ላልተጠበቁ ነገሮች

ሃያ ሦስተኛ ቀን። እግዚአብሔርን መጠበቅ፦ ላልተጠበቁ ነገሮች።

«ከዓለም መጀመሪያ ጀምሮ፥ አምላክ ሆይ፥ ከአንተ በቀር እርሱን ለሚጠብቀው ያዘጋጀውን ሰዎች አልሰሙም፥ በጆሮም አላስተዋሉም፥ ዓይንም አላየችም።»—ኢሳይያስ 64:4።

የተሻሻለው ትርጉም እንዲህ ይላል፦ «እርሱን ለሚጠብቀው የሚሠራ ከአንተ በቀር ሌላ አምላክ ዓይን አላየችም።» በተፈቀደው ትርጉም አሳቡ፥ እግዚአብሔር ያዘጋጀውን ነገር ዓይን አላየችም የሚል ነው። በተሻሻለው ትርጉም ደግሞ እርሱን ለሚጠብቀው የሚሠራ ከአምላካችን በቀር ሌላ አምላክ ዓይን አላየችም። ሁለቱም የሚጋሩአቸው ሁለት አሳቦች አሉ፦ ስፍራችን እግዚአብሔርን መጠበቅ እንደ ሆነ፥ የሰው ልብ ሊያስበው የማይችለውም ለእኛ እንደሚገለጥ። ልዩነቱ ይህ ነው፦ በተሻሻለው ትርጉም የሚሠራው አምላክ ነው፤ በተፈቀደው ትርጉም ደግሞ የሚሠራው ነገር ነው። በ1ኛ ቆሮንቶስ 2:9 ጥቅሱ የተጠቀሰው ልክ በተፈቀደው ትርጉም እንዳለው መንፈስ ቅዱስ ሊገልጣቸው ስላሉት ነገሮች ነው፤ በዚህ ማሰላሰልም በዚያው እንጸናለን።

ቀደም ያሉት ቍጥሮች፥ በተለይም ከምዕራፍ 63:15 ጀምሮ ያሉት፥ የእግዚአብሔር ሕዝብ ስለ ወደቁበት ዝቅተኛ ሁኔታ ይናገራሉ። ጸሎቱ ፈስሶአል፦ «ከሰማይ ተመልከት።» (ቍጥር 15።) «ልቤንስ እንዳልፈራህ ለምን አጸናህ? ስለ ባሪያዎችህ ስትል ተመለስ።» (ቍጥር 17።) በ64:1 ደግሞ ይበልጥ አጥብቆ እንዲህ ይላል፦ «ምነው ሰማያትን ቀደህ በወረድህ፥ . . . የሚያቀልጥ እሳት እንደሚነድድ፥ ስምህን ለጠላቶችህ ታስታውቅ ዘንድ!» ከዚያም ካለፈው የተወሰደው ልመና ይከተላል፦ «ያልጠበቅነውን የሚያስፈራ ነገር ባደረግህ ጊዜ ወረድህ፤ ተራሮችም በፊትህ ቀለጡ።» «ምክንያቱም»—ያልጠበቅናቸውን ነገሮች በማሰብ የነቃው እምነት አሁን ይህ ነው፤ እርሱ አሁንም ያው አምላክ ነው—«አምላክ ሆይ፥ ከአንተ በቀር እርሱን ለሚጠብቀው ያዘጋጀውን ዓይን አላየችም።» እግዚአብሔር ብቻ ለሚጠብቁት ሕዝቡ ምን ሊያደርግ እንደሚችል ያውቃል። ጳውሎስ እንደሚያብራራውና እንደሚተገብረው፦ «ከእግዚአብሔር መንፈስ በቀር ለእግዚአብሔር ያለውን ማንም አያውቅም።» ነገር ግን «ለእኛ እግዚአብሔር በመንፈሱ በኩል ገለጠው።»

የእግዚአብሔር ሕዝብ ችግርና እግዚአብሔር ጣልቃ እንዲገባ የሚቀርበው ጥሪ በኢሳይያስ ዘመን እንደ ነበረው በእኛም ዘመን አጣዳፊ ነው። ያን ጊዜ እንደ ነበረው፥ በዘመናት ሁሉ እንደ ነበረው፥ አሁንም እግዚአብሔርን በፍጹም ልባቸው የሚፈልጉ ቅሬታዎች አሉ። ነገር ግን የክርስትናን ዓለም በጠቅላላ፥ የክርስቶስን ቤተ ክርስቲያን ሁኔታ ብንመለከት፥ እግዚአብሔር ሰማያትን ቀዶ እንዲወርድ የምንለምንበት ወሰን የሌለው ምክንያት አለ። ሁሉን የሚችል ኃይል ልዩ ጣልቃ ገብነት እንጂ ሌላ ምንም አይጠቅምም። ክርስቲያን የተባለው ዓለም በእግዚአብሔር ፊት ምን እንደ ሆነ ትክክለኛ ግንዛቤ የለንም ብዬ እፈራለሁ። እግዚአብሔር «የሚያቀልጥ እሳት እንደሚነድድ፥ ስሙን ለጠላቶቹ ያስታውቅ ዘንድ» ካልወረደ፥ ድካማችን በአንጻራዊነት ፍሬ ቢስ ነው። የስብከት አገልግሎቱን ተመልከት—ምን ያህሉ በሰው ጥበብና በሥነ ጽሑፍ ትምህርት እንደ ሆነ፥ ምን ያህል ጥቂቱ ደግሞ በመንፈስና በኃይል መገለጥ እንደ ሆነ። የአካሉን አንድነት አስብ—የእግዚአብሔርን ልጆች አንድ አድርጎ የሚያስራቸው የሰማያዊ ፍቅር ኃይል መገለጥ ምን ያህል ጥቂት እንደ ሆነ። ቅድስናን አስብ—ክርስቶስን የመሰለ የትሕትናና ለዓለም የመሰቀል ቅድስና—በክርስቶስ በሰማይ የሚኖሩ፥ ክርስቶስና ሰማይም በእነርሱ ውስጥ የሚኖሩ ሰዎች በመካከላቸው እንዳሉ ዓለም የሚያየው ምን ያህል ጥቂት እንደ ሆነ።

ምን ይደረግ? አንድ ነገር ብቻ አለ። እግዚአብሔርን መጠበቅ አለብን። ለምንስ ነገር? ፈጽሞ በማያርፍ ጩኸት እንዲህ ብለን መጮኽ አለብን፦ «ምነው ሰማያትን ቀደህ በወረድህ፥ ተራሮችም በፊትህ በቀለጡ።» እግዚአብሔር ያልተጠበቁ ነገሮችን እንዲያደርግ ልንመኝና ልናምን፥ ልንለምንና ልንጠባበቅ ይገባናል። ለሚጠብቁት ያዘጋጀውን ሰዎች በማያውቁት አምላክ ላይ እምነታችንን ልንጥል ይገባናል። ከምንጠብቀው ሁሉ የሚበልጥ ተአምራትን የሚያደርግ አምላክ የመተማመናችን አምላክ ሊሆን ይገባዋል።

አዎን፥ የእግዚአብሔር ሕዝብ ከምንለምነው ወይም ከምናስበው ሁሉ እጅግ አብልጦ ሊያደርግ የሚችልን አምላክ ለመጠበቅ ልባቸውን ያስፉ። ሰዎች ስላላዩአቸው ነገሮች ቀንና ሌሊት ወደ እርሱ የሚጮኹ ምርጦቹ ሆነን በአንድነት እንሰለፍ። ተነሥቶ ሕዝቡን በምድር ላይ ስምና ምስጋና ሊያደርጋቸው ይችላል። «ይራራላችሁ ዘንድ ይጠብቃል፤ እርሱን የሚጠባበቁ ሁሉ ብፁዓን ናቸው።»

«ነፍሴ ሆይ፥ እግዚአብሔርን ብቻ ጠብቂ!»