ሲድኒ፣ ብሪቲሽ ኮሎምቢያ

ኪችነርን ለቅቀን ከመሄዳችን ሁለት ቀን በፊት በካምብሪጅ በሚገኘው የዋይዋም ማዕከል ከኡሊ ጋር ቀዝቃዛ መጠጥ እየተጎነጨሁ ተቀምጬ ነበር። ጌታ በሁለታችንም ሕይወት ውስጥ እያደረጋቸው ስለ ነበሩት ብዙ መልካም ነገሮች እየተነጋገርን ነበር። ስለ ወደ ፊት ዕቅዶች መነጋገር ስንጀምር «ኡሊ፣ በምዕራብ ጠረፍ ለዋይዋም የሚያገናኝ ሰው ካስፈለገህ ሳታመነታ ደውልልኝ» አልሁት። ያ ቀላል ግብዣ በወደ ፊት ሕይወታችን ላይ ምን ያህል ተጽዕኖ እንደሚያሳድር ብዙም አልተገነዘብሁም ነበር። እውነተኛ ካናዳዊ ለመሆን ሁለት ነገሮችን ማድረግ አለብህ ይባላል፤ የራስህን ቤት መሥራትና አገሪቱን ከዳር እስከ ዳር ማቋረጥ። የራሴን ቤት አልሠራሁም ነበር፤ ነገር ግን ቤተ ክርስቲያን ሲሠራ አይቼ ነበር። በዚያ ሕንጻ ውስጥ ያለውን እያንዳንዱን የሲሚንቶ ብሎኬትና እያንዳንዱን ጣውላ በአንድ ወቅት ወይም በሌላ ጊዜ በእጄ ሳልይዘው አልቀረሁም! አሁን አብዛኛውን የካናዳ ክፍል በመኪና የምናቋርጥበት ጊዜ ደርሶ ነበር።

አንድ ትልቅ የኪራይ ከባድ መኪና ንብረታችንን ሁሉ ተጭኖ፣ መኪናችንም በመጎተቻ ተያይዞ ረጅሙን ጉዞ ጀመርን። በየቀኑ ከአምስት መቶ ማይል በላይ እየነዳን ከስድስት ቀን በኋላ በቫንኩቨር ደሴት ወደምትገኘው ወደ ሲድኒ ደረስን። ትንሹ ጉባኤ በሞቀ ስሜት ተቀበለን፤ ብዙም ሳንቆይ በአዲሱ ሥራ ተደላደልን። የሲድኒ አላያንስ ቤተ ክርስቲያን፣ «ውቢቱ ብሪቲሽ ኮሎምቢያ» ዋና ከተማ በሆነችው በቪክቶሪያ ከምትገኘው ቤተ ክርስቲያን የተገኘች ቅርንጫፍ ነበረች። ጉባኤው እጅግ አሳቢ ነበር፤ መንፈስ ቅዱስ በዚያ አካባቢ እያደረገ ባለው ሥራ ትኩስነት ውስጥ ለመመላለስም ይፈልግ ነበር። ደመወዝ የሚከፈለው መጋቢ እንዲመራቸው በመጋበዝ «የእምነት እርምጃ» ወስደው ነበር፤ ነገር ግን የገቡትን ግዴታ ለመወጣት ከፈለጉ የቤተ ክርስቲያኒቱ የገንዘብ መሠረት መስፋት እንደሚኖርበት ብዙም ሳይቆይ ግልጽ ሆነ። ሁላችንም ለዚያ ዓላማ ሠራን፣ ጸለይንም፤ ከሦስት ወር በኋላ ግን ብዙም ሳንቆይ ወደ ጉድለት እንደምንገባ አየሁ። ደመወዜ ትንሽ ቢሆንም በቤተ ክርስቲያኒቱ ላይ ሸክም እንዳይሆን የትርፍ ጊዜ የማስተማር ሥራ ለመጠየቅ አሰብሁ። ካፊያ የሚያካፋበት የእሑድ ምሽት ነበር፤ እኔም ትንሽ ራስ ምታት ነበረብኝ። የራሳችን የምሽት አገልግሎት ስላልነበረን አን ሴቶች ልጆቻችንን ይዛ ወደ ሌላ ቤተ ክርስቲያን ሄደች። እኔ ደግሞ ስለ ቤተ ክርስቲያኒቱ ሁኔታችን ተጨማሪ ጊዜ በጸሎት ለማሳለፍ በእግሬ ወጣሁ። ከሃያ ደቂቃ በኋላ ተወዳጅ የመመልከቻ ስፍራ ከሆነው ከቤር ሂል አናት ላይ ደረስሁ። ምሪቱን ለማግኘት ወደ ጌታ ስጮኽ ድምፄን ሊሰማ በሚችል ርቀት ሌላ ማንም አልነበረም።

ሰዎች «ጌታ ነገረኝ…» ሲሉ እጠራጠራለሁ። ሁልጊዜ በትክክል እንዴት እንደ ተናገራቸው ልጠይቃቸው እፈልጋለሁ። በተለይ ደግሞ ለምክር ወደ አንተ መጥተው ችግራቸውን ከማቅረባቸው በፊት «ጌታ ነገረኝ…» ብለው ሲጀምሩ ያበሳጫል። ጌታ ከተናገረው ጋር የሚቃረን ምክር ለመስጠት እንዴት እደፍራለሁ? እርግጥ ጌታ በእውነት እንደሚናገረን አምናለሁ። በጎቹ ድምፁን ማወቅ ይገባቸዋል። ይሁን እንጂ ሰዎች ምላሽ የሰጡባቸው የእግዚአብሔር ድምፅ ናቸው የተባሉ ብዙ ማስረጃዎች እጅግ ያሳስቡኛል — አንዳንዶቹም ከቅዱሳት መጻሕፍት ጋር በቀጥታ የሚቃረኑ ናቸው። እርሱ በብዙ የተለያዩ መንገዶች ይናገራል። ቤር ሂል በግልጽና በሚሰማ ድምፅ ሲናገር ከሰማሁባቸው ጥቂት ጊዜያት አንዱ ነበር!

«አትፍራ! ወደዚህ ያመጣሁህ እኔ ነኝ፤ ፈቃዴንም በአንተ ውስጥ ማድረጌን እቀጥላለሁ። ወደ ሌላ ስፍራ እስክጠራህ ድረስ በሲድኒ ቤተ ክርስቲያን ትቆያለህ። ከዚያም የቪክቶሪያ አላያንስ ቤተ ክርስቲያንን በመጋቢነት ትመራለህ።» ተደነቅሁ! ድምፁ እጅግ ግልጽ ነበር፤ በተነገረውም ነገር ላይ ምንም ጥርጥር ሊኖር አይችልም ነበር። ሆኖም ይህ በቅርቡ የመፈጸሙ ዕድል እጅግ ጠባብ ነበር። በዚያን ጊዜ በቪክቶሪያ በምትገኘው እናት ቤተ ክርስቲያን ሦስት መጋቢዎች ነበሩ፤ ዋናው መጋቢም በዚያ የቆየው አንድ ዓመት ብቻ ነበር። ከዚህም በላይ ይህች የዋና ከተማዪቱ ቤተ ክርስቲያን ነበረች፤ እኔ ደግሞ ገና አሁን የተሾምሁ ስሆን ሴሚናሪ ገብቼ አላውቅም ነበር። የዚያች ቤተ ክርስቲያን መጋቢ ሆኜ ተቀባይነት ለማግኘት ገና ብዙ ዓመታት እንደሚወስድ ግልጽ ነበር። ሆኖም ድምፁ እጅግ ግልጽ ስለ ነበረ፣ የእግዚአብሔርን ድምፅ በመስማቴ በደስታ ስሜት፣ እርሱ ፍላጎታችንን እያሟላ በሲድኒ አላያንስ ቤተ ክርስቲያን እንድቆይ እንደሚገባኝ በማወቄም በሰላም ከዚያ ኮረብታ አናት ወረድሁ።

በዚያ ምሽት በቤር ሂል ላይ የሆነውን ከአን በቀር ለማንም አልነገርሁም፤ ከአንድ ወር በኋላ የቪክቶሪያ ቤተ ክርስቲያን መጋቢ በድንገት ሥራውን እንደሚለቅ ማሳወቁ በከተማዪቱ ሁሉ በፍጥነት ሲሰማ ግን ብዙም አልገረመኝም። ረዳት መጋቢዎቹም ቦታቸውን ለቀው ነበር፤ የዲስትሪክቱ የበላይ ጠባቂም የሽማግሌዎች ቦርድ ሌላ መጋቢ እንዲያገኝ ለመርዳት ተጠራ። በሚቀጥሉት ወራት የሆነውን ሁሉ አላውቅም፤ ነገር ግን የሚፈልጉት ሰው እኔ እንደ ሆንሁ ሁሉም እንዲሰሙ ለመጮኽ ከሚገፋፋኝ ፈተና ጋር ታገልሁ! ይልቁንም ሽማግሌዎቹ እኔን መጋቢያቸው እንዲሆን ለመጋበዝ ግዴታ እንዳለባቸው እንዲሰማቸው ሁኔታውን ለመጠምዘዝ ፈጽሞ እንዳንፈተን፣ እኔና አን በከተማው መሀል ካለችው ቤተ ክርስቲያን ራቅን።

ከዲስትሪክቱ የበላይ ጠባቂያችን የስልክ ጥሪ እስኪደርሰኝ ድረስ አራት ወራት አለፉ። «ጋሬዝ፣ የቪክቶሪያ አላያንስ ቤተ ክርስቲያን መጋቢያቸው እንድትሆን እንድጋብዝህ ጠይቃኛለች። ያንን ቦታ ትፈልገዋለህን?» በመልሴ ፍጥነት ተገረመ፤ ይህ እንደሚሆን ከበርካታ ወራት በፊት እንደማውቅ ስነግረው ደግሞ ይበልጥ ተገረመ። ጌታ ሲናገር ሰምቼ ነበር፤ ነገር ግን እንዲፈጸም ለማድረግ ምንም አልሞከርሁም ነበር። እርሱ ሲናገር ቃሉን ለመፈጸም ፍጹም ይችላል!

በሴፕቴምበር 1984፣ ሴት ልጅዋ ወደ ሆነችው ወደ ሲድኒ ቤተ ክርስቲያን ከመጣሁ ከአንድ ዓመት በኋላ፣ የቪክቶሪያ አላያንስ ቤተ ክርስቲያን መጋቢ ሆኜ ተሾምሁ። በእነዚያ ዓመታት ታላላቅ ደጋፊዎቻችን ለሆኑት የሲድኒ ሰዎች እዚህ ላይ ሞቅ ያለ ምስጋና ማቅረብ ይገባል። ለእኛ የነበራቸው ፍቅርና ጌታ በዚህ ዝውውር ውስጥ እንዳለ ማወቃቸው ቅሬታቸውን አሸነፈው። ከብዙ ዓመታት በኋላ ዛሬም ከቅርብ ወዳጆቻችንና ደጋፊዎቻችን መካከል ናቸው።