ከትናንት ጋር የሚያገናኙ ሰንሰለቶች

2009 እና 2010 በአብዛኛው ጸጥ ያሉ ዓመታት ነበሩ፤ በእነርሱም በየሦስት ወሩ ምርመራ ማድረግ ነበረብኝ — እያንዳንዱም ካንሰር እንደሌለ አሳየ፤ ዩሮሎጂስቴም፦ «አቶ ኢቫንስ፣ ካንሰሩ አይመለስም — አመለካከትዎና የአኗኗር ዘይቤዎ እጅግ አዎንታዊ ነውና» ይለኝ ነበር። በ2009 ጥቂት ጊዜ የመናገር ዕድል አግኝቼ ነበር፤ በተለይም ስለ «መነቃቃት» ተከታታይ መልእክቶችን ባቀረብሁበት በሲድኒ ጴንጤቆስጤ ቤተ ክርስቲያን እጅግ ተደሰትሁ።

በ2009 መጨረሻ ሊኔትንና ቤተሰቧን ለመጠየቅ ወደ ብሪዝበን፣ አውስትራሊያ ተመለስን — ሁልጊዜም ለእኛ ታላቅ ደስታ ነው። በዚያም ጡረታ ከወጡ አንድ አረጋዊ የዌልስ መጋቢ ጋር የበለጸገ ኅብረት አደረግሁ። ያለፈውን ለማስታወስ፣ እርስ በርስ ለመካፈልና ከጥንቶቹ የዌልስ መዝሙሮች አንዳንዶቹን አብረን ለመዘመር በየሳምንቱ እንገናኝ ነበር። በዊናም-ማንሊ አላያንስ ቤተ ክርስቲያንም ብዙ ጊዜ ተናገርሁ።

በኦክቶበር 2010 በባልቲሞር፣ ዩናይትድ ስቴትስ በሚካሄድ ጉባኤ ላይ እንድናገር ተጋበዝሁ። «በዙፋኑ ፊት መሰበር» የተባለው ጉባኤ ለአንድ ሳምንት የሚቆይ ሲሆን፣ በጸሎት ርዕስ ላይ የሚናገሩ ሌሎች በርካታ ተናጋሪዎችንም አካትቶ ነበር። የመጀመሪያዎቹን ትምህርቶች ቅዳሜ ምሽትና እሑድ ጠዋት አቀረብሁ።

በእያንዳንዱ ክፍለ ጊዜ እንደ ተመራሁ የምጠቀምበት ሦስት ሰዓት ተሰጠኝ፤ እያንዳንዱንም ጊዜ ተሳታፊዎቹን በኅብረት ጸሎት በመራሁበት «የጸሎት ኅብረ ድምፅ» እደመድም ነበር። አዘጋጁ ዳን ባይሰርና አብያተ ክርስቲያናት እንደ ገና በጕልበታቸው ተንበርክከው የእግዚአብሔርን ፊት ሲፈልጉ ለማየት ያለው ጽኑ ፍላጎት በጣም ማረከኝ። ከዚህ የባልቲሞር ጉዞ ለእኔ ታላቅ የበረከት ምንጭ የሆኑ ሁለት እጅግ አስደናቂ ነገሮች ወጡ።

ከጥቂት ቀናት በኋላ ከአይዳሆ ዴብ ክራም ኢሜይል ጻፈችልኝ። በገንዘብ የሚቸገር የሬዲዮ አገልግሎት ነበራት፤ ስለዚህ እርሷና የቦርድ አባሎቿ እንዴት መቀጠል እንዳለባቸው እያጠኑ ነበር። የባልቲሞሩን መልእክቴን «በኢንተርኔት» ከተመለከተች በኋላ አቅጣጫዋን እንድትለውጥና ስለ ወደ ፊቱ አገልግሎት የእርሱን አመራር በመፈለግ በጸሎት ብዙ ጊዜ እንድታሳልፍ ተሞገተች። የቦርድ አባሎቿ የቦርድ ስብሰባቸውን ወደ «ጸሎት ስብሰባ» የመለወጡን ሐሳብ ተቃወሙ፤ አንዳንዶቹም ለቀቁ። እርሷ ግን የእግዚአብሔርን ፊት ለመፈለግ ቈርጣ ነበር፤ እኛም መደበኛ የደብዳቤ ግንኙነት ጀመርን።

ዴብ አሁን በገዛ ሕይወቷ ስለ ተደረገ ድንቅ ጣልቃ ገብነትና በአይዳሆና በአጎራባች ግዛቶች ላሉ ሴቶች ስለምታበረክተው የበለጸገ አገልግሎት ስለምትመሰክር፣ ጌታችን ምን ያህል ታማኝ እንደ ሆነ ጊዜ አሳይቷል። ጦማሯን «ግሬስ ታፔስትሪስ» በሚለው ስም መከታተል ትችላለህ።

ራሚንና ነሲባን ያገኘኋቸው ከባልቲሞር በምመለስበት ጉዞ ላይ ነበር። እነርሱና ሁለቱ ትንንሽ ወንዶች ልጆቻቸው በቶሮንቶ አውሮፕላን ማረፊያ በአጠገቤ ተቀምጠው ነበር። ቤተሰቡ በሙሉ በፎቶው ውስጥ እንዲገቡ ነሲባን ፎቶ ላነሣላት ፈቃደኛ መሆኔን ገለጽሁላት። ወደ ቪክቶሪያ የሚሄደውን አውሮፕላን ስሳፈር ራሴን ከራሚና ከአንዱ ልጁ አጠገብ ተቀምጬ አገኘሁት፤ ሚስቱና ሌላው ልጁ ደግሞ ከኋላችን ባለው ረድፍ ነበሩ። ለሚቀጥሉት አራት ሰዓታት እጅግ የሚያስደስት ውይይት አደረግን። ከመካ፣ ሳዑዲ ዓረቢያ የመጡ ነበሩ፤ ወደ ካናዳ የመጡትም የራሚ ወንድም ሃኒ የዶክትሬት ዲግሪውን እየተማረ ባለበት ዩኒቨርሲቲ ነሲባ እንድትማር ነበር።

ስለ እምነት፣ ስለ ሱኒና ስለ ሺዓ እስልምና፣ ስለ መሐመድና ስለ ኢየሱስ ተነጋገርን — በመካከላችን ምንም የክርክር ግንብ ሳይኖር። ካናዳ የክርስቲያን አገር ሳትሆን ዋነኛው ሃይማኖቷ ዓለማዊ ሰብአዊነት የሆነባት አገር እንደ ሆነች ነገርሁት። ራሚ ከዚያ በፊት እውነተኛ ክርስቲያን አግኝቶ ስለማያውቅ አንድ በማግኘቱ እጅግ ተደሰተ። ይህን ምዕራፍ በምጽፍበት ጊዜ ራሚና ነሲባ፣ ሃኒና ሚስቱ ዘይነብ እንደ ገዛ ልጆቻችን ሆነውልናል ማለቱ ይበቃል፤ እግዚአብሔርን ለማወቅ (ለመለማመድ) ስላለን ጽኑ ፍላጎት ሁልጊዜ እየተነጋገርን አብረን በምናሳልፋቸው ጊዜያት እንደሰታለን። ሁሉም እውነተኛ ጽድቅን ይራባሉ፤ ስለዚህ ጸሎታችን ጌታ ራሱን እንዲገልጥላቸው ነው።

በ2010 መጨረሻ በብሪቲሽ ኮሎምቢያ፣ ሚድዌይ ከሚገኘው ከባውንደሪ ኮሚኒቲ ቤተ ክርስቲያን የስልክ ጥሪ ደረሰኝ። በብሪቲሽ ኮሎምቢያ ስላለችው ስለ ሚድዌይ ከዚያ በፊት ሰምቼ አላውቅም ነበር፤ ምንም እንኳ ከብዙ ዓመታት በፊት በቍጥር 3 አውራ ጎዳና በኩል ወደ አልበርታ ባደረግሁት ብቸኛ ጉዞዬ በእርሷ በኩል አልፌ መሆን ቢኖርብኝም። መጋቢያቸው የጥናት ፈቃድ ያስፈልገው ነበር፤ ነገር ግን ቤተ ክርስቲያኒቱ ለሁለት ወር እርሷን የሚጠብቅ ብቻ ሳይሆን አንድን ወጣት የወጣቶች አገልግሎት ተለማማጅ የማማከርና የማሳደግ ኃላፊነትም የሚወስድ ሰው እስክታገኝ ድረስ ፈቃዱን አይወስድም ነበር።

የገዛ ቤተ እምነታቸውን ሞክረው ነበር፤ ነገር ግን ለመምጣት የተስማማ አንድም ሰው አልነበረም — ምናልባት በጣም ትንሽ በሆነ ማኅበረሰብ ውስጥ ተገልሎ ክረምትን የማሳለፉ ሐሳብ አስፈርቷቸው ይሆናል! ተለማማጁ ማይክና ሚስቱ ኔታ ያውቁኝ ስለ ነበር ልገኝ እንደምችል ሐሳብ አቅርበው ነበር። ፈቃደኛ መሆኔን ስገልጽ «በሚቀጥለው የሳምንቱ መጨረሻ» ወደ ሚድዌይ መጥቼ እንድናገር (ቤተ ክርስቲያኒቱም «እንድትገመግመኝ») ተጋበዝሁ።

በዚህም ሁኔታ ከፌብሩዋሪ 2011 አጋማሽ ጀምሮ ለሁለት ወር መጋቢያቸው እንድሆን ተስማማን። ጥቂት ሳምንታት ቀደም ብለን እንድንመጣ ፈልገው ነበር፤ ይህ ግን የማይቻል ነበር፤ ከበርካታ ወራት ጸጥታ በኋላ ሌሎች ሁለት አስደሳች አጋጣሚዎች በድንገት ተከስተው ነበርና። በኖቬምበር ከኳላ ላምፑር፣ ማሌዥያ ኢሜይል ደረሰኝ። በ1980/2 በካናዳ ዩኒቨርሲቲዎች (በአብዛኛው በኦንታሪዮ) ለሚማሩ የማሌዥያ ተማሪዎች ቄስ ሆኜ አገልግዬ ነበር፤ ከዚያ ወዲህም አንዳንዶቹን በሦስት አጋጣሚዎች የመጠየቅ ዕድል አግኝቼ ነበር።

አሁን የ30 ዓመት የመገናኘት በዓል በጃንዋሪ 2011 ሊያከብሩ ነበር፤ እኔና አንም ለሁለት ሳምንት እንድንቀላቀላቸው ፈለጉ — ወጪው ሁሉ ተሸፍኖልን! እንዲህ ያለ ሞቅ ያለ ትዝታ ከሰጡን እንዲህ ካሉ ልዩ ወጣቶች የመጣን እንዲህ ያለ ግብዣ እንዴት እምቢ ልንል እንችላለን? የበረራ ትኬቶቻችንን በታላቅ ጉጉት ቈረጥን፤ ከ1967-69 ቤታችን በነበረችው በሆንግ ኮንግ (ምዕራፍ 5ን ተመልከት) የአራት ቀን ቆይታ ማድረጋችንም ለጉጉታችን አንዱ ምክንያት ነበር።

በሆንግ ኮንግ በዋይዋም ማዕከል (በሌሊት በ10 ዶላር ብቻ!!) አረፍን፤ የቀድሞዋ የብሪታንያ ቅኝ ግዛት አሁን የሕዝቧ ቍጥር በእጥፍ ቢያድግም፣ ሰማይ ጠቀስ ሕንጻዎቿም እጅግ ቢበዙም፣ ብዙዎቹን የቀድሞ መዋያዎቻችንን ለመጎብኘት ቻልን። ከጃኪ ፑሊንጀር ጋር እንደ ገና የመገናኘትና በዕፅ ሱሰኞች፣ በወሮበሎች ቡድኖችና በዝሙት አዳሪዎች መካከል መምራቷን የቀጠለችውን አስደናቂ ሥራ የማየት ዕድል አገኘን። ጃኪ ለዚህች ከተማ ያላትን ጽኑ ፍቅር ለመረዳት ሁሉም ሰው «ዘንዶውን ማሳደድ» የተባለውን መጽሐፏን ማንበብ አለበት። የሚሰጣት ዕውቅና በእርግጥ ይገባታል፤ ለዚህም ምሳሌ የሚሆነው ሥራዋን በሠራችበት በዚያ ስመ ጥፉ ስፍራ፣ በቀድሞዋ «በቅጥር የተከበበች ከተማ» ቦታ ላይ ለክብሯ የቆመው የመታሰቢያ ድንጋይ ነው። በኢንተርኔት ላይ ስለ እርሷ ብዙ ተጽፏል።

ከሆንግ ኮንግ ወደ ኳላ ላምፑር በረርን፤ በዚያም ለሚቀጥሉት ሁለት ድንቅ ሳምንታት አስተናጋጆቻችን የሆኑት ቪንሰንትና ሸርሊ ቼአ ተቀበሉን። ከ«ካናዳውያን» ተማሪዎቻችን ብዙዎቹን እንደ ገና ማግኘትና ምን ያህል እንደ በለጸጉ ማየት እንዴት ደስ ያሰኛል! በአንድ የአካባቢው ቤተ ክርስቲያንና በፔናንግ በአንድ የቤት ኅብረት ላይ የመናገር ዕድልም አገኘሁ። በፔናንግ የሚገኘውን የአላያንስ ሚስዮናውያን ትምህርት ቤት ጎበኘን፤ አንድ የሳምንቱ መጨረሻም በሲንጋፖር በሚገኘው የቼአ ቤተሰብ መኖሪያ አፓርትመንት አሳለፍን፤ በዚያም የአን የትምህርት ቤት ዘመን ጓደኛ ከሆነችው ከፕሩደንስ ጋር ጊዜ የማሳለፍ አጋጣሚ አገኘን።

ቪንሰንት ሁለት ምግብ ቤቶች ስላሉት በደንብ በላን! ከመሄዳችን በፊት ወደ አውስትራሊያ በምናደርገው በሚቀጥለው ጉብኝታችን መንገድ ላይ እርሱንና ሸርሊን በቻይና እንድንቀላቀላቸው ጋበዘን። በሆንግ ኮንግ ተቀብሎን በዚያች ታላቅ አገር አጭር ጉብኝት ሊያደርግልን ነበር። ይህ የታቀደው ለ2012 መጨረሻ ነበር፤ ነገር ግን ትልቁ «ካ» እነዚያን ዕቅዶች ለመለወጥ እንደ ገና ጣልቃ ሊገባ ነበር — በእኔ ሳይሆን በአን ላይ።

ከማሌዥያ ወደ ቫንኩቨር ተመለስን፤ ከዚያም አን አጭር በረራ ወደ ቪክቶሪያ ሄደች — እኔ ግን በቶሮንቶና በሞንትሪያል በኩል ወደ ሄይቲ መሄድ ነበረብኝ — የ42 ሰዓት ጉዞ! በዲሴምበር በኪስኬያ ክርስቲያን ትምህርት ቤት የሠራተኞች መንፈሳዊ ጉባኤ ላይ ለመናገር ወደ ፖርት-ኦ-ፕሪንስ እንድሄድ ግብዣ ደርሶኝ ነበር። ሰባ ያህል ተሳታፊዎች የነበሩበት ጉባኤ የተካሄደው ከአንድ ዓመት በፊት በደረሰው የመሬት መንቀጥቀጥ ከተከሰተው የፖርት-ኦ-ፕሪንስ ውድመት ራቅ ብሎ በሚገኝ ውብ የባሕር ዳርቻ ማረፊያ ነበር። ቤቶች፣ ሱቆች፣ አፓርትመንቶችና የመሳሰሉት የነበሩትን ትልልቅ የኮንክሪት ንጣፎች ለማንሣት የሚያገለግሉ ከባድ መሣሪያዎች እጅግ ጥቂት ስለ ነበሩ ከተማዋ አሁንም ፈርሳ ነበር።

ብዙ አስከሬኖች አሁንም በፍርስራሹ ሥር ተቀብረው ነበር፤ የተረፉት ሰዎች ታሪኮችም ልብ የሚሰብሩ ነበሩ። ቤታቸውን ላጡ — ወይም እንደ ገና ወደ ቤታቸው ለመግባት ለፈሩ — ሰዎች መጠለያ የሚሆኑ በመቶዎች የሚቈጠሩ ሰማያዊ ድንኳኖች በየቦታው ነበሩ። ያረፍሁት በሎሬን፣ ኦሪገን በጎበኘናቸው ጊዜያት በደንብ ያወቅናቸው ሚስዮናውያን በሆኑት በሼንና በክሪስቲ ማተንሊ ቤት ነበር። ስለ መስተንግዷቸውና በሄይቲ ስለ ተናገርሁባቸው ጊዜያት ሞቅ ያለ ትዝታ አለኝ።

ከጉባኤው በኋላ በየዕለቱ ለአንድ ሰዓት ያህል በሚቆይ የጠዋት ስብሰባ ላይ ለተማሪዎቹ ሁሉ እንድናገር ተጋበዝሁ። የፖርት-ኦ-ፕሪንስ ዓለም አቀፍ ቤተ ክርስቲያን በሆነው በኪስኬያ የጸሎት ቤትም እንደ ገና እንድናገር ተጋበዝሁ — እጅግ ታላቅ ዕድል ነበር! በዚህ የጠዋት አገልግሎት ላይ አንድ ያልተለመደ ነገር ሆነ። ለመናገር ስነሣ የድምፅ ማጉያ ሥርዓቱ ተቋረጠ! በድሃ አገሮች እንዲህ ያለ የኤሌክትሪክ መቋረጥ መጠበቅ አለበት።

በአንድ ትልቅ ቤተ ክርስቲያን ውስጥ ከ400 በላይ ሰዎች ነበሩ፤ ስለዚህ ከመድረኩ የፊት ደረጃዎች ላይ ቆሜ በጣም ጮክ ብዬና በግልጽ መናገር ነበረብኝ። ሆኖም ሁሉም ሰው እያንዳንዱን ቃሌን ለመስማት ስለ ተጣጣረ ምናልባት የተሰወረ በረከት ሳይሆን አይቀርም፤ ከሰጡት አስተያየት እንደሚታየውም ተሳክቶላቸዋል። ስጨርስ የድምፅ ማጉያ ሥርዓቱ ተመልሶ ሠራ!

በዚያ ሁሉ ውድመት መካከል የእግዚአብሔር እጅ በብዙ የሄይቲ ወጣቶች ሕይወት ውስጥ ሲሠራ ማየት እጅግ ያስደስታል — አንድ ቀን የዚህች አገር መሪዎች የሚሆኑ ሰዎች ናቸው። በፌብሩዋሪ አጋማሽ ቤት ደረስሁ፤ በማግሥቱም ወደ ሚድዌይ፣ ብሪቲሽ ኮሎምቢያ ረጅሙን ጉዞ ለማድረግ ጠረፉን ለቀቅን። በጀልባ ወደ ዋናው የብስ ስንሻገር የባውንደሪ ኮሚኒቲ ቤተ ክርስቲያን መጋቢ የሆነውን ማርክንና ቤተሰቡን አገኘን። በኒው ዚላንድ፣ ከዚያም በቪክቶሪያ በሚገኘው ቤታችን የሚያሳልፉትን ጊዜ ያካተተ የጥናት ፈቃዳቸውን ሊጀምሩ ነበር። ሆኖም ልጃቸው ሊና ወደ ሚድዌይ በምናደርገው ጉዞ ከእኛ ጋር ሆና በአዲሱ ቤታችን እንድንደላደል ልትረዳን ነበር።

በባውንደሪ ኮሚኒቲ ቤተ ክርስቲያን ያሳለፍናቸው አሥር ሳምንታት ታላቅ በረከት ነበሩ። ጸጥ ባለው የገጠር ሕይወትና በእነዚህ ደግ ሰዎች ኅብረት እጅግ ተደሰትን። በአካባቢው የተራራ መንገዶች በእግር ተጓዝን፤ ብዙዎቹን የአካባቢውን ታሪካዊ ውብ ስፍራዎችም ጎበኘን። አገልግሎቴ በደስታ ተቀባይነት አገኘ፤ ብዙ አዳዲስ ወዳጆችንም አፍርተን ተመለስን። አዲስ ጉባኤን የምጠብቅባቸውን እንዲህ ያሉትን ጊዜያት እጅግ እወዳቸዋለሁ፤ ይህም ሦስተኛው እንዲህ ያለ ረዘም ያለ ጊዜ ነበር።

2009 እና 2010 ጸጥ ያለ ጊዜ ከነበሩ፣ በዚያ ጊዜ መጨረሻ ላይ ነገሮች በእርግጥ ተለውጠው ነበር — 2011ንም እጅግ አስደሳች ዓመት ያደረጉ ተጨማሪ ነገሮች ገና ይመጡ ነበር።