የተፈጥሮ መበላሸትና የመለኮታዊ ጸጋ ኃይል

ደቀ መዝሙሩ፦

አቤቱ አምላኬ ጌታ ሆይ፣ በራስህ መልክና ምሳሌ የፈጠርኸኝ አንተ፣ ወደ ኃጢአትና ወደ ጥፋት የሚስበኝን እጅግ ክፉ ተፈጥሮዬን አሸንፍ ዘንድ፣ ለመዳን እጅግ ታላቅና አስፈላጊ እንደ ሆነች ያሳየኸኝን ይህችን ጸጋ ስጠኝ። በሥጋዬ ከአእምሮዬ ሕግ ጋር የሚዋጋውንና በብዙ ነገር ለሥጋዊ ስሜት እንዳገለግል የሚማርከኝን የኃጢአትን ሕግ ይሰማኛልና። እጅግ ቅድስት የሆነችው ጸጋህ በልቤ በሙቀት ፈስሳ ካልረዳችኝ በቀር ምኞቶቹን ልቋቋም አልችልም።

ከታናሽነቱ ጀምሮ ወደ ክፉ ያዘነበለውን ተፈጥሮ ለማሸነፍ ጸጋህ፣ ያውም ታላቅ ጸጋ ያስፈልጋል። በፊተኛው ሰው በአዳም ተፈጥሮ በኃጢአት ወድቋልና፣ ደክሟልምና፤ የዚያም ርኵሰት ቅጣት በሰው ልጆች ሁሉ ላይ ወርዷል። ስለዚህ አንተ መልካምና ቅን አድርገህ የፈጠርኸው ተፈጥሮ ራሱ የክፋትና የተበላሸ ተፈጥሮ ድካም ምልክት ተደርጎ ይቈጠራል፤ ለራሱ በተተወ ጊዜ ወደ ክፉና ወደ ዝቅተኛ ነገሮች ያዘነብላልና። በውስጡ የቀረው ጥቂት ኃይል በዐመድ ውስጥ እንደ ተሰወረ ፍንጣሪ ነው። ያም ኃይል በድቅድቅ ጨለማ የተከበበ ቢሆንም አሁንም መልካሙንና ክፉውን የመለየት፣ በእውነትና በሐሰት መካከል ያለውን ልዩነት የማየት ችሎታ ያለው የተፈጥሮ አእምሮ ነው፤ ይሁን እንጂ የሚቀበለውን ሁሉ ለመፈጸም አይችልም፤ የእውነትን ሙሉ ብርሃንም ሆነ የፍቅርን ጤንነት አያገኝም።

አምላኬ ሆይ፣ ስለዚህ ነው በውስጡ ሰውነቴ በሕግህ ደስ የሚለኝ፤ ትእዛዝህ በጎ፣ ጻድቅና ቅዱስ እንደ ሆነ፣ ክፉንና ኃጢአትን ሁሉ መሸሽ አስፈላጊ መሆኑንም እንደሚያስረዳ አውቃለሁ። በሥጋዬ ግን ከአእምሮ ይልቅ ለሥጋዊ ስሜት እየታዘዝሁ የኃጢአትን ሕግ እጠብቃለሁ። ስለዚህም ደግሞ በጎውን መፈለግ በእኔ ዘንድ አለ፤ እንዴት እንደምፈጽመው ግን አላውቅም። ስለዚህም ደግሞ ብዙ ጊዜ ብዙ መልካም ነገሮችን አቅዳለሁ፤ ነገር ግን ድካሜን የሚረዳ ጸጋ ስለሚጐድለኝ በጥቂት ተቃውሞ ወደ ኋላ አፈገፍጋለሁ፤ ተስፋም ቈርጬ እተዋለሁ። ስለዚህ የፍጽምናን መንገድ አውቃለሁ፤ እንዴት ማድረግ እንደሚገባኝም በበቂ ሁኔታ በግልጽ አያለሁ፤ ነገር ግን በራሴ መበላሸት ክብደት ስለ ተጫንሁ ወደሚበልጡ ፍጹማን ነገሮች አልነሣም።

አቤቱ፣ ማንኛውንም መልካም ሥራ ለመጀመር፣ ለመቀጠልና ለመፈጸም ጸጋህ ለእኔ እንዴት እጅግ አስፈላጊ ነው! ያለ ጸጋ ምንም ማድረግ አልችልምና፤ በኃይሏ ግን በአንተ ሁሉን እችላለሁ። ዋጋችን ያለ አንቺ ከንቱ የሆነ፣ የተፈጥሮ ስጦታዎችም ያለ አንቺ የማይከበሩ፣ በእውነት ሰማያዊ የሆንሽ ጸጋ ሆይ!

አቤቱ፣ በፊትህ ያለ ጸጋ ጥበብም ሆነ ሀብት፣ ውበትም ሆነ ብርታት፣ ብልሃትም ሆነ ማስተዋል ምንም አይጠቅምም። የተፈጥሮ ስጦታዎች ለመልካሞችም ለክፉዎችም የጋራ ናቸውና፤ የምርጦችህ ልዩ ስጦታ ግን ጸጋ ወይም ፍቅር ነው፤ በእርሷም የታተሙት ለዘላለም ሕይወት የተገባቸው ሆነው ይቈጠራሉ። ይህች ጸጋ እጅግ የላቀች ከመሆኗ የተነሣ ያለ እርሷ የትንቢት ስጦታም ሆነ ተአምራት፣ ወይም የቱንም ያህል ከፍ ያለ ማሰላሰል እንደ አንዳች ሊቈጠር አይችልም። ያለ ፍቅርና ያለ ጸጋ እምነትም ሆነ ተስፋ ወይም ሌሎች በጎ ምግባራት እንኳ በፊትህ ተቀባይነት የላቸውም።

በመንፈስ ድሆች የሆኑትን በበጎ ምግባር ባለ ጠጎች የምታደርጊ፣ በብዙ መልካም ነገር ባለ ጠጋ የሆነውንም ልበ ትሑት የምታደርጊ እጅግ ብፅዕት የሆንሽ ጸጋ ሆይ፣ ነፍሴ በድካምና በአእምሮ ድርቀት እንዳትዝል ነዪ፣ በእኔ ላይ ውረጂ፣ በመጽናናትሽም ፈጥነሽ ሙዪኝ።

ጌታ ሆይ፣ ተፈጥሮ ከሚመኛቸው ነገሮች አንዱንም ባላገኝ እንኳ ጸጋህ ይበቃኛልና፣ እለምንሃለሁ፣ በፊትህ ሞገስ ላግኝ። በብዙ መከራ ብፈተንና ብጨነቅ፣ ጸጋህ ከእኔ ጋር ሳለች ክፉን አልፈራም። ይህች ብርታቴ ናት። ይህች ምክርንና እርዳታን ትሰጠኛለች። ይህች ከጠላቶቼ ሁሉ የበረታች፣ ከጠቢባንም ሁሉ የጠበበች ናት። ይህች የእውነት እመቤት፣ የሥርዓት መምህር፣ የልብ ብርሃን፣ በጭንቀት አጽናኝ፣ ኀዘንን አባራሪ፣ ፍርሃትን አስወጪ፣ የአምልኮ መጋቢ፣ የእንባ አፍላቂ ናት። ያለ ጸጋ ከደረቀ እንጨት፣ ተጥሎ ብቻ ከሚገባው ከማይረባ ቅርንጫፍ በቀር ምንድር ነኝ?

ስለዚህ አቤቱ፣ ጸጋህ ትቅደመኝ፣ ትከተለኝም፤ በልጅህ በኢየሱስ ክርስቶስ በኩል ሁልጊዜ ለመልካም ሥራ የተጋሁ አድርገኝ።