የጦር አለቃው ባላቅዮስ፤ አባ እንጦንስ ቢያስጠነቅቀውም በክፉ አሟሟት መሞቱ

86. ባላቅዮስ የሚባል አንድ የጦር አለቃም ለአርዮሳውያን—ለዚያ መጥፎ ገድ ላለው ስም—ባለው አክብሮት ምክንያት እኛን ክርስቲያኖችን አጥብቆ አሳደደን። ጭካኔውም እጅግ ታላቅ ከመሆኑ የተነሣ ደናግልን ይደበድብ፣ መነኮሳትንም ልብሳቸውን ገፎ ይገርፍ ስለ ነበረ፣ አባ እንጦንስ በዚያን ጊዜ እንዲህ የሚል ደብዳቤ ጽፎ ላከለት፦ «ቍጣ ወደ አንተ ሲመጣ አያለሁ፤ ስለዚህ ቍጣ እንዳይዝህ ክርስቲያኖችን ማሳደድህን ተው፤ አሁንም እንኳ ሊመጣብህ ተቃርቧልና።» ባላቅዮስ ግን ሳቀ፤ ደብዳቤውንም መሬት ላይ ጥሎ ተፋበት፤ ያመጡትንም ሰዎች ሰደባቸው፤ ለአባ እንጦንስም ይህን እንዲነግሩት አዘዛቸው፦ «ስለ መነኮሳቱ ስለምትጨነቅ በቅርቡ አንተንም ደግሞ ልይዝህ እመጣለሁ።» አምስት ቀንም ሳያልፍ ቍጣ መጣበት። ባላቅዮስና የግብፅ አገረ ገዥ ንስጥሮስ ከእስክንድርያ ወጥተው ኬሬዩ ወደሚባለው ወደ መጀመሪያው ማረፊያ ሄዱ፤ ሁለቱም በፈረስ ላይ ተቀምጠው ነበር፤ ፈረሶቹም የባላቅዮስ ነበሩ፤ ከበረቱም ፈረሶች ሁሉ እጅግ የተገሩ ነበሩ። ነገር ግን ወደ ስፍራው ብዙ ሳይርቁ ፈረሶቹ እንደ ልማዳቸው እርስ በርሳቸው መፈንጨት ጀመሩ፤ ድንገትም ንስጥሮስ የተቀመጠበት ይበልጥ የተገራው ፈረስ ባላቅዮስን ነክሶ ከፈረሱ ጣለው፤ አጠቃውም፤ ጭኑንም በጥርሱ ክፉኛ ስለ ቦጫጨቀው ወዲያውኑ ተሸክመው ወደ ከተማ መለሱት፤ በሦስት ቀንም ውስጥ ሞተ። አባ እንጦንስ አስቀድሞ የተናገረው ነገር እንዲህ ፈጥኖ ስለ ተፈጸመ ሁሉም ተደነቁ።