የፍጡር እውነተኛ ስፍራ

ሦስተኛ ቀን። እግዚአብሔርን መጠበቅ፦ የፍጡር እውነተኛ ስፍራ።

«እነዚህ ሁሉ አንተን ይጠብቃሉ፤

ምግባቸውን በጊዜው ትሰጣቸው ዘንድ።

አንተ የምትሰጣቸውን ይሰበስባሉ፤

እጅህን ትከፍታለህ፥ መልካምንም ይጠግባሉ።»

መዝሙር 104:27, 28 (የተሻሻለው ትርጉም)።

ፈጣሪን የሚያመሰግነው ይህ መዝሙር ስለ ወፎችና ስለ ዱር አራዊት፥ ስለ አንበሳ ግልገሎችና ወደ ሥራው ስለሚወጣ ሰው፥ ቍጥር የሌላቸው ተንቀሳቃሾች፥ ታናናሽና ታላላቅ እንስሶች ስላሉበት ስለ ታላቁ ባሕር ሲናገር ቆይቷል። የፍጥረትን ሁሉ ከፈጣሪው ጋር ያለውን ግንኙነት ሁሉ፥ በእርሱም ላይ ያለውን የማያቋርጥና ሁሉን አቀፍ መደገፍ በዚህ አንድ ቃል ይጠቀልለዋል፦ «እነዚህ ሁሉ አንተን ይጠብቃሉ!» መፍጠር የእግዚአብሔር ሥራ እንደ ነበረ ሁሉ፥ ማኖርም የእርሱ ሥራ ነው። ፍጡር ራሱን መፍጠር እንዳልቻለ ሁሉ፥ ራሱን እንዲያኖርም አልተተወም። ፍጥረት ሁሉ በአንድ በማይለወጥ ሕግ ይገዛል፤ ይኸውም—እግዚአብሔርን መጠበቅ!

ይህ ቃል ፍጡር ወደ ሕልውና የመጣበትን ብቸኛ ዓላማ፥ የአፈጣጠሩንም መሠረት በቀላሉ የሚገልጥ ነው። እግዚአብሔር ለፍጡራን ሕይወትን የሰጠበት ብቸኛ ዓላማ፥ በየቅጽበቱ ሕይወታቸውና ደስታቸው በመሆን፥ እንደ አቅማቸውም የቸርነቱንና የኃይሉን ባለጠግነት በእነርሱ ላይ በማፍሰስ ጥበቡን፥ ኃይሉንና ቸርነቱን በእነርሱ ያረጋግጥና ይገልጥ ዘንድ ነው። የፍጡርን ጕድለት ሁሉ ያለማቋረጥ መሙላት የእግዚአብሔር ስፍራና ባሕርይ እንደ ሆነ ሁሉ፥ የፍጡርም ስፍራና ባሕርይ ከዚህ በቀር ሌላ አይደለም—እግዚአብሔርን መጠበቅና እርሱ ብቻ ሊሰጠው የሚችለውን፥ ሊሰጠውም ደስ የሚለውን ከእርሱ መቀበል። (ስለ ሎው የተጻፈውን ማስታወሻ ተመልከት፤ የመንፈስ ኃይል።)

በዚህ ትንሽ መጽሐፍ እግዚአብሔርን መጠበቅ ለአማኝ ምን ሊሆንለት እንደሚገባ ልንገነዘብ፥ ልንለማመደውና ብፅዕናውን ልንቀምስ ከሆነ፥ ከመጀመሪያው ጀምረን ወደ እኛ የሚመጣው ጥሪ ምን ያህል ጥልቅ ምክንያታዊነት እንዳለው ማየታችን አስፈላጊ ነው። ይህ ኃላፊነት እንዲሁ በዘፈቀደ የተሰጠ ትእዛዝ እንዳልሆነ እንረዳለን። አስፈላጊ የሆነው በኃጢአታችንና በአቅመ ቢስነታችን ምክንያት ብቻ እንዳልሆነ እናያለን። ይህ በቀላሉና በእውነት ወደ መጀመሪያው ዕጣ ፈንታችንና ወደ ከፍተኛው ክብራችን፥ ሁሉ በሁሉ ክቡር በሆነው አምላክ ላይ በብፅዕና የምንደገፍ ፍጡራን እንደ መሆናችን ወደ እውነተኛ ስፍራችንና ክብራችን መመለሳችን ነው።

ዓይኖቻችን ለዚህ ክቡር እውነት አንድ ጊዜ ከተከፈቱ፥ ተፈጥሮ ሁሉ በፍጥረት የተመሠረተውንና አሁን በጸጋ የታደሰውን ግንኙነት የምታሳስበን ሰባኪ ትሆናለች። ይህን መዝሙር ስናነብ፥ በተፈጥሮ ያለውን ሕይወት ሁሉ እግዚአብሔር ራሱ ዘወትር እንደሚያኖረው አድርገን መመልከትን ስንማር፥ እግዚአብሔርን መጠበቅ ለሕልውናችን የግድ አስፈላጊ መሆኑ ይታያል። ወደ እርሱ ስለሚጮኹት የአንበሳ ግልገሎችና ቍራዎች፥ ምግባቸውን በጊዜው እስኪሰጣቸው ድረስ እርሱን ስለሚጠብቁ ወፎች፥ ዓሦችና ነፍሳት ሁሉ ስናስብ፥ የሚጠበቅ አምላክ መሆኑ የእግዚአብሔር ባሕርይና ክብር እንደ ሆነ እናያለን። ተፈጥሮ ምን እንደ ሆነች፥ እግዚአብሔርም ምን እንደ ሆነ የምናስበው ሐሳብ ሁሉ «እግዚአብሔርን ብቻ ጠብቂ» ለሚለው ጥሪ አዲስ ኃይል ይሰጠዋል።

«እነዚህ ሁሉ ትሰጣቸው ዘንድ አንተን ይጠብቃሉ።» ሁሉን የሚሰጥ እግዚአብሔር ነው፤ ይህ እምነት በልባችን ውስጥ ጠልቆ ይግባ። እግዚአብሔርን መጠበቅ የሚያመለክተውን ሁሉ በሙላት ከመረዳታችን በፊት፥ ልማዱንም ማዳበር ከመቻላችን በፊት፥ ይህ እውነት ወደ ነፍሳችን ይግባ፦ እግዚአብሔርን መጠበቅ፥ በእርሱ ላይ የማያቋርጥና ፍጹም መደገፍ፥ በሰማይም በምድርም ብቸኛው እውነተኛ ሃይማኖት ነው፤ በእርሱ ሆነን ከምንኖረው ከዘላለም ቡሩክ አምላክ ጋር ላለው እውነተኛ ግንኙነት ብቸኛውና የማይለወጠው፥ ሁሉንም የሚያጠቃልለው መግለጫ ነው።

ዘወትር፥ በትሕትናና በመታመን እግዚአብሔርን መጠበቅ የሕይወታችንና የአምልኳችን ብቸኛ መለያ እንዲሆን አሁኑኑ እንወስን። ራሱን ለእኛና በእኛ ይሰጥ ዘንድ ለራሱ የፈጠረን እርሱ ፈጽሞ እንደማያሳፍረን እርግጠኞች ልንሆን እንችላለን። እርሱን በመጠበቅ ዕረፍትንና ደስታን ኃይልንም፥ የሚያስፈልገንንም ሁሉ እናገኛለን።

«ነፍሴ ሆይ፥ እግዚአብሔርን ብቻ ጠብቂ!»