ከልክ ያለፈ መቀራረብን መሸሽ

ልብህን ለሰው ሁሉ አትክፈት፤ ነገር ግን ጉዳይህን ጠቢብ ከሆነና እግዚአብሔርን ከሚፈራ ሰው ጋር ተነጋገርበት። ከወጣቶችና ከእንግዶች ጋር አትወዳጅ። ባለጠጎችን አትለማመጥ፤ ከታላላቆችም ጋር መቀላቀልን አትውደድ። ከትሑታንና ከየዋሆች፣ ለእግዚአብሔር ካደሩና ከበጎ ምግባረኞች ጋር ተቀራረብ፤ ከእነርሱም ጋር የሚያንጽ ነገርን ተነጋገር። ከማንኛዋም ሴት ጋር የቅርብ ወዳጅነት አትመሥርት፤ ነገር ግን በጎ ሴቶችን ሁሉ በአንድነት ለእግዚአብሔር አደራ ስጣቸው። የእግዚአብሔርንና የመላእክቱን ቅርበት ብቻ ፈልግ፤ የሰዎችንም ትኵረት ሽሽ።

ሰውን ሁሉ ልንወድ ይገባናል፤ ከሁሉም ጋር መቀራረብ ግን አይጠቅምም። አንዳንድ ጊዜ አንድ ሰው በማያውቁት ሰዎች ዘንድ መልካም ስም ኖሮት፣ በዚያው ጊዜ በሚያውቁት ዘንድ ግን የተናቀ ይሆናል። ብዙ ጊዜ በመገኘታችን ሌሎችን ደስ የምናሰኝ ይመስለናል፤ ይልቁንም በእኛ ውስጥ በሚያዩት ጕድለት የተነሣ ማሳዘን እንጀምራለን።