ያለ ቃላት ድምፅ በውስጥ የሚናገር እውነት

ደቀ መዝሙሩ፦

«ጌታ ሆይ፥ ተናገር፥ ባሪያህ ይሰማልና።» «እኔ ባሪያህ ነኝ፤ ሥርዓትህን አውቅ ዘንድ ማስተዋልን ስጠኝ … ልቤን ወደ ሥርዓትህ አዘንብል … ቃልህ እንደ ጠል ይንጠባጠብ።»

የእስራኤል ልጆች በአንድ ወቅት ሙሴን፦ «አንተ ተናገረን እኛም እንሰማለን፤ እንዳንሞት እግዚአብሔር አይናገረን» አሉት።

ጌታ ሆይ፥ እንዲህ አይደለም፤ እኔ እንዲህ አልጸልይም። ይልቁንም ከነቢዩ ከሳሙኤል ጋር በትሕትናና በጽኑ ልመና፦ «ጌታ ሆይ፥ ተናገር፥ ባሪያህ ይሰማልና» እላለሁ። ሙሴም ሆነ ከነቢያት አንዱም አይናገረኝ፤ ነገር ግን ነቢያትን ሁሉ ያነሣሣህና ያበራህ ጌታ አምላክ ሆይ፥ አንተ ተናገር፤ አንተ ብቻህን ያለ እነርሱ ፍጹም አድርገህ ልታስተምረኝ ትችላለህና፤ እነርሱ ግን ያለ አንተ ምንም ሊያደርጉ አይችሉም። እነርሱ በእርግጥ ያማሩ ቃላትን ይናገራሉ፤ መንፈስን ግን ሊሰጡ አይችሉም። በእርግጥ በውበት ይናገራሉ፤ አንተ ዝም ብትል ግን ልብን ሊያቃጥሉ አይችሉም። እነርሱ መልእክቱን ያደርሳሉ፤ አንተ ትርጓሜውን ትገልጣለህ። እነርሱ ምሥጢራትን በፊታችን ያኖራሉ፤ አንተ ግን ፍቻቸውን ትከፍታለህ። እነርሱ ትእዛዛትን ያውጃሉ፤ አንተ እንድንጠብቃቸው ትረዳናለህ። እነርሱ መንገዱን ያመለክታሉ፤ አንተ ለጕዞው ብርታትን ትሰጣለህ። እነርሱ የሚሠሩት በውጭ ብቻ ነው፤ አንተ ግን ልባችንን ታስተምራለህ፤ ታበራለህም። እነርሱ በውጭ ያጠጣሉ፤ አንተ ታሳድጋለህ።

እነርሱ ቃላትን ይጮኻሉ፤ አንተ ለሰሚው ማስተዋልን ትሰጣለህ።

ስለዚህ ሙሴ አይናገረኝ፤ ነገር ግን አንተ ጌታ አምላኬ፣ ዘላለማዊ እውነት ሆይ፥ ተናገር፤ በውጭ ምክር ብቻ ተሰጥቶኝ በውስጤ ሳልቃጠል እንዳልሞትና ፍሬ ቢስ ሆኜ እንዳልገኝ፤ ተሰምቶ ያልተጠበቀ፣ ታውቆ ያልተወደደ፣ ታምኖ ያልተታዘዘ ቃል በእኔ ላይ ለፍርድ እንዳይነሣብኝ።

ስለዚህ ጌታ ሆይ፥ ባሪያህ ይሰማልና ተናገር። «አንተ የዘላለም ሕይወት ቃል አለህ።» ለነፍሴ መጽናናት፣ ለሕይወቴ መታረም፣ ለምስጋናህ፣ ለክብርህና ለዘላለማዊ ግርማህ ተናገረኝ።