ለተጓዥ አገልግሎት የመጡ ብዙ ግብዣዎች

በአውስትራሊያ ካሳለፍነው ድንቅ ጊዜ በኋላ፣ ቀጥሎም በዌልስ ሦስት ተጨማሪ ወራት ካሳለፍን በኋላ፣ ወደ ሌሎች አገሮች እንድጓዝ ግብዣዎች ይደርሱኝ ጀመር፤ አብዛኛውን ጊዜ በደቀ መዝሙርነት ሥልጠና ትምህርት ቤቶቻቸው እንዳስተምር ከሚፈልጉ የዋይዋም መሪዎች ነበር። በፌብሩዋሪ 1996 ያደረግሁት የመጀመሪያው ጉዞ በ1988/89 «ልቤን ወደ ሰጠሁባትና» የሚስዮን ጥሪን ወደ ሰማሁባት ወደ ሜክሲኮ ሲቲ መመለስ ነበር። በዚያም ብዙ አዳዲስ ወዳጆች አፈራሁ፤ ከብዙ ዓመታት በፊት በኮምፓሽን አማካይነት ትምህርቷን ከምንደግፍላት «ልጃችን» ከቪኪ ጋርም እንደ ገና ተገናኘሁ።

ፍራንሲስኮንና ቤተሰቡን እንደ ገና ማግኘቴ፣ እንዲሁም የሜክሲኮ እጅግ ዝነኛ የኦፔራ ልጅ የሆነው የፓኮ ሲዬራ ልጅ ከሆነችው ከማሪትሳ ሲዬራ ጋር አዲስ ወዳጅነት መመሥረቴ አስደሳች ነበር። እርሱ የፕላሲዶ ዶሚንጎ ወላጆች ወዳጅ ነበር፤ ፕላሲዶም በኒው ዮርክ ሜትሮፖሊታን ኦፔራ ቤት «ኦቴሎን» ለመጀመሪያ ጊዜ ያቀረበበትን ትርኢት «እስከ ዛሬ ከሰማሁት ኦቴሎ ሁሉ አንተ እጅግ የላቅህ ነህ» ብሎ ለእርሱ መታሰቢያ አድርጎታል።

በደቀ መዝሙርነት ሥልጠና ትምህርት ቤቱ ከማስተማሬ በተጨማሪ በአጥቢያ አብያተ ክርስቲያናት እንድናገር፣ ለመጋቢዎች የሁለት ቀን ጉባኤ እንድመራና የጠዋት የትዳር ሴሚናር እንዳስተምር ተጋበዝሁ። ማሪትሳና እኅቷ ማርታ አዲስ አማኞች ነበሩ፤ በከተማዋ እምብርት በሚገኘው በሰፊው የቻፑልቴፔክ ፓርክ ምግብ ቤት ምሳ ጋበዙኝ።

የደረስነው በምሳ ሰዓት ነበር፤ ስለ አዲሱ እምነታቸው እጅግ ብዙ ጥያቄዎችን ስለ ጠየቁ ከምሽቱ 1 ሰዓት በኋላ ብዙ እስኪቆይ ድረስ አልወጣንም። እንዲህ ያሉ ጉጉ ወጣት ሴቶችን ማስተማር እንዴት ያስደስታል — ሁለቱም ዛሬም ከጌታቸው ጋር በመልካም ሁኔታ እየተጓዙ መሆናቸውን ማወቅስ እንዴት ያስደስታል! በኦገስት 1996 በሰሜን ምሥራቅ ብራዚል ወደሚገኘው ወደ ፎርታሌዛው ዋይዋም ተጋበዝሁ።

እስከ ዛሬ ካገኘኋቸው ወጣቶች ሁሉ እጅግ የተቀባው ቶኒ ሊማ በዚህች ከተማ ድንቅ የዋይዋም ሥራ ጀምሮ ነበር፤ ከተማዋ በካናዳ ብሮድካስቲንግ ኮርፖሬሽን «በዓለም የሕፃናት ዝሙት አዳሪነት ዋና ከተማ» ተብላ የተሰየመች ነበረች! የደረስሁት ባልተመቸ ጊዜ ነበር፤ ቶኒ በዋይዋም ማዕከሉ የጋዝ ሲሊንደር ፈንድቶ የሞተውን የአንድ ወጣት አስከሬን አጅቦ ወደ ብራዚሊያ ከተማ መሄድ ግድ ሆኖበት ነበርና። ወጣቱ ሲሊንደሩ ይመግበው ከነበረው የጋዝ ምድጃ ከተላቀቀ በኋላ ሌሎችን ከአደጋው ለመከለል እየሞከረ ነበር። እኔም ሌሎቹን ተማሪዎች፣ በተለይም ፍንዳታውን በዓይኗ ያየችውን የወጣቱን እኅት፣ በሐዘናቸው ለማማከርና ለማጽናናት ራሴን ሰጠሁ።

ሆኖም እጅግ ጠንካሮች ወጣቶች ሆነው አገኘኋቸው፤ ለሁለት ቀናት ብቻ አዘኑ፤ ከዚያም በእርሱ ላይ ያላቸው መታመን ያልቀነሰውን ጌታ ለማገልገል ራሳቸውን እንደ ገና ሰጥተው ሕይወታቸውን ቀጠሉ።

ለሦስት ሳምንታት በየጠዋቱ በትምህርት ቤቱ አስተማርሁ፤ በየምሽቱም በአጥቢያ አብያተ ክርስቲያናት ተናገርሁ። ፕሮግራሙ የተዘጋጀው በአንዲት ቤተ ክርስቲያን ሦስት ምሽቶችንና የእሑድ ጠዋትን፣ ከዚያም በሌላዪቱ የእሑድ ምሽትንና ቀጣዮቹን ሦስት ምሽቶች እንዳገለግል ተደርጎ ነበር።

በሄድሁበት ሁሉ ድንቅ ሞገስ አገኘሁ፤ ይህም የአካባቢው መጋቢዎች ለቶኒና ለባለቤቱ ለክሪስቲን ከነበራቸው ከፍተኛ አክብሮት የተነሣ እንደ ሆነ እርግጠኛ ነኝ።

ወደ ቤታችን ወደ ብሪቲሽ ኮሎምቢያ ስመለስ በኬሎውና ከምትገኝ አንዲት ባፕቲስት ቤተ ክርስቲያን ከመጡ 70 ያህል ወንዶች ጋር የወንዶች መንፈሳዊ ጉባኤ እንድመራ ተጋበዝሁ። ስለ «መልቀቅ» ያስተማርሁበት በመሆኑ እጅግ የሚክስ ጊዜ ነበር (መጽሐፌን «በእጄ ያለው መክፈቻ» ተመልከት)። ከሦስት ወር በኋላ ሜክሲኮ እንደ ገና በፕሮግራሙ ላይ ነበረች፤ በዚህ ጊዜ ግን ወደ ፔሩ የሁለት ሳምንት ጉዞ ተጨመረ። ከዋና ከተማዋ ከሊማ በስተ ምሥራቅ በሚገኝ ለምለም ሸለቆ ውስጥ ባለ የደቀ መዝሙርነት ሥልጠና ትምህርት ቤት አስተማርሁ፤ ከዚያም በሊማ የቤቲ ማሪያካና የቤተሰቧ እንግዳ ሆንሁ። አባቷ ጡረታ የወጡ የፖሊስ አዛዥ ነበሩ — አዎን፣ ሰው ከላቲን አሜሪካ የፖሊስ አዛዦች ጋር የሚያያይዘው ዓይነት ግዙፍና ብርቱ ሰው። በመጨረሻው ጠዋት ቡና አብሬያቸው እንድጠጣ ጋበዙኝ። ፊታችን ሁለት ትናንሽ የቡና ስኒዎች ተቀምጠው ከትንሿ ጠረጴዛ ፊት ተቀመጥሁ፤ እርሳቸውም ከቁም ሳጥናቸው ውስጥ ትልቅ ቆርቆሮ የቲም ሆርተንስ ቡና አወጡ — ይህ በካናዳውያን ሁሉ ዘንድ የታወቀ ተወዳጅ የቡና ዓይነት ነው። በካናዳ፣ በኦታዋ ከሚኖር አንድ ዘመዳቸው በስጦታ የተቀበሉት ሲሆን ከካናዳዊ እንግዳቸው ጋር ሊካፈሉት ፈልገው ነበር።

ቀጥሎም በ1995 የአላያንስ ፕሬዚዳንት ላቀረቡልኝ ግብዣ ምላሽ ለመስጠት ወደ አውስትራሊያ ከመመለሳችን በፊት ወደ ሕንድና ወደ ኔፓል የሚጠሩ ግብዣዎች ተከተሉ። አሁን ይመጡልኝ ከነበሩት ግብዣዎች አንዱንም ስላልፈለግሁ ጌታ በፊታችን በሮችን እየከፈተና የወደፊት አገልግሎቴን እያረጋገጠ እንደ ነበር ግልጽ ነበር። አንድም ደብዳቤ አልጻፍሁም፣ አንድም ስልክ አልደወልሁም፣ ለጥረቶቼም ማንንም ገንዘብ አልጠየቅሁም። አሁን ከቤተ ክርስቲያን ቦርድ የሚመጣ መደበኛ ገቢ አልነበረኝም። እግዚአብሔር ይሖዋ ይርኤ መሆኑን ማረጋገጥ ነበረበት — እርሱም በእርግጥ አረጋግጦአል!