ሁሉን ቻዩ አምላክ

ሃያ አንደኛ ቀን። እግዚአብሔርን መጠበቅ፦ ሁሉን ቻዩ አምላክ።

«እግዚአብሔርን የሚጠባበቁ ግን ኃይላቸውን ያድሳሉ፤ እንደ ንስር በክንፍ ይወጣሉ፤ ይሮጣሉ አይታክቱም፤ ይሄዳሉ አይደክሙም።»—ኢሳይያስ 40:31።

መጠበቅ ሁልጊዜ የምንጠብቀውን አካል በተመለከተ ያለንን አሳብ ባሕርይ ይይዛል። እግዚአብሔርን መጠበቃችን እርሱ ማን እንደ ሆነ በተመለከተ ባለን እምነት ላይ እጅግ የተመሠረተ ነው። በጥቅሳችን ውስጥ እግዚአብሔር ራሱን ዘላለማዊና ሁሉን ቻይ አምላክ አድርጎ የሚገልጥበትን ክፍል መደምደሚያ እናገኛለን። ያ መገለጥ ወደ ነፍሳችን ሲገባ ነው መጠበቅ እርሱ ምን እንደ ሆነ የምናውቀውን—ፈጽሞ ሊጠበቅ የሚገባው አምላክ መሆኑን—በራሱ ጊዜ የሚገልጥ መግለጫ የሚሆነው።

ቃሉን አድምጥ፦ «ያዕቆብ ሆይ፥ ስለ ምን፦ መንገዴ ከእግዚአብሔር ተሰውራለች ትላለህ?» እግዚአብሔር የማይሰማና የማይረዳ ይመስል ስለ ምን እንዲህ ትናገራለህ?

«ዘላለማዊው አምላክ፥ እግዚአብሔር፥ የምድር ዳርቻ ፈጣሪ እንደማይደክም እንደማይታክትም አላወቅህምን? አልሰማህምን?» ይልቁንም እንዲህ ነው፦ «ለደካማ ኃይልን ይሰጣል፥ ጕልበት ለሌለውም ብርታትን ያበዛል። ብላቴኖች እንኳ»—«የጐበዛዝት ክብር ጕልበታቸው ነው»—«ብላቴኖች እንኳ ይደክማሉ፥ ጐበዛዝትም ፈጽመው ይወድቃሉ፤» በሰው ዘንድ ብርቱ ተብሎ የሚቈጠር ሁሉ ከንቱ ይሆናል። «ነገር ግን እግዚአብሔርን የሚጠባበቁ»፥ የማይደክመውንና የማይታክተውን ዘላለማዊውን አምላክ የሚጠባበቁ፥ «ኃይላቸውን ያድሳሉ፤ እንደ ንስር በክንፍ ይወጣሉ፤ ይሮጣሉ»—አሁን አድምጥ፥ በእግዚአብሔር ኃይል ይበረታሉ፥ እንደ እርሱም «አይታክቱም፤ ይሄዳሉ»፥ እንደ እርሱም «አይደክሙም»።

አዎን፥ «እንደ ንስር በክንፍ ይወጣሉ።» የንስር ክንፍ ምን ማለት እንደ ሆነ ታውቃለህ። ንስር የወፎች ንጉሥ ነው፤ ወደ ሰማያት ከሁሉ ከፍ ብሎ ይበርራል። አማኞች በእግዚአብሔር ሀልዎት፥ ፍቅርና ደስታ ውስጥ ሆነው ሰማያዊ ሕይወት ሊኖሩ ይገባቸዋል። እግዚአብሔር በሚኖርበት ሊኖሩ ይገባቸዋል፤ ወደዚያ ለመውጣትም የእግዚአብሔር ኃይል ያስፈልጋቸዋል። እርሱን ለሚጠባበቁት ይህ ይሰጣቸዋል።

የንስር ክንፍ እንዴት እንደሚገኝ ታውቃለህ። በአንድ መንገድ ብቻ—በንስር ልደት። አንተ ከእግዚአብሔር ተወልደሃል። የንስር ክንፍ አለህ። ይህን አላወቅህ ይሆናል፤ ክንፎችህን ሳትጠቀምባቸው ቀርተህ ይሆናል፤ እግዚአብሔር ግን እንድትጠቀምባቸው ሊያስተምርህ ይችላል፥ ያስተምርህማል።

ንስሮች ክንፎቻቸውን መጠቀም እንዴት እንደሚማሩ ታውቃለህ። ከባሕር አንድ ሺህ ጫማ ከፍ ብሎ የቆመውን ያንን ገደል ተመልከት። ከፍ ብሎ በዓለቱ ላይ ያለውን ጠርዝ ተመልከት፤ በዚያ ሁለት የንስር ጫጩቶች፥ ውድ ሀብቱ፥ ያሉበት የንስር ጎጆ አለ። እናቲቱ ወፍ መጥታ ጎጆዋን ስትቀሰቅስ፥ ፈሪዎቹንም ጫጩቶች በመንቁሯ ገፍታ ከገደሉ አፋፍ ስትጥላቸው ተመልከት። እንዴት እንደሚርገፈገፉ፥ እንደሚወድቁና ወደ ጥልቁ እንደሚሰምጡ ተመልከት። አሁን ደግሞ ተመልከት (ዘዳግም 32:11)፦ «በጫጩቶቿ ላይ እንዴት እንደምትሰፍፍ፥ ክንፎቿን እንደምትዘረጋ፥ እንደምታነሣቸው፥ በክንፎቿም እንደምትሸከማቸው»፤ እንዲሁም በክንፎቿ ላይ ተቀምጠው ሲበሩ ወደ ደኅና ስፍራ ታደርሳቸዋለች። ይህንም ደጋግማ ታደርጋለች፤ በየጊዜው ከገደሉ አፋፍ ትጥላቸዋለች፥ ከዚያም እንደገና ታነሣቸዋለች፥ ትሸከማቸዋለችም። «እንዲሁ እግዚአብሔር ብቻውን መራው።» አዎን፥ የዚያች የእናት ንስር ደመ ነፍስ የእግዚአብሔር ስጦታ ነበር፤ ሁሉን ቻዩ አምላክ ሕዝቡን በንስር ክንፍ እንደሚወጡ አድርጎ የሚያሠለጥንበት የዚያ ፍቅር አንዲት ጨረር ነበር።

ጎጆህን ይቀሰቅሳል። ተስፋህን ያከሽፋል። መታመኛህን ያፈርሳል። ኃይልህ ሁሉ ሲከዳህ፥ ፈጽመህም እንደ ደከምህና አቅም እንዳጣህ ሲሰማህ፥ እንድትፈራና እንድትንቀጠቀጥ ያደርግሃል። በዚያን ጊዜ ሁሉ ግን ድካምህን እንድታሳርፍባቸው ብርቱ ክንፎቹን እየዘረጋልህ፥ በአንተ ውስጥ እንዲሠራም ዘላለማዊ የፈጣሪነት ኃይሉን እያቀረበልህ ነው። የሚጠይቅህም ሁሉ በድካምህ ውስጥ ዝቅ ብለህ እንድትጠብቀው፥ በሁሉን ቻይነቱም ክንፎች ላይ ተቀምጠህ ስትበር በእግዚአብሔርነቱ ኃይል እንዲሸከምህ እንድትፈቅድለት ብቻ ነው።

ውድ የእግዚአብሔር ልጅ ሆይ! እለምንሃለሁ፥ ዓይንህን አንሣ፥ አምላክህንም እይ! እንደማይደክም እንደማይታክትም የሚናገረውን፥ አንተም እንዳትደክምና እንዳትታክት ተስፋ የሚሰጠውን፥ ከዚህ አንዲት ነገር በቀር፥ እርሱን እንድትጠብቅ ከማለት በቀር፥ ምንም የማይጠይቅህን አድምጠው። መልስህም እንዲህ ይሁን፦ እንዲህ ካለ አምላክ ጋር፥ እጅግ ብርቱ፥ እጅግ ታማኝ፥ እጅግ ርኅሩኅ ከሆነ አምላክ ጋር፥

«ነፍሴ ሆይ፥ እግዚአብሔርን ብቻ ጠብቂ!»