መቅድም

መቅድም

ባለፈው ዓመት ወደ እንግሊዝ ከመሄዴ በፊት፥ በግልም ሆነ በጋራ በምንኖረው ሃይማኖታዊ ሕይወታችን ሁሉ እግዚአብሔር ይበልጥ እንደሚያስፈልገን የሚለው ሐሳብ በጥልቅ ይዞኝ ነበር። ሕዝባችንን በአምልኳቸው እግዚአብሔርን ይበልጥ እንዲጠብቁ ማሠልጠን እንደሚያስፈልገን፥ የመገኘቱን ጥልቅ ስሜት፥ ከእርሱ ጋር ይበልጥ ቀጥተኛ የሆነ ኅብረትን፥ በእርሱም ላይ ፍጹም መደገፍን ማሳደግ የአገልግሎታችን ግልጽ ግብ ማድረግ እንዳለብንም ተሰምቶኝ ነበር። በኤክሰተር አዳራሽ በተደረገልኝ የ«እንኳን ደህና መጣህ» ቁርስ ላይ፥ ይህን ሐሳብ ከሃይማኖታዊ ሥራችን ሁሉ ጋር አያይዤ እጅግ ቀላል በሆነ መንገድ ገለጽሁት። ይህ ሐሳብ ባገኘው ምላሽ መደነቄን ቀደም ሲል በሌላ ስፍራ ተናግሬአለሁ። የእግዚአብሔር መንፈስ ያንኑ ምኞት በብዙ ልቦች ውስጥ ሲሠራ እንደ ነበረ አየሁ።

ያለፈው ዓመት ልምምዶች፥ የግልም የጋራም፥ ይህን እምነቴን እጅግ አጥልቀውታል። ስለ እግዚአብሔርና ከእርሱ ጋር ስላለን ግንኙነት ያለው ጥልቁ እውነት በዚህ እግዚአብሔርን በመጠበቅ ላይ እንደሚያተኩር፥ በሕይወታችንና በሥራችንም የዚህ መንፈስ የከበበን እጅግ በጥቂቱ እንደ ሆነ እኔ ራሴ ገና ማየት የጀመርሁ ያህል ነው። የሚከተሉት ገጾች የዚህ እምነቴ ፍሬ ናቸው፤ የእግዚአብሔርን ሕዝብ ሁሉ ትኩረት ለሚያስፈልገን ሁሉ አንድ ታላቅ መፍትሔ ወደ ሆነው ነገር የመምራት ምኞቴም ፍሬ ናቸው። ከጽሑፎቹ ከግማሽ በላይ የተጻፉት በመርከብ ላይ ሳለሁ ነው፤ በመጠኑ ያልተሟሉና የችኮላ ምልክት ይታይባቸዋል ብዬ እሰጋለሁ። መልሼ ስመለከታቸው፥ ዳግመኛ ብጽፋቸው ብዬ ተመኘሁ። ይህን ግን አሁን ማድረግ አልችልም። ስለዚህ ደካሞችን መጠቀም የሚወድድ እርሱ ከእነርሱ ጋር በረከቱን እንዲሰጥ እየጸለይሁ እልካቸዋለሁ።

ልንማራቸው የሚገቡንን ዋና ዋና ነገሮች በጥቂት ቃላት ማስቀመጥ ይቻለኝ እንደ ሆነ አላውቅም። በመጽሐፉ መጨረሻ ስለ ሎው በጻፍሁት ማስታወሻ አንዳንዶቹን ጠቅሻለሁ። እዚህ ልናገር የምፈልገው ግን ይህ ነው፦ የሃይማኖታችን ታላቅ ጕድለት፥ እግዚአብሔርን አለማወቃችን ነው። ስለ ድካምና ስለ ውድቀት ለሚቀርብ ለእያንዳንዱ ማጕረምረም የሚሰጠው መልስ፥ ስለ ቅድስና ትምህርት ለሚሹ ጉባኤዎችና ስብሰባዎች ሁሉ የሚነገረው መልእክት፥ በቀላሉ እንዲህ የሚል ሊሆን ይገባዋል፦ ምን ሆነሃል? እግዚአብሔር የለህምን? በእርግጥ በእግዚአብሔር የምታምን ከሆነ፥ እርሱ ሁሉን ያቀናል። እግዚአብሔር በመንፈስ ቅዱሱ ለማድረግ ፈቃደኛም ችሎታም ያለው ነው። ከራስህ ትንሹን መልካም ነገር እንኳ፥ በሰው ውስጥ ካለ ከማንኛውም ነገር ትንሹን እርዳታ እንኳ መጠበቅ ተው፤ እግዚአብሔርም በአንተ እንዲሠራ ምንም ሳታስቀር ራስህን ብቻ ስጠው፤ እርሱ ሁሉን ያደርግልሃል።

ይህ እንዴት ቀላል ይመስላል! ሆኖም ይህ እጅግ በጥቂቱ የምናውቀው ወንጌል ነው። እነዚህን እጅግ ጕድለት ያለባቸውን ማሰላሰያዎች ስልካቸው አፍራለሁ፤ ላደርግ የምችለው በወንድሞቼና በአምላካችን ፍቅር ላይ መጣል ብቻ ነው። እርሱ ሁላችንን ወደ ራሱ ለመሳብ፥ እግዚአብሔርን ብቻ የመጠበቅን የተባረከ ጥበብ በተግባርና በልምምድ እንድንማርም ይጠቀምባቸው። በሐሳብ ወይም በምናብ ወይም በጥረት ሳይሆን በመንፈስ ቅዱስ ኃይል ፈጽሞ እግዚአብሔርን ለመጠበቅ የተሰጠ ሕይወት ምን ዓይነት ተጽዕኖ እንደሚኖረው ትክክለኛ ግንዛቤ ብናገኝ ምንኛ መልካም በሆነ!

ለመገናኘት ዕድል ላገኘኋቸው ለእግዚአብሔር ቅዱሳን ሁሉ፥ ላልተገናኘኋቸውም እንዲሁ፥ በክርስቶስ ሰላምታዬን እያቀረብሁ፥ ወንድማችሁና አገልጋያችሁ ሆኜ ስሜን እፈርማለሁ፦

አንድሪው መሪ።

ዌሊንግተን

ማርች 3 ቀን 1896

[ገጽ 16 ባዶ ነው]