ከትንቢት መቋረጥና ከኢየሩሳሌም መጥፋት የቀረበ ማስረጃ

§40. ማስረጃ (1)፦ ከትንቢት መቋረጥና ከኢየሩሳሌም መጥፋት፤ (2)፦ ከአሕዛብ መመለስ፣ ያውም ወደ ሙሴ አምላክ መመለሳቸው። ክርስቶስ ያላደረገው፣ መሲሕ ሊያደርገው የሚቀረው ምን አለ?

እንግዲህ አይሁድ ከንቱ ነገር እየተናገሩ ነው፤ ወደፊት ይመጣል ብለው የሚጠብቁት ያ ጊዜ በእርግጥ መጥቷል። ቅዱሰ ቅዱሳን ክርስቶስ ከመጣ በቀር ነቢይና ራእይ ከእስራኤል መቼ ተቋረጡ? ኢየሩሳሌም ከእንግዲህ አለመቆምዋ፣ ለእነርሱም ነቢይ አለመነሣቱና ራእይ አለመገለጡ የእግዚአብሔር ቃል የመምጣቱ ምልክትና ታላቅ ማስረጃ ነውና፤ ይህም እጅግ ተገቢ ነው። 2. የተመለከተው እርሱ ራሱ ከመጣ በኋላ እርሱን የሚያመለክት ሌላ ምን ያስፈልጋል? እውነቱ ከተገኘ በኋላ ጥላው ምን ያስፈልጋል? ትንቢት የመናገራቸው ምክንያት ይኸው ነበረና፤ ይኸውም እውነተኛው ጽድቅ፣ የሁሉንም ኃጢአት የሚቤዠውም እስኪመጣ ድረስ ነው። ኢየሩሳሌምም እስከዚያ ጊዜ የቆመችው ስለዚህ ነበር፤ ይኸውም ለእውነተኛው ነገር ዝግጅት እንዲሆን በዚያ በምሳሌዎቹ እንዲለማመዱ ነው። 3. ስለዚህ ቅዱሰ ቅዱሳን በመጣ ጊዜ ራእይና ትንቢት መታተማቸው፣ የኢየሩሳሌምም መንግሥት መቋረጡ ተገቢ ነው። ነገሥታት በመካከላቸው የሚቀቡት ቅዱሰ ቅዱሳን እስኪቀባ ድረስ ብቻ ነበርና፤ ያዕቆብም የአይሁድ መንግሥት እስከ እርሱ ድረስ እንደሚጸና እንዲህ ብሎ ትንቢት ይናገራል፦ «ለእርሱ የተጠበቀለት እስኪመጣ ድረስ ገዢ ከይሁዳ፣ አለቃም ከአብራኩ አይጠፋም፤ እርሱም የአሕዛብ ተስፋ ነው።» 4. ስለዚህ መድኃኒታችን ራሱ ደግሞ ጮኾ እንዲህ አለ፦ «ነቢያት ሁሉና ሕጉ እስከ ዮሐንስ ድረስ ትንቢት ተናገሩ።» እንግዲህ አሁን በአይሁድ መካከል ንጉሥ ወይም ነቢይ ወይም ራእይ ካለ፣ የመጣውን ክርስቶስን መካዳቸው ተገቢ ነው። ነገር ግን ንጉሥም ራእይም ከሌለ፣ ከዚያን ጊዜ ጀምሮ ትንቢት ሁሉ ታትሞ ከተማይቱና መቅደሱ ከተያዙ፣ የሆነውን እያዩ ይህን ሁሉ ያደረገውን ክርስቶስን የሚክዱት እንዲህ እግዚአብሔርን የማይፈሩና ጠማሞች የሆኑት ስለ ምንድር ነው? ወይስ አሕዛብ እንኳ ጣዖቶቻቸውን ትተው በክርስቶስ በኩል ተስፋቸውን በእስራኤል አምላክ ላይ ሲያደርጉ እያዩ፣ በሥጋ ከእሴይ ሥር የተወለደውንና ከእንግዲህ ንጉሥ የሆነውን ክርስቶስን ስለ ምን ይክዳሉ? አሕዛብ ሌላ አምላክ ቢያመልኩና የአብርሃምንና የይስሐቅን፣ የያዕቆብንና የሙሴን አምላክ ባይመሰክሩ ኖሮ፣ እንደ ገና እግዚአብሔር አልመጣም ማለታቸው ተገቢ በሆነ ነበር። 5. ነገር ግን አሕዛብ ለሙሴ ሕግን የሰጠውን፣ ለአብርሃምም የተስፋ ቃል የገባውን፣ አይሁድም ቃሉን ያቃለሉትን ያንኑ አምላክ የሚያከብሩ ከሆነ፣ በመጻሕፍት አስቀድሞ የተነገረው ጌታ ለዓለም እንደ በራና በሥጋ እንደ ተገለጠለት ስለ ምን አያውቁም? ይልቁንስ ላለማወቅ ስለ ምን ይመርጣሉ? መጽሐፍ እንዲህ እንዳለ፦ «እግዚአብሔር አምላክ አበራልን»፤ ደግሞም፦ «ቃሉን ላከ፣ ፈወሳቸውም»፤ ደግሞም፦ «መልእክተኛ አይደለም፣ መልአክም አይደለም፤ ጌታ ራሱ አዳናቸው እንጂ»። 6. ሁኔታቸው ምድር በፀሐይ ስትበራ እያየ የሚያበራትን ፀሐይ ከሚክድ አእምሮውን ከሳተ ሰው ጋር ሊመሰል ይችላል። የሚጠብቁት እርሱ በመጣ ጊዜ የሚያደርገው ሌላ ምን ይቀረዋል? አሕዛብን መጥራት? እነርሱ ግን አስቀድመው ተጠርተዋል። ትንቢትን፣ ንጉሥንና ራእይን ማስቀረት? ይህም አስቀድሞ ተፈጽሟል። የጣዖት አምልኮን ክህደት መግለጥ? አስቀድሞ ተገልጦ ተፈርዶበታል። ወይስ ሞትን ማጥፋት? ሞት አስቀድሞ ጠፍቷል። 7. እንግዲያስ ክርስቶስ ሊያደርገው የሚገባው ያልተፈጸመ ምን አለ? አይሁድ አሁን ያለ ቅጣት እንዳያምኑ ሳይፈጸም የቀረ ምንድር ነው? እላለሁ፣ በእርግጥ እንደምናየው በመካከላቸው ከእንግዲህ ንጉሥ ወይም ነቢይ ወይም ኢየሩሳሌም ወይም መሥዋዕት ወይም ራእይ ከሌለ፣ ይልቁንም ምድር ሁሉ እግዚአብሔርን በማወቅ ተሞልታ፣ አሕዛብ ክህደታቸውን ትተው አሁን በቃሉ፣ በጌታችን በኢየሱስ ክርስቶስ በኩል ወደ አብርሃም አምላክ እየተጠጉ ከሆነ፣ ክርስቶስ እንደ መጣና ሁሉንም ፈጽሞ በብርሃኑ እንዳበራ፣ ስለ አባቱም እውነተኛውንና መለኮታዊውን ትምህርት እንደ ሰጣቸው እጅግ ልበ ደንዳኖች ለሆኑት እንኳ ግልጽ ሊሆን ግድ ነው። 8. እንግዲህ አይሁድን በእነዚህና ከመለኮታዊ መጻሕፍት በተወሰዱ በሌሎች ማስረጃዎች በሚገባ መርታት ይቻላል።