የምንኵስና ሕይወት

ከሌሎች ጋር ሰላምና ስምምነት ብትሻ፣ በብዙ ነገር ፈቃድህን መስበርን ልትማር ይገባሃል። በገዳማት ወይም በመነኮሳት ማኅበር ውስጥ መኖር፣ በዚያ ያለ ማጕረምረም መቆየትና እስከ ሞት ድረስ በታማኝነት መጽናት ትንሽ ነገር አይደለም። በዚያ መልካም ሕይወት የሚኖርና በዚያም ዘመኑን በደስታ የሚፈጽም በእውነት ብፁዕ ነው።

ፍጽምናን በመሻት ልትጸና ብትወድ፣ ራስህን በምድር ላይ እንደ መንገደኛና እንደ ስደተኛ ልትቈጥር ይገባሃል። መነኩሴ ልትሆን ብትወድ፣ ስለ ክርስቶስ ሞኝ መስሎ ለመታየት ልትረካ ይገባሃል። የምንኵስና ልብስና የጠጕር መላጨት ሰውን የሚለውጡት እጅግ ጥቂት ነው፤ እውነተኛ መነኩሴ የሚያደርገው የሕይወት ለውጥና የስሜቶች ፈጽሞ መገደል ነው።

ከእግዚአብሔር ብቻና ከነፍሱ መዳን በቀር ሌላ ነገር የሚፈልግ ሁሉ ችግርንና ኀዘንን ብቻ ያገኛል፤ ከሁሉ የሚያንስና የሁሉ አገልጋይ ለመሆን የማይጥርም ብዙ ጊዜ በሰላም ሊቆይ አይችልም።

የመጣኸው ልታገለግል እንጂ ልትገዛ አይደለም። ደግሞም የተጠራኸው መከራ ልትቀበልና ልትሠራ እንጂ ሥራ ፈትተህ በወሬ ጊዜህን ልታባክን እንዳልሆነ ልታስተውል ይገባሃል። በዚህ ሰዎች እንደ ወርቅ በእቶን ይፈተናሉ። በዚህ በሙሉ ልቡ በእግዚአብሔር ፊት ራሱን ሊያዋርድ ካልተመኘ በቀር ማንም ሊቆይ አይችልም።