ጌታ መምራቱን ቀጠለ

በ2002 በአገር ውስጥም በውጭም ብዙ አገልግሎት ነበረኝ፤ ወደ ሄይቲ፣ ወደ ማኒቶባ፣ ወደ ዩናይትድ ኪንግደም፣ ወደ ፖርትላንድ፣ ወደ ፎርታሌዛ ጉብኝቶችን አደረግሁ፤ እንደ ገናም ወደ አውስትራሊያ ተመለስሁ። በሄይቲ እኔና የአሜሪካው የፖርትላንድ ነዋሪ ጥሩ ወዳጄ ዴቭ ክኒፔል፣ በዚያች ደሴት ምዕራባዊ ክፍል የልጆች አገልግሎት በማስፋፋት ላይ የነበሩት የኬቨንና የካረን ሃል እንግዶች ነበርን። የ«ሰርኪት ቲቺንግ ኢንተርናሽናል»ን የማስተማሪያ ጽሑፍ በበርካታ የመጋቢዎች ስብሰባዎች ላይ እንዳስተምር ታቅዶ ነበር፤ ሆኖም ሌሎች ብዙ የስብከት ዕድሎችም ነበሩ። ከእነዚህ መካከል አንዱ ለየት ብሎ ይታወሰኛል፤ ይህም በሄይቲ በእንግሊዝኛ ቋንቋ የሚያመልኩ ምእመናን ካሉባቸው አብያተ ክርስቲያናት ሁሉ በምትበልጠው፣ በዋና ከተማዋ በፖርት ኦ ፕራንስ በምትገኘው በኪስኬያ ቻፕል የሆነው ነው። ኬቨን በመኪናው ላይ ችግር ስላጋጠመው ትንሽ ዘግይተን ደረስን፤ ስለዚህም ከአምልኮው በፊት ከመጋቢ ኦልሰን ጋር ለመተዋወቅ ብዙ ጊዜ አላገኘሁም።

ከፊት ጥቂት ረድፎች ወደ ኋላ ብሎ ከእርሳቸውና ከባለቤታቸው አጠገብ እንድቀመጥ ስመራ፣ ብዙ መቶ ሰዎች የአምልኮ አዳራሹን አጨናንቀውት ነበር። ከመክፈቻው የአምልኮ መዝሙሮች በኋላ እንግዶችን ለመቀበል ተነሡ፤ እውቅና እንዲሰጣቸውም እንዲቆሙ ጋበዟቸው። በተለይ ከአሜሪካ የመጡትን የብዙዎቹን እንግዶች ስሞችና አገልግሎቶች ሳዳምጥ፣ በዚህች ጠዋት የእነርሱ ተናጋሪ የመሆን ሞገስ እንዴት ሊሰጠኝ እንደ ቻለ መገረም ጀመርሁ። ስለ መሰናከል ተናገርሁ፤ ጌታ በዚያ ቀን በእኔ በኩል በዚያ ለነበሩ ብዙ ሰዎች እየተናገረ እንደ ሆነ እስካውቅ ድረስ ታላቅ ቅባት ተሰማኝ።

በአምልኮው ማብቂያ ላይ መጋቢ ኦልሰንን ስለ ሰጡኝ ዕድል አመሰገንኋቸው፤ ከመጻሕፍቴም አንዱን፣ «በእጄ ያለው መክፈቻ»ን ሰጠኋቸው። መጽሐፉ በረከት እንደ ሆነላቸው ግልጽ ነበር፤ በኋላ ወደ ቪክቶሪያ ጽፈውልኝ ደርዘን ተጨማሪ ቅጂዎች እንድልክላቸው ጠየቁኝ፤ ለዚህች ዓለም አቀፍ ቤተ ክርስቲያን የቦርድ አባላት ሁሉ ሊሰጧቸው ፈልገው ነበርና፤ የቦርዱ አባላት የሚኖሩት በጆርጂያ ግዛት በአትላንታ ነበር።

ወደ ምዕራብ ወዳለው መቀመጫችን ስንመለስ እኔ፣ ኬቨንና ዴቭ ምሳ ለመብላትና ኅብረት ለማድረግ በአንድ ትንሽ የሚስዮን ጣቢያ ቆምን። በዚያም አንድ አስደናቂ ታሪክ ሰማን። ከሚስዮናውያኑ አንዱ በየሳምንቱ ከአሜሪካ ሦስት ሐኪሞችን የሚያመጣበት መርሐ ግብር ነበረው። ሐኪሞቹ ወደ አንድ ራቅ ያለ መንደር ተወስደው በዚያ ያሉትን ሰዎች ያክሙ፣ ሪፖርቶቻቸውን በቦታው ለሚኖረው ሚስዮናዊ ሐኪም ጽፈው ያስረክቡና ወደ አገራቸው ይመለሱ ነበር። ይህን በየሳምንቱ ያደርግ ነበር፤ የሚያገለግሉባቸውም አሥራ ሦስት መንደሮች በዙር ይጎበኙ ነበር። በዚያች ቀን ለዚሁ መርሐ ግብር ሐኪሞቹን ለመቀያየር ወደ አውሮፕላን ማረፊያው ሄዶ ገና መመለሱ ነበር፤ ያን ጊዜም ልክ የሆነውን አስደናቂ ነገር ነገረን።

ሦስቱ ሰዎች ሥራቸውን ጨርሰው ሪፖርቶቻቸውን እየጻፉ ሳሉ ከበላያቸው ባለው ኮረብታ ላይ እሳት አዩ። ይህ ገና ትተውት በመጡት መንደር ውስጥ እንደ ሆነ ተገነዘቡ። ስለዚህም ባለ አራት እግር ተሽከርካሪያቸው ውስጥ ገብተው ተመለሱ፤ የመንደሩ የቩዱ ጠንቋይም በሚነድደው የቤቱ ፍርስራሽ አጠገብ ቆሞ አገኙት። ሊያጽናኑት ጀመሩ፤ እርሱ ግን እንዲህ አለ፦ «አይደለም! ሕይወቴን ገና ለክርስቶስ ሰጥቻለሁ፤ ስለዚህም የቩዱ ዕቃዎቼን ሁሉ ወደ ቤቴ ሰብስቤ ሁሉንም ለማቃጠል ወሰንሁ። ከእንግዲህ ወዲህ በእኔ ላይ ምንም ሥልጣን አይኖራቸውም!» እንዴት ያለ ድንቅ የንስሐ ምሳሌ ነው!

ወደ ካናዳ፣ ማኒቶባ ያደረግሁት ጉብኝት በማኒቶባ መጽሐፍ ቅዱስ ማኅበር ዓመታዊ የእራት ግብዣ ላይ ለመናገር ነበር። በዚያም በ1967-67 በጀርመን ሳስተምር በሃም ከምናውቃቸው ከጆንና ከአይሊን ዊብ ጋር ኅብረታችንን አደስን። ጆን በዚያን ጊዜ በካናዳ ጦር ኃይሎች ውስጥ ነበር፤ አሁን ግን በካናዳ አንግሊካን ቤተ ክርስቲያን ውስጥ ቄስ ሆኗል። በእራት ግብዣውም ላይ በአዲሱ የካናዳ ግዛት በኑናቩት እየተካሄደ በነበረው መንፈሳዊ መነቃቃት ውስጥ በቅርቡ የተሳተፉ ሁለት ሴቶች በእንግድነት ተገኝተው ነበር። እንዴት ያለ ታሪክ ሊነግሩን ይችሉ ነበር! ስለዚህ የእግዚአብሔር ጉብኝት «ትራንስፎርሜሽንስ ቍጥር 2» የተባለ ዘጋቢ ፊልም ማግኘት ይቻላል። በዚያ ካሉ አማኞች ጋር እጅግ የሞቀ ኅብረት እያደረግን ሌሎች የመናገር ዕድሎችም ተሰጡኝ፤ ለኤፕሪል ወር የአየሩ ሙቀት እጅግ ቀዝቃዛ የነበረ ቢሆንም!

ወደ ዩናይትድ ኪንግደም የተደረጉ ጉዞዎችና በብሪቲሽ ኮሎምቢያ የነበሩኝ ሌሎች ብዙ የንግግር ቀጠሮዎች የዓመቱን አብዛኛውን ጊዜ ያዙ፤ በኦክቶበር ግን ዴቭንና ባለቤቱን ኤለንን ለመጠየቅ ወደ ፖርትላንድ ተጓዝን። ይህም እነርሱ በሚያስተናግዱት ትንሽ የቤት ኅብረት ውስጥ የማስተምርበት ጊዜ ነበር። በ1982 በኦንታሪዮ፣ በካምብሪጅ በሚገኘው የአካባቢው የዋይዋም ማዕከል ተማሪዎች ሳሉ በኪችነር የምትገኘው የቤተ ክርስቲያናችን አባላት ነበሩ። በዚያ ኤለን በውዝዋዜ አገልግሎት በብርቱ ትሳተፍ ነበር፤ ነገር ግን አንድ አሳዛኝ አደጋ በአካሏና በአንጎሏ ላይ ጉዳት አድርሶባት ነበር፤ ስለዚህም አሁን ከቤት መውጣት አትችልም፤ የምትንቀሳቀሰውም በ«መራመጃ» እርዳታ በዝግታ ብቻ ነበር። ከእነርሱ ጋር ጊዜ ማሳለፍ፣ ጉብኝታችን ለኤለን ያመጣላትን ደስታ ማየትና ስለ እኛ ስትጸልይ መስማት ደስታ ነበር።

በኖቬምበር እንደ ገና በብራዚል ወደምትገኘው ወደ ፎርታሌዛ ተጓዝሁ፤ ይህም ቶኒንና ክሪስቲንን፣ ማርሴሎንና አሊንን፣ እንዲሁም በቀደሙት ጉብኝቶቼ ያፈራኋቸውን ብዙ ወዳጆች የጎበኘሁበት የመጨረሻ ጉብኝቴ ይሆን ነበር። ቀደም ብዬ እንደ ጻፍሁት፣ ይህ ጊዜ ያገለገልሁባቸው አብያተ ክርስቲያናት ሁሉ ከ1998ቱ የወንጌል ስብከት ዘመቻ በፊት ከነበራቸው እጅግ የበዙ ምእመናን እንዳሏቸው ያየሁበት የበረከት ጊዜ ነበር።

ዓመቱ የተጠናቀቀው በየሦስት ዓመቱ ወደ አውስትራሊያ በምናደርገው ጉብኝት ሊኔትን፣ ፊሊፕንና ሦስቱን ልጆቻቸውን — ማይክልን፣ ክሎዊንና ኤማን — በማየት ነበር። ልማዳችን እየሆነ እንደ መጣው፣ በካናዳ የክረምት ወቅታችን ሁሉ ለስድስት ወራት በዚያ እንቆይ ነበር፤ ብዙ የንግግር ቀጠሮዎችም ነበሩኝ። ከድምቀቶቹ መካከል በስኖዊ ተራሮች በጂንዳባይን የተካሄዱ ሁለት መንፈሳዊ ጉባኤዎች ይገኙበታል፤ አንዱ ከክርስቲያን ኤንድ ሚሽነሪ አላያንስ ሴሚናሪ ሠራተኞችና ተማሪዎች ጋር፣ ሌላው ደግሞ ከዎደን (ካንቤራ) አላያንስ ቤተ ክርስቲያን የቤተሰብ ካምፕ ጋር ነበር። በተጨማሪም እጅግ ልዩ የነበሩት ከአቦርጂናል መጋቢው ከሮን ዊልያምስ ጋር ለመጸለይ በየሳምንቱ ያደረግናቸው ስብሰባዎች ነበሩ፤ የምንገናኘው በጦርነቶች የሞቱትን አቦርጂናል ወንዶች ሁሉ ለማክበር እርሱ ባቆመው የመታሰቢያ ስፍራ ነበር፤ እነዚያ ሰዎች ቍጥራቸው ከአንድ ሺህ በላይ ቢሆንም በአውስትራሊያ መንግሥት እውቅና አልተሰጣቸውም ነበር!

ስንለያይ ሮን፦ «በሚቀጥለው ጊዜ ስትመጣ ሕዝቤን እንድትተዋወቅ እወስድሃለሁ!» አለኝ። እኔ ከመመለሴ በፊት በካንሰር እንደሚሞትና መንግሥትም የመታሰቢያ ሥነ ሥርዓቱን በካንቤራ በሚገኘው የሕግ አውጪው ምክር ቤት አዳራሽ ውስጥ በማካሄድ ታላቅ እውቅና እንደሚሰጠው ፈጽሞ አላወቅንም ነበር። ወዳጁ ተብሎ መጠራት እንዴት ያለ ክብር ነበር! እርሱም «በእጄ ያለው መክፈቻ» የተሰኘውን መጽሐፌን የሚወክል መክፈቻ በማስተማሪያ መሣሪያው ውስጥ በማካተት አክብሮኝ ነበር።

ይህ የማስተማሪያ መሣሪያ ለአቦርጂናል ሕዝቦች እጅግ ተምሳሌታዊ የሆነውን «የኢሙን መንገድ» የሚያሳይ ሰሌዳ ነበር፤ ሕዝቡ ከጥንት ዘመን ጀምሮ፣ በነጮች መምጣት በኩል አልፎ እስከ ዛሬ ድረስ ያደረገውን ጉዞ ያሳያል። ብዙ የ«ደም መፍሰስ» ታሪኮችን የያዘ ነበር፤ ከዚያም ሮን የፈሰሰው የመስቀሉ ደም ለሰው ኃጢአት ብቸኛ መፍትሔ መሆኑን፣ እንዲሁም በነጮችና በአቦርጂናል ሕዝብ መካከል ዕርቅ አስፈላጊ መሆኑን ያመለክት ነበር። በሰሌዳው መካከል ያንን ዕርቅ የሚያመለክት፣ ብርቅ ከሆነ እንጨት የተቀረጸ መክፈቻ ነበር።

በ2003 ወደ ካናዳ ቤታችን ስንመለስ ጥሩ ወዳጆቻችንን፣ ቀደም ሲል የ«ኤም/ቪ አናስታሲስ» መሐንዲስ የነበሩትን ጆንና ማሪዮን ብሪግናልን ለማየት በኒው ዚላንድ አረፍን። ወደ ዌሊንግተን በረርን፤ በዚያም ዴቭ ክኒፔል ተቀበለን፤ ከዚያም እኅቱ ወደምትኖርበት ወደ ማስተርተን በመኪና ተጓዝን። ናንሲ የአንድ የዊክሊፍ መጽሐፍ ቅዱስ ተርጓሚ ባልቴት ነበረች፤ ስለዚህም እርሷም ግሪክ ታውቅ እንደ ሆነ ጠየቅኋት። በግሪክ ቋንቋ ሊቅ በማክሮሰን የተጻፈውንና ከታተመ ብዙ ዘመን ያለፈውን «ሽባ የሆነችው የክርስቶስ ቤተ ክርስቲያን በኤክስሬይ ስትመረመር» የተባለውን ግሩም መጽሐፍ በቅርቡ አሳጥሬ አዘጋጅቼ ነበር፤ አንድ ቅጂም ልሰጣት ፈለግሁ።

በዚያ የስቅለት ዓርብና የትንሣኤ እሑድ በቤተ ክርስቲያኗ አገለገልሁ፤ ከዚያም ከታውራንጋ ወደ ደቡብ በመኪና ተጉዘው ከሚመጡት ከብሪግናሎች ጋር ወደምንገናኝበት ወደ ታውፖ ሐይቅ ብዙ ማይል ወደ ሰሜን በመኪና ወሰደችን። በመንገድ ላይ ናንሲ አሁን ትንሽ የስጦታ ዕቃዎች መሸጫ ሱቅ ያላትን አንዲት ወዳጇን ጎበኘች፤ ሱቁ ያገለገሉ መጻሕፍት የተደረደሩባቸው ጥቂት መደርደሪያዎችም ነበሩት። በዚያም የዋናውን መጽሐፍ ቅጂ አዲስ በሚመስል ሁኔታ ስታገኝ ምን ያህል እንደ ተገረምሁ አስብ! ጌታ በ«አጋጣሚዎቹ» እኔን ማስገረሙን ቀጥሏል!