ለቅዱሳን ሁሉ

ስድስተኛ ቀን። እግዚአብሔርን መጠበቅ፦ ለቅዱሳን ሁሉ።

«አንተን የሚጠባበቁ ሁሉ አያፍሩ።»— መዝሙር 25:3

እንግዲህ በዛሬው ማሰላሰላችን እያንዳንዳችን ራሳችንን እንርሳ፤ ከእኛ ጋር ሆነው ሁሉም እርሱን እየጠበቁ ስላሉት፣ በዓለም ሁሉ ስለሚገኙት ስለ ታላቁ የእግዚአብሔር ቅዱሳን ጉባኤ እናስብ። ሁላችንም ስለ እርስ በርሳችን፦ «አንተን የሚጠባበቁ ሁሉ አያፍሩ» በሚለው ብርቱ ጸሎት እንተባበር።

ይህን ጸሎት የሚያስፈልጋቸውን የሚጠባበቁትን ብዙ ሕዝብ ለአፍታ አስብ፤ ስንቶቹ ታመው፣ ደክመውና ብቸኞች ሆነው፣ ጸሎታቸው መልስ ያላገኘ የሚመስላቸውና አንዳንድ ጊዜም ተስፋቸው ለኀፍረት ይሆን ብለው መፍራት የሚጀምሩ ናቸው። ደግሞም በሥራቸው ተስፋቸው የከሸፈባቸውና ለኃይልና ለበረከት ያላቸው ናፍቆት ያልረካላቸው፣ በልዩ ልዩ ስም የሚጠሩ ስንት የእግዚአብሔር አገልጋዮች፣ የወንጌል አገልጋዮች ወይም ሚስዮናውያን፣ አስተማሪዎች ወይም ሠራተኞች አሉ። ደግሞም ዕረፍትና ፍጹም ሰላም ስላለበት፣ ጸንቶ የሚኖር ብርሃንና ኅብረት ስላለበት፣ ብርታትና ድል ስላለበት ሕይወት ሰምተው መንገዱን ማግኘት ያቃታቸው ስንቶቹ ናቸው። በእነዚህ ሁሉ ዘንድ ያለው ነገር አንድ ብቻ ነው፤ እግዚአብሔርን በሙላት የመጠበቅን ምሥጢር ገና አልተማሩም። የሚያስፈልጋቸው ሁላችንም የሚያስፈልገንን ነው፤ ይኸውም እግዚአብሔርን መጠበቅ ፈጽሞ ከንቱ ሊሆን እንደማይችል የሚሰጥ ሕያው ማረጋገጫ ነው። ሊደክሙ ወይም ሊታክቱ በአደጋ ላይ ያሉትን ሁሉ እናስብ፤ ሁላችንም በአንድነት፦ «አንተን የሚጠባበቁ ሁሉ አያፍሩ»! ብለን እንጩኽ።

ስለ ራሳችን እግዚአብሔርን መጠበቃችን፣ እግዚአብሔርን ስለሚጠብቁ ሁሉ ይህን ምልጃ ማቅረብን የሚጨምር ከሆነ፣ የአንዳችንን ሸክም ሌላችን ለመሸከም እንረዳዳለን፤ እንዲሁም የክርስቶስን ሕግ እንፈጽማለን።

እግዚአብሔርን በመጠበቃችን ውስጥ ያ ራስ ወዳድነት የሌለበትና ፍቅር የሞላበት ባሕርይ ይገባል፤ እርሱም ወደ ከፍተኛው በረከትና ከእግዚአብሔር ጋር ወደሚገኘው ሙሉ ኅብረት የሚያደርስ መንገድ ነው። ወንድሞችን መውደድና እግዚአብሔርን መውደድ የማይለያዩ ሆነው የተሳሰሩ ናቸው። በእግዚአብሔር ዘንድ ለልጁ ያለው ፍቅርና ለእኛ ያለው ፍቅር አንድ ነው፦ «እኔንም የወደድህባት ፍቅር በእነርሱ እንድትሆን።» በክርስቶስ ዘንድ አብ ለእርሱ ያለው ፍቅርና እርሱ ለእኛ ያለው ፍቅር አንድ ነው፦ «አብ እንደ ወደደኝ እኔ ደግሞ ወደድኋችሁ።» በእኛ ዘንድ ደግሞ ለእኛ ያለው ፍቅሩ ለወንድሞች የእኛ ፍቅር እንዲሆን ይለምናል፦ «እንደ ወደድኋችሁ እናንተ ደግሞ እርስ በርሳችሁ ትዋደዱ ዘንድ።» የእግዚአብሔርና የክርስቶስ ፍቅር ሁሉ ከወንድሞች ፍቅር ጋር የማይለያይ ሆኖ የተሳሰረ ነው። ታዲያ ስለ እርስ በርሳችን በየዕለቱ ከመጸለይ በቀር ይህን ፍቅር ዕለት ዕለት በምን ሌላ መንገድ ልናረጋግጠውና ልናሳድገው እንችላለን? ክርስቶስ የአብን ፍቅር ለራሱ ብቻ ሊደሰትበት አልፈለገም፤ ሁሉንም ለእኛ አስተላለፈልን። እግዚአብሔርንና ፍቅሩን ለራሳችን በእውነት መፈለጋችን ሁሉ፣ ስለ ወንድሞቻችን ከማሰብና ለእነርሱ በመጸለይ ከምናሳየው ፍቅር ጋር የማይለያይ ሆኖ የተሳሰረ ይሆናል።

«አንተን የሚጠባበቁ ሁሉ አያፍሩ።» ዳዊት በመዝሙሩ ውስጥ ሁለት ጊዜ ስለ ራሱ እግዚአብሔርን መጠበቁን ይናገራል፤ እዚህ ግን እርሱን ስለሚጠብቁ ሁሉ ያስባል። ይህ ገጽ ለተፈተኑትና ለደከሙት የእግዚአብሔር ልጆች ሁሉ፣ ከሚያውቁት በላይ ብዙዎች እየጸለዩላቸው እንደ ሆኑ የሚገልጥ መልእክት ያድርስላቸው። እነርሱንም እኛንም በመጠበቃችን አንዳንድ ጊዜ ራሳችንን ሆን ብለን እንድንረሳ፣ ልባችንንም እንድናሰፋ፣ አብንም፦ «እነዚህ ሁሉ አንተን ይጠብቃሉ፤ አንተም ምግባቸውን በጊዜው ትሰጣቸዋለህ» እንድንለው ያነሣሣን። ሁላችንንም በአዲስ ድፍረት ያነቃቃን—አንዳንድ ጊዜ ሊደክምና ሊታክት የተቃረበ የማይሆን ማን አለና? «አንተን የሚጠባበቁ ሁሉ አያፍሩ» የሚለው በጸሎት ውስጥ ያለ የተስፋ ቃል ነው፦ «አንተን የሚጠባበቁ አያፍሩም»! ከብዙ ብዙ ምስክሮች እርዳታ ለሚያስፈልገው ሁሉ፣ ለወንድም፣ ለእኅት፣ ለተፈተነው ሁሉ እንዲህ የሚል ጩኸት ይመጣል፦ «እግዚአብሔርን ጠብቅ፤ አይዞህ፥ እርሱም ልብህን ያጸናዋል፤ እግዚአብሔርን ጠብቅ እላለሁ። እግዚአብሔርን የምትጠባበቁ ሁላችሁ፥ አይዟችሁ፥ እርሱም ልባችሁን ያጸናዋል።»

የተባረክህ አባት ሆይ! አንተን የሚጠባበቁ ሁሉ አያፍሩ ብለን በትሕትና እንለምንሃለን፤ አንድ ስንኳ አያፍር። አንዳንዶች ደክመዋል፤ የመጠበቁም ጊዜ ረጅም መስሎ ይታያቸዋል። አንዳንዶችም ደካሞች ናቸው፤ እንዴት መጠበቅ እንዳለባቸው እንኳ በጭንቅ ያውቃሉ። አንዳንዶችም በጸሎታቸውና በሥራቸው ጥረት እጅግ ስለ ተጠላለፉ ዘወትር ለመጠበቅ ጊዜ የሚያገኙ አይመስላቸውም። አባት ሆይ! ሁላችንንም እንዴት መጠበቅ እንዳለብን አስተምረን። እርስ በርሳችን እንድንተሳሰብና ስለ እርስ በርሳችን እንድንጸልይ አስተምረን። የሚጠባበቁ ሁሉ አምላክ የሆንኸውን አንተን እንድናስብ አስተምረን። አባት ሆይ! አንተን የሚጠባበቁ ሁሉ አያፍሩ። ስለ ኢየሱስ ብለህ። አሜን።

«ነፍሴ ሆይ፥ እግዚአብሔርን ብቻ ጠብቂ!»