ለሚያስፈልገን ሁሉ

አራተኛ ቀን። እግዚአብሔርን መጠበቅ፦ ለሚያስፈልገን ሁሉ።

«እግዚአብሔር የሚወድቁትን ሁሉ ይደግፋቸዋል፥

የተዋረዱትንም ሁሉ ያነሣቸዋል።

የሁሉ ዓይን አንተን ይጠብቃል፤

አንተም ምግባቸውን በጊዜው ትሰጣቸዋለህ።»

—መዝሙር 145:14፣ 15።

መዝሙር 104 የፍጥረት መዝሙር ነው፤ «እነዚህ ሁሉ አንተን ይጠብቃሉ» የሚለውም ቃል የተነገረው ስለ እንስሳት ፍጥረት ነበር። እዚህ ግን የመንግሥቱ መዝሙር አለን፤ «የሁሉ ዓይን አንተን ይጠብቃል» የሚለውም በተለይ የሚያመለክተው የእግዚአብሔርን ቅዱሳን ፍላጎት፣ የሚወድቁትንና የተዋረዱትን ሁሉ ፍላጎት ይመስላል። ጽንፈ ዓለሙና የእንስሳት ፍጥረት ሳያውቁት የሚያደርጉትን፣ የእግዚአብሔር ሕዝብ በማስተዋልና በገዛ ፈቃዳቸው ሊያደርጉት ይገባል። ሰው የተፈጥሮ ተርጓሚ ሊሆን ይገባዋል። ነጻ ፈቃዳችንን ልንጠቀምበት ከምንችልበት መንገድ ሁሉ፣ እግዚአብሔርን ለመጠበቅ ከመጠቀም የበለጠ ክቡርም ሆነ ብፁዕ ነገር እንደሌለ ማረጋገጥ አለበት።

ወደ ጠላት አገር እንዲዘምት የተላከ ሠራዊት ወደ ፊት እየገሰገሰ እንዳልሆነ ወሬ ቢደርስ፣ ወዲያውኑ የመዘግየቱ ምክንያት ምን ሊሆን እንደሚችል ይጠየቃል። መልሱም ብዙ ጊዜ፦ «ስንቅ በመጠበቅ ላይ ነው» የሚል ይሆናል። የምግቡ፣ የልብሱ ወይም የጥይቱ ክምችት ሁሉ ገና አልደረሰም፤ ያለ እነዚህ ወደ ፊት ለመሄድ አይደፍርም። በክርስትና ሕይወትም ከዚህ የተለየ አይደለም፤ ዕለት ዕለት፣ በእያንዳንዱ እርምጃ፣ ከላይ የሚመጣልንን ስንቅ እንፈልጋለን። የሚያስፈልገው የጸጋና የኃይል ስንቅ ሳይደርስ ወደ ፊት ለመሄድ እምቢ የሚለውን፣ በእግዚአብሔር የመደገፍንና በእርሱ የመታመንን መንፈስ ከማሳደግ የበለጠ አስፈላጊ ነገር የለም።

ይህ በምንጸልይበት ጊዜ ከምናደርገው የተለየ ነገር ነውን ተብሎ ቢጠየቅ፣ መልሱ ይህ ነው፦ ብዙ ጸሎት እያለ እግዚአብሔርን መጠበቅ ግን እጅግ ጥቂት ሊሆን ይችላል። በምንጸልይበት ጊዜ ብዙ ጊዜ የምንጠመደው በራሳችን፣ በገዛ ፍላጎቶቻችንና እነርሱን ለማቅረብ በምናደርገው የራሳችን ጥረት ነው። እግዚአብሔርን በመጠበቅ ግን የመጀመሪያው ሐሳብ ስለምንጠብቀው አምላክ ነው። ወደ ፊቱ እንገባለን፤ እርሱም እንደ አምላክነቱ በራሱ ይጋርደን ዘንድ ዝም ማለት ብቻ እንደሚያስፈልገን ይሰማናል። እግዚአብሔር ራሱን ሊገልጥ፣ በራሱም ሊሞላን ይናፍቃል። እግዚአብሔርን መጠበቅ እርሱ በራሱ መንገድና በመለኮታዊ ኃይሉ ወደ እኛ ይመጣ ዘንድ ጊዜ ይሰጠዋል።

ይህን መንፈስ ለማሳደግ በተለይ ራሳችንን ልንሰጥ የሚገባን በጸሎት ጊዜ ነው።

ከመጸለይህ በፊት፣ እርሱ ማን እንደ ሆነ፣ ምን ያህል ቅርብ እንደ ሆነ፣ ሊረዳ እንደሚችልና በእርግጥም እንደሚረዳ ለማስታወስና ለመገንዘብ ብቻ በእግዚአብሔር ፊት በጸጥታ ስገድ። በፊቱ ዝም ብቻ በል፤ መንፈስ ቅዱሱም ፍጹም የመደገፍንና በእርግጠኝነት የመጠባበቅን የልጅነት ዝንባሌ በነፍስህ ውስጥ እንዲያነቃና እንዲያነሣሣ ፍቀድለት። እግዚአብሔርን እንደ ሕያው አካል፣ እንደ ሕያው አምላክ ጠብቅ፤ እርሱ ያስተውልሃል፣ በማዳኑም ሊሞላህ ይናፍቃል። እንደ ተገናኘኸው እስክታውቅ ድረስ እግዚአብሔርን ጠብቅ፤ ያን ጊዜ ጸሎት እጅግ የተለየ ይሆናል።

በምትጸልይበትም ጊዜ፣ የዝምታ ጊዜያት ይኑሩ፤ ይኸውም ሊያስተምርህ ወይም በአንተ ውስጥ ሊሠራ የሚፈልገው ነገር ቢኖር ብለህ ራስህን ለእግዚአብሔር የምትሰጥበት፣ በአክብሮት የተሞላ የነፍስ ጸጥታ ነው። እርሱን መጠበቅ የጸሎት እጅግ የተባረከ ክፍል ይሆናል፤ በዚህ መንገድ የተገኘውም በረከት ከቅዱሱ ጋር የተደረገ እንዲህ ያለ ኅብረት ፍሬ በመሆኑ እጥፍ ውድ ይሆናል። እርሱን መጠበቅ ለእርሱ የምንሰጠው ክብር እንዲሆን፣ እግዚአብሔር ከቅዱስ ባሕርዩና ከእኛም ባሕርይ ጋር በሚስማማ መንገድ እንዲሁ ወስኖአል። ይህን አገልግሎት በደስታና በእውነት እናቅርብለት፤ እርሱም አትረፍርፎ ይከፍለናል።

«የሁሉ ዓይን አንተን ይጠብቃል፤ አንተም ምግባቸውን በጊዜው ትሰጣቸዋለህ።» ውድ ነፍስ ሆይ፣ እግዚአብሔር በተፈጥሮ ውስጥ ለፈጠራቸው ፍጥረታት ያዘጋጃል፤ በጸጋ ደግሞ ለዋጃቸውማ እንዴት አብልጦ ያዘጋጅላቸዋል። ስለ እያንዳንዱ ጉድለት፣ ስለ እያንዳንዱ ውድቀት፣ የሚያስፈልግህም ጸጋ ስለ ጐደለህ ሁሉ እንዲህ ማለትን ተማር፦ እግዚአብሔርን የጠበቅሁት እጅግ ጥቂት ነው፤ አለዚያማ የሚያስፈልገኝን ሁሉ በጊዜው በሰጠኝ ነበር። ከዚያም ደግሞ እንዲህ በል—

«ነፍሴ ሆይ፥ እግዚአብሔርን ብቻ ጠብቂ!»