ሥሬን መዳሰስ

በዲሴምበር 2008 ከስኮትላንድ ስመለስ፣ ከካንሰሬ እንደ ተፈወስሁ ሙሉ በሙሉ አምኜ፣ እንደሚጠበቅብኝ ዩሮሎጂስቴን ለማየት ሄድሁ፤ ስለዚህ በሽንት ፊኛዬ ግድግዳ ላይ ሦስት እብጠቶች መታየታቸውን ሲያገኝ እጅግ ተገረምሁ። የቀድሞው «ፍቀት» ከፍተኛ ደረጃ ያለው ካንሰር መሆኑን አሳይቶ ስለ ነበር፦ «በአስቸኳይ ማውጣት አለብን» አለ። «በአስቸኳይ» ያለው ግን አምስት ሳምንት ማለቱ ነበር፤ ገና በዓል እየቀረበ ስለ ነበርና የእርሱ ዕረፍትም ቀጠሮ ስለ ተያዘለት እስከ አዲሱ ዓመት ድረስ ሆስፒታል አልገባም ነበር። ሁለተኛው ቀዶ ሕክምና በሕይወቴ ደርሶብኝ የማያውቅ እጅግ የሚያሠቃይ የጡንቻ መኰማተር አስከተለብኝ፤ ነገር ግን የተሳካ እንደ ነበር ግልጽ ነው፤ አሁን በውስጤ ምንም የካንሰር ምልክት የለምና።

በሚቀጥሉት ሦስት ወራት የሽንት ፊኛ ካንሰር የተለመደ ሕክምና ነው የተባለውን የከብት የሳንባ ነቀርሳ ባክቴሪያ በየሳምንቱ ወደ ፊኛዬ በመርፌ ተሰጠኝ። ከእንዲህ ያለ ሕክምና በኋላ ለሁለት ዓመት በየሦስት ወሩ ዩሮሎጂስትን ማየት፣ ከዚያም ወደ ስድስት ወር ማራዘም የተለመደ ነው፤ ልዩ ልመና ባቀረብሁ ጊዜም ሁኔታው ይኸው ነበር። የዌልሱ ካርዲጋን ስቲቭ ኢቫንስ ከካንሰሩ ጋር እንዴት እንደ ሆንሁ ለማወቅ ከእኔ ጋር ግንኙነቱን ቀጥሎ ነበር፤ ከእርሱ ጋር ሳለሁ የተናገርሁትንም ቃል አንሥቶ ነበር። ወደ ዌልስ ተመልሼ በቤተ ክርስቲያኑ «የመነቃቃት ጉባኤ» ላይ እንድናገርና ለረዘመ ጊዜ በቤተ ክርስቲያኑ ለማገልገል እንድቆይ ጋበዘኝ።

የገለጽሁት ሕልሜ እንደ ነበረው በዌልስ ቋንቋ ተናጋሪ ባህል ውስጥ እዘፈቃለሁ። መኪና እንደሚዘጋጅልኝ፣ ዲክም በዩናይትድ ስቴትስ ለሰባት ሳምንት በዕረፍት ላይ ሳለ ቤቱን እየጠበቅሁ መኖር እንደምችል ጨመረልኝ። ስለዚህ የአን የወንድም ልጅ ካሪስ 50ኛ የልደት ቀኗን እስከምታከብርበት እስከ ኦገስት የመጀመሪያው ሳምንት ድረስ፣ ማለትም ከሚቀጥለው ቀጠሮዬ ሦስት ሳምንት አልፌ፣ በብሪታንያ መቆየት ይቻል እንደ ሆነ ዩሮሎጂስቴን ጠየቅሁት። እርሱም በቀላሉ ተስማምቶ፦ «ጋሬዝ፣ አመለካከትህና የአኗኗር ዘይቤህ ካንሰሩ እንደማይመለስ ያሳምኑኛል፤ ቢመለስም እንኳ ለማከም በቂ ጊዜ ይኖረናል። ሂዱና ተደሰቱ» አለ።

እኔና አን በሜይ 2009 የመጀመሪያው ሳምንት ካርዲጋን ደረስን፤ በኋላ ሁለታችንም እነዚህን ሦስት ወራት «እስከ ዛሬ ካሳለፍናቸው ዕረፍቶች ሁሉ እጅግ ድንቁ!» አድርገን እንደምንቈጥራቸው አናውቅም ነበር። ከመጀመሪያው አንሥቶ «መነቃቃት ቀርቧል» የሚል ስሜት ከተሰማኝ ከጽዮን ተራራ ባፕቲስት ቤተ ክርስቲያን ሰዎች ጋር «ፍቅር ያዘን»። በዚያ ብዙ ጊዜ ተናገርሁ፤ ነገር ግን እጅግ የተባረክሁት ስቲቭ ኢቫንስ «በደረቁ አጥንቶች ሸለቆ» ላይ አራት መልእክቶችን ሲሰብክ ነበር። በስብከቱ ላይ እንዴት ያለ ቅባት ነበር! (እነዚህን መልእክቶች በድረ ገጼ ላይ ማዳመጥ ትችላለህ — «ሊንኮች» www.garethevansministries.org) የጸሎት ስብሰባዎቹ እጅግ የሚያበረታቱ ነበሩ፤ በየሳምንቱ ከ25 በላይ ሰዎች ይገኙ ነበር (ወደ 100 ገደማ ከሚሆኑ ምእመናን መካከል)፤ ዝማሬው ደግሞ… እንግዲህ፣ ዌልሳዊ ነበር! — ከልብ የሆነ፣ የሚያነቃቃ፣ የተዋሐደ፣ የጋለ። እኔም ልክ በምወደው ዓለም ውስጥ ነበርሁ! የዲክ ቤት ጸጥ ያለውና ጥልቁ የታይቪ ወንዝ በካርዲጋን ከተማ አጠገብ አልፎ ወደ ባሕር የሚፈስስበትን ገደል የሚመለከት ውብ ጎጆ ነበር።

የገደሉ ግራና ቀኝ በዛፎች የተሸፈነ ነበር፤ ሌላው ብቸኛ የሰው መኖሪያ ምልክት ከኮረብታው ላይ ከፍ ብሎ የቆመው የጥንቱ የኪልጌራን ግንብ ነበር። ዲክና ጓቲማላዊት ሚስቱ ግላዲስ አስደናቂ ጥንዶች ነበሩ። ሁለቱም ምንም ሥር ለሌላቸው፣ ጌታ ግን በልባቸው ላይ ላኖረው ምድር መነቃቃት እንደ ገና እስኪመጣ ድረስ በጸሎት ሕይወታቸውን ለመስጠት መጥተው ነበር። ይህን በምጽፍበት ጊዜ የሚያደርጉትን ሁሉ www.walesawakening.org በተባለው ድረ ገጻቸው ላይ መከታተል ትችላለህ።

የዚያ ድንቅ ጊዜ ጐልተው የሚታዩ ትዝታዎች ብዙ ናቸው — ወጣ ገባ በሆነው ጠረፍ ዳር ባሉት ገደሎች ላይ በእግር መጓዝ፣ ጸሎተኛ ቅድስት የሆነችውን ዓይነ ስውሯን ዶሪንን መጠየቅ፣ የዚያችን ማራኪ የገበያ ከተማ ጎዳናዎች መቃኘት — ደግሞም የዌልስን ቋንቋ መናገር! አዎ፣ በቢ.ቢ.ሲ. ዌልስ የዌልስ ቋንቋ ትምህርቶች የተማርሁትን ሁሉ በስቲቭና በሱልዌን እርዳታ፣ እንዲሁም «የመካከለኛ ደረጃ ተማሪዎች» ክፍል በመከታተል ለመለማመድ ቻልሁ።

በዚያም በክፍሉ ፊት በዌልስ ቋንቋ ብቻ እየተናገርሁ አንድ ገለጻ እንኳ አቀረብሁ፤ መምህሩም እንዳለው፣ በጣም ጥሩ በሆነ አነጋገር ነበር። ርዕሴ በወቅቱ የነበረኝ የትርፍ ጊዜ ማሳለፊያዬ — ቋንቋዎችን መማር — ነበር። ዲክና ግላዲስ ከዩናይትድ ስቴትስ ከተመለሱ በኋላ፣ ለአንድ ሳምንት ከወትሮው ዋጋ በጥቂቱ ብቻ ከጠረፉ ወደ ላይ ራቅ ብሎ በሚገኝ ውብ የአልጋና ቁርስ ማረፊያ ተስተናገድን፤ ከዚያም ለሁለት ሳምንት የአካባቢውን «ቤተ መንግሥት» — የአንድ የቤተ ክርስቲያን አባል የሆነ ግሩም ቤት — እየጠበቅን ኖርን።

በእነዚህ ሁሉ ውድ ሰዎች እጅግ ተባረክን! አንድ ቀን ባልና ሚስት ከጽዮን ተራራ ቤተ ክርስቲያን ውጭ ቆመው የማስታወቂያ ሰሌዳውን እየተመለከቱ ሳሉ፣ ከአባላቱ አንዷ አርሊን ከቤተ ክርስቲያኑ ወጣች፤ ይህን ያህል ፍላጎት ሲያሳዩ አይታም ታነጋግራቸው ጀመር።

በዩናይትድ ኪንግደም ከሚኖረው ልጃቸው ጋር በጠረፉ በኩል ወደ ላይ በሚያደርጉት ጉዞ በካርዲጋን እያለፉ ነበር። ከካናዳ እንደ መጡም ጨመሩላት፤ ስለዚህ አርሊን በኋላ አንን ስታገኛት ስለ ውይይታቸው ነገረቻት፤ ከቤተ ክርስቲያኑ ትይዩ ወዳለው የአካባቢው የክርስቲያን መጻሕፍት መደብር ገና እንደ ገቡም ነገረቻት። አንም ወደ መደብሩ ገብታ ታነጋግራቸው ጀመር።

በቪክቶሪያ ከሚገኘው ቤታችን ጥቂት ማይሎች ብቻ ከምትርቀው ከብሬንትውድ ቤይ የመጡ ነበሩ! ሴትዮዋ ስሜን ስትሰማ በደስታ ተሞልታ፦ «ላለፉት አራት ወራት ስለ እርሱ ስንጸልይ ነበር!» ብላ ጮኸች። ስለ ካንሰሬ ሰምተው፣ በግል ባያውቁኝም ስለ እኔ ለመጸለይ ራሳቸውን ሰጥተው እንደ ነበር ግልጽ ነው። በዚህ ቤተሰብ ውስጥ እንግዶች እንደሌሉ፣ ያላገኘናቸው ወንድሞች ብቻ እንዳሉ እያወቅን የእግዚአብሔር ቤተሰብ አባል መሆን እንዴት የተባረከ ነው!

ለካሪስ የልደት ቀን በጊዜ ወደ ሉኸር ከመመለሳችን በፊት የአጎቴን ልጅ ክሪስቶፈርንና ሚስቱን (ዴም) ኤልስቤት ቶማስን ለመጠየቅ ዩናይትድ ኪንግደምን አቋርጠን ለመጓዝ ወሰንን። ኤልስቤት ፕሬዚዳንት ሆነው ላገለገሉበት ለብሪታንያ ቀይ መስቀል ላበረከቱት አገልግሎት በንግሥቲቱ የ«ዴም» ማዕረግ ተሰጥቷቸው ነበር። ልዕልት ዳያናንም ያለ ጊዜዋ ከመሞቷ በፊት በደንብ ያውቋት ነበር። ክሪስቶፈርና ኤልስቤት እኔና አን በካምብሪጅሻየር ለጥቂት ቀናት ከእነርሱ ጋር እንድንቆይ ጋብዘውን ነበር፤ እኛም ግብዣውን ለመቀበል ጓጉተን ነበር።

በመንገዳችን ላይ በ1964 በጀርመን ሳለን ለመጀመሪያ ጊዜ ያገኘናቸውን፣ በጦር ሠራዊቱ ውስጥ የመጽሐፍ ቅዱስ አንባቢዎች ሆነው አገልግለው ጡረታ የወጡትን አይቨርና ሜይ ሸርውድን፣ የአን የትምህርት ቤት ዘመን ጓደኛ የሆነችውን ማሪዮን (እና ጆን) ፓልመርን፣ ሌላዋን የአጎቴን ልጅ ሲንቲያን (እና ቢል ብራውንን)፣ እንዲሁም የአንን የአጎት ልጅ ጉዊሊም (እና ሱ) ኤድዋርድስን ጠየቅን። ትዝታ የሞላበትና ለዌልሱ ዕረፍታችን የሚገባ ፍጻሜ የሆነ እንዴት ያለ ድንቅ ጉዞ ነበር! አንድ ነገር ብቻ ቀርቶ ነበር — የካሪስን 50ኛ የልደት ቀን መደሰት፤ ያንንም ከብዙ ወዳጆቿ ጋር በአንድ ግሩም የራት ግብዣ አከበርነው። ወደ ቤት ስንመለስ ካንሰሩ የመመለስ ምልክት እንዳላሳየ የሚገልጽ መልካም ዜና ጠበቀን።