ቍርባንን በሚገባ ለሚቀበሉ የሚሰጡ ብዙ በረከቶች

ደቀ መዝሙሩ፦

ጌታ አምላኬ ሆይ፥ ወደ ግሩሙ ቅዱስ ቍርባንህ በሚገባና በአምልኮ ለመቅረብ እንድበቃ አገልጋይህን በጣፋጭነትህ በረከቶች ጐብኘው። ልቤን ወደ አንተ አንሣ፤ ይህንም ከባድ ስንፍና ከእኔ አርቅ። በዚህ ቅዱስ ቍርባን ውስጥ በምንጭ ጥልቀት እንዳለ ውኃ ተሰውሮ ያለውን ጣፋጭነትህን በመንፈስ እንድቀምስ በሚያድን ጸጋህ ጐብኘኝ። ይህን ታላቅ ምሥጢር እንዲመለከቱ ዓይኖቼን አብራ፤ በጽኑ እምነትም እንዳምንበት ብርታትን ስጠኝ።

ይህ የአንተ ሥራ እንጂ የሰው ኃይል አይደለምና፤ የአንተ ቅዱስ ሥርዓት እንጂ የሰው ፈጠራ አይደለምና። የመላእክትን ስለታም እይታ እንኳ የሚያልፉትን እነዚህን ነገሮች ማንም ሰው በራሱ ሊረዳቸውና ሊያስተውላቸው አይችልም። እንግዲያስ ትቢያና አመድ ብቻ የሆንሁ፣ የማይገባኝ ኃጢአተኛ እኔ እንዲህ ያለውን ታላቅ ምሥጢር እንዴት ልመረምረውና ላስተውለው እችላለሁ?

ጌታ ሆይ፥ እንደ ትእዛዝህ በልብ ቅንነት፣ በመልካምና በጽኑ እምነት፣ በተስፋና በአክብሮት ወደ አንተ እመጣለሁ፤ አምላክና ሰው የሆንህ አንተ በዚህ ቅዱስ ቍርባን ውስጥ በእርግጥ እንዳለህም በእውነት አምናለሁ። እንድቀበልህና በፍቅር ከአንተ ጋር አንድ እንድሆን ፈቃድህ ነው። ስለዚህ ምሕረትህን እለምናለሁ፤ ከእንግዲህ ስለ ውጫዊ መጽናናት እንዳልጨነቅ፣ በአንተ ውስጥ ፈጽሜ እንድቀልጥና በፍቅርህ እንድሞላ የተለየ ጸጋ እንዲሰጠኝ እጠይቃለሁ። ይህ እጅግ ከፍ ያለና እጅግ ክቡር የሆነው ቅዱስ ቍርባን የነፍስና የሥጋ ጤና፣ የመንፈሳዊ ድካም ሁሉ ፈውስ ነውና። በእርሱ ጕድለቶቼ ይታረማሉ፤ ምኞቶቼ ይገታሉ፤ ፈተናዎችም ድል ይደረጋሉ ወይም ይበርዳሉ። በእርሱ የበለጠ ጸጋ ይፈስሳል፤ እያደገ ያለው በጎ ምግባር ይመገባል፤ እምነት ይጸናል፤ ተስፋ ይበረታል፤ ፍቅርም ይቀጣጠላል።

አምላኬ ሆይ፥ የነፍሴ ጠባቂ፣ የሰው ድካም ብርታትና የውስጣዊ መጽናናት ሁሉ ሰጪ የሆንህ አንተ፣ በአምልኮ ቍርባን ለሚቀበሉ ለወዳጆችህ በዚህ ቅዱስ ቍርባን ታላላቅ ስጦታዎችን ሰጥተሃል፤ አሁንም ብዙ ጊዜ ትሰጣለህ። ከዚህም በላይ በብዙ መከራቸው መካከል ብዙ መጽናናትን ትሰጣቸዋለህ፤ ከተስፋ መቍረጥ ጥልቀትም ወደ ጥበቃህ ተስፋ ታነሣቸዋለህ። ከቍርባን በፊት በጭንቀት የተሞሉና ፍቅር የራቃቸው የነበሩት ይህን ሰማያዊ ምግብና መጠጥ ከተካፈሉ በኋላ ወደ በጎ እንደ ተለወጡ ራሳቸውን እንዲያገኙ በአዲስ ጸጋ በውስጣቸው ታበረታቸዋለህ፤ ታበራላቸዋለህም።

እንዲሁም በራሳቸው ምን ያህል ደካሞች እንደ ሆኑና ከአንተ ምን ዓይነት ቸርነትና ጸጋ እንደሚያገኙ በእውነት እንዲያውቁና በግልጥ እንዲለማመዱ ከምርጦችህ ጋር እንዲህ ታደርጋለህ። በራሳቸው ቀዝቃዛዎች፣ ልበ ደንዳኖችና አምልኮ የጐደላቸው ቢሆኑም፣ በአንተ ግን ትጉዎች፣ ደስተኞችና ለእግዚአብሔር ያደሩ ይሆናሉ።

ወደ ጣፋጭነት ምንጭ በትሕትና ቀርቦ ከእርሱ ጥቂት ይዞ የማይሄድ ማን ነው? ወይስ በሚንበለበል እሳት ፊት ቆሞ ከሙቀቱ ጥቂት የማይሰማው ማን ነው? አንተ ሁልጊዜ ተትረፍርፎ የሚሞላ ምንጭ ነህ! አንተ ሁልጊዜ የሚነድድና ፈጽሞ የማይጠፋ እሳት ነህ!

ስለዚህ የምንጩን ሙላት ልጨርሰው ወይም እስክጠግብ ልጠጣ ባልችልም፣ ጥማቴን የሚያረካ ቢያንስ ትንሽ ጠብታ እንዳገኝና እንዳልደርቅ ከንፈሮቼን በዚህ ሰማያዊ ወንዝ አፍ ላይ አኖራለሁ። ገና ፈጽሞ ሰማያዊ መሆን ወይም እንደ ኪሩቤልና ሱራፌል እሳት የተሞላ መሆን ባልችልም፣ ሕይወት ሰጪ የሆነውን ይህን ቅዱስ ቍርባን በትሕትና በመቀበል ከመለኮታዊው እሳት ትንሽ ፍንጣሪ እንድሰበስብ ይበልጥ ለእግዚአብሔር ያደርሁ ለመሆን እጥራለሁ፤ ልቤንም አዘጋጃለሁ።

ቸር ኢየሱስ፣ እጅግ ቅዱስ መድኃኒት ሆይ፥ ሁሉን፦ «እናንተ ደካሞች ሸክማችሁ የከበደ ሁሉ፥ ወደ እኔ ኑ፥ እኔም አሳርፋችኋለሁ።» ብለህ ወደ አንተ ልትጠራ የወደድህ አንተ በእኔ የጐደለውን ሁሉ በደግነትህና በጸጋህ ሙላልኝ።

እኔ በእርግጥ በፊቴ ወዝ እደክማለሁ። በልብ ኀዘን ተቈርሻለሁ። በኃጢአት ተጭኛለሁ፤ በፈተናዎች ታውካለሁ፤ በብዙ ክፉ ምኞቶች ተተብትቤ ተጨንቃለሁ፤ ከአንተ፣ ከጌታ አምላኬና መድኃኒቴ በቀር የሚረዳኝ፣ የሚታደገኝና የሚያድነኝ ማንም የለም፤ ትጠብቀኝና ወደ ዘላለም ሕይወት ትመራኝ ዘንድ ራሴንና ያለኝን ሁሉ ለአንተ አደራ እሰጣለሁ። ሥጋህንና ደምህን ለእኔ መብልና መጠጥ አድርገህ ያዘጋጀህ ሆይ፥ ለስምህ ክብርና ምስጋና ተቀበለኝ። ጌታ ሆይ፥ አምላኬና መድኃኒቴ ሆይ፥ ወደ ምሥጢራትህ ብዙ ጊዜ በመቅረብ የአምልኮዬ ትጋት እንዲጨምር ስጠኝ።