ከክፉ ምኞት ጋር በሚደረገው ትግል ትዕግሥትን ማግኘት

ደቀ መዝሙሩ፦

አቤቱ ጌታ አምላክ ሆይ፥ በዚህ ሕይወት ብዙ መከራ ስላለ ትዕግሥት ለእኔ እጅግ አስፈላጊ እንደ ሆነ አያለሁ። ለራሴ ሰላም የቱንም ያህል ዕቅድ ባወጣ ሕይወቴ ከትግልና ከኀዘን ነጻ ሊሆን አይችልም።

ክርስቶስ፦

ልጄ ሆይ፥ ትክክል ነህ፤ ነገር ግን ፈቃዴ ከፈተና ነጻ የሆነውን ወይም ተቃውሞ የማያጋጥመውን ሰላም እንድትፈልግ አይደለም፤ ይልቁንም በብዙ መከራ በተሠቃየህና በብዙ ችግር በተፈተንህ ጊዜ ሰላምን እንዳገኘህ ራስህን እንድትቈጥር ነው።

ብዙ መከራ መቀበል አልችልም ብትል የመንጽሔን እሳት እንዴት ትታገሣለህ? ከሁለት ክፉ ነገሮች ሁልጊዜ ያነሰው ሊመረጥ ይገባል። ስለዚህ ከሚመጣው የዘላለም ቅጣት ታመልጥ ዘንድ፣ የአሁኑን ክፉ ነገር ስለ እግዚአብሔር ብለህ በትዕግሥት ለመሸከም ሞክር።

የዓለም ሰዎች መከራ የሌላቸው ወይም ጥቂት ብቻ ያላቸው ይመስልሃልን? እጅግ ብዙ ተድላ ያላቸውን እንኳ ጠይቅ፤ ሌላ ነገር ትማራለህ። «ነገር ግን» ትላለህ፤ «ብዙ ተድላን ይደሰታሉ፤ ፈቃዳቸውንም ይከተላሉ፤ ስለዚህ መከራቸው ብዙም አይሰማቸውም።» የሚፈልጉትን ሁሉ ያገኛሉ እንበል፤ ይህ እስከ መቼ የሚዘልቅ ይመስልሃል? እነሆ፣ በዓለም የሚበለጽጉ እንደ ጢስ ይጠፋሉ፤ ያለፈው ደስታቸውም መታሰቢያ አይኖረውም። በዚህ ሕይወት እንኳ በእነዚህ ተድላዎች ያለ ምሬት፣ ያለ መሰልቸትና ያለ ፍርሃት ዕረፍትን አያገኙም። ደስታቸው ይመጣበታል ብለው ከሚያምኑት ከዚያው ነገር ብዙ ጊዜ የኀዘንን ቅጣት ይቀበላሉና። ይህም ትክክል ነው። ተድላን ያለ አእምሮ ስለሚፈልጉና ስለሚከተሉ፣ ያለ ኀፍረትና ያለ ምሬት ሊደሰቱበት አይገባቸውም።

እነዚህ ተድላዎች ሁሉ ምንኛ አጭሮች፣ ምንኛ ሐሰተኞች፣ ምንኛ ከአእምሮ የራቁና አሳፋሪዎች ናቸው! ቢሆንም ሰዎች በስካር ዕውርነታቸው ይህን አያስተውሉም፤ ነገር ግን አእምሮ እንደ ሌላቸው እንስሶች ለሚጠፋ ሕይወት ለጥቂት ደስታ ሲሉ የነፍስን ሞት በራሳቸው ላይ ያመጣሉ።

ስለዚህ ልጄ ሆይ፥ ምኞትህን አትከተል፤ ከፈቃድህም ተመለስ። «በእግዚአብሔር ደስ ይበልህ፥ የልብህንም መሻት ይሰጥሃል።» በእውነት ደስ ሊልህና ከእኔ በብዛት ልትጽናና ብትወድ፣ እነሆ፣ ዓለማዊ ነገሮችን ሁሉ በመናቅና ዝቅተኛ ተድላዎችን ሁሉ በመቍረጥ በረከትህ ይሆናል፤ ታላቅ መጽናናትም ይሰጥሃል። ደግሞም ከፍጥረታት መጽናናት ሁሉ ራስህን ባራቅህ መጠን በእኔ ዘንድ ይበልጥ ጣፋጭና ብርቱ መጽናናትን ታገኛለህ።

መጀመሪያ እነዚህን በረከቶች ያለ ኀዘን፣ ያለ ድካምና ያለ ትግል አታገኛቸውም። ቀድሞ የተለመደ ልማድ ይቃወምሃል፤ ነገር ግን በተሻለ ልማድ ይሸነፋል። ሥጋ በአንተ ላይ ያጕረመርማል፤ ነገር ግን በመንፈስ ትጋት ይለጐማል። የቀድሞው እባብ ይነድፍሃል፤ ያውክሃልም፤ ነገር ግን ጸሎት ያባርረዋል፤ በጸናና ጠቃሚ በሆነ ሥራም መንገዱ ይዘጋበታል።