አርዮሳውያን ዛሬ የሚያደርጉትን በራእይ ማየቱ

82. እንግዲህ እንዲህ ያለ ታላቅ ሰው መሆኑ ስለ ታወቀና ሊጠይቁት ለመጡትም እንዲህ ያሉ መልሶችን ስለ ሰጠ፣ እንደ ገና ወደ ውስጠኛው ተራራ ተመለሰ፤ የለመደውንም ተጋድሎ አጸና። ብዙ ጊዜም ሰዎች ወደ እርሱ በመጡ ጊዜ፣ ተቀምጦም ሆነ እየተመላለሰ ሳለ፣ በዳንኤል እንደ ተጻፈ ዲዳ ይሆን ነበር፤ ከጥቂት ጊዜም በኋላ ከእርሱ ጋር ለነበሩት ወንድሞች ቀድሞ ይናገረው የነበረውን ነገር ቀጥሎ ይናገር ነበር። ባልንጀሮቹም ራእይ እያየ እንደ ሆነ ያስተውሉ ነበር። በተራሮች ላይ ሳለ በግብፅ የሚሆነውን ብዙ ጊዜ ያይ ነበርና፤ ከእርሱ ጋር በቤት ውስጥ ለነበረውና አባ እንጦንስ በራእይ ተመስጦ እንደ ነበረ ለተመለከተው ለኤጲስ ቆጶሱ ለሴራፕዮን ይነግረው ነበር። አንድ ጊዜ ተቀምጦ ሲሠራ በተመስጦ ውስጥ እንደ ወደቀ ሆነ፤ ባየውም ነገር እጅግ አቃሰተ። ከጥቂት ጊዜም በኋላ በአጠገቡ ወደ ቆሙት ዘወር ብሎ እያቃሰተና እየተንቀጠቀጠ ጸለየ፤ በጕልበቱም ተንበርክኮ ለረጅም ጊዜ እንዲሁ ቆየ። ሽማግሌውም ተነሥቶ አለቀሰ። ስለዚህ ባልንጀሮቹ እየተንቀጠቀጡና እየፈሩ ያ ነገር ምን እንደ ሆነ ከእርሱ ለመረዳት ፈለጉ፤ ለመናገርም እስኪገደድ ድረስ እጅግ አስጨነቁት። እርሱም እጅግ እያቃሰተ እንዲህ ብሎ ተናገረ፦ «ልጆቼ ሆይ፣ በራእዩ የታየው ነገር ከመፈጸሙ በፊት መሞት በተሻለ ነበር።» ደግሞም በጠየቁት ጊዜ እንባውን አፍስሶ እንዲህ አለ፦ «ቍጣ ቤተ ክርስቲያንን ሊይዛት ነው፤ እንደ አእምሮ የለሽ እንስሶች ለሆኑ ሰዎችም ተላልፋ ልትሰጥ ተቃርባለች። የጌታን ቤት መንበር አየሁ፤ በዙሪያውም በየአቅጣጫው ክብ ሠርተው የቆሙ በቅሎዎች በውስጡ ያሉትን ነገሮች ይረግጡ ነበር፤ መንጋ ተደበላልቆ ሲዘል እንደሚራገጥ እንዲሁ ይራገጡ ነበር። እንዴት እንዳቃሰትሁ አያችሁ፤» አለ፤ «‹መሠዊያዬ ይረክሳል› የሚል ድምፅ ሰምቼ ነበርና።» ሽማግሌው እነዚህን ነገሮች አየ፤ ከሁለት ዓመትም በኋላ አሁን የደረሰው የአርዮሳውያን ወረራና የአብያተ ክርስቲያናት ዝርፊያ ሆነ፤ ያን ጊዜ ንዋያተ ቅድሳቱን በግፍ ወሰዱ፤ አሕዛብንም አስሸከሟቸው፤ አሕዛብንም ከወኅኒ አውጥተው በአምልኳቸው እንዲተባበሯቸው አስገደዱ፤ በፊታቸውም በመንበሩ ላይ የወደዱትን አደረጉ። በዚያን ጊዜ የበቅሎዎቹ እርግጫ አርዮሳውያን እንደ እንስሳ ያለ አእምሮ አሁን የሚያደርጉትን ለአባ እንጦንስ እንዳመለከተው ሁላችንም ተረዳን። ነገር ግን ይህን ራእይ ባየ ጊዜ ከእርሱ ጋር የነበሩትን እንዲህ ብሎ አጽናናቸው፦ «ልጆቼ ሆይ፣ አትዘኑ፤ ጌታ እንደ ተቈጣ እንዲሁ ደግሞ ይፈውሰናልና፤ ቤተ ክርስቲያንም ፈጥና የራሷን ሥርዓት እንደ ገና ትቀበላለች፤ እንደ ልማዷም ታበራለች። የተሰደዱትም ወደ ስፍራቸው ሲመለሱ፣ ክፋትም እንደ ገና ወደ ራሱ መሸሸጊያ ሲገባ፣ ደገኛውም እምነት በየስፍራው በሙሉ ነጻነት በግልጥ ሲናገር ታያላችሁ። ብቻ ከአርዮሳውያን ጋር ራሳችሁን አታርክሱ፤ ትምህርታቸው የአጋንንትና የአባታቸው የዲያብሎስ ነው እንጂ የሐዋርያት አይደለምና፤ እንዲያውም እንደ እነዚህ በቅሎዎች አእምሮ ማጣት መካን፣ አእምሮ የለሽና የብርሃን ማስተዋል የሌለው ነው።»