ስለ ውጫዊ ነገሮች አለመጨነቅ

ክርስቶስ፦

ልጄ ሆይ፥ ባታውቃቸው የሚሻልህ ብዙ ነገሮች አሉ፤ ራስህንም በምድር ላይ እንደ ሞተና ዓለም ሁሉ ለእርሱ እንደ ተሰቀለበት ሰው ልትቈጥር ይገባሃል። ደግሞም ለሰላምህ የሚበጀውን እያሰብህ ጆሮ ዳባ ልበስ ብለህ ልታልፋቸው የሚሻሉ ብዙ ነገሮች አሉ። በጭቅጭቅ ንግግር ከመካፈል ይልቅ ደስ ከማያሰኙህ ነገሮች ዞር ማለትና ለእያንዳንዱ ሰው የራሱን አሳብ መተው ይበልጥ ይጠቅማል። ከእግዚአብሔር ጋር በመልካም ሁኔታ ብትሆንና ፍርዱን ብትመለከት፣ መሸነፍን ይበልጥ በቀላሉ ትታገሣለህ።

ደቀ መዝሙሩ፦

ጌታ ሆይ፥ ምን ደረጃ ላይ ደረስን? እነሆ፥ ስለ ጊዜያዊ ጥፋት እናለቅሳለን። ለጥቂት ትርፍ እንደክማለን፤ እንጨነቃለንም፤ የነፍስ ጥፋት ግን ይረሳል፤ ወደ አእምሮም ከስንት አንድ ጊዜ ይመለሳል። ጥቂት ወይም ምንም ዋጋ የሌለው ነገር ትኵረታችንን ይይዛል፤ እጅግ አስፈላጊ የሆነው ግን ቸል ይባላል—ይህ ሁሉ የሆነው ሰው ራሱን ፈጽሞ ለውጫዊ ነገሮች ስለሚሰጥ ነው። ፈጥኖ ራሱን ካላወጣም በውጫዊ ነገሮች ውስጥ ተዘፍቆ በፈቃዱ ይኖራል።