ዕዝራ፣ የሚጸልየው ተሐድሶ አራማጅ

ከታላቁ ጦርነት በፊት በጸሎት ላይ አዲስ ፍላጎትና ከልምምዱ የሚጠበቅ አዲስ ተስፋ መኖሩን የሚያሳዩ ብዙ ምልክቶች ነበሩ። እነዚህ ምልክቶች ምን ያህል እንደ በዙ ሁሉም ያውቃል። ቢያንስ ይህን አንድ መልካም ነገር ጦርነቱ እስከ አሁን አድርጎልናል። ዕድላችንን አናምልጥ። ጸሎት ቀላል ልምምድ አይደለም። ማበረታቻን፣ ማብራሪያንና ሥልጠናን ይጠይቃል። ወንዶችና ሴቶች እንዴት መጸለይ እንዳለባቸው ለመማር ከልብ የጓጉበት እንደ ዛሬ ያለ ጊዜ ከቶ አልነበረም። ጸሎት በጦር ዕቃ ግምጃ ቤታችን ውስጥ ካሉት መሣሪያዎች ሁሉ እጅግ ኃያሉ ነው፤ እግዚአብሔር በሰጠው ማበረታቻ መጠን ልንጠቀምበት ከሆነ፣ ወደ ተግባር ለማምጣት በአቅማችን ያለውን ሁሉ ማድረግ አለብን።—ቄስ ጄምስ ሄስቲንግስ።

ካህኑ ዕዝራ፣ ከእግዚአብሔር ታላላቅ ተሐድሶ አራማጆች አንዱ፣ በብሉይ ኪዳን ውስጥ እንደ ሚጸልይ ሰው፣ ችግሮችን ለማሸነፍና መልካም ነገሮችን ለማስገኘት ጸሎትን እንደሚጠቀም ሰው ሆኖ ይቀርብልናል። ከባቢሎን የተመለሰው በባቢሎን ንጉሥ ድጋፍ ነበር፤ ይህም ንጉሥ በሚያስገርም ሁኔታ ልቡ ወደ ዕዝራ ተስቦ በብዙ መንገድ ሞገስ አሳይቶት ነበር። ዕዝራ በኢየሩሳሌም የቆየው ጥቂት ቀናት ብቻ ነበር፤ አለቆቹም ሕዝቡ ራሳቸውን ከዚያች አገር ሕዝብ እንዳልለዩና በዙሪያቸው እንደ ነበሩት አሕዛብ ርኵሰት እንደሚያደርጉ የሚገልጥ አሳዛኝ ወሬ ይዘው ወደ እርሱ መጡ። ከሁሉም የከፋው ደግሞ የእስራኤል አለቆችና ሹማምት በዚህ በደል ዋናዎች መሆናቸው ነበር።

ዕዝራ ቤተ ክርስቲያን ተስፋ በማይታይበት ሁኔታ ከዓለም ጋር ተጠላልፋ ባገኛት ጊዜ የገጠመው ሁኔታ አሳዛኝ ነበር። እግዚአብሔር በዘመናት ሁሉ ቤተ ክርስቲያኑ ከዓለም እንድትለይ ይጠይቃል፤ ይህም መለየት እስከ ጠላትነት የሚደርስ ያህል የጠራ ነው። ይህን ፍጻሜ ለማስገኘትም እስራኤልን በተስፋይቱ ምድር አኖረ፤ በተራሮች፣ በምድረ በዳዎችና በባሕሮች ከሌሎች አሕዛብ ለያቸው፤ ወዲያውም ከባዕዳን ሕዝቦች ጋር ምንም ዓይነት ግንኙነት — በጋብቻም፣ በማኅበራዊ ኑሮም፣ በንግድም — እንዳይመሠርቱ አዘዛቸው።

ዕዝራ ግን ከባቢሎን በተመለሰ ጊዜ በኢየሩሳሌም ያለችውን ቤተ ክርስቲያን በዚህ መርሕ መጣስ ምክንያት ሽባ ሆና፣ ተስፋ በሌለውና በፍጹም ሁኔታ ተዘርራ አገኛት። ተጋብተው ነበር፤ ከአሕዛብ ሕዝቦች ጋር በቤተሰብ፣ በማኅበራዊና በንግድ ሕይወት እጅግ የቀረበና እጅግ የተቀደሰ ትስስር መሥርተው ነበር። ሁሉም — ካህናት፣ ሌዋውያን፣ አለቆችና ሕዝብ — በዚህ ውስጥ ገብተው ነበር። የሕዝቡ የቤተሰብ፣ የንግድና የሃይማኖት ሕይወት የተመሠረተው በዚህ የእግዚአብሔርን ሕግ በመጣስ ላይ ነበር። ምን መደረግ ነበረበት? ምንስ ሊደረግ ይችል ነበር? በዚህ የእስራኤል መሪ፣ በዚህ የእግዚአብሔር ሰው ፊት የተደቀኑት ዋና ጥያቄዎች እነዚህ ነበሩ።

የቤተ ክርስቲያንን መመለስ ሁሉም ነገር የሚቃወም ይመስል ነበር። ዕዝራ ሊሰብካቸው አይችልም ነበር፤ ከተማይቱ ሁሉ ትቈጣለች፣ ከስፍራውም አሳድዳ ታስወጣው ነበርና። የንግድ ሽርክናዎችን እንዲያፈርሱ፣ ሚስቶችንና ባሎችን እንዲፈቱ፣ ትውውቆችን እንዲቆርጡና ወዳጅነቶችን እንዲያፈርሱ ወደ እግዚአብሔር ሊመልሳቸው የሚችል ምን ኃይል ነበር?

በዕዝራ ዘንድ በመጀመሪያ ሊጠቀስ የሚገባው ነገር ሁኔታውን ማየቱና ምን ያህል ከባድ እንደ ሆነ መገንዘቡ ነበር። በቤተ ክርስቲያን ውስጥ ምንም ስሕተት የማያይ ዓይኑ የታወረ ብሩህ ተስፈኛ አልነበረም። እግዚአብሔር በኢሳይያስ አፍ «ከባሪያዬ በቀር ዕውር ማን ነው?» የሚለውን እጅግ ተገቢ ጥያቄ አቅርቦ ነበር። ነገር ግን ይህ በምንም መንገድ በዕዝራ ላይ ሊሠራ አይችልም ነበር። የነገሩንም ሁኔታ አላቃለለም፤ የሕዝቡንም ኃጢአት ለማለዘብ ወይም የወንጀላቸውን ታላቅነት ለማሳነስ አልሞከረም። በደላቸው በዓይኖቹ እጅግ ከባድ ሆኖ ታየው። የዘመኑን ክፋት ብቻ ሳይሆን የቤተ ክርስቲያንንም ኃጢአት የሚያዩ ዓይኖች ያሏቸው መሪዎች በጽዮን መኖራቸው ጥቂት ዋጋ ያለው ነገር አይደለም። የዘመናችን ቤተ ክርስቲያን ካሏት ታላላቅ ፍላጎቶች አንዱ፣ በማየታቸው ዕውሮች ያልሆኑ፣ በቤተ ክርስቲያን ውስጥ ያለውን የነገሮች ሁኔታ ለማየት ፈቃደኞች የሆኑና ዓይኖቻቸውን ወደ እውነተኛው ሁኔታ ለመክፈት የማያመነቱ፣ እንደ ዕዝራ ያሉ መሪዎች ናቸው።

በቤተ ክርስቲያንና በኢየሩሳሌም ማኅበረሰብ ውስጥ እነዚህን አስከፊ ክፋቶች ሲያይ መጨነቁ የተፈጥሮ ነገር ነበር። አሳዛኙ የነገሮች ሁኔታ እጅግ አሳዘነው፤ ስለዚህም ልብሱን ቀደደ፣ ጠጕሩን ነጨ፣ ተደንቆም ተቀመጠ። እነዚህ ነገሮች ሁሉ በአስከፊው ሁኔታ ምክንያት በነፍሱ ላይ የደረሰውን ታላቅ ጭንቀት ያሳያሉ። ከዚያም በዚያ የልብ ሁኔታ ሆኖ፣ ተጨንቆ፣ ተቈርቍሮና በነፍሱ ታውኮ ራሱን ለጸሎት፣ የሕዝቡንም ኃጢአት ለመናዘዝ፣ ከእግዚአብሔርም እጅ ይቅር የሚል ምሕረትን ለመለመን ሰጠ። እንደዚህ ባለ ጊዜ ጸሎትን ወደሚሰማ፣ ይቅር ለማለት ወደ ተዘጋጀና ያልተጠበቀውን ነገር ሊያደርግ ወደሚችል አምላክ ካልሆነ ወደ ማን ይሄዳል?

በሕዝቡ ክፉ ምግባር ከቃል በላይ ተደነቀ፣ እጅግ ተነካ፣ መጾምና መጸለይም ጀመረ። ጸሎትና ጾም ሁልጊዜ አንድ ነገር ይፈጽማሉ። ሌላ ሊያደርገው የሚችል ምንም ነገር ስለሌለ በተሰበረ ልብ ይጸልያል። ከተማይቱ ሁሉ በጸሎት ከእርሱ ጋር ሲተባበሩ፣ እጅግ ሸክም ከብዶት፣ በምድር ላይ ተደፍቶና እያለቀሰ ወደ እግዚአብሔር ይጸልያል።

የእግዚአብሔርን ቍጣ ለማብረድ ብቸኛው መንገድ ጸሎት ነበር፤ ዕዝራም ለእግዚአብሔር በተደረገ ታላቅ ሥራ ውስጥ ታላቅ አንቀሳቃሽ ሆነ፤ ድንቅ ውጤቶችም ተገኙ። ሥራው ሁሉ፣ መርሖቹና ውጤቶቹ፣ በዕዝራ 10:1 ባለች በአንዲት ቍጥር ብቻ ተጠቃልለዋል፦

«ዕዝራም በእግዚአብሔር ቤት ፊት እያለቀሰና እየተደፋ በጸለየና በተናዘዘ ጊዜ፣ ከእስራኤል እጅግ ታላቅ ጉባኤ ወንዶችና ሴቶች ልጆችም ወደ እርሱ ተሰበሰቡ፤ ሕዝቡ እጅግ አልቅሰው ነበርና።»

ብርቱ፣ ቀላልና የጸና ጸሎት ተደርጎ ነበር። ጽኑና አሸናፊ ጸሎት ፍጻሜውን አግኝቶ ነበር። የዕዝራ ጸሎት ለእግዚአብሔር በተደረገ ታላቅ ሥራ ውስጥ ውጤቶችን ወደ መኖር አምጥቶ አስገኝቶአል። ከጸሎትና ከእግዚአብሔር በቀር ከሌላ ከማንኛውም ምንጭ ፈጽሞ ተስፋ የሌለውን የራሱን ሥራ ሁሉን የሚችለው እግዚአብሔር እንዲሠራ ስላደረገ ብርቱ ጸሎት ነበር። ነገር ግን ለእግዚአብሔር ተስፋ የሌለው ምንም ነገር ስለሌለ ለጸሎትም ተስፋ የሌለው ምንም ነገር የለም።

እንደ ገና ልንናገር የሚገባን ጸሎት የሚመለከተው እግዚአብሔርን ብቻ እንደ ሆነና ውጤት የሚያስገኘውም እግዚአብሔርን በሚመለከትበት መጠን ብቻ እንደ ሆነ ነው። የዕዝራ ጸሎት በራሱ ላይ ምንም ተጽዕኖ ቢያደርግ፣ ዋናዎቹ — ብቸኞቹ ባይሆኑ — ውጤቶቹ የተከተሉት በእግዚአብሔር ላይ ተጽዕኖ ስላደረገና ሥራውን እንዲሠራ ስላንቀሳቀሰው ነው።

ይህን የዕዝራን ጸሎት ታላቅና አጠቃላይ ንስሐ ተከተለው፤ በእስራኤልም ድንቅ ተሐድሶ ሆነ። እነዚህን ታላላቅ ነገሮች በማስገኘት ረገድ የዕዝራ ኀዘንና ጸሎት ዋና ምክንያቶች ነበሩ።

የተከሰተው መነቃቃት እጅግ ጥልቅ ስለ ነበር፣ እውነተኛነቱን ለማስረጃ ያህል የእስራኤል መሪዎች በዚህ ቃል ወደ ዕዝራ እንደ መጡ ተጽፎአል፦

«እኛ በአምላካችን ላይ በድለናል፤ ከምድሪቱም አሕዛብ እንግዶች ሴቶችን አግብተናል፤ አሁን ግን በዚህ ነገር ለእስራኤል ተስፋ አለ።»

«አሁንም እንደ ጌታዬ ምክርና በአምላካችን ትእዛዝ እንደሚንቀጠቀጡት ሰዎች ምክር ሚስቶቹን ሁሉ ከእነርሱም የተወለዱትን እናወጣ ዘንድ ከአምላካችን ጋር ቃል ኪዳን እናድርግ፤ እንደ ሕጉም ይደረግ።»

«ተነሥ፤ ይህ ነገር የአንተ ነውና፤ እኛም ከአንተ ጋር ነን፤ አይዞህ፥ አድርገውም።»