ክርስቶስ ከታማኝ ነፍስ ጋር የሚያደርገው ውስጣዊ ንግግር

«እግዚአብሔር አምላክ በውስጤ የሚናገረውን እሰማለሁ።»

ጌታ በውስጧ ሲናገር የምትሰማ፣ የመጽናናትንም ቃል ከአፉ የምትቀበል ነፍስ ብፅዕት ናት። የመለኮታዊውን ሹክሹክታ ቃና የሚይዙ፣ ለዚህ ዓለም ጕርምርምታ ግን ግድ የማይሰጣቸው ጆሮዎች ብፁዓን ናቸው። በውጭ ለሚሰማው ድምፅ ሳይሆን በውስጥ ለሚያስተምረው እውነት የሚያደምጡ ጆሮዎች በእውነት ብፁዓን ናቸው። ለውጭ ነገሮች የተዘጉ፣ በውስጣዊ ነገሮች ላይ ግን የተተከሉ ዓይኖች ብፁዓን ናቸው። ወደ ውስጥ ዘልቀው የሚገቡ፣ ምሥጢራትንም ለማስተዋል ዕለት ዕለት ራሳቸውን ይበልጥ ለማዘጋጀት የሚጣጣሩ ብፁዓን ናቸው። ጊዜያቸውን ለእግዚአብሔር ለመስጠት የሚናፍቁ፣ ከዓለምም መሰናክሎች ራሳቸውን የሚለዩ ብፁዓን ናቸው።

ነፍሴ ሆይ፥ ጌታ አምላክሽ በውስጥሽ የሚናገረውን ትሰሚ ዘንድ እነዚህን ነገሮች አስቢ፤ የስሜቶችሽንም ደጅ ዝጊ። «እኔ መዳንሽ ነኝ» ይላል ተወዳጅሽ። «እኔ ሰላምሽና ሕይወትሽ ነኝ። ከእኔ ጋር ኑሪ፤ ሰላምንም ታገኛለሽ። የሚያልፉትን ነገሮች ሁሉ ተዪ፤ ዘላለማዊውንም ፈልጊ። ጊዜያዊ ነገሮች ሁሉ ወጥመዶች ካልሆኑ በቀር ምንድር ናቸው? ፈጣሪ ቢተውሽስ ፍጥረታት ሁሉ ምን ሊረዱሽ ይችላሉ?» ስለዚህ እነዚህን ነገሮች ሁሉ ተዪ፤ ወደ እውነተኛ ብፅዕና ትደርሺ ዘንድ ለፈጣሪሽ ደስ የምታሰኚና የታመንሽ ሁኚ።