ሰርመን ኢንዴክስ.ኔት

እግዚአብሔር ለእኔ ሊከፍትልኝ ስላሰባቸው አዳዲስ በሮች ምንም ሳናውቅ በጁን 2007 መጨረሻ ወደ ካናዳ ቤታችን ተመለስን። ይህ ታሪክ የጀመረው በ2004 ነበር፤ በዚያን ጊዜ ከአካባቢው መጋቢዎች ጋር ኅብረት ለማድረግና ለመጸለይ ለሁለት ቀናት ወደ ቪክቶሪያ ከመጡ ከዋሽንግተንና ከኦሪገን ከደርዘን የሚበልጡ መጋቢዎች ጋር ተገናኝቼ ነበር። እነርሱን ለማግኘት በመጡት ጥቂት የአካባቢው ሰዎች፣ እነርሱ ምናልባት እንደ ተገረሙት ሁሉ፣ እኔም አፈርሁ።

ሆኖም አብረን ጥራት ያለው ጊዜ አሳለፍን፤ ለእኔ ዋነኛው ድምቀት ግን በሁለተኛው ቀን ማብቂያ ላይ ሊጸልዩልን በተሰበሰቡ ጊዜ ነበር። መሪያቸው በሲያትል የሚገኘው የቅዱስ ሉቃስ ኤጲስቆጶሳዊት ቤተ ክርስቲያን አለቃ፣ ቄስ ጆን ሮዳም ነበሩ፤ በዚህ የጸሎት ጊዜም በፊቴ ተንበርክከው እጆቼን በእጆቻቸው ውስጥ እንዳደርግ የጠየቁኝ እርሳቸው ነበሩ። «እግዚአብሔር ብዙ ወንዶችና ሴቶች ልጆችን ሰጥቶሃል» አሉ፤ ቀጥለውም፦ «ወደ ቅባቱ እንዲገቡ በማሰማራታቸው ሊጠቀምብህ ነው!» አሉ። ተደነቅሁ፤ ተገረምሁም፤ በእርግጥ «ወንዶችና ሴቶች ልጆቼ» ብዬ የምጠራቸውና በአብዛኞቹ ቀናት የምጸልይላቸው ብዙዎች አሉኝና።

ጆን ይህን የሚያውቅበት ምንም መንገድ አልነበረም፤ ስለዚህም ይህን «ከጌታ የመጣ ቃል» አድርጌ ለመቀበል ጓጓሁ። ፍሎይድ መክላንግ በአንድ ወቅት አናስታሲስን በጎበኘ ጊዜ «ከጌታ የመጣን ቃል» ስለ መቀበል ያስተማረንን በሚገባ አስታወስሁ። «የተሰጠህ ለአቅጣጫ ሳይሆን ሲፈጸም ስታየው እምነትህን እንዲደግፍ ነው።

ቃሉን በታችኛው መሳቢያ ውስጥ አስቀምጠው፤ እግዚአብሔር ፍጻሜውን እስኪገልጥልህ ድረስም መሳቢያውን ቆልፈው።» አሁን በ«ከጌታ የመጣ ቃሌ» ምን ማድረግ እንዳለብኝ አወቅሁ። ለማንም አልተናገርሁም፤ ነገር ግን ይህ በእርግጥ ከጌታ ከሆነ፣ እኔ ለእርሱ ዝግጁ ለመሆን ስፈልግ፣ ይህን ወደ ፍጻሜ ለማድረስ እንዲያዘጋጀኝ አዘውትሬ ጸለይሁ። እግዚአብሔር ይህን ወደ ፍሬ ሊያደርሰው እንደ ነበር አምናለሁ።

ረጅም በሆነው ሕመሜ ወቅት ለበርካታ ሳምንታት በየሳምንቱ አብሬያቸው የመጸለይ መብት ያገኘሁባቸው አራት ወጣቶች በነበራቸው ጽኑ ፍቅር አንድን ድረ ገጽ «እንድወደው» አድርገውኝ ነበር። www.sermonindex.net በድንቅ ስብከቶች፣ በተለይም ስለ «መነቃቃት» በሚናገሩና ልቤን በሚያነቃቁ ስብከቶች የተሞላ ሆኖ አገኘሁት። በ1904/5 በታላቁ መነቃቃት እግዚአብሔር ከትውልድ አገሬ ከዌልስ ሕዝብ ጋር ስላደረገው ድንቅ ሥራ ሰምቼና አንብቤ ነበር፤ ያንኑም ለመለማመድ እናፍቅ ነበር።

እግዚአብሔር በጸጋው በመንፈሱ ባጠመቀኝ ጊዜ በስዋንሲ ዩኒቨርሲቲ በተከራየሁበት ቤት የግሌን መነቃቃት አግኝቼ ነበር፤ በዌልስ ሸለቆዎች ስሰብክ «የመነቃቃቱ ልጅ» ተብዬ የመጠራት ደስታ አግኝቼ ነበር፤ ሁልጊዜም «የእግዚአብሔርን ጥልቅ ነገሮች» እራብ ነበር፤ አሁን ግን እንደ እኔ እግዚአብሔር በቤተ ክርስቲያኑ ላይ ገብቶ እንዲያነቃቃትና እንደ ገና ለራሱ ክብርን እንዲያመጣ ጽኑ ናፍቆት ካላቸው ግንባር ቀደም ሰዎች የሚሰጡ ስብከቶችን በመስማት ራሴን ማርካት እችል ነበር።

በዲፓርቸር ቤይ ባፕቲስት ቤተ ክርስቲያን እያገለገልሁ ሳለሁ አንድ ቀን፣ ልሰማቸው የምፈልጋቸውን ተናጋሪዎችና ርዕሶች በቀላሉ ለማግኘት እንዳልችል በድረ ገጹ ላይ ያለው ጽሑፍ እጅግ እየበዛ ስለ መጣ «በጫካ ውስጥ እንደ ጠፋ» ሆኜ ራሴን እስካገኘሁበት ጊዜ ድረስ በየሳምንቱ በዚያ ድረ ገጽ ላይ ጊዜ አሳልፍ ነበር።

ለጥልቁ ሕይወትና ለመነቃቃት ጽኑ ፍቅር ያለው ሰው የሚወደውን ስብከት ከማግኘቱ በፊት የሚስቡ ርዕሶች ያሏቸውን ነገር ግን ይዘታቸው የተለያየ የሆኑ ብዙ ስብከቶችን መፈለግ እንዳያስፈልገው፣ ተናጋሪዎቹንና መልእክቶቹን በማውጫ ማደራጀት ይቻል እንደ ሆነ ለመጠየቅ ለድረ ገጹ ኢሜይል ለመጻፍ ወሰንሁ። አክብሮት ሳላጓድልና ስም ሳልጠቅስ ልናገር፦ የተአምራት ዘመን አልፏል ብለው የሚነግሩኝን፣ ወይም በመለወጥ ጊዜ ያለውን ሁሉ እንቀበላለን፣ በበዓለ ኀምሳ እንደ ሆነው የእግዚአብሔር መንፈስ ሰውን ኃይል ሊያለብሰው በላዩ የሚመጣበት «ሁለተኛ በረከት» የሚባል ነገር የለም ብለው የሚያስተምሩትን ሰዎች ማዳመጥ በእውነት አያስደስተኝም። የቤተ እምነት ወገንተኝነት ያለበት ወይም «ከኪንግ ጄምስ ትርጉም በቀር ሌላ አይሆንም» የሚል አመለካከት ያለው መልእክትም አያስደስተኝም። ከእነዚህ ብዙዎቹ በሰርመን ኢንዴክስ ላይ ሊገኙ የሚገባቸው ለእግዚአብሔር ያደሩ ሰዎች ናቸው፤ እኔ ግን አንዳንዶቹ መልእክቶቻቸው እምብዛም አይስቡኝም።

በእርግጥ አንድ ድረ ገጽ መኖሪያው በዓለም ላይ የትም ሊሆን ይችላል፤ ስለዚህም ልክ ከአንድ ሳምንት በኋላ በብሪቲሽ ኮሎምቢያ ከሚገኘው ቤቴ የአንድ ቀን የመኪና መንገድ ብቻ ርቃ ከምትገኘው ከኬሎውና መልስ ሲደርሰኝ ምን ያህል እንደ ተገረምሁ መገመት ትችላለህ፤ መልሱ የድረ ገጹ መሥራች ግሬግ ጎርደን በወሩ መጨረሻ ወደ ቪክቶሪያ እንደሚዛወርና እኔ መካሪው እንድሆን የሚጠይቅ ነበር! እንዴት ያለ መብት ነው! ወዲያውኑ ተስማማሁ። በዚህም ሁኔታ ከጥቂት ቀናት በኋላ የበሩን ደወል ሰምቼ ስከፍት ይህን ግዙፍ ሰው አገኘሁት፤ ወደ ሕይወቴና ወደ ቤቴም ተቀበልሁት።

ግሬግ ዕድሜው ከሠላሳ ዓመት በታች ነበር፤ ነገር ግን እግዚአብሔር ከአሥር ዓመት በፊት ብቻ ከተለወጠበት ጊዜ ጀምሮ ለቅድስናና ለመነቃቃት ጽኑ ፍቅር ሰጥቶት ነበር። በመጽሐፍ ቅዱሳችን፣ በሻይ ጽዋዎችና በዌልስ ኬኮች ዙሪያ በየዕለቱ ኅብረት ማድረግ እንዴት ያለ መብት ነበር!

በጁላይ 2007 ግሬግ ከሌሎቹ ሁሉ የተለየ የመነቃቃት ጉባኤ ለማየት እንደሚናፍቅ በድረ ገጹ ላይ ጽፎ ነበር። አምልኮን የሚመሩ ትላልቅ የሙዚቃ ቡድኖች፣ የሚሸጡ መጻሕፍት ወይም ሙዚቃዎች፣ የመግቢያ ክፍያና መባ አይኖሩም። ተናጋሪዎቹ ምንም ዓይነት ክፍያ እንደሚያገኙ ቃል ሳይገባላቸው በራሳቸው ወጪ ይመጣሉ። ጉባኤው አንድ ጽኑ ፍላጎት ያላቸው ተናጋሪዎችና ተሳታፊዎች «የተቀደሰ ጉባኤ» እንዲሆን ታስቦ ነበር — ይኸውም ለግልም ለአገርም መነቃቃት ጌታን መፈለግ ነው።

በኦሃዮ ግዛት በካንተን ከተማ የምትገኝ አንዲት ትንሽ ቤተ ክርስቲያን እንዲህ ያለውን ጉባኤ ለማስተናገድ ፈቃደኛ እንደ ሆነችና ማስታወቂያውንና ዝግጅቱን ሁሉ እንደምታከናውን ጻፈች። ግሬግ ተስማማ፤ የሚያውቃቸው በራሱ ድረ ገጽ ላይ በማዳመጥ ብቻ የነበረ ቢሆንም፣ እንዲናገሩ ሰዎችን ማነጋገር ጀመረ። የሚገርመኝ — ምናልባት እርሱን አይገርመው ይሆናል — ተናጋሪ እንዲሆን የጠየቀው ሰው ሁሉ በእነዚህ ሁኔታዎች ለመምጣት ተስማማ! እነዚህ በራሳቸው ታላቅ ክብር ያላቸው ሰዎች ነበሩ፤ ይኸው ግን ጥቂት ማጣቀሻዎች ብቻ ባሉት በአንድ ያልታወቀ ወጣት በተዘጋጀ ጉባኤ ላይ ለመምጣት ተስማሙ።

በሰዎች ዘንድ ያልታወቀ ሊሆን ይችላል፤ በእግዚአብሔር ዘንድ ግን የታወቀ ነበር! ይህ በእርግጥ የእግዚአብሔር ቅባት የመጀመሪያው ምልክት ነበር። በዚህም ሁኔታ ከዩናይትድ ኪንግደም፣ ከደቡብ አፍሪካ፣ ከአሜሪካና ከካናዳ ተናጋሪዎች፣ እንደ አውስትራሊያና አውሮፓ ካሉ ሩቅ ቦታዎች ደግሞ ተሳታፊዎች ያሉበት ጉባኤ ተዘጋጀ።

ማመልከቻዎች እየመጡ ሲሄዱ ትንሿ አስተናጋጅ ቤተ ክርስቲያን ጉባኤው ለእርሷ እጅግ እየበዛ እንደ ሆነ ተገነዘበች፤ ስለዚህም በዚያ አካባቢ ከፍ ያለ ክብር ባላቸው ሽማግሌ በመጋቢ «ዴቭ» አመራር ሥር ወዳለችው በከተማዋ ውስጥ ትልቋ ቤተ ክርስቲያን ቀረቡ። እርሳቸውም ሰርመን ኢንዴክስን ራሳቸው ለመመርመር ወደ ድረ ገጹ ገቡ፤ ከዚያም፦ «ይህ ከእግዚአብሔር ነው — እኛ እናስተናግደዋለን» ብለው አወጁ። በዚህም ሁኔታ ለሦስቱ የጉባኤ ቀናት የቤተ ክርስቲያናቸውን ድንቅ ተቋማት ከሠራተኞቻቸው ሁሉ ሙሉ ትብብር ጋር አገኘን። እንዴት ያለ በረከት ሆኑልን! አን በካናዳ ቤት ሆና ሁሉንም ሂደት እንድትከታተል ስብሰባዎቹን በቀጥታ በድረ ገጽ ለማሰራጨት የቴሌቪዥን ካሜራዎች ነበሩ።

አን ግሬግን ለመደገፍ እንድገኝ ሐሳብ አቅርባ ነበር፤ ነገር ግን ለስብሰባዎቹ እጅግ ጥቂት ዝግጅት ተደርጎ ስንደርስ፣ ሌላ ሰው ባለመኖሩ የአወያይነቱ ኃላፊነት በዶን ኮርቪልና በእኔ ላይ ወደቀ። እነዚህ ጉባኤዎች ሲያድጉ፣ እግዚአብሔርም ግሬግን በራሱ ዘንድና በመላው ዓለም ባሉ ለእግዚአብሔር ያደሩ ሰዎች ዘንድ እንዴት በሞገስ እንደ መራው ስናይ እጅግ ተባርከናል። በመነቃቃት ውስጥ የእግዚአብሔርን ሉዓላዊ እንቅስቃሴ ከተለማመዱ ሰዎች ጋር ለመቀመጥና ስለ እነዚያ ጊዜያት ሲያካፍሉ ለማዳመጥ እጅግ ዕድለኛ ሆኛለሁ። አንድ ሰው መነቃቃትን ከተለማመደ በኋላ ዳግመኛ እንደ ቀድሞው እንደማይሆን የተረጋገጠ ነው! ከዚህና ከኋለኞቹ ጉባኤዎች የተናጋሪዎቹን ሁሉ መልእክቶች በግሬግ ድረ ገጽ www.sermonindex.net ላይ ማዳመጥ ይቻላል።