwamba watu wasio na maarifa hawawezi kuyapokea mambo ya kiroho. Kauli ya kweli inatuhakikishia kwamba Mungu ameyaficha mambo haya kwa wenye hekima na busara, naye amewafunulia watoto wachanga. Nayo kunaweza kuwa na hatari gani katika kuiendea njia ya kweli pekee, ambayo ni Yesu Kristo, katika kujitoa Kwake, tukimtazama Yeye daima, tukiweka tumaini letu lote katika neema Yake, na kuelekea, kwa nguvu zote za nafsi zetu, kwenye upendo Wake safi?

Mbali na wanyofu kuwa hawawezi ukamilifu huu, wao ndio wanaofaa zaidi kwa ajili yake, kwa sababu ni watiifu zaidi, wanyenyekevu zaidi, na wasio na hatia zaidi; na kwa kuwa hawabishani kwa hoja, hawang’ang’anii sana nuru yao wenyewe. Kwa kuwa hawana elimu, hujiacha kwa urahisi zaidi waongozwe na Roho wa Mungu: hali wengine walio vipofu katika kujitosheleza kwao wenyewe huupinga uvuvio wa Mungu.

Mungu anatuambia pia kwamba ni kwa wanyofu ampatia ufahamu kwa kuingia kwa Neno Lake (Zaburi 119:130). “Ushuhuda wa Bwana ni amini, huwatia hekima wanyofu” (Zaburi 19:7). “Bwana huwahifadhi wanyofu; nilikuwa nimedhoofika, naye akaniokoa” (Zaburi 116:6).

Enyi mlio na uangalizi wa nafsi! Angalieni msiwazuie wadogo wasimwendee Kristo. Maneno Yake kwa wanafunzi Wake yalikuwa, “Waacheni watoto wadogo waje Kwangu, wala msiwazuie; kwa maana walio mfano wa hawa ufalme wa Mungu ni wao” (Luka 18:16). Yesu alilisema hili kwa wanafunzi Wake tu, kwa sababu walitaka kuwaweka watoto mbali Naye. Mara nyingi dawa hutiwa mwilini, hali ugonjwa upo moyoni. Sababu ya kufaulu kwetu kidogo hivyo katika kutafuta kuwarekebisha watu, ni kwamba tunaelekeza juhudi zetu upande wa nje, na yote tuwezayo kufanya huko hupita upesi. Lakini kama tungewapa kwanza ufunguo wa ndani, upande wa nje ungerekebishwa mara moja kwa wepesi wa asili.

Nalo hili ni rahisi sana. Kuwafundisha kumtafuta Mungu moyoni mwao, kumfikiria Yeye, kumrudia Yeye wanapojiona wamegeuka kando, kufanya yote na kuvumilia yote kwa ajili ya kumpendeza Yeye—hii ni kuwaelekeza kwenye chemchemi ya neema yote, na kuwafanya wapate humo yote yanayohitajika kwa utakaso wao. Enyi mnaozitumikia nafsi! Nawasihi muwaweke kwanza kabisa katika njia hii, ambayo ni Yesu Kristo; naye ni Yeye anayewasihi mfanye hivi kwa damu aliyoimwaga kwa ajili ya nafsi anazowakabidhi mzitunze. “Iambieni Yerusalemu maneno ya kuufariji moyo wake” (Isaya 40:2). Enyi wagawanyaji wa neema Yake, wahubiri wa Neno Lake, wahudumu wa sakramenti! Uwekeni ufalme Wake; na, ili kuuweka kweli, ufanyeni utawale juu ya MIOYO. Kwa maana kwa vile ni moyo peke yake uwezao kuupinga utawala Wake, ni kwa kuutiisha moyo ndipo enzi Yake huheshimiwa zaidi. Ole! Twatafuta kufanya maombi yaliyotungwa kwa ustadi; na kwa kutaka kuyapanga kupita kiasi, twayafanya yasiwezekane. Tumewatenga watoto na Baba aliye bora kuliko wote, kwa kutafuta kuwafundisha lugha iliyonolewa. Nendeni, enyi watoto maskini, mzungumze na Baba yenu wa Mbinguni kwa lugha yenu ya asili: hata iwe mbichi kiasi gani, kwake Yeye si hivyo. Baba hupenda zaidi maneno yaliyovurugwa na upendo na heshima, kwa sababu huona kwamba yanatoka moyoni: ni bora kwake kuliko hotuba kavu, ya bure na isiyozaa matunda ijapokuwa imetungwa vizuri. Ee, jinsi mitazamo fulani ya upendo inavyomvutia na kumteka! Inaeleza mengi zaidi kupita lugha na akili zote. Kwa kutaka kufundisha jinsi ya kumpenda Upendo Mwenyewe kwa mbinu, mengi ya upendo huu yamepotea. Ee! Si lazima kufundisha ustadi wa kupenda. Lugha ya upendo ni ushenzi kwa yule asiyependa; nasi hatuwezi kujifunza kumpenda Mungu vizuri zaidi ila kwa kumpenda Yeye. Roho wa Mungu hahitaji mipango yetu; huwachukua wachungaji apendavyo ili kuwafanya manabii; na, mbali na kuufunga ukumbi wa maombi kwa yeyote, kama inavyodhaniwa, huiacha milango wazi kwa wote, na Hekima imeamriwa kupaza sauti katika viwanja vya watu, “Kila aliye mjinga na ageukie huku; naye aliyepungukiwa na akili, humwambia, Njoo, ule chakula changu, unywe divai niliyoichanganya” (Mithali 9:4, 5). Je, Kristo hakumshukuru Baba Yake kwa kuwa aliyaficha mambo haya kwa wenye hekima na busara, naye aliyafunua kwa watoto wachanga? (Mathayo 11:25.)