መጽሐፍ ቅዱስ ለሁሉም

«በከንቱ ተቀበላችሁ፥ በከንቱ ስጡ።» — ከማቴዎስ 10

በ1905 ራማባይ በሙክቲ የነበሩትን ልጆች እግዚአብሔር በሕንድ ያሉ ብዙ ሰዎችን «እኛንም ጨምሮ» ወደ ራሱ እንዲያቀርብ በየማለዳው እንዲጸልዩ ጠየቀቻቸው። ሰባ ያህል ልጆች መጡ። ብዙም ሳይቆይ በመቶዎች የሚቆጠሩ ይጸልዩ ጀመር! በጁን ወር አንድ ቀን እግዚአብሔር በሚያስደንቅ መንገድ መለሰ። ልጆቹ እያለቀሱ መጸለይና ስለ ሠሩት ስሕተት ይቅርታ መጠየቅ ጀመሩ። አንዳንዶቹ የወሰዷቸውን ነገሮች መለሱ። በደስታም ተሞሉ። የልጆች ቡድኖች በመላው ሕንድ ላሉ ሰዎች ለመጸለይ ወጡ። ራማባይ የእግዚአብሔር መንፈስ ከሁሉ የሚበልጠው ምልክት ፍቅር እንደ ሆነ አስተማረቻቸው።

ራማባይ ገና አንድ ትልቅ ሥራ ይጠብቃት ነበር። በቋንቋዋ በማራቲ የነበረው መጽሐፍ ቅዱስ ረጃጅምና ከባድ ቃላትን ይጠቀም ነበር። በመንደሮች የሚኖሩ ብዙ ሴቶች ሊረዱት አይችሉም ነበር። ስለዚህ ራማባይ ተራ ሰዎች በሚናገሯቸው ቀላል ቃላት አዲስ መጽሐፍ ቅዱስ ማዘጋጀት ጀመረች። መጽሐፍ ቅዱስ በመጀመሪያ የተጻፈባቸውን ቋንቋዎች ዕብራይስጥንና ግሪክን ተማረች። በሙክቲ የነበሩት ልጆች በገዛ ማተሚያቸው ላይ ፊደሎቹን ደረደሩ። መጽሐፍ ቅዱሷ እንዲሸጥ ፈጽሞ አልፈቀደችም። ለእርሷ በነፃ እንደ ተሰጣት ሁሉ በነፃ መሰጠት አለበት አለች።

በ1921 አንድ በጣም የሚያሳዝን ነገር ሆነ። ለብዙ ዓመታት ከእርሷ ጋር ጎን ለጎን የሠራችው ልጇ ማኖራማ ታመመችና ሞተች። ራማባይም «እግዚአብሔር ሰጠ፥ እግዚአብሔርም ነሣ፤ የእግዚአብሔር ስም የተባረከ ይሁን» አለች።

ራማባይ መጽሐፍ ቅዱሷን የጨረሰችው ልትሞት ጥቂት ቀደም ብሎ ነበር። ኤፕሪል 5 ቀን 1922 በማለዳ በእንቅልፏ በጸጥታ ሞተች። ዕድሜዋ ስድሳ ሦስት ነበር። የሙክቲ ወጣት ሴቶች የሬሳ ሣጥኗን ተሸክመው ሲሄዱ አንድ ሺህ ሴት ልጆች ተከተሉ። ከየካስቱ የመጡ ሰዎች ጎን ለጎን ቆሙ፤ አንዲት አሮጊት መበለትም «ኦ ታላቋ እናት፣ ታላቋ እናት!» ብላ ጮኸች። ሙክቲ ዛሬም ድረስ አለ፤ ሴቶችንና ልጆችን ይንከባከባል።

ራማባይ የእግዚአብሔርን ፍቅር በነፃ ተቀበለች፤ ስለዚህ ለሁሉም በነፃ ሰጠች። አንተም መልካም ስጦታዎችን ተቀብለሃል። ዛሬ የእግዚአብሔርን ፍቅር ለማን ልታካፍል ትችላለህ?

ውድ እግዚአብሔር ሆይ፣ ስለ መጽሐፍ ቅዱስ፣ እንደ ራማባይም ስላካፈሉት ሰዎች አመሰግንሃለሁ። ፍቅርህን ለሌሎች በነፃ እንዳካፍል እርዳኝ። አሜን።