ክርስቶስን ልንቀበልበት የሚገባ ታላቅ አክብሮት

ደቀ መዝሙሩ፦

ዘላለማዊ እውነት የሆንህ ክርስቶስ ሆይ፥ እነዚህ ሁሉ ቃሎችህ ናቸው፤ ሁሉም በአንድ ጊዜ ባይነገሩም በአንድ ስፍራም በአንድነት ባይጻፉም ቃሎችህ ናቸው። የአንተ ስለ ሆኑና እውነት ስለ ሆኑ ሁሉንም በእምነትና በምስጋና ልቀበላቸው ይገባኛል። የአንተ ናቸው፤ አንተም ተናግረሃቸዋል፤ ለመዳኔ ስትል ስለ ተናገርሃቸውም የእኔም ናቸው። በልቤ ውስጥ ይበልጥ አጥብቀው እንዲታተሙ ከአፍህ በደስታ እቀበላቸዋለሁ።

እንዲህ ያለ ርኅራኄ ያላቸው፣ ጣፋጭነትና ፍቅር የሞላባቸው ቃሎች ያበረታቱኛል፤ ነገር ግን ወደ እንደነዚህ ያሉ ታላላቅ ምሥጢራት ስቀርብ ኃጢአቶቼ ያስፈሩኛል፤ ንጹሕ ያልሆነ ሕሊናዬም በእኔ ላይ ያንጐደጕዳል። የቃሎችህ ጣፋጭነት ይጋብዘኛል፤ የክፉ ልማዶቼ ብዛት ግን ይጫነኛል።

ከአንተ ጋር ዕድል ሊኖረኝ ብወድ በእምነት ወደ አንተ እንድቀርብ፣ የዘላለምን ሕይወትና ክብር ላገኝ ብመኝም የማይሞተውን ምግብ እንድቀበል ታዝዘኛለህ።

እንዲህም ትላለህ፦ «እናንተ ደካሞች ሸክማችሁ የከበደ ሁሉ፥ ወደ እኔ ኑ፥ እኔም አሳርፋችኋለሁ።»

ጌታዬ አምላኬ ሆይ፥ ድሆችንና ችግረኞችን እጅግ ቅዱስ የሆነውን ሥጋህን እንዲቀበሉ የምትጋብዝበት ቃል በኃጢአተኛው ጆሮ እንዴት ጣፋጭና ደግ ነው! ጌታ ሆይ፥ ወደ አንተ ለመቅረብ የምደፍር እኔ ማን ነኝ? እነሆ፥ ሰማየ ሰማያት ሊይዝህ አይችልም፤ አንተ ግን «ሁላችሁ ወደ እኔ ኑ» ትላለህ።

ይህ እጅግ ቸር የሆነ ክብርና ይህ የወዳጅነት ግብዣ ምን ማለት ነው? ልመካበት የምችል አንዳች መልካም ነገር በራሴ የማላውቅ እኔ እንዴት ለመምጣት እደፍራለሁ? እጅግ ቸር በሆነው ፊትህ ብዙ ጊዜ የበደልሁ እኔ ወደ ቤቴ እንዴት አስገባሃለሁ? መላእክትና የመላእክት አለቆች ያከብሩሃል፤ ቅዱሳንና ጻድቃን ይፈሩሃል፤ አንተ ግን «ሁላችሁ ወደ እኔ ኑ!» ትላለህ። ጌታ ሆይ፥ አንተ ባትናገረው ኖሮ እውነት መሆኑን ማን ያምን ነበር? ባታዝዝስ ኖሮ ለመቅረብ ማን ይደፍር ነበር?

እነሆ፥ ጻድቅ ሰው የነበረው ኖኅ እርሱና ጥቂቶች ሌሎች እንዲድኑ መርከቡን ሲሠራ መቶ ዓመት ደከመ፤ እንግዲያስ እኔ የዓለምን ፈጣሪ በአክብሮት ለመቀበል በአንድ ሰዓት ራሴን እንዴት ላዘጋጅ እችላለሁ?

ታላቁ አገልጋይህና የተለየ ወዳጅህ ሙሴ የሕግህን ጽላቶች ያኖርበት ዘንድ ከማይነቅዝ እንጨት ታቦትን ሠርቶ በጥሩ ወርቅ ለበጠው፤ እኔ የመበስበስ ፍጥረት የሆንሁ፣ ሕግን የሰጠህንና ሕይወትን የምትሰጠውን አንተን እንዲህ በቀላሉ ለመቀበል እደፍራለሁን?

ከእስራኤል ነገሥታት ሁሉ እጅግ ጠቢብ የነበረው ሰሎሞን ለስምህ ምስጋና የሚሆን ግሩም ቤተ መቅደስ ሲሠራ ሰባት ዓመት አሳለፈ፤ መቀደሱንም በስምንት ቀን በዓል አከበረ። ለክብርህ ሺህ መሥዋዕቶችን አቀረበ፤ የቃል ኪዳኑንም ታቦት በመለከትና በእልልታ በክብር ወደ ተዘጋጀለት ስፍራ አስገባው፤ እኔ ግን ምስኪንና ከሰዎች ሁሉ ይልቅ ድሀ የሆንሁ፣ ግማሽ ሰዓት እንኳ በአምልኮ ለማሳለፍ የሚያቅተኝ እኔ ወደ ቤቴ እንዴት አስገባሃለሁ—ያንንስ እንኳ እንደሚገባ ባሳልፈው ምንኛ በወደድሁ!

አምላኬ ሆይ፥ እነዚህ ሰዎች አንተን ደስ ለማሰኘት ምንኛ ተጣጣሩ! ወዮ፥ እኔ የማደርገው ሁሉ ምንኛ ጥቂት ነው! ለቍርባን ራሴን ለማዘጋጀት የማሳልፈው ጊዜ ምንኛ አጭር ነው! ፈጽሞ በውስጤ የምሰበሰበው አልፎ አልፎ ነው፤ ከሐሳብ መበታተን ሙሉ በሙሉ ነጻ የምሆነውም እጅግ አልፎ አልፎ ነው። ነገር ግን ሕይወትን በሚሰጠው በመለኮትህ ፊት የማይገባ ሐሳብ ሊነሣ፣ ፍጥረትም ልቤን ሊይዝ በፍጹም አይገባም፤ በእንግድነት ልቀበል ያለሁት መልአክን ሳይሆን የመላእክትን ጌታ ራሱን ነውና።

ደግሞም ከነሀብቱ ባለው በቃል ኪዳኑ ታቦትና ሊነገር የማይችል ኃይል ባለው እጅግ ንጹሕ በሆነው ሥጋህ መካከል፣ ሊመጡ ላሉ ነገሮች ምሳሌ ብቻ በነበሩት በሕጉ መሥዋዕቶችና የቀደሙት መሥዋዕቶች ሁሉ ፍጻሜ በሆነው በሥጋህ እውነተኛ መሥዋዕት መካከል ያለው ልዩነት እጅግ ታላቅ ነው።

እንግዲያስ የቀደሙት ቅዱሳን አበውና ነቢያት፣ ነገሥታትና መሳፍንትም ከሕዝባቸው ሁሉ ጋር ለእግዚአብሔር አምልኮ እንዲህ ያለ የፍቅር ትጋት ካሳዩ፣ እኔ ለሚሰገድለት መገኘትህ ይበልጥ አጥብቄ የማልናፍቀው ስለ ምንድር ነው? ቅዱሳት ስጦታዎችህን ለመቀበል ራሴን በበለጠ ጥንቃቄ የማላዘጋጀውስ ስለ ምንድር ነው?

እጅግ ለእግዚአብሔር ያደረው ንጉሥ ዳዊት ቀድሞ ለአባቶቹ የተደረገላቸውን በረከት እያሰበ በእግዚአብሔር ታቦት ፊት በሙሉ ኃይሉ ዘፈነ። ብዙ ዓይነት የዜማ መሣሪያዎችን አሠራ። መዝሙራትን ደርሶ በደስታ እንዲዘመሩ አዘዘ። እርሱ ራሱም በመንፈስ ቅዱስ ጸጋ ሲነሣሣ ብዙ ጊዜ በገና ይደረድር ነበር። የእስራኤልን ሕዝብ እግዚአብሔርን በሙሉ ልባቸው እንዲያመሰግኑት፣ እርሱንም ለመባረክና ለማክበር በየቀኑ ድምፃቸውን ከፍ እንዲያደርጉ አስተማራቸው። በዚያ ዘመን በቃል ኪዳኑ ታቦት ፊት እንዲህ ያለ ታላቅ አምልኮ ከተስፋፋና እግዚአብሔርን ለማመስገን እንዲህ ያለ ሥርዓት ከተደረገ፣ እኔና የክርስቲያን ሕዝብ ሁሉ አሁን በዚህ ቅዱስ ቍርባን ፊት እንዴት ያለ ታላቅ አምልኮ ልናሳይ ይገባናል፤ እጅግ ክቡር የሆነውን የክርስቶስን ሥጋ ስንቀበልስ እንዴት ያለ አክብሮት!

ብዙ ሰዎች የቅዱሳንን ዐፅም ለማክበር ሩቅ መንገድ ይጓዛሉ፤ በድንቅ ሥራቸውና በግሩማን መቅደሶቻቸው አሠራር ይደነቃሉ። በሐርና በወርቅ የተሸፈነውን ቅዱስ ዐፅም ትኵር ብለው ይመለከታሉ፤ ይስሙታልም፤ እነሆ ግን፥ አምላኬ፣ የቅዱሳን ቅዱስ፣ የሰው ፈጣሪና የመላእክት ጌታ ሆይ፥ አንተ በዚህ በመሠዊያው ላይ በፊቴ አለህ!

እንደዚህ ያሉትን ነገሮች ሲመለከቱ ብዙ ጊዜ ሰዎች በጕጕት፣ ባልታየ ነገር አዲስነት ይነሣሣሉ፤ በተለይም ያለ እውነተኛ ጸጸት በቀላል ልብ ከስፍራ ወደ ስፍራ ሲዞሩ ሕይወታቸውን ለማሻሻል የሚሆን ጥቂት ፍሬ ብቻ ይዘው ይመለሳሉ። እዚህ ግን በመሠዊያው ቅዱስ ቍርባን ውስጥ አምላኬ፣ ሰው የሆነ ክርስቶስ ኢየሱስ፣ አንተ ሙሉ በሙሉ አለህ፤ በሚገባና በአምልኮ በተቀበሉህ ቍጥር ከዚህ የዘላለም መዳን ሙሉ ፍሬ ይገኛል። ወደዚህም የሚስበን ቅለት ወይም ጕጕት ወይም የስሜት ደስታ ሳይሆን ጽኑ እምነት፣ የአምልኮ ተስፋና ቅን ፍቅር ነው።

የዓለም ስውር ፈጣሪ አምላክ ሆይ፥ ከእኛ ጋር የምትሠራው እንዴት ድንቅ ነው! በዚህ ቅዱስ ቍርባን ራስህን ለሚቀበሉህ ከምትሰጣቸው ከምርጦችህ ጋር ነገሩን እንዴት በጣፋጭነትና በቸርነት ታዘጋጃለህ! ይህ በእውነት ማስተዋልን ሁሉ ያልፋል። ይህ በተለየ ሁኔታ ለእግዚአብሔር ያደሩትን ሰዎች ልብ ይስባል፤ ፍቅራቸውንም ያነድዳል። ሕይወታቸውን ሁሉ ለመታረም የሚሰጡ እውነተኛ ታማኝ አገልጋዮችህ በቅዱስ ቍርባን ውስጥ የአምልኮንና የበጎ ምግባርን ፍቅር ታላቅ ጸጋ ብዙ ጊዜ ይቀበላሉ።

የክርስቶስ ምእመናን ብቻ የሚያስተውሉት፣ የማያምኑና የኃጢአት ባሪያዎች ግን ሊቀምሱት የማይችሉት የዚህ ቅዱስ ቍርባን ድንቅና ስውር ጸጋ ሆይ! በእርሱ መንፈሳዊ ጸጋ ይሰጣል፤ የጠፋው በጎ ምግባር ይመለሳል፤ በኃጢአት የተበላሸውም ውበት ይታደሳል። አንዳንድ ጊዜማ ጸጋው እጅግ ታላቅ ከመሆኑ የተነሣ፣ ከአምልኮው ሙላት የተነሣ አእምሮ ብቻ ሳይሆን ደካማው ሥጋም በበለጠ ብርታት እንደ ተሞላ ይሰማዋል።

ይሁን እንጂ የሚድኑት ሁሉ ተስፋና ዋጋ ያለበትን ክርስቶስን በበለጠ ትጋት ለመቀበል በማንነሣሣበት ጊዜ ቸልተኝነታችንና ቀዝቃዛነታችን እጅግ የሚያሳዝንና የሚያስቈጭ ነው። እርሱ ቅድስናችንና ቤዛነታችን ነው። በዚህ ሕይወት መጽናናታችን፣ በሰማይም ላሉ ብፁዓን ዘላለማዊ ደስታቸው ነው። ይህ እውነት ሆኖ ሳለ፣ ሰማያትን በደስታ የሚሞላውንና መላውን ዓለም በሕልውና የሚያኖረውን ይህን የመዳን ምሥጢር ብዙዎች እጅግ ጥቂት ትኵረት መስጠታቸው የሚያሳዝን ነው።

ለእንደዚህ ያለ ድንቅ ስጦታ የበለጠ ክብር የማይሰጥ፣ ይልቁንም በዕለት ዕለት ከመጠቀሙ የተነሣ ወደ ቸልተኝነት የሚወድቅ የሰው ልብ ዕውርነትና ድንዳኔ ሆይ! ይህ እጅግ ቅዱስ ቍርባን በዓለም ሁሉ በአንድ ስፍራ ብቻ ቢከበርና በአንድ ካህን ብቻ ቢቀደስ ኖሮ፣ መለኮታዊውን ምሥጢራት ሲከበር ለማየት ሰዎች ወደዚያ ስፍራ፣ ወደዚያ የእግዚአብሔር ካህን በምን ያህል ታላቅ ናፍቆት የሚሳቡ ይመስልሃል! አሁን ግን ቅዱስ ቍርባን በዓለም ሁሉ ይበልጥ በተስፋፋ መጠን የእግዚአብሔር ጸጋና ለሰዎች ያለው ፍቅር ይበልጥ ግልጥ ሆኖ እንዲታይ ብዙ ካህናት አሉ፤ ቅዳሴም በብዙ ስፍራ ይቀደሳል።

ዘላለማዊ መልካም እረኛ ኢየሱስ ሆይ፥ እኛን ምስኪኖችንና በስደት ያለን ሕዝብ በክቡር ሥጋህና ደምህ ልትመግበን፣ ከራስህም አፍ በወጡ ቃሎች፦ «እናንተ ደካሞች ሸክማችሁ የከበደ ሁሉ፥ ወደ እኔ ኑ፥ እኔም አሳርፋችኋለሁ።» ብለህ ከእነዚህ ቅዱሳት ምሥጢራት እንድንካፈል ልትጋብዘን ስለ ወደድህ ምስጋና ለአንተ ይሁን።