የእግዚአብሔር ታላቅ ቸርነትና ፍቅር በዚህ ቅዱስ ቍርባን ለሰው መገለጡ

ደቀ መዝሙሩ፦

ጌታ ሆይ፥ በቸርነትህና በታላቅ ምሕረትህ ታምኜ፣ በሽተኛ ወደ ፈዋሹ፣ የተራበና የተጠማ ወደ ሕይወት ምንጭ፣ ችግረኛ ወደ ሰማይ ንጉሥ፣ አገልጋይ ወደ ጌታው፣ ፍጥረት ወደ ፈጣሪው፣ ብቸኝነት የወረሳት ነፍስ ወደ ገሩ አጽናኜ እንደሚመጣ እመጣለሁ።

ነገር ግን አንተ ወደ እኔ ትመጣ ዘንድ ይህ እንዴት ይሆንልኛል? ራስህን ለእኔ ትሰጥ ዘንድ እኔ ማን ነኝ? ኃጢአተኛው በፊትህ ለመቅረብ እንዴት ይደፍራል? አንተስ ወደ ኃጢአተኛው ለመምጣት እንዴት ዝቅ ትላለህ? አገልጋይህን ታውቀዋለህ፤ ይህን ትሰጠው ዘንድ የሚያበቃው አንዳች መልካም ነገር በእርሱ እንደሌለም ታውቃለህ።

ስለዚህ የማይገባኝ መሆኔን እመሰክራለሁ። ቸርነትህን አምናለሁ። ምሕረትህን አመሰግናለሁ፤ ስለ ወሰን የለሽ ፍቅርህም ምስጋና አቀርባለሁ። ይህን የምታደርገው ስለ ራስህ ብለህ ነውና፤ ስለ እኔ ዋጋ አይደለም፤ ይኸውም ቸርነትህ ይበልጥ እንዲታወቀኝ፣ በእኔም ውስጥ የበለጠ ፍቅር እንዲነሣሣና ይበልጥ ፍጹም ትሕትና እንዲወለድ ነው። እንግዲህ ይህ ደስ ካሰኘህና እንዲህ ከፈቀድህ፣ ቸርነትህ እኔንም ደስ ያሰኘኛል። ኃጢአተኛነቴ እንቅፋት ባይሆን ምንኛ በወደድሁ!

እጅግ ጣፋጭና መሐሪ ኢየሱስ ሆይ፥ ማንም ሰው ክብሩን ሊገልጥ የማይችለውን ቅዱስ ሥጋህን ስለምንቀበል እንዴት ያለ ታላቅ አክብሮት፣ ምስጋናና የማያቋርጥ ውዳሴ ይገባሃል!

ነገር ግን በዚህ ቍርባን፣ እንደሚገባ ፈጽሞ ላከብረው ወደማልችለው፣ ነገር ግን በአምልኮ ልቀበለው ወደምመኘው ወደ ጌታዬ በምቀርብበት በዚህ ጊዜ ምን ላስብ? በፊትህ ራሴን ፈጽሜ ከማዋረድና ወሰን የሌለውን ቸርነትህን ከራሴ በላይ ከፍ ከማድረግ የተሻለና ይበልጥ የሚጠቅመኝ ሐሳብ ምን አለ?

አምላኬ ሆይ፥ አመሰግንሃለሁ፤ ለዘላለምም ከፍ ከፍ አደርግሃለሁ! ራሴን እንቃለሁ፤ በማይገባኝ መሆኔ ጥልቀትም በፊትህ እወድቃለሁ። እነሆ፥ አንተ ቅዱሰ ቅዱሳን ነህ፤ እኔ ደግሞ የኃጢአተኞች ጥራጊ ነኝ! እነሆ፥ ቀና ብዬ ልመለከትህ ወደማይገባኝ ወደ እኔ ዝቅ ትላለህ! እነሆ፥ ወደ እኔ ትመጣለህ! ከእኔ ጋር ልትሆን ትወዳለህ! ወደ ግብዣህ ትጠራኛለህ! ሰማያዊውን ምግብ፣ የመላእክትን እንጀራ ልትመግበኝ ትወዳለህ፤ ይህም ከሰማይ የወረድህና ለዓለም ሕይወትን የምትሰጥ ሕያው እንጀራ ከሆንኸው ከራስህ በቀር ሌላ አይደለም።

እነሆ፥ ፍቅር የሚመነጨው ከዚህ ነው! እንዴት ያለ ዝቅ ማለት ያበራል! ስለ እነዚህ ስጦታዎች እንዴት ያለ ታላቅ ምስጋናና ውዳሴ ይገባሃል! ይህን በመሠረትህ ጊዜ ዕቅድህ ምንኛ የሚያድንና የሚጠቅም ነበር! ራስህን ምግብ አድርገህ በሰጠህ ጊዜ ግብዣው ምንኛ ጣፋጭና ደስ የሚያሰኝ ነው!

ጌታ ሆይ፥ ሥራህ እንዴት ድንቅ ነው! ኃይልህ እንዴት ታላቅ ነው! እውነትህ እንዴት የማይስት ነው! አንተ ተናገርህ፤ ሁሉም ሆነ፤ ያዘዝኸውም ይህ ተፈጸመ። ጌታዬ አምላኬ ሆይ፥ እውነተኛ አምላክና ሰው የሆንህ አንተ በጥቂት እንጀራና ወይን መልክ ሙሉና ፍጹም ሆነህ መገኘትህ፣ ሳታልቅም በሚቀበልህ መበላትህ የሰውን ማስተዋል የሚያልፍና ሊታመን የሚገባው ድንቅ ነገር ነው!

ምንም የማያስፈልግህ የዓለማት ጌታ አንተ በቅዱስ ቍርባንህ አማካይነት በእኛ ውስጥ ልታድር ፈቅደሃል። በደስታና ነውር በሌለው ሕሊና ምሥጢራትህን ብዙ ጊዜ እንዳከብርና ለተለየ ክብርህና ለዘላለም መታሰቢያ የሾምኸውንና የመሠረትኸውን ለዘላለም መዳኔ እንድቀበል ልቤንና ሰውነቴን ንጹሕ አድርገህ ጠብቅ።

ነፍሴ ሆይ፥ ደስ ይበልሽ፤ በዚህ የእንባ ሸለቆ ውስጥ እንዲህ ያለ ክቡር ስጦታና እንዲህ ያለ የተለየ መጽናናት ስለ ተወልሽ እግዚአብሔርን አመስግኚ። ይህን ምሥጢር ባደስሽና የክርስቶስን ሥጋ በተቀበልሽ ቍጥር የቤዛነትን ሥራ ትፈጽሚያለሽ፤ የክርስቶስም ዋጋ ሁሉ ተካፋይ ትሆኛለሽ፤ የክርስቶስ ፍቅር ፈጽሞ አይቀንስምና፤ የምሕረቱም ባለጠግነት ፈጽሞ አያልቅምና።

ስለዚህ ልብሽን ዘወትር በማደስና ታላቁን የመዳን ምሥጢር አጥልቀሽ በማሰላሰል ለእርሱ ራስሽን ልታዘጋጂ ይገባሻል። ቅዳሴ በቀደስሽ ወይም በሰማሽ ቍጥር፣ ልክ በዚያው ቀን ክርስቶስ በድንግል ማኅፀን ሰው እንደ ሆነ ወይም በመስቀል ላይ ተሰቅሎ ስለ ሰው መዳን መከራ እንደ ተቀበለና እንደ ሞተ ያህል ታላቅ፣ አዲስና ጣፋጭ መስሎ ሊታይሽ ይገባል።