መቅድም

ይህን የክርስቶስን መምሰል እትም ስናዘጋጅ ዓላማችን፣ ይህን ወደር የለሽ መጽሐፍ አስቀድመው ለሚወዱት እውነተኛ ሆኖ የሚሰማቸውንና ሌሎችንም ወደ እርሱ የሚስብ ቀላልና ለንባብ የሚመች ጽሑፍ ማዘጋጀት ነበር። ስለዚህም የክርስትናን ጥንታውያን መጻሕፍት ብዙ ትርጉሞች በሚያከብዱ ግልጽ ያልሆኑና ያረጁ ቃላት ፈንታ፣ ጽሑፉን ዛሬ በሚነገረው እንግሊዝኛ ለማቅረብ ሞክረናል። ውጤቱም ዘመናውያን አንባቢዎች የሚቀበሉትን ቀጥተኛነትና አጭርነት እንዳስገኘ ይሰማናል። ሁለተኛም፣ የመጀመሪያው ጽሑፍና ብዙዎቹ ትርጉሞች የሚከተሉትን የአጫጭር ዓረፍተ ነገሮች ወይም የቍጥር አጻጻፍ ትተን፣ የተለመደውን የአንቀጽ አጻጻፍ ተጠቅመናል። ይህንም ያደረግነው ለማንበብ እንዲቀልና በየዓረፍተ ነገሩ መካከል ያለው ትስስር ይበልጥ ግልጽ ሆኖ እንዲታይ ነው።

አሁን ካሉት ከብዙዎቹ የእንግሊዝኛ ትርጉሞች በሥነ ጽሑፍ ጥራት እንበልጣለን የሚል ጥያቄ እዚህ አናቀርብም፤ የመጽሐፉን ደራሲ ማንነት ጥያቄ ለመፍታት ሞክረን ነገሩን ይበልጥ ለማወሳሰብም አንሻም።

በአሁኑ ጊዜ ይበልጥ ተቀባይነት ያገኙት አስተያየቶች ክርስቶስን መምሰልን የጻፉት፣ በአሥራ አራተኛው መቶ ክፍለ ዘመን ሁለተኛ አጋማሽ በኔዘርላንድ የተደራጀው «የጋራ ሕይወት ወንድሞች» የተባለው የካህናት ማኅበር አባላት የሆኑ ሁለት ወይም ሦስት ሰዎች እንደ ሆኑ ይገምታሉ። የኬምፐን ተወላጅ የሆነው ቶማስ ሄመርከን፣ ማለትም ዛሬ በሚታወቅበት ስሙ ቶማስ አ ኬምፒስ፣ በኋላ የእነዚህን ሰዎች ጽሑፎች ስብስብ — በመሠረቱ መንፈሳዊ ማስታወሻ የሆነውን — ከመጀመሪያው የኔዘርላንድ ቋንቋ ወደ ላቲን እንደ ተረጎመው በአብዛኞቹ ሊቃውንት ዘንድ ተቀባይነት አለው። ይህ ቶማስ በ1380 ገደማ የተወለደ ሲሆን፣ በእነዚሁ በጋራ ሕይወት ወንድሞች እጅ ተማረ፤ ማኅበራቸውንም ለመቀላቀል ልቡ ተነሣሣ፤ ክህነትንም ተቀበለ። ከዚያ በኋላ ሕይወቱን በሙሉ የመንፈሳዊ ፍጽምናን ምክሮች በመፈጸምና ለትምህርት ቤቶች መጻሕፍትን በመገልበጥ አሳለፈ። ከእነዚህ ከሁለቱ ተግባራት ክርስቶስን መምሰል ተገኘ። እንደ አዘጋጅና እንደ ተርጓሚ ጕድለት አልነበረበትም ማለት አይቻልም፤ ነገር ግን በእርሱ ምክንያት ክርስቶስን መምሰል ከመጽሐፍ ቅዱስ ቀጥሎ በዓለም ላይ ከሁሉ ይበልጥ የሚነበብ መጽሐፍ ሆነ፤ እስከ ዛሬም እንደዚያው ነው። እዚህ ወደ እንግሊዝኛ የቀረበውም የእርሱ እትም ነው፤ የአንዳንዶቹ ምዕራፎች ወይም ክፍሎች ደራሲነት ስለሚያጠራጥር፣ ወይም የአጻጻፍ ስልት ልዩነት ስላለባቸው፣ ወይም ከሌሎች ብዙ ወይም ጥቂት ተገቢነት ካላቸው ምክንያቶች የተነሣ አንድም ምዕራፍ ወይም የምዕራፍ ክፍል አልተቀነሰም።

አንድ ትልቅ ለውጥ ብቻ አለ። አ ኬምፒስ ሦስተኛው መጽሐፍ አድርጎ ያስቀመጠው ስለ ቅዱስ ቍርባን የሚናገረው ድርሳን እዚህ አራተኛው መጽሐፍ ተብሎ ተሰይሟል። ይህ ሽግሽግ የመጽሐፉን አጠቃላይ ቅደም ተከተል ይበልጥ ምክንያታዊ ያደርገዋል፤ ከአብዛኞቹ አዘጋጆች አሳብም ጋር ይስማማል።

ተርጓሚዎቹ

አሎይሺየስ ክሮፍት

ሃሮልድ ቦልተን