የጸጋ መንገድ

«ሰላም ሳይኖር፦ ሰላም፥ ሰላም እያሉ የሕዝቤን ሴት ልጅ ስብራት በቀላሉ ፈወሱ።»

እግዚአብሔር ለአንድ ሕዝብ ወይም ወገን ታማኞች፣ ቅኖችና ትክክለኞች አገልጋዮችን ከመስጠት የሚበልጥ በረከት ሊልክለት እንደማይችል ሁሉ፣ እንዲሁ እግዚአብሔር በዚህ ዓለም በአንድ ሕዝብ ላይ ሊያመጣ የሚችለው ታላቁ መርገም ለዕውሮች፣ ዳግመኛ ላልተወለዱ፣ ለሥጋውያን፣ ለለብታሞችና ለማያውቁ መሪዎች አሳልፎ መስጠቱ ነው። ሆኖም በዘመናት ሁሉ የበግ ለምድ የለበሱ ብዙ ተኵላዎች እንደ ነበሩ፣ ግድግዳውን ባልተለወሰ ጭቃ የሚመርጉ ብዙዎች እንደ ነበሩ፣ እግዚአብሔር ከፈቀደው በላይ የሚያለሰልስ ነገር የሚተነብዩ እንደ ነበሩ እናገኛለን። ቀድሞ እንደ ነበረ ዛሬም እንዲሁ ነው፤ የእግዚአብሔርን ቃል የሚያረክሱና በተንኰል የሚይዙት ብዙዎች አሉ። ይህ በተለይ በነቢዩ በኤርምያስ ዘመን እንዲሁ ነበረ፤ እርሱም ለጌታው ታማኝ ሆኖ፣ ለላከው ለዚያ አምላክ ታማኝ ሆኖ፣ በየጊዜው በእነርሱ ላይ አፉን ከመክፈትና በስሙ ይናገርለት ለነበረው ለዚያ አምላክ ክብር የተከበረ ምስክርነት ከመስጠት ወደ ኋላ አላለም። ይህን ትንቢት ብታነቡ፣ እንደ ኤርምያስ እንዲህ ባሉ አገልጋዮች ላይ አብልጦ የተናገረ እንደሌለ ታገኛላችሁ፤ በተለይም ጽሑፋችን በተወሰደበት በዚህ ምዕራፍ እጅግ አጥብቆ ይናገርባቸዋል — በብዙ ወንጀል ይከስሳቸዋል፤ በተለይም በስስት ይከስሳቸዋል፤ በ13ኛው ቁጥር እንዲህ ይላል፦ «ከታናሻቸው ጀምሮ እስከ ታላቃቸው ድረስ ሁሉ ለስስት ተሰጥተዋል፤ ከነቢዩም ጀምሮ እስከ ካህኑ ድረስ ሁሉ በሐሰት ያደርጋሉ።» ከዚያም በጽሑፋችን ቃል፣ በተለየ ሁኔታ፣ እንዴት በሐሰት እንዳደረጉ፣ በምስኪን ነፍሳት ላይ እንዴት በክሕደት እንደ ተመላለሱ በምሳሌ ያሳያል፤ እንዲህ ይላል፦ «ሰላም ሳይኖር፦ ሰላም፥ ሰላም እያሉ የሕዝቤን ሴት ልጅ ስብራት በቀላሉ ፈወሱ።» ነቢዩ በእግዚአብሔር ስም በሕዝቡ ላይ ጦርነትን ሲያውጅ ነበር፤ ቤታቸው ባድማ እንደሚቀር፣ እግዚአብሔርም ምድሪቱን በጦርነት በእርግጥ እንደሚጐበኛት ይነግራቸው ነበር። በ11ኛው ቁጥር እንዲህ ይላል፦ «ስለዚህ የእግዚአብሔር ቍጣ ሞልቶብኛል፤ መታገሥ ደክሞኛል፤ በመንገድ ላይ ባሉ ሕፃናትና በአንድነት በተሰበሰቡ ጐበዛዝት ላይ አፈስሰዋለሁ፤ ባልም ከሚስቱ ጋር፥ ሽማግሌውም ዕድሜ ከጠገበው ጋር ይያዛሉና። ቤቶቻቸውም ከእርሻዎቻቸውና ከሚስቶቻቸው ጋር በአንድነት ለሌሎች ይሆናሉ፤ በምድሪቱ በሚኖሩት ላይ እጄን እዘረጋለሁና፥ ይላል እግዚአብሔር።» ነቢዩ ይደነግጡና ጥቂትም ቢሆን ወቀሳና የንስሐ ዝንባሌ ያገኙ ዘንድ እንደ ነጐድጓድ ያለ መልእክት ያስተላልፋል፤ ነገር ግን ሐሰተኞቹ ነቢያት፣ ሐሰተኞቹ ካህናት የሰዎችን ወቀሳ ለማፈን ይሯሯጡ የነበሩ ይመስላል፤ ሰዎቹ ሲቈስሉ ወይም ጥቂት ሲደነግጡ ቍስሉን በላዩ ብቻ ይለስኑት ነበር፤ ኤርምያስ ስሜታዊ ሰባኪ ብቻ እንደ ሆነ፣ በመካከላቸው እንዲህ ያለ ጦርነት ሊሆን እንደማይችል ይነግሯቸው ነበር፤ ነቢዩ ሰላም የለም ብሎ ሲነግራቸው፣ እነርሱ ግን ለሕዝቡ፦ ሰላም፥ ሰላም፥ ተረጋጉ ይሉ ነበር። እንግዲህ ቃሉ በመጀመሪያ የሚያመለክተው ውጫዊ ነገሮችን ነው፤ ነገር ግን ነፍስንም ደግሞ እንደሚመለከትና ሰዎች በኃጢአት ሲወቀሱ፣ ወደ ሰማይ መመልከት ሲጀምሩ፣ ወቀሳቸውን አፍነው ከዚህ ቀደምም በቂ መልካሞች እንደ ነበሩ በሚነግሯቸው በእነዚያ ሐሰተኞች አስተማሪዎች ላይ ሊተረጐም እንደሚገባው በእውነት አምናለሁ። በእርግጥም ሰዎች በአብዛኛው እንዲህ እንዲሆን ይወድዳሉ፤ ልባችን እጅግ ተንኰለኛ ክፉም ነው፤ ከዘላለማዊው አምላክ በቀር ምን ያህል አታላይ እንደ ሆነ የሚያውቅ የለም። ስንቶቻችን ሰላም ሳይኖር ለነፍሳችን፦ ሰላም፥ ሰላም እንላለን! አሁን በአተላቸው ላይ የረጉ፣ አሁን ክርስቲያኖች እንደ ሆኑ የሚያስቡ፣ አሁን በኢየሱስ ክርስቶስ ዘንድ ድርሻ እንዳላቸው ራሳቸውን የሚሸነግሉ ስንት ናቸው፤ ነገር ግን ልምዳቸውን ብንመረምር ሰላማቸው ዲያብሎስ የሠራው ሰላም ብቻ እንደ ሆነ እናገኛለን — እግዚአብሔር የሰጠው ሰላም አይደለም — የሰውን አእምሮ ሁሉ የሚያልፍ ሰላም አይደለም። ስለዚህ የምወድዳችሁ አድማጮቼ ሆይ፥ ለልባችን ሰላምን ልንናገር እንችል እንደ ሆነ ማወቅ እጅግ አስፈላጊ ነገር ነው። ሁላችን ሰላምን እንመኛለን፤ ሰላም የማይነገር በረከት ነው፤ ያለ ሰላም እንዴት ልንኖር እንችላለን? ስለዚህ ሰዎች ለልባቸው ሰላምን ከመናገራቸው በፊት ምን ያህል ርቀው መሄድ እንዳለባቸውና በውስጣቸው ምን ሊሠራ እንደሚገባ በየጊዜው መማር አለባቸው። ነፍሴን አድን ዘንድ፣ ከምሰብክላቸው ሰዎች ደም ንጹሕ እሆን ዘንድ — የእግዚአብሔርን ምክር ሁሉ ከመናገር ወደ ኋላ እንዳልል — አሁን የማስበው ይህንኑ ነው። ከጽሑፋችን ቃል በመነሣት ለልባችሁ ሰላምን ከመናገራችሁ በፊት ምን ማለፍ እንዳለባችሁና በውስጣችሁ ምን ሊሠራ እንደሚገባ ላሳያችሁ እጥራለሁ።

ነገር ግን ወደዚህ በቀጥታ ከመምጣቴ በፊት አንድ ወይም ሁለት ማስጠንቀቂያ አስቀድሜ እንድናገር ፍቀዱልኝ። የመጀመሪያው ይህ ነው፤ ሃይማኖት ውስጣዊ ነገር እንደ ሆነ እንደምታምኑ እወስዳለሁ፤ በልብ ውስጥ የሚሠራ ሥራ፣ በእግዚአብሔር መንፈስ ኃይል በነፍስ ውስጥ የሚሠራ ሥራ እንደ ሆነ ታምናላችሁ። ይህን ባታምኑ መጽሐፍ ቅዱሳችሁን አታምኑም። ይህን ባታምኑ፣ መጽሐፍ ቅዱሳችሁን በእጃችሁ ብትይዙ እንኳ በልባችሁ ጌታ ኢየሱስ ክርስቶስን ትጠላላችሁ፤ ሃይማኖት በመጽሐፍ ቅዱስ በየስፍራው የእግዚአብሔር ሥራ በልብ ውስጥ እንደ ሆነ ተገልጦአልና። ጌታችን፦ «እነሆ፥ የእግዚአብሔር መንግሥት በመካከላችሁ ናት» ይላል፤ ደግሞም፦ «በግልጥ ክርስቲያን የሆነ ክርስቲያን አይደለም፤ ዳሩ ግን በስውር ክርስቲያን የሆነ ክርስቲያን ነው።» ከእናንተ ማንም ሃይማኖትን በውጫዊ ነገሮች ላይ ቢያኖር፣ ምናልባት በዚህ ማለዳ ደስ አላሰኛችሁም፤ እግዚአብሔር በምስኪን ኃጢአተኛ ልብ ላይ ስለሚሠራው ሥራ ስናገር፣ በማታውቁት ቋንቋ እንደምናገር ያህል አትረዱኝም። ደግሞም እግዚአብሔርን በአንድ የአሠራር መንገድ በፍጹም እንደማልወስነው አስቀድሜ ላስጠነቅቅ እወድዳለሁ። ሰዎች ሁሉ በልባቸው የጸና ሰላም ከማግኘታቸው በፊት በአንድ ዓይነት የወቀሳ መጠን ማለፍ ግድ ነው በፍጹም አልልም። አይደለም፤ እግዚአብሔር ልጆቹን ወደ ቤቱ የሚያመጣበት ልዩ ልዩ መንገድ አለው፤ ቅዱስ መንፈሱ በወደደው ጊዜ፣ በወደደው ስፍራና በወደደው መንገድ ይነፍሳል። ነገር ግን ይህን በድፍረት አረጋግጣለሁ፤ ለልባችሁ ሰላምን ከመናገራችሁ በፊት፣ ወቀሳችሁ አጭር ቢሆን ወይም ረጅም፣ እጅግ በሚወጋ መንገድ ቢሆን ወይም በገርነት፣ በዚህ ስብከት ከዚህ በኋላ የማቀርበውን ማለፍ አለባችሁ።

እንግዲህ በመጀመሪያ፣ ለልባችሁ ሰላምን ከመናገራችሁ በፊት በእግዚአብሔር ሕግ ላይ የሠራችሁትን በደላችሁን እንድታዩ፣ እንድትሰማችሁ፣ እንድታለቅሱለትና እንድታዝኑበት ልትደረጉ ይገባል። በሥራ ኪዳን መሠረት፣ «ኃጢአት የምትሠራ ነፍስ እርስዋ ትሞታለች»፤ ማንም ቢሆን በሕግ መጽሐፍ በተጻፉት ሁሉ ጸንቶ የማይኖር የማያደርግም ሁሉ የተረገመ ነው። የሚገባን አንዳንዱን ነገር ብቻ ማድረግ አይደለም፤ ሁሉን ማድረግ፣ ይህንም ሳናቋርጥ ማድረግ ይገባናል፤ ስለዚህ በሥራ ኪዳን መሠረት ከሥነ ምግባር ሕግ ትንሽ ፈቀቅ ማለት እንኳ — በአሳብ ቢሆን፣ በቃል ቢሆን ወይም በሥራ — ከእግዚአብሔር እጅ የዘላለም ሞት ይገባዋል። አንድ ክፉ አሳብ፣ አንድ ክፉ ቃል፣ አንድ ክፉ ሥራ የዘላለም ፍርድ የሚገባው ከሆነ፣ ወዳጆቼ ሆይ፥ ዕድሜ ልካችን በሙሉ በእግዚአብሔር ላይ የማያቋርጥ ዓመፅ ለሆነ ለእያንዳንዳችን ስንት ሲኦል ይገባናል! ስለዚህ ለልባችሁ ሰላምን ከመናገራችሁ በፊት ከሕያው እግዚአብሔር መራቅ ምን ያህል የሚያስፈራ ነገር እንደ ሆነ እንድታዩና እንድታምኑ ልትደረጉ ይገባል። አሁንም የምወድዳችሁ ወዳጆቼ ሆይ፥ ልባችሁን መርምሩ፤ ነፍሳችሁ እንድትሻሻል አስባችሁ ወደዚህ እንደ መጣችሁ ተስፋ አደርጋለሁና። እግዚአብሔር እያየ እንድጠይቃችሁ ፍቀዱልኝ፤ እግዚአብሔር መራራ ነገርን የጻፈባችሁበትን፣ የሁሉን ቻዩ ፍላጻዎች በውስጣችሁ የነበሩበትን ጊዜ ታውቃላችሁን? ጊዜውን በትክክል ባታውቁ እንኳ እንዲህ ያለ ጊዜ እንደ ነበረ ታውቃላችሁን? የኃጢአታችሁ ትዝታ ከቶ አሳዝኖአችሁ ያውቃልን? የኃጢአታችሁ ሸክም ለአሳባችሁ የማይቻል ሆኖባችሁ ያውቃልን? በእግዚአብሔር ላይ በሠራችሁት በደል ምክንያት የእግዚአብሔር ቍጣ በእናንተ ላይ በቅን ሊወድቅ እንደሚችል አይታችሁ ታውቃላችሁን? በሕይወታችሁ ሁሉ ስለ ኃጢአታችሁ ከቶ አዝናችሁ ታውቃላችሁን? ኃጢአቴ ከራሴ በላይ አልፎአል፤ እንደ ከባድ ሸክምም ልሸከመው የማልችለው ሆኖብኛል ብላችሁ ከቶ መናገር ትችሉ ነበርን? እንዲህ ያለ ነገር ከቶ አጋጥሟችሁ ያውቃልን? እንዲህ ያለ ነገር በእግዚአብሔርና በነፍሳችሁ መካከል ከቶ ሆኖ ያውቃልን? ካልሆነ፣ ስለ ኢየሱስ ክርስቶስ ብላችሁ ራሳችሁን ክርስቲያኖች አትበሉ፤ ለልባችሁ ሰላምን ልትናገሩ ትችላላችሁ፤ ሰላም ግን የለም። ፈቃዱ ቢሆን፣ ወደ ቤታችሁ ከመሄዳችሁ በፊት ጌታ ያንቃችሁ፤ ጌታ ይመልሳችሁ፤ ጌታ ሰላምን ይስጣችሁ!

ከዚህም በላይ፦ እስክትንቀጠቀጡ ድረስ በሠራችኋቸው ኃጢአቶች ልትወቀሱ ትችላላችሁ፤ ሆኖም ለኢየሱስ ክርስቶስ እንግዶች ልትሆኑ፣ በልባችሁም እውነተኛ የጸጋ ሥራ ላይኖር ይችላል። ስለዚህ ለልባችሁ ሰላምን ከመናገራችሁ በፊት ወቀሳው ወደ ጥልቅ መውረድ አለበት፤ በእግዚአብሔር ሕግ ላይ በሠራችሁት በደል ብቻ ሳይሆን የበደላችሁ ሁሉ መሠረት በሆነውም ልትወቀሱ ይገባል። ይህስ ምንድር ነው? የውርስ ኃጢአት ማለቴ ነው፤ እያንዳንዳችን ይዘነው ወደ ዓለም የምንመጣው፣ ለእግዚአብሔር ቍጣና ፍርድ የሚያጋልጠን የመጀመሪያው ርኵሰት ነው። ራሳቸውን ጥሩ አመዛዛኞች አድርገው የሚቈጥሩ ብዙ ምስኪን ነፍሳት አሉ፤ ነገር ግን የውርስ ኃጢአት የሚባል ነገር የለም ለማለት ይደፍራሉ፤ የአዳምን ኃጢአት በእኛ ላይ በመቍጠሩ እግዚአብሔርን በዓመፃ ይከስሱታል፤ የአውሬውና የዲያብሎስ ምልክት በላያችን ቢኖርም በኃጢአት እንዳልተወለድን ይነግሩናል። እስቲ ወደ ዓለም ዙሪያ ይመልከቱ፤ በውስጡ ያለውን ሥርዓተ አልበኝነት ይዩ፤ ቢችሉም እግዚአብሔር ሰውን ያኖረባት ገነት ይህች እንደ ሆነች ያስቡ። አይደለም! በዓለም ያለው ነገር ሁሉ ከሥርዓቱ ወጥቶአል። በውጭ አገር በነበርሁ ጊዜ፣ የውርስ ኃጢአትን የሚያረጋግጥ ሌላ ማስረጃ ባይኖር እንኳ ተኵላዎችና ነብሮች በሰው ላይ መነሣታቸው፣ እንዲያውም ውሻ በእኛ ላይ መጮኹ የውርስ ኃጢአት ማስረጃ ነው ብዬ ብዙ ጊዜ አስቤአለሁ። ከአዳም የመጀመሪያ ኃጢአት በቀር ነብሮችና አንበሶች በእኛ ላይ ለመነሣት ባልደፈሩ ነበር፤ ፍጥረታት በእኛ ላይ ሲነሡ፦ እናንተ በእግዚአብሔር ላይ ኃጢአት ሠርታችኋል፤ እኛም የጌታችንን ክርክር እንወስዳለን እንደ ማለት ነውና። ወደ ውስጣችን ብንመለከት ብዙ ምኞትን፣ የእግዚአብሔርንም ባሕርይ የሚቃረን የሰውን ባሕርይ እናያለን። በሁላችንም ልብ ትዕቢት፣ ክፋትና በቀል አለ፤ ይህ ባሕርይ ከእግዚአብሔር ሊመጣ አይችልም፤ የሚመጣው ከመጀመሪያው አባታችን ከአዳም ነው፤ እርሱ ከእግዚአብሔር ከወደቀ በኋላ ከእግዚአብሔር ወጥቶ ወደ ዲያብሎስ ወደቀ። ስለዚህ አንዳንድ ሰዎች ይህን ቢክዱም፣ ወቀሳ ሲመጣ የሥጋ አመዛዘን ሁሉ ወዲያውኑ ይፈርሳል፤ ምስኪኒቱም ነፍስ የረከሱ ጅረቶች ሁሉ የሚፈስሱበትን ምንጭ ማየትና መረዳት ትጀምራለች። ኃጢአተኛው በመጀመሪያ ሲነቃ፦ እንዲህ ክፉ እንዴት ሆንሁ? ብሎ ይደነቅ ይጀምራል። ያን ጊዜ የእግዚአብሔር መንፈስ ይገባና በተፈጥሮው በእርሱ ዘንድ አንዳች በጎ ነገር እንደሌለ ያሳየዋል፤ ያን ጊዜም ፈጽሞ ከመንገድ እንደ ወጣ፣ ፈጽሞም የተጸየፈ እንደ ሆነ ያያል፤ ምስኪኑም ፍጡር በእግዚአብሔር ዙፋን እግር ሥር ተዋርዶ እንዲኖር፣ በሕይወቱ አንድም ኃጢአት ባይሠራ እንኳ እግዚአብሔር ቢፈርድበትና ቢያጠፋው ጻድቅ እንደ ሆነ እንዲመሰክር ይደረጋል። ከእናንተ ማንም ይህን ተሰምቶአችሁ፣ ይህንም አጋጥሟችሁ ያውቃልን — እግዚአብሔር ቢፈርድባችሁ ጻድቅ እንደ ሆነ ልታጸድቁት — በተፈጥሮአችሁ የቍጣ ልጆች እንደ ሆናችሁ፣ በሕይወታችሁ ሁሉ በሥራ ከቶ ባታሳዝኑት እንኳ እግዚአብሔር በቅን ሊያጠፋችሁ እንደሚችል ልትመሰክሩ? ከቶ በእውነት ተወቅሳችሁ ቢሆን፣ ልባችሁ ከቶ በእውነት ተሰንጥቆ ቢሆን፣ እኔነታችሁ በእውነት ከእናንተ ተወግዶ ቢሆን፣ ይህን ታዩትና ይሰማችሁ ዘንድ በተደረጋችሁ ነበር። የውርስ ኃጢአትን ክብደት ከቶ ካልተሰማችሁ ራሳችሁን ክርስቲያኖች አትበሉ። የውርስ ኃጢአት የእውነተኛ አማኝ ታላቅ ሸክም እንደ ሆነ በእውነት አምናለሁ፤ ዳግመኛ የተወለደችውን ነፍስ፣ የተቀደሰችውን ነፍስ ዘወትር የሚያሳዝናት ይህ ነው። በልብ ውስጥ የሚያድር ኃጢአት የተመለሰ ሰው ሸክም ነው፤ የእውነተኛ ክርስቲያን ሸክም ነው። ዘወትር፦ «እኔ ምንኛ ጎስቋላ ሰው ነኝ! ለዚህ ሞት ከተሰጠ ሰውነት ማን ያድነኛል?» እያለ ይጮኻል፤ ይህም በልቤ ውስጥ የሚያድረው ርኵሰት ነው። ምስኪኒቱን ነፍስ አብልጦ የሚያውካት ይህ ነው። ስለዚህ ይህ ውስጣዊ ርኵሰት ከቶ ካልተሰማችሁ፣ እግዚአብሔር ስለ እርሱ በቅን ሊረግማችሁ እንደሚችል ከቶ ካላያችሁ፣ በእውነት የምወድዳችሁ ወዳጆቼ ሆይ፥ ለልባችሁ ሰላምን ልትናገሩ ትችላላችሁ፤ ነገር ግን እውነተኛ ሰላም የለም ብዬ እፈራለሁ፤ እንዲያውም አውቃለሁ።

ከዚህም በላይ፦ ለልባችሁ ሰላምን ከመናገራችሁ በፊት ስለ ሕይወታችሁ ኃጢአትና ስለ ተፈጥሮአችሁ ኃጢአት ብቻ ሳይሆን ስለ መልካሙ ተግባራችሁና ሥራችሁ ኃጢአትም ደግሞ ልትታወኩ ይገባል። ምስኪኒቱ ነፍስ በጌታ ማስፈራሪያዎች በመጠኑ ስትነቃ፣ ምስኪኑ ፍጡር በሥራ ኪዳን ሥር የተወለደ ስለ ሆነ ወዲያውኑ እንደ ገና ወደ ሥራ ኪዳን ይሸሻል። አዳምና ሔዋን በገነት ዛፎች መካከል እንደ ተሸሸጉና ዕራቁትነታቸውን ለመሸፈን የበለስ ቅጠል እንደ ሰፉ፣ እንዲሁ ምስኪኑ ኃጢአተኛ ሲነቃ ከእግዚአብሔር ለመሸሸግ ወደ ተግባሩና ወደ ሥራው ይሸሻል፤ የራሱንም ጽድቅ ሊጣጥፍ ይሄዳል። እንዲህም ይላል፦ ከአሁን ወዲያ እጅግ መልካም እሆናለሁ — እታረማለሁ — የምችለውን ሁሉ አደርጋለሁ፤ ከዚያም ኢየሱስ ክርስቶስ በእርግጥ ይምረኛል። ነገር ግን ለልባችሁ ሰላምን ከመናገራችሁ በፊት፣ ከቶ ባቀረባችሁት እጅግ መልካም ጸሎት ምክንያት እግዚአብሔር ሊፈርድባችሁ እንደሚችል እንድታዩ ልትደረጉ ይገባል፤ ተግባራችሁ ሁሉ — ጽድቃችሁ ሁሉ — ነቢዩ በሚያምር አነጋገር እንደሚገልጠው፣ ሁሉንም በአንድነት ብትሰበስቧቸው፣ በእግዚአብሔር ዘንድ ከማስመስገን እጅግ የራቁ፣ እግዚአብሔር ምስኪኒቱን ነፍሳችሁን እንዲምር ምክንያትና መገፋፋት ከመሆን እጅግ የራቁ እንደ ሆኑ፣ እርሱም የመርገም ጨርቅ፣ የቆሸሸ ጨርቅ አድርጎ እንደሚያያቸው ልትመለከቱ ይገባል — በእርሱ ፊት ሞገስ እንድታገኙ ይዛችሁ ብትቀርቡ እግዚአብሔር እንደሚጠላቸውና ሊታገሣቸው እንደማይችል ልታዩ ይገባል። የምወድዳችሁ ወዳጆቼ ሆይ፥ በእግዚአብሔር ዘንድ እኛን የሚያስመሰግን ምን ነገር በሥራችን ውስጥ አለ? እኛ ራሳችን በተፈጥሮአችን ባልጸደቀ ሁኔታ ውስጥ ነን፤ አሥር ሺህ ጊዜ ፍርድ ይገባናል፤ ታዲያ ሥራችን ምን ሊሆን ይችላል? በተፈጥሮአችን አንዳች በጎ ነገር ልናደርግ አንችልም፤ «በሥጋ ያሉትም እግዚአብሔርን ደስ ሊያሰኙት አይችሉም።» በውጫዊ መልኩ በጎ የሆነውን ብዙ ነገር ልታደርጉ ትችላላችሁ፤ ነገር ግን በእውነተኛ ባሕርዩና በቅንነት በጎ የሆነውን አንድም ነገር ልታደርጉ አትችሉም፤ ተፈጥሮ ከራሱ በላይ ሊሠራ አይችልምና። ያልተመለሰ ሰው ለእግዚአብሔር ክብር ሊሠራ አይቻለውም፤ በእምነት አንዳች ነገር ሊያደርግ አይችልም፤ «በእምነትም ያልሆነ ሁሉ ኃጢአት ነው።» ከታደስን በኋላም ቢሆን የታደስነው በከፊል ብቻ ነው፤ የሚያድረው ኃጢአት በውስጣችን ይቀጥላል፤ በእያንዳንዱ ተግባራችን ውስጥ የርኵሰት ቅልቅል አለ፤ ስለዚህ ከተመለስን በኋላ እንኳ ኢየሱስ ክርስቶስ እንደ ሥራችን ብቻ ቢቀበለን ሥራችን ያስፈርድብን ነበር፤ የሥነ ምግባር ሕግ ከሚጠይቀው ፍጹምነት ያልራቀ አንድ ጸሎት እንኳ ልናቀርብ አንችልምና። እናንተ ምን እንደምታስቡ አላውቅም፤ እኔ ግን ይህን ማለት እችላለሁ፤ ኃጢአት ሳልሠራ መጸለይ አልችልም — ኃጢአት ሳልሠራ ለእናንተም ሆነ ለሌሎች መስበክ አልችልም — ያለ ኃጢአት አንዳች ማድረግ አልችልም፤ አንድ ሰው እንደ ተናገረውም፣ ንስሐዬ ራሱ ንስሐ ያስፈልገዋል፤ እንባዬም በውዱ ቤዛዬ ክቡር ደም መታጠብ ያስፈልገዋል። መልካሙ ተግባራችን እንደ ብዙ ያማሩ ኃጢአቶች ነው። ለልባችሁ ሰላምን ከመናገራችሁ በፊት በውርስና በሠራችሁት ኃጢአት ብቻ ሳይሆን በጽድቃችሁም፣ በተግባራችሁና በሥራችሁ ሁሉ እንድትታክቱ ልትደረጉ ይገባል። ከራስ ጽድቃችሁ ወጥታችሁ ልትመጡ ከመቻላችሁ በፊት ጥልቅ ወቀሳ ሊኖር ይገባል፤ ከልባችን የሚወጣው የመጨረሻው ጣዖት እርሱ ነውና። የልባችን ትዕቢት ለኢየሱስ ክርስቶስ ጽድቅ እንድንገዛ አይፈቅድልንም። ነገር ግን የራሳችሁ ጽድቅ እንደሌላችሁ ከቶ ካልተሰማችሁ፣ የራሳችሁ ጽድቅ ጕድለት ከቶ ካልተሰማችሁ፣ ወደ ኢየሱስ ክርስቶስ ልትመጡ አትችሉም። ዛሬ፦ መልካም፣ ይህን ሁሉ እናምናለን የሚሉ እጅግ ብዙዎች አሉ፤ ነገር ግን በመናገርና በመሰማት መካከል ታላቅ ልዩነት አለ። የውድ ቤዛ ማጣት ከቶ ተሰምቶአችሁ ያውቃልን? ከራሳችሁ ጽድቅ ጕድለት የተነሣ የኢየሱስ ክርስቶስ ማጣት ከቶ ተሰምቶአችሁ ያውቃልን? አሁንስ ከልባችሁ፦ ጌታ ሆይ፥ ከቶ ባደረግሁት እጅግ መልካም ተግባር ምክንያት በቅን ልትፈርድብኝ ትችላለህ ብላችሁ መናገር ትችላላችሁን? እንዲህ ከራሳችሁ ወጥታችሁ ካልመጣችሁ ለራሳችሁ ሰላምን ልትናገሩ ትችላላችሁ፤ ነገር ግን ሰላም የለም።

ከዚያም በኋላ ለነፍሳችሁ ሰላምን ከመናገራችሁ በፊት እጅግ ልትታወኩበት የሚገባ አንድ የተለየ ኃጢአት አለ፤ ሆኖም ምን እንደ ሆነ የምታስቡ ከእናንተ ጥቂቶች ብቻ እንደ ሆናችሁ እፈራለሁ፤ እርሱ በክርስቲያኑ ዓለም ላይ የሚነግሠው፣ የሚያስፈርደው ኃጢአት ነው፤ ሆኖም የክርስቲያኑ ዓለም እምብዛም ወይም ከቶ አያስበውም። ይህስ ምንድር ነው እባካችሁ? ብዙዎቻችሁ ከእርሱ ነጻ እንደ ሆናችሁ የምታስቡት ነው — እርሱም ያለማመን ኃጢአት ነው። ለልባችሁ ሰላምን ከመናገራችሁ በፊት ስለ ልባችሁ አለማመን ልትታወኩ ይገባል። ነገር ግን በዚህ የቤተ ክርስቲያን ቅጽር ግቢ ውስጥ ያላችሁ፣ በተሐድሶ አገር በስኮትላንድ የተወለዳችሁ፣ በየሰንበቱ ወደ ቤተ ክርስቲያን የምትሄዱ ከእናንተ ማንም የማያምን ሊሆን ይችላል ተብሎ ይታሰባልን? በዓመት አንድ ጊዜ ቅዱስ ቍርባንን የምትቀበሉ — ኦ ምነው አብዝቶ በተሰጠ! — ለቅዱስ ቍርባን ምልክት የተሰጣችሁ እናንተ፣ የቤተ ሰብ ጸሎትን የምትጠብቁ እናንተ፣ ከእናንተ ማንም በጌታ ኢየሱስ ክርስቶስ አያምንም ተብሎ ይታሰባልን? ከእናንተ ማንም በክርስቶስ ያምን እንደ ሆነ ብጠራጠር ፍቅር የሌለኝ አድርጋችሁ አትቈጥሩኝምን ብዬ ልባችሁን እጠይቃለሁ፤ ሆኖም ብንመረምር ብዙዎቻችሁ ዲያብሎስ ራሱ ያለውን ያህል እንኳ በጌታ ኢየሱስ ክርስቶስ እምነት እንደሌላችሁ እናገኛለን ብዬ እፈራለሁ። ዲያብሎስ ከብዙዎቻችን ይልቅ መጽሐፍ ቅዱስን አብልጦ እንደሚያምን እርግጠኛ ነኝ። የኢየሱስ ክርስቶስን አምላክነት ያምናል፤ ይህም ራሳቸውን ክርስቲያኖች ከሚሉ ከብዙዎች ይበልጣል፤ እንዲያውም ያምናል ይንቀጠቀጥማል፤ ይህም በመካከላችን ካሉ ከሺዎች ይበልጣል። ወዳጆቼ ሆይ፥ በእግዚአብሔር መንፈስ በልብ ውስጥ የተሠራውን እውነተኛ እምነት በታሪካዊ እምነት እንሳሳታለን። መጽሐፍ ቅዱስ የምንለው መጽሐፍ እንዳለ ስለምታምኑ — ወደ ቤተ ክርስቲያን ስለምትሄዱ — የምታምኑ ይመስላችኋል፤ ይህን ሁሉ ልታደርጉ ትችላላችሁ፤ ሆኖም በክርስቶስ እውነተኛ እምነት ላይኖራችሁ ይችላል። ክርስቶስ የሚባል ሰው እንደ ነበረ ማመን ብቻ፣ መጽሐፍ ቅዱስ የሚባል መጽሐፍ እንዳለ ማመን ብቻ፣ ቄሳር ወይም ታላቁ እስክንድር የሚባል ሰው እንደ ነበረ ከማመን የበለጠ አንዳች አይጠቅማችሁም። መጽሐፍ ቅዱስ የተቀደሰ አደራ ነው። ስለ እነዚህ ሕያዋን ቃሎች ለእግዚአብሔር ምንኛ ምስጋና ልናቀርብ ይገባናል! ነገር ግን እነዚህ ኖረውን በጌታ ኢየሱስ ክርስቶስ ላናምን እንችላለን። የምወድዳችሁ ወዳጆቼ ሆይ፥ በሕያው እግዚአብሔር መንፈስ በልብ ውስጥ የተሠራ መሠረት ሊኖር ይገባል። በኢየሱስ ክርስቶስ ካመናችሁ ምን ያህል ጊዜ እንደ ሆናችሁ ብጠይቃችሁ፣ ብዙዎቻችሁ ከምታስታውሱት ጊዜ ጀምሮ በኢየሱስ ክርስቶስ እንዳመናችሁ ትነግሩኛላችሁ ብዬ እገምታለሁ — ከቶ ተጠራጥራችሁ አታውቁም። እንግዲያስ ከማኅፀን ጀምሮ እንደሚባለው በልጅነታችሁ ካልተቀደሳችሁ በቀር፣ ገና በኢየሱስ ክርስቶስ እንዳላመናችሁ ከዚህ የተሻለ ማስረጃ ልትሰጡኝ አትችሉም፤ በሌላ መንገድ በክርስቶስ የሚያምኑ በኢየሱስ ክርስቶስ ያላመኑበት ጊዜ እንደ ነበረ ያውቃሉና። እግዚአብሔርን በፍጹም ልባችሁ፣ በፍጹም ነፍሳችሁና በፍጹም ኃይላችሁ እንደምትወድዱት ትናገራላችሁ። እግዚአብሔርን ከወደዳችሁ ምን ያህል ጊዜ እንደ ሆናችሁ ብጠይቃችሁ፦ ከምናስታውሰው ጊዜ ጀምሮ ትላላችሁ፤ እግዚአብሔርን ከቶ ጠልታችሁ አታውቁም፤ በልባችሁ በእግዚአብሔር ላይ ጥል የነበረበትን ጊዜ አታውቁም። እንግዲያስ በጣም በልጅነታችሁ ካልተቀደሳችሁ በቀር በሕይወታችሁ ከቶ እግዚአብሔርን አልወደዳችሁትም። የምወድዳችሁ ወዳጆቼ ሆይ፥ በዚህ ነገር ላይ አብልጬ የማተኵረው ብዙ ሰዎች ቀድሞውኑ እንዳመኑ በማሰብ የሚወሰዱበት እጅግ አታላይ ማታለል ስለ ሆነ ነው። ስለዚህ ስለ ሚስተር ማርሻል የተነገረው ይህ ነው፤ እርሱ ልምዱን ሲተርክ፣ ሕይወትን በሥራ ለማግኘት ሲደክም እንደ ነበረ፣ ኃጢአቶቹንም ሁሉ በአሥርቱ ትእዛዛት ሥር እንደ ዘረዘረ፣ ከዚያም ወደ አንድ አገልጋይ መጥቶ ሰላምን ማግኘት ያልቻለበትን ምክንያት እንደ ጠየቀው ይናገራል። አገልጋዩም ዝርዝሩን ተመልክቶ፦ ወግድ፤ በዝርዝርህ ሁሉ ስለ ያለማመን ኃጢአት አንድ ቃል እንኳ አላገኘሁም አለው። ያለማመናችንን — እምነት እንደሌለን — ሊያስረዳን የእግዚአብሔር መንፈስ የተለየ ሥራ ነው። ኢየሱስ ክርስቶስ ስለ ያለማመን ኃጢአት እንዲህ ይላል፦ «ስለ ኃጢአት፥» ይላል ክርስቶስ፥ «በእኔ ስለማያምኑ ነው።» አሁንም የምወድዳችሁ ወዳጆቼ ሆይ፥ እምነት እንደሌላችሁ እግዚአብሔር ከቶ አሳይቷችኋልን? ስለ ልባችሁ የማያምን ድንዳኔ ከቶ እንድታለቅሱ ተደርጋችኋልን? የልባችሁ ቋንቋ፦ ጌታ ሆይ፥ እምነትን ስጠኝ፤ ጌታ ሆይ፥ አንተን እንድይዝ አስችለኝ፤ ጌታ ሆይ፥ አንተን የእኔ ጌታ፥ የእኔ አምላክ ብዬ እንድጠራህ አስችለኝ የሚል ሆኖ ያውቃልን? ኢየሱስ ክርስቶስ በዚህ መንገድ ከቶ ወቅሷችኋልን? ክርስቶስን ለመያዝ አቅም እንደሌላችሁ ከቶ አስረድቷችሁ፣ እምነትን እንዲሰጣችሁ ወደ እግዚአብሔር እንድትጮኹ አድርጓችኋልን? ካልሆነ ለልባችሁ ሰላምን አትናገሩ። ከዚህ ሄዳችሁ ሳትጠፉ በፊት ጌታ ያንቃችሁ፤ እውነተኛና የጸና ሰላምንም ይስጣችሁ!

እንግዲህ አንድ ጊዜ ደግሞ፦ ለልባችሁ ሰላምን ከመናገራችሁ በፊት በሠራችሁትና በውርስ ኃጢአታችሁ፣ በራሳችሁ ጽድቅ ኃጢአቶችና በያለማመን ኃጢአት ልትወቀሱ ብቻ ሳይሆን፣ የጌታ ኢየሱስ ክርስቶስን ፍጹም ጽድቅ፣ በሁሉ የሚበቃውን ጽድቅ እንድትይዙ ልትበረቱ ይገባል፤ የኢየሱስ ክርስቶስን ጽድቅ በእምነት መያዝ አለባችሁ፤ ያን ጊዜም ሰላም ይሆንላችኋል። «እናንተ ደካሞች ሸክማችሁ የከበደ ሁሉ፥ ወደ እኔ ኑ፥» ይላል ኢየሱስ፥ «እኔም አሳርፋችኋለሁ።» ይህ ለደከሙትና ሸክማቸው ለከበደባቸው ሁሉ መጽናናትን ይናገራል፤ ነገር ግን የዕረፍቱ ተስፋ የተሰጣቸው እነርሱ ሲመጡ፣ ሲያምኑና እርሱን አምላካቸውና ሁሉ ነገራቸው አድርገው ሲቀበሉት ብቻ ነው። በእግዚአብሔር ዘንድ ሰላም ከማግኘታችን በፊት በጌታችን በኢየሱስ ክርስቶስ በኩል በእምነት መጽደቅ ይገባናል፤ ጽድቁ ጽድቃችን እንዲሆን፣ ብቃቱም ለነፍሳችን እንዲቈጠር፣ ክርስቶስን የልባችን ገንዘብ እንድናደርገው ልንበረታ፣ ክርስቶስም ወደ ነፍሳችን እንዲመጣ ይገባል። የምወድዳችሁ ወዳጆቼ ሆይ፥ ከኢየሱስ ክርስቶስ ጋር ከቶ ተጋብታችኋልን? ኢየሱስ ክርስቶስ ከቶ ራሱን ሰጥቷችኋልን? ክርስቶስ በልባችሁ እንዲሰማችሁ፣ ለነፍሳችሁም ሰላምን ሲናገር እንድትሰሙት፣ ከቶ በሕያው እምነት ክርስቶስን ይዛችሁ ታውቃላችሁን? ሰላም እንደ ወንዝ በልባችሁ ላይ ከቶ ፈሶ ያውቃልን? ክርስቶስ ለደቀ መዛሙርቱ የተናገረው ያ ሰላም ከቶ ተሰምቶአችሁ ያውቃልን? መጥቶ ሰላምን እንዲናገራችሁ እግዚአብሔርን እለምናለሁ። እነዚህን ነገሮች በሕይወታችሁ ልታገኙአቸው ይገባል። የምናገረው ስለ ሌላው ዓለም ስለማይታዩ እውነታዎች፣ ስለ ውስጣዊ ሃይማኖት፣ እግዚአብሔር በምስኪን ኃጢአተኛ ልብ ላይ ስለሚሠራው ሥራ አይደለምን? የምወድዳችሁ አድማጮቼ ሆይ፥ የምናገረው እጅግ አስፈላጊ ስለ ሆነ ነገር አይደለምን? ሁላችሁንም ይመለከታችኋል፤ ነፍሳችሁን ይመለከታል፤ የዘላለም መዳናችሁ ይመለከተዋል። ሁላችሁም ሰላም ያላችሁ ትመስሉ ይሆናል፤ ነገር ግን ምናልባት ዲያብሎስ በሥጋዊ ድንዛዜና ግድ የለሽነት አስተኝቷችሁ ይሆናል፤ ወደ ሲኦልም እስኪያገባችሁ ድረስ በዚያው ሊያቆያችሁ ይጥራል፤ በዚያም ትነቃላችሁ፤ ነገር ግን ታላቅ ገደል ተደርጎአል በሚባልበት ጊዜ፣ መላሳችሁን የምታበርድ የውኃ ጠብታ ለዘላለም ስትለምኑ ሳታገኙአትም ስትቀሩ፣ ነቅታችሁ ራሳችሁን እንዲህ በሚያስፈራ ሁኔታ ተሳስታችሁ ማግኘታችሁ እጅግ አስከፊ ይሆናል።

እንግዲህ ለተለያዩ ዓይነት ሰዎች እንድናገር ፍቀዱልኝ፤ ኦ እግዚአብሔር ከማያልቅ ምሕረቱ የተነሣ ይህን ማሳሰቢያ ይባርክ! ምናልባት ከእናንተ አንዳንዶቻችሁ እንዲህ ልትሉ ትችላላችሁ፦ በጸጋ ከአንተ ጋር አብረን መሄድ እንችላለን። እግዚአብሔር ይመስገን፤ በሠራነው ኃጢአት ተወቅሰናል፤ በውርስ ኃጢአት ተወቅሰናል፤ በራስ ጽድቅ ተወቅሰናል፤ የያለማመንን ምሬት ቀምሰናል፤ በጸጋም ኢየሱስ ክርስቶስን ይዘናል፤ እግዚአብሔር ሰላምን ስለ ተናገረን ለልባችን ሰላምን ልንናገር እንችላለን። እንዲህ ማለት ትችላላችሁን? እንግዲያስ በሳምንቱ የመጀመሪያ ቀን መላእክት ሴቶቹን እንዳመሰገኑ እኔም፦ ደስ ይበላችሁ! ብዬ ሰላም እላችኋለሁ። የምወድዳችሁ ወንድሞቼ ሆይ፥ እናንተስ አትፍሩ፤ ደስተኞች ነፍሳት ናችሁ፤ እግዚአብሔር ሰላምን ሰጥቷችኋልና በእውነት በሰላም ልትተኙ ትችላላችሁ፤ ከአሁን ወዲያ በነፍሳችሁ ላይ ካለው የእግዚአብሔር ፍቅር የሚመነጭ ነገር እንጂ ሌላ አንዳች ስለማይደርስባችሁ፣ በእግዚአብሔር አሠራር ሁሉ ሥር ልትረኩ ትችላላችሁ፤ በውስጣችሁ ሰላም ስላለ በውጭ ምን ዓይነት ትግል ቢኖር አትፍሩ። ክርስቶስን ይዛችኋልን? እግዚአብሔር ወዳጃችሁ ነውን? ክርስቶስ ወዳጃችሁ ነውን? እንግዲያስ በመጽናናት ቀና ብላችሁ ተመልከቱ፤ ሁሉ የእናንተ ነው፥ እናንተም የክርስቶስ ናችሁ ክርስቶስም የእግዚአብሔር ነው። ነገር ሁሉ ለበጎአችሁ በአንድነት ይደረጋል፤ የራሳችሁ ጠጉር ሁሉ እንኳ ተቈጥሮአል፤ እናንተን የሚነካ የእግዚአብሔርን የዓይን ብሌን ይነካል። ነገር ግን የምወድዳችሁ ወዳጆቼ ሆይ፥ በመጀመሪያው መመለሳችሁ ላይ ከማረፍ ተጠንቀቁ። በክርስቶስ ገና አዲስ አማኞች የሆናችሁ እናንተ፣ በየጊዜው የጌታ ኢየሱስ ክርስቶስን አዲስ መገለጥ መፈለግ ይገባችኋል፤ ባለፈው ልምዳችሁ ላይ መሥራት የለባችሁም፤ በውስጣችሁ በተሠራው ሥራ ላይ መሥራት የለባችሁም፤ ነገር ግን ሁልጊዜ ከራሳችሁ ወጥታችሁ ከእናንተ ውጭ ወዳለው ወደ ኢየሱስ ክርስቶስ ጽድቅ መምጣት አለባችሁ፤ ከመዳን ምንጮች ውኃን ለመቅዳት እንደ ምስኪን ኃጢአተኞች ሁልጊዜ መምጣት አለባችሁ፤ በኋላችሁ ያለውን እየረሳችሁ በፊታችሁ ወዳለው ዘወትር መዘርጋት አለባችሁ። የምወድዳችሁ ወዳጆቼ ሆይ፥ ከጌታ ኢየሱስ ክርስቶስ ጋር ርኅሩኅና የቀረበ አካሄድ መጠበቅ አለባችሁ። በግዴለሽ አካሄዳችን ሰላማችንን የምናጣ ብዙዎቻችን ነን፤ አንድ ነገር በክርስቶስና በእኛ መካከል ይገባል፤ ወደ ጨለማም እንወድቃለን፤ አንድ ነገር ልባችንን ከእግዚአብሔር ይሰርቃል፤ ይህም መንፈስ ቅዱስን ያሳዝናል፤ መንፈስ ቅዱስም ለራሳችን ይተወናል። ስለዚህ ከእግዚአብሔር ጋር ሰላም ያገኛችሁ እናንተ ይህን ሰላም እንዳታጡ እንድትጠነቀቁ ልምከራችሁ። አንድ ጊዜ በክርስቶስ ከሆናችሁ በመጨረሻ ከእግዚአብሔር ልትወድቁ እንደማትችሉ እውነት ነው፤ «በክርስቶስ ኢየሱስ ላሉት አሁን ኵነኔ የለባቸውም።» ነገር ግን በመጨረሻ መውደቅ ባትችሉም በአሳፋሪ ሁኔታ ልትወድቁ፣ ዕድሜ ልካችሁንም በተሰበረ አጥንት ልትሄዱ ትችላላችሁ። ከኋሊት መመለስ ተጠንቀቁ፤ ስለ ኢየሱስ ክርስቶስ ብላችሁ መንፈስ ቅዱስን አታሳዝኑ፤ በሕይወት እስካላችሁ ድረስ መጽናናታችሁን መልሳችሁ ላታገኙ ትችላላችሁ። ኦ ኢየሱስ ክርስቶስን ከያዛችሁ በኋላ ከእግዚአብሔር ርቃችሁ ከመባዘንና ከመቅበዝበዝ ተጠንቀቁ። የምወድዳችሁ ወዳጆቼ ሆይ፥ ከኋሊት በመመለሴ ውድ ዋጋ ከፍያለሁ። ልባችን እጅግ የተረገመ ክፉ ስለ ሆነ ካልተጠነቀቃችሁ፣ የማያቋርጥ ትጋት ካልጠበቃችሁ፣ ክፉ ልባችሁ ያታልላችኋል ወደ ጎንም ይስባችኋል። በሚቀጣ አባት በትር ሥር መሆን አሳዛኝ ነው፤ የኢዮብ፣ የዳዊትና በመጽሐፍ ቅዱስ ያሉት የሌሎች ቅዱሳን ጕብኝት ምስክር ነው። ስለዚህ ሰላም ያገኛችሁ እናንተ ከክርስቶስ ጋር የቀረበ አካሄድ እንድትጠብቁ ልምከራችሁ። የኢየሱስ ክርስቶስ መገለጥ የደረሳቸው ክርስቲያኖች ነን የሚሉ ሰዎች የላላ አካሄድ ያሳዝነኛል፤ በእነርሱና በሌሎች ሰዎች መካከል ያለው ልዩነት እጅግ ጥቂት ስለ ሆነ እውነተኛው ክርስቲያን የትኛው እንደ ሆነ ለማወቅ እቸገራለሁ። ክርስቲያኖች ስለ እግዚአብሔር ለመናገር ይፈራሉ — ከጅረቱ ጋር ይወርዳሉ፤ ዓለማውያን ወዳሉበት ቢገቡ በገዛ አገራቸው እንዳሉ ያህል ስለ ዓለም ያወራሉ፤ የክርስቶስን ፍቅር መጀመሪያ በተገለጠላችሁ ጊዜ ይህን አታደርጉም ነበር፤ የጌታ መብራት በነፍሳችሁ ላይ ባበራ ጊዜ ያን ጊዜ ስለ ክርስቶስ ፍቅር ለዘላለም ልታወሩ ትችሉ ነበር። ስለ ውድ ጌታችሁ የምትናገሩት ነገር የነበራችሁበት ጊዜ ነበረ፤ አሁን ግን ሰዎች ወዳሉበት ሄዳችሁ ሌሎች ስለ ዓለም በድፍረት ሲናገሩ ትሰማላችሁ፤ ስለ ኢየሱስ ክርስቶስ ብትናገሩ ግን መሳቂያ እንዳትሆኑ ትፈራላችሁ። እጅግ ብዙ ሰዎች ዛሬ በቃሉ እጅግ በከፋው ትርጕም ተመሳሳዮች (ኮንፎርሚስቶች) ሆነዋል፤ በቤተ ክርስቲያን ሥርዓቶች ላይ ይጮኻሉ፤ ይህንም በቅን ሊያደርጉ ይችላሉ፤ እናንተ ግን በአካሄዳችሁ ሥርዓትን እጅግ ትወድዳላችሁ፤ ከዚያ እጅግ የከፋውን ዓለምን ትመስላላችሁ። ብዙዎች ዲያብሎስ አዲስ ፋሽን እስኪያመጣ ድረስ ይጠብቃሉ። እንግዲያስ ይህን ዓለም አትምሰሉ፤ ተጠንቀቁ። ክርስቲያኖች ከዓለም ጋር ምን ጉዳይ አላቸው? ክርስቲያኖች በተለየ ሁኔታ መልካሞች፣ ለጌታቸው ደፋሮች ሊሆኑ ይገባቸዋል፤ ከእናንተ ጋር ያሉ ሁሉ ከኢየሱስ ጋር እንደ ነበራችሁ ያስተውሉ ዘንድ። እግዚአብሔር ዘወትር በልባችሁ እንዲኖር በኢየሱስ ክርስቶስ ውስጥ እንድትጸኑ እመክራችኋለሁ። በመጣበቅ እምነታችን ላይ እንገነባለን፤ መጽናናታችንንም አጣን፤ ነገር ግን የእግዚአብሔር እንደ ሆንን ወደምናውቅበት ወደ እርግጠኝነት እምነት ማደግ ይገባናል፤ እንዲሁም በመንፈስ ቅዱስ መጽናናት እንመላለሳለን እንታነጻለንም። ኢየሱስ ክርስቶስ አሁን በወዳጆቹ ቤት እጅግ ቈስሏል። በዝርዝር ስለ መናገሬ ይቅርታ አድርጉልኝ፤ ወዳጆቼ ሆይ፥ ኢየሱስ ክርስቶስ በጠላቶቹ ከሚቈስል ይልቅ በወዳጆቹ መቍሰሉ አብልጦ ያሳዝነኛልና። ከዴይስቶች ሌላ ነገር ልንጠብቅ አንችልም፤ ነገር ግን ኃይሉን የቀመሱት ሲወድቁ፣ በተጠራችሁበት መጠራታችሁ እንደሚገባ ሳይመላለሱ ሲቀሩ — በዚህ የጌታችንን ሃይማኖት ለንቀት፣ በአሕዛብም መካከል መተረቻ እንዲሆን እናደርገዋለን። ስለ ክርስቶስ ብላችሁ፣ ክርስቶስን የምታውቁ ከሆናችሁ ከእርሱ አጠገብ ተጣበቁ፤ እግዚአብሔር ሰላምን ተናግሮ ከሆነ ኦ በየጊዜው ወደ ኢየሱስ ክርስቶስ በመመልከት ያን ሰላም ጠብቁ። ከእግዚአብሔር ጋር ሰላም ያገኛችሁ እናንተ፣ በመከራ ውስጥ ብትሆኑ አትፍሩ፤ ነገር ሁሉ ለበጎአችሁ ይደረጋል፤ በፈተና ውስጥ ብትሆኑ አትፍሩ፤ ለልባችሁ ሰላምን ተናግሮ ከሆነ እነዚህ ነገሮች ሁሉ ለበጎአችሁ ይሆናሉ።

ነገር ግን ከእግዚአብሔር ጋር ሰላም ለሌላችሁ ለእናንተ ምን ልበል? — ምናልባትም የዚህ ጉባኤ አብዛኞቹ እናንተ ናችሁ፤ ይህን ሳስብ ያስለቅሰኛል። ብዙዎቻችሁ ልባችሁን ብትመረምሩ እግዚአብሔር ገና ሰላምን እንዳልተናገራችሁ ልትመሰክሩ ግድ ነው፤ ክርስቶስ በእናንተ ከሌለ፣ እግዚአብሔርም ለልባችሁ ሰላምን ካልተናገረ የዲያብሎስ ልጆች ናችሁ። ምስኪን ነፍስ ሆይ! ምንኛ የተረገመ ሁኔታ ውስጥ ነህ። በአሥር ሺህ ጊዜ አሥር ሺህ ዓለማት ለውጬ እንኳ በአንተ ሁኔታ ውስጥ መሆን አልፈልግም። ለምን? በሲኦል አፋፍ ላይ ተንጠልጥለህ ነህና። እግዚአብሔር ጠላትህ ሆኖ ሳለ፣ የእግዚአብሔር ቍጣ በምስኪኒቱ ነፍስህ ላይ ተቀምጦ ሳለ ምን ሰላም ሊኖርህ ይችላል? እንግዲያስ በሐሰት ሰላም የምትተኙ እናንተ ንቁ፤ እናንተ ሥጋውያን ክርስቲያን ነን ባዮች፣ ወደ ቤተ ክርስቲያን የምትሄዱ፣ ቅዱስ ቍርባንን የምትቀበሉ፣ መጽሐፍ ቅዱሳችሁን የምታነቡ፣ ነገር ግን የእግዚአብሔር ኃይል በልባችሁ ላይ ከቶ ያልተሰማችሁ ግብዞች ንቁ፤ እናንተ በሥርዓት ብቻ ክርስቲያን ነን ባዮች፣ እናንተ የተጠመቃችሁ አሕዛብ፤ ንቁ፣ ንቁ፤ በሐሰት መሠረት ላይም አትረፉ። ስለ እናንተ በመናገሬ አትውቀሱኝ፤ በእውነት ይህ ለነፍሳችሁ ካለኝ ፍቅር የተነሣ ነው። በሰዶማችሁ ውስጥ ስትዘገዩና በዚያ ለመቅረት ስትፈልጉ አያችኋለሁ፤ ነገር ግን መልአኩ ወደ ሎጥ እንደ መጣ እኔም እጃችሁን ልይዝ ወደ እናንተ መጥቻለሁ። የምወድዳችሁ ወንድሞቼ ሆይ፥ ኑ፤ ሽሹ፣ ሽሹ፣ ሕይወታችሁን ለማዳን ወደ ኢየሱስ ክርስቶስ ሽሹ፤ ወደሚደማ አምላክ ሽሹ፤ ወደ ጸጋ ዙፋን ሽሹ፤ ልባችሁን እንዲሰብር እግዚአብሔርን ለምኑ፤ በሠራችሁት ኃጢአት እንዲወቅሳችሁ እግዚአብሔርን ለምኑ፤ በውርስ ኃጢአታችሁ እንዲወቅሳችሁ እግዚአብሔርን ለምኑ፤ በራስ ጽድቃችሁ እንዲወቅሳችሁ እግዚአብሔርን ለምኑ — እምነትን እንዲሰጣችሁና ኢየሱስ ክርስቶስን እንድትይዙ እንዲያስችላችሁ እግዚአብሔርን ለምኑ። ኦ ግድ የለሾች እናንተ፤ ለእናንተ የነጐድጓድ ልጅ መሆን አለብኝ፤ ኦ በነጐድጓድ እንኳ ቢሆን እግዚአብሔር ያንቃችሁ፤ የምናገራችሁ በእውነት ከፍቅር የተነሣ ነው። በሐሰት ሰላም ማንቀላፋት ምን እንደ ሆነ በአሳዛኝ ልምድ አውቃለሁ፤ ለረጅም ጊዜ አንቀላፍቼ ነበር፤ ስለ ጌታ ኢየሱስ ክርስቶስ ምንም ሳላውቅ ራሴን ክርስቲያን አድርጌ ለረጅም ጊዜ አስብ ነበር። ምናልባት ከብዙዎቻችሁ ይልቅ አልፌ ሄጄ ነበር፤ በሳምንት ሁለት ጊዜ እጦም ነበር፤ አንዳንድ ጊዜ በቀን ዘጠኝ ጊዜ እጸልይ ነበር፤ በየጌታ ቀን ሳላቋርጥ ቅዱስ ቍርባንን እቀበል ነበር፤ ሆኖም በልቤ ስለ ኢየሱስ ክርስቶስ ምንም አላውቅም ነበር፤ አዲስ ፍጥረት መሆን እንዳለብኝ አላውቅም ነበር — በነፍሴ ውስጥ ስለ ውስጣዊ ሃይማኖት ምንም አላውቅም ነበር። ምናልባትም እኔ ምስኪኑ ፍጡር እንደ ተታለልሁ ብዙዎቻችሁ ልትታለሉ ትችላላችሁ፤ ስለዚህ የምናገራችሁ በእውነት ለእናንተ ካለኝ ፍቅር የተነሣ ነው። ኦ ካልተጠነቀቃችሁ የሃይማኖት መልክ ነፍሳችሁን ያጠፋል፤ በእርሱ ላይ ታርፋላችሁ፤ ወደ ኢየሱስ ክርስቶስም ከቶ አትመጡም፤ እነዚህ ነገሮች ግን የሃይማኖት መንገዶች ብቻ እንጂ ፍጻሜው አይደሉም፤ የሚያምኑ ሁሉ ይጸድቁ ዘንድ ክርስቶስ የሕግ ፍጻሜ ነው። ኦ እንግዲያስ በአተላችሁ ላይ የረጋችሁ እናንተ ንቁ፤ እናንተ የቤተ ክርስቲያን አባል ነን ባዮች ንቁ፤ በሕይወት እንዳላችሁ ስም ያላችሁ፣ ሀብታሞች የሆናችሁ፣ አንዳችም የማያስፈልጋችሁ የሚመስላችሁ፣ ምስኪኖችና ዕውሮች የተራቆታችሁም መሆናችሁን የማታስተውሉ እናንተ ንቁ፤ መጥታችሁ ወርቅንና ነጭ ልብስን ኵልንም ከኢየሱስ ክርስቶስ ትገዙ ዘንድ እመክራችኋለሁ። ነገር ግን ጥቂት የቈሰሉ አንዳንዶች እንዳሉ ተስፋ አደርጋለሁ፤ እግዚአብሔር በከንቱ እንድሰብክ እንደማይተወኝ ተስፋ አደርጋለሁ፤ እግዚአብሔር ከክቡራን ነፍሶቻችሁ አንዳንዶቹን እንደሚደርስባቸው፣ ከእናንተም አንዳንዶቻችሁን ከሥጋዊ ግድ የለሽነታችሁ እንደሚያነቃችሁ ተስፋ አደርጋለሁ፤ ወደ ክርስቶስ ለመምጣት የፈቀዱ፣ በሐሰት መሠረት ላይ ሲገነቡ እንደ ነበሩ ማሰብ የጀመሩ አንዳንዶች እንዳሉ ተስፋ አደርጋለሁ። ምናልባት ዲያብሎስ ጣልቃ ገብቶ ከምሕረት ተስፋ እንድትቈርጡ ይነግራችሁ ይሆናል፤ ነገር ግን አትፍሩ፤ የተናገርኋችሁ ለእናንተ ካለኝ ፍቅር የተነሣ ብቻ ነው — ላነቃችሁና አደጋችሁን እንድታዩ ብቻ ነው። ከእናንተ ማንም ከእግዚአብሔር ጋር ሊታረቅ ቢፈቅድ፣ እግዚአብሔር አብ፣ ወልድና መንፈስ ቅዱስ ከእናንተ ጋር ሊታረቅ ፈቃደኛ ነው። ኦ እንግዲያስ ገና ሰላም ባይኖራችሁም ወደ ኢየሱስ ክርስቶስ ኑ፤ እርሱ ሰላማችን ነው፤ እርሱ ሰላም አድራጊያችን ነው — በእግዚአብሔርና በበደለው ሰው መካከል ሰላምን አድርጎአል። ከእግዚአብሔር ጋር ሰላምን ትፈልጋላችሁን? እንግዲያስ ሰላምን በገዛው በኢየሱስ ክርስቶስ በኩል ወደ እግዚአብሔር ሂዱ፤ ጌታ ኢየሱስ ለዚህ የልቡን ደም አፍስሶአል። ለዚህ ሞተ፤ ለዚህ ተነሣ፤ ወደ ላይኛው ሰማይ ዓረገ፤ አሁንም በእግዚአብሔር ቀኝ ይማልዳል። ምናልባት ለእናንተ ሰላም አይኖርም ብላችሁ ታስቡ ይሆናል። ለምን? ኃጢአተኞች ስለ ሆናችሁ? ክርስቶስን ስለ ሰቀላችሁት — በግልጥ ስላዋረዳችሁት — የእግዚአብሔርን ልጅ ደም ስለ ረገጣችሁ? ይህ ሁሉ ምንድር ነው? ሆኖም ለእናንተ ሰላም አለ። እስቲ ንገሩኝ፤ ኢየሱስ ክርስቶስ በሳምንቱ የመጀመሪያ ቀን ወደ ደቀ መዛሙርቱ በመጣ ጊዜ ምን አላቸው? የተናገረው የመጀመሪያ ቃል፣ እጆቹንና ጎኑን አሳያቸውና፦ «ሰላም ለእናንተ ይሁን» አለ። ይህም፦ ደቀ መዛሙርቴ ሆይ፥ አትፍሩ፤ እጆቼንና እግሮቼን እዩ፤ ስለ እናንተ እንዴት እንደ ተወጉ ተመልከቱ፤ ስለዚህ አትፍሩ እንደ ማለት ነው። ክርስቶስ ለደቀ መዛሙርቱ እንዴት ተናገረ? «ሄዳችሁ ለወንድሞቼ፥ በተለይም ልቡ ለተሰበረው ለጴጥሮስ፥ ክርስቶስ እንደ ተነሣ፥ ወደ አባቱና ወደ አባታችሁ ወደ አምላኩና ወደ አምላካችሁ እንደ ዓረገ ንገሩአቸው።» ክርስቶስም ከሙታን ከተነሣ በኋላ እንደ ኖኅ ርግብ የሰላምን የወይራ ቅርንጫፍ ይዞ ሰላምን እየሰበከ መጣ፤ «ሰላምን እተውላችኋለሁ፥ ሰላሜን እሰጣችኋለሁ።» እነዚህ እነማን ነበሩ? እንደ እኛ የክርስቶስ ጠላቶች ነበሩ፤ እንደ እኛ አንድ ጊዜ ክርስቶስን የካዱ ነበሩ።ምናልባት ከእናንተ አንዳንዶቻችሁ ወደ ኋላ ተመልሳችሁ ሰላማችሁን አጥታችሁ ይሆናል፤ ሰላምም አይገባንም ብላችሁ ታስቡ ይሆናል፤ በእርግጥም አይገባችሁም። ነገር ግን እግዚአብሔር ከዳተኛነታችሁን ይፈውሳል፤ በነጻ ይወድዳችኋል። የቈሰላችሁ እናንተ ግን፣ ወደ ክርስቶስ ለመምጣት ፈቃደኞች ከተደረጋችሁ ኑ። ምናልባት ከእናንተ አንዳንዶቻችሁ የበሰበሰ ጨርቅ ብቻ በሆነው በተግባራችሁ ራሳችሁን ማልበስ ትፈልጉ ይሆናል። አይደለም፤ ጨርቃችሁን ጥላችሁ በደማችሁ ልትመጡ ግድ ነውና እንዳላችሁ ዕራቁታችሁን ብትመጡ ይሻላችኋል። ከእናንተ አንዳንዶቻችሁ፦ በመጣን ነበር፤ ነገር ግን ልባችን ደንዳና ነው ትሉ ይሆናል። ነገር ግን ወደ ክርስቶስ እስክትመጡ ድረስ ልባችሁ ከቶ አይለሰልስም፤ እርሱ የድንጋዩን ልብ ያስወግዳል፤ የሥጋንም ልብ ይሰጣችኋል፤ ለነፍሳችሁ ሰላምን ይናገራል፤ አሳልፋችሁ ብትሰጡትም እንኳ እርሱ ሰላማችሁ ይሆናል። በዚህ ማለዳ ከእናንተ ማንም ወደ ኢየሱስ ክርስቶስ እንዲመጣ ላሳምን እችል ይሆን? እዚህ እጅግ ብዙ የነፍሳት ሕዝብ አለ፤ ሁላችሁም በምን ያህል ፍጥነት ትሞታላችሁ፣ ወደ ፍርድም ትሄዳላችሁ! ከምሽቱ በፊት ወይም በነገው ምሽት ከእናንተ አንዳንዶቻችሁ በዚህ የቤተ ክርስቲያን ቅጽር ግቢ ለመቀበር ልትዘጋጁ ትችላላችሁ። ከእግዚአብሔር ጋር ሰላም ከሌላችሁ — ጌታ ኢየሱስ ክርስቶስ ለልባችሁ ሰላምን ካልተናገረ — ምን ታደርጋላችሁ? እግዚአብሔር እዚህ ሰላምን ካልተናገራችሁ ለዘላለም ትፈረድባላችሁ። የምወድዳችሁ ወዳጆቼ ሆይ፥ ልሸነግላችሁ አይገባኝም፤ ከነፍሳችሁ ጋር በቅንነት እሠራለሁ። ከእናንተ አንዳንዶቻችሁ ነገሩን ከልክ በላይ እንዳራመድሁት ታስቡ ይሆናል። ነገር ግን በእውነት ወደ ፍርድ በመጣችሁ ጊዜ የምናገረው እውነት እንደ ሆነ ታገኛላችሁ፤ ለዘላለም ፍርዳችሁ ወይም ለመጽናናታችሁ። እግዚአብሔር ወደ እርሱ እንድትመጡ ልባችሁን ያነሣሣ! ሳላሳምናችሁ መሄድ አልፈልግም። እግዚአብሔር ከእናንተ አንዳንዶቻችሁ ወደ ጌታ ኢየሱስ ክርስቶስ እንዲመጡ ለማሳመን እንደ መሣሪያ ሊጠቀምብኝ እንደሚችል ከማመን ልመለስ አልችልም። ኦ ጌታ ኢየሱስ ክርስቶስን የሚወድዱ ያላቸውን ሰላም ምነው በተሰማችሁ! «ሕግህን ለሚወድዱ ብዙ ሰላም አላቸው፤» ይላል መዝሙረኛው፥ «ማሰናከያም የለባቸውም።» ለክፉዎች ግን ሰላም የላቸውም። በኃጢአት ሕይወት መኖር ምን እንደ ሆነ አውቃለሁ፤ ወቀሳን ለማፈን ኃጢአት ለመሥራት ተገድጄ ነበር። ከእናንተም ብዙዎቻችሁ የምትወስዱት መንገድ ይህ እንደ ሆነ እርግጠኛ ነኝ፤ ሰዎች ወዳሉበት ብትገቡ ወቀሳን ታባርራላችሁ። ነገር ግን ወደ ታች ወደ መሠረቱ በአንድ ጊዜ ብትወርዱ ይሻላችኋል፤ መደረግ አለበት — ቍስላችሁ መመርመር አለበት፤ አለዚያ ትፈረድባላችሁ። ግድ የማይሰጥ ነገር ቢሆን ኖሮ ስለ እርሱ አንድ ቃል እንኳ ባልተናገርሁ ነበር። ነገር ግን ያለ ክርስቶስ ትፈረድባላችሁ። እርሱ መንገድና እውነት ሕይወትም ነው። ያለ ክርስቶስ ወደ ሲኦል ትሄዳላችሁ ብዬ ማሰብ አልችልም። ከዘላለም ቃጠሎ ጋር እንዴት ልትኖሩ ትችላላችሁ? ከዲያብሎስ ጋር ለዘላለም መኖርን ማሰብ እንዴት ትችላላችሁ? በኋላ በኢየሱስ ክርስቶስ ወደ ሲኦል ከመላክ ይልቅ እዚህ ጥቂት የነፍስ ጭንቀት ቢኖራችሁ አይሻልምን? ሲኦል ከክርስቶስ ተለይቶ መኖር ካልሆነ ምንድር ነው? ሌላ ሲኦል ባይኖር እንኳ ያ ብቻ በቂ ሲኦል በሆነ ነበር። ከዲያብሎስ ጋር ለዘላለም መሠቃየት ሲኦል ይሆናል። እንግዲያስ ከእግዚአብሔር ጋር ተዋወቁ፤ ሰላምም ይኑራችሁ። ምስኪንና ከንቱ የኢየሱስ ክርስቶስ መልእክተኛ ሆኜ ከእግዚአብሔር ጋር ታረቁ ብዬ እለምናችኋለሁ። በዚህ ማለዳ፣ በሳምንቱ የመጀመሪያ ቀን፣ ሥራዬ ክርስቶስ ከእናንተ ጋር ሊታረቅ ፈቃደኛ እንደ ሆነ ልነግራችሁ ነው። ከእናንተ ማንም ከኢየሱስ ክርስቶስ ጋር ይታረቃልን? እንግዲያስ ኃጢአታችሁን ሁሉ ይቅር ይላችኋል፤ መተላለፋችሁንም ሁሉ ይደመስሳል። ነገር ግን በክርስቶስ ላይ እያመፃችሁ፣ በየዕለቱም እየወጋችሁት ብትቀጥሉ — ኢየሱስ ክርስቶስን እያዋረዳችሁ ብትቀጥሉ — የእግዚአብሔር ቍጣ በእናንተ ላይ እንደሚወርድ ልትጠብቁ ይገባችኋል። እግዚአብሔር አይዘበትበትም። ሰው የሚዘራውን ሁሉ ያንኑ ደግሞ ያጭዳል። ከእግዚአብሔር ጋር በሰላም መኖር ባትፈልጉ እግዚአብሔርም ከእናንተ ጋር በሰላም አይኖርም። እግዚአብሔር በተቈጣ ጊዜ በፊቱ ማን ሊቆም ይችላል? በተቈጣ አምላክ እጅ መውደቅ የሚያስፈራ ነገር ነው። ሰዎቹ ክርስቶስን ሊይዙ በመጡ ጊዜ ኢየሱስ፦ «እኔ ነኝ» ባለ ጊዜ በምድር ወደቁ። የሟችነትን ጨርቅ ለብሶ ሳለ ክርስቶስን ማየት ካልቻሉ፣ በአባቱ ዙፋን ላይ ሳለ እንዴት ሊያዩት ይችላሉ? ምስኪኖቹ ጐስቋሎች በዲያብሎስ ከመቃብራቸው ሲጐተቱ የማይ ይመስለኛል፤ እየተንቀጠቀጡ ተራሮችንና ዓለቶችን እንዲሰውሯቸው ሲጮኹ የማይ ይመስለኛል። ነገር ግን ዲያብሎስ፦ ኑ፤ እወስዳችኋለሁ ይላል፤ ከዚያም በክርስቶስ የፍርድ ወንበር ፊት እየተንቀጠቀጡ ይቆማሉ። አንድ ጊዜ ሊያዩትና፦ «እናንተ ርጉማን፥ ለሰይጣንና ለመላእክቱ ወደ ተዘጋጀ ወደ ዘላለም እሳት ከእኔ ሂዱ።» የሚለውን የማይሻረውን ፍርድ ሲናገር ሊሰሙት በፊቱ ይቀርባሉ። ምስኪኖቹ ፍጡራን፦ ጌታ ሆይ፥ መፈረድ ካለብን አንድ መልአክ ፍርዱን ይናገር ሲሉ የምሰማ ይመስለኛል። አይደለም፤ የፍቅር አምላክ ኢየሱስ ክርስቶስ ራሱ ይናገረዋል። ይህን አታምኑምን? በዘፈቀደ የምናገር አይምሰላችሁ፤ የምናገረው ከእውነት መጻሕፍት ጋር በሚስማማ መንገድ ነው። እንግዲያስ ካላመናችሁ ወንዶች መሆናችሁን አሳዩ፤ በዚህ ማለዳ በእግዚአብሔር ኃይል ከክርስቶስ ጋር ለመጣበቅ በሙሉ ቍርጠኝነት ሂዱ። በኢየሱስ ክርስቶስ እስክታርፉ ድረስም በነፍሳችሁ ዕረፍት አይኑራችሁ! ገና መቀጠል በቻልሁ ነበር፤ ስለ ክርስቶስ መናገር ጣፋጭ ነውና። አዲስ አካል የሚኖራችሁበትን — የማይሞትና ክቡር ሥጋውን እንዲመስል የሚለወጥበትን — ጊዜ አትናፍቁምን? ያን ጊዜም ለዘላለም ስለ ኢየሱስ ክርስቶስ ይናገራሉ። ነገር ግን ምናልባት ሄዳችሁ ለየአምልኮአችሁ የምትዘጋጁበት ጊዜ ደርሶአል፤ ከእናንተም ማንንም ማዘግየት አልፈልግም። አሳቤ ምስኪን ኃጢአተኞችን ወደ ኢየሱስ ክርስቶስ ማምጣት ነው። ኦ እግዚአብሔር ከእናንተ አንዳንዶቻችሁን ወደ ራሱ ያምጣችሁ! ጌታ ኢየሱስ አሁን በበረከቱ ያሰናብታችሁ፤ ውዱ ቤዛም ያልነቃችሁትን እናንተን ይውቀሳችሁ፤ ክፉዎችንም ከክፉ መንገዳቸው ይመልስ! አእምሮን ሁሉ የሚያልፍ የእግዚአብሔር ፍቅርም ልባችሁን ይሙላ። አባት ሆይ፥ ይህን ስለ ክርስቶስ ብለህ ስጠን፤ ለእርሱ ከአንተና ከተባረከው መንፈስ ጋር ክብርና ምስጋና ሁሉ ከአሁን እስከ ለዘላለም ይሁን። አሜን።