የአይሁድ አለማመንና የግሪኮች ፌዝ

§33. የአይሁድ አለማመንና የግሪኮች ፌዝ። አይሁድ በገዛ መጻሕፍታቸው ተረቱ። እንደ አምላክና እንደ ሰው ስለ መምጣቱ የተነገሩ ትንቢቶች።

ይህ እንዲህ ከሆነ፣ የሥጋውም ትንሣኤና መድኃኒታችን በሞት ላይ የተቀዳጀው ድል በግልጥ ከተረጋገጠ፣ እንግዲህ ኑ፣ የአይሁድን አለማመንና የአሕዛብን ፌዝ እንገሥጽ። 2. አይሁድ የማያምኑበትና አሕዛብ የሚስቁበት፣ የመስቀልን ውርደትና የእግዚአብሔር ቃል ሰው መሆኑን የሚነቅፉበት ነጥብ ምናልባት ይህ ነውና። ነገር ግን በእነርሱ ላይ በእጃችን ያሉት ማስረጃዎች እንደ ቀን ብርሃን ግልጥ ስለ ሆኑ፣ ክርክራችን በተለይ ከሁለቱም ጋር ለመታገል አይዘገይም። 3. አይሁድ በአለማመናቸው ራሳቸው እንኳ ከሚያነቡአቸው መጻሕፍት ሊረቱ ይችላሉና፤ ይህም ጥቅስ ያም ጥቅስ፣ በአጭሩም በመንፈስ መሪነት የተጻፈው መጽሐፍ ሁሉ፣ ግልጥ ቃላቱ እንኳ በብዛት እንደሚያሳዩት፣ ስለ እነዚህ ነገሮች በታላቅ ድምፅ ይጮኻልና። ነቢያት ስለ ድንግሊቱ ድንቅና ከእርስዋ ስለሚሆነው ልደት እንዲህ ብለው አስቀድመው ተናገሩ፦ «እነሆ፥ ድንግል ትፀንሳለች ልጅም ትወልዳለች፥ ስሙንም አማኑኤል ይሉታል፤ ትርጓሜውም፦ እግዚአብሔር ከእኛ ጋር የሚል ነው»። 4. በእውነት ታላቅ የሆነውና እውነትን እንደሚናገር የሚያምኑት ሙሴም፣ መድኃኒታችን ሰው ስለ መሆኑ የተነገረውን እጅግ አስፈላጊ አድርጎ ቈጥሮ፣ እውነትነቱንም ተረድቶ፣ በእነዚህ ቃላት ጻፈው፦ «ከያዕቆብ ኮከብ ይወጣል፥ ከእስራኤልም ሰው ይነሣል፤ የሞዓብንም አለቆች ያደቅቃል»። ደግሞም፦ «ያዕቆብ ሆይ፥ ቤቶችህ፥ እስራኤል ሆይ፥ ድንኳኖችህ እንዴት ያማሩ ናቸው! እንደ ጥላ ሰጪ የአትክልት ስፍራዎች፥ በወንዝም ዳር እንዳሉ ገነቶች፥ እግዚአብሔር እንደ ተከላቸው ድንኳኖች፥ በውኃም ዳር እንዳሉ ዝግባዎች ናቸው። ከዘሩ ሰው ይወጣል፥ በብዙ ሕዝቦችም ላይ ጌታ ይሆናል»። ደግሞም ኢሳይያስ፦ «ሕፃኑ አባቴ ወይም እናቴ ብሎ መጥራትን ሳያውቅ የደማስቆን ኃይልና የሰማርያን ምርኮ በአሦር ንጉሥ ፊት ይወስዳል»። 5. እንግዲህ ሰው እንደሚገለጥ በእነዚህ ቃላት አስቀድሞ ተነግሮአል። የሚመጣው ግን የሁሉ ጌታ እንደ ሆነ እንደ ገና እንዲህ ብለው ይተነብያሉ፦ «እነሆ፥ እግዚአብሔር በቀላል ደመና ላይ ተቀምጦአል፤ ወደ ግብፅም ይመጣል፤ የግብፅም የተቀረጹ ምስሎች ይናወጣሉ»። አብ ደግሞ ከዚያ መልሶ የሚጠራው፦ «ከግብፅ ልጄን ጠራሁት» ብሎ ነውና።