የልባችንን ምኞቶች መመርመርና ልከኛ ማድረግ

ክርስቶስ፦

ልጄ ሆይ፥ ገና በሚገባ ያልተማርሃቸውን ብዙ ነገሮች ልትማር ያስፈልግሃል።

ደቀ መዝሙሩ፦

ጌታ ሆይ፥ እነርሱ ምንድን ናቸው?

ክርስቶስ፦

ምኞትህን ፈጽመህ እንደ በጎ ፈቃዴ እንድታስተካክል፣ የራስህም ወዳጅ ሳትሆን የፈቃዴ ትጉ አድራጊ እንድትሆን ነው። ምኞቶች ብዙ ጊዜ ያቃጥሉሃል፤ እንደ እብድም ይነዱሃል፤ ነገር ግን የምታደርገው ለክብሬ ወይስ ለራስህ ጥቅም እንደ ሆነ መርምር። ምክንያቱ እኔ ከሆንሁ እኔ በምወስነው ሁሉ በሚገባ ትረካለህ። በሌላ በኩል ግን በውስጥህ ራስን መፈለግ ተሸሽጎ ቢገኝ ያውክሃል፤ ይጫንሃልም። እንግዲህ ኋላ ተጸጽተህ መጀመሪያ ደስ ባሰኘህና ለበጎ ነው ብለህ በተመኘኸው ነገር እንዳትከፋ፣ ከእኔ ጋር ግንኙነት በሌለው አስቀድሞ በተቋጠረ ምኞት ላይ እጅግ እንዳትደገፍ ተጠንቀቅ። መልካም መስሎ የሚታይ ምኞት ሁሉ ወዲያው ሊከተሉት አይገባም፤ በሌላ በኩልም የሚቃረን ዝንባሌ ሁሉ ወዲያው ሊጣል አይገባም።

በመልካም ምኞቶችና ዝንባሌዎች እንኳ ጥቂት መግታት አንዳንድ ጊዜ መልካም ነው፤ ይኸውም በብዙ ጕጕት በአእምሮህ ላይ መበታተንን እንዳታመጣ፣ በሥርዓት ማጣትህም በሌሎች ላይ ማሰናከያ እንዳትፈጥር፣ ወይም ከሌሎች በሚመጣ ተቃውሞ በድንገት ታውከህ እንዳትወድቅ ነው። ነገር ግን አንዳንድ ጊዜ ኃይልን ልትጠቀምና የሥጋ ፍላጎትህን በብርታት ልትቃወም ይገባሃል። ሥጋ የሚመኘውን ወይም የማይመኘውን ከምንም ሳትቈጥር፣ በግድም ቢሆን ለመንፈስ እንዲገዛ ልትተጋ ይገባሃል። ለሁሉ ነገር እስኪዘጋጅ፣ በጥቂት መርካትን፣ በቀላል ነገሮች ደስ መሰኘትንና በችግሮች ላይ አለማጉረምረምን እስኪማር ድረስ ሊገሠጽና በመገዛት እንዲኖር ሊገደድ ይገባዋል።