ነገሥታቱ ለአባ እንጦንስ እንዴት እንደ ጻፉና የሰጣቸው መልስ

81. የአባ እንጦንስ ዝና እስከ ነገሥታት እንኳ ደረሰ። ንጉሠ ነገሥቱ ቈስጠንጢኖስና ልጆቹ ነገሥታቱ ቈስጠንጢዮስና ቈስጣንስ እንደ አባት አድርገው ደብዳቤ ጻፉለት፤ መልስም እንዲሰጣቸው ለመኑት። እርሱ ግን ደብዳቤዎቹን ብዙም ከቁም ነገር አልቈጠራቸውም፤ በመልእክቶቹም ደስ አላለውም፤ ነገሥታቱ ከመጻፋቸው በፊት እንደ ነበረ እንዲሁ ነበረ። ደብዳቤዎቹን ባመጡለት ጊዜ ግን መነኮሳቱን ጠርቶ እንዲህ አላቸው፦ «ንጉሠ ነገሥት ለእኛ ቢጽፍ አትደነቁ፤ እርሱ ሰው ነውና፤ ይልቁንም እግዚአብሔር ሕጉን ለሰዎች እንደ ጻፈ፣ በገዛ ልጁም ለእኛ እንደ ተናገረ ተደነቁ።» ስለዚህም እንዲህ ላሉት ነገሮች እንዴት መልስ እንደሚጻፍ አላውቅም ብሎ ደብዳቤዎቹን ሊቀበል አልፈለገም። ነገር ግን ነገሥታቱ ክርስቲያኖች ስለ ሆኑ፣ እንደ ተናቁም ቈጥረው እንዳይሰናከሉ መነኮሳቱ አጥብቀው ስለ ለመኑት፣ እንዲነበቡ ፈቀደ፤ ክርስቶስን ስለሚያመልኩም እያመሰገናቸው መልስ ጻፈ፤ ስለ መዳን በሚሆኑ ነገሮችም እንዲህ ሲል መከራቸው፦ «የአሁኑን ነገር ከፍ አድርገው እንዳያስቡ፣ ይልቁንም የሚመጣውን ፍርድ እንዲያስቡ፣ ክርስቶስም ብቻ እውነተኛና ዘላለማዊ ንጉሥ እንደ ሆነ እንዲያውቁ።» ርኅሩኆች እንዲሆኑ፣ ለፍትሕና ለድሆችም እንዲጠነቀቁ ለመናቸው። እነርሱም መልሱን ተቀብለው ደስ አላቸው። እንዲህ በሁሉ ዘንድ የተወደደ ነበረ፤ ሁሉም እንደ አባት ሊቈጥሩት ይመኙ ነበር።