ቅዱሳት መጻሕፍትን ማንበብ

ቅዱሳት መጻሕፍትን ስናነብ የምንፈልገው እውነትን እንጂ የንግግር ውበትን አይደለም፤ እያንዳንዱም ክፍል በተጻፈበት መንፈስ ሊነበብ ይገባዋል። በመጻሕፍት ውስጥ ካማረ አነጋገር ይልቅ ጥቅምን ልንፈልግ ይገባናልና።

እንዲሁም የተራቀቁትንና ጥልቅ የሆኑትን መጻሕፍት በምናነብበት ፈቃደኝነት ቀላልና መንፈሳዊ መጻሕፍትንም ልናነብ ይገባናል። ጸሐፊው ታላቅ ሊቅ ቢሆን ወይም የማይታወቅ ሰው፣ በጸሐፊው ሥልጣን ሳይሆን ለቀላሉ እውነት ባለን ፍቅር ልንመራ ይገባናል። የሚናገረው ማን እንደ ሆነ ሳይሆን የሚነገረው ምን እንደ ሆነ ልናስተውል ይገባናል። ሰዎች ያልፋሉ፤ የጌታ እውነት ግን ለዘላለም ይኖራል። እግዚአብሔር ለሰው ፊት ሳያደላ በብዙ መንገድ ይናገረናል።

በቀላሉ አንብበን ልናልፈው የሚገባንን ነገር ለመመርመርና ደጋግመን ለማብሰልሰል ስንፈልግ፣ የማወቅ ጕጕታችን ብዙ ጊዜ ቅዱሳት መጻሕፍትን ከማንበብ ያሰናክለናል።

ስለዚህ ልትጠቀምበት ብትወድ በትሕትና፣ በየዋህነትና በእምነት አንብብ፤ ሊቅ ነኝ የሚል ስምንም ከቶ አትፈልግ። የቅዱሳንን ቃል በፈቃደኝነት ፈልግ፤ በጥሞናም አድምጥ፤ የአበውንም አባባሎች አትጥላ፤ ያለ ዓላማ አልተነገሩምና።