ጋኔን ያደረባቸውን በመፈወስ ፈላስፎቹን እንዴት እንደ ረታቸው

80. «እነዚህም ምልክቶች የክርስቶስ እምነት ብቻ እውነተኛ ሃይማኖት እንደ ሆነ ለማረጋገጥ በቂ ናቸው። ነገር ግን እዩ! እናንተ አሁንም አታምኑም፤ ክርክርም ትፈልጋላችሁ። እኛ ግን መምህራችን እንደሚለው ማስረጃችንን የምናቀርበው ‹በሚያባብል በግሪክ ጥበብ ቃል› አይደለም፤ ከክርክር ማስረጃ በግልጥ በሚቀድም እምነት እናሳምናለን እንጂ። እነሆ በዚህ ጋኔን ያደረባቸው አንዳንድ ሰዎች አሉ፤»—በዚያን ጊዜ በአጋንንት እጅግ የተጨነቁ አንዳንድ ሰዎች ወደ እርሱ መጥተው ነበርና፤ እነርሱንም ወደ መካከል አምጥቶ እንዲህ አለ—«እናንተ በክርክራችሁ ወይም በመረጣችሁት በማንኛውም ጥበብ ወይም አስማት ጣዖቶቻችሁን እየጠራችሁ አንጹአቸው፤ ካልቻላችሁ ግን ከእኛ ጋር ያላችሁን ክርክር ተዉ፤ የክርስቶስን መስቀል ኃይልም ታያላችሁ።» ይህንም ብሎ ክርስቶስን ጠራ፤ የተሠቃዩትንም ሁለት ወይም ሦስት ጊዜ በመስቀል ምልክት አማተባቸው። ወዲያውኑም ሰዎቹ ተፈውሰውና ልባቸው ተመልሶ ቆሙ፤ ወዲያውኑም ጌታን አመሰገኑ። ፈላስፎች የሚባሉትም ተደነቁ፤ በሰውየው ማስተዋልና በተደረገው ምልክት እጅግ ተገረሙ። አባ እንጦንስ ግን እንዲህ አለ፦ «በዚህ ለምን ትደነቃላችሁ? እነዚህን ነገሮች የምናደርግ እኛ አይደለንም፤ በእርሱ በሚያምኑት አማካይነት የሚያደርጋቸው ክርስቶስ ነው እንጂ። እንግዲህ እናንተም ራሳችሁ እመኑ፤ በእኛ ዘንድ የቃል ብልጠት እንደሌለ፣ ነገር ግን በእኛ ውስጥ ወደ ክርስቶስ ያለ በፍቅር የሚሠራ እምነት እንዳለ ታያላችሁ፤ ይህንም እናንተ ራሳችሁ ብታገኙት ከእንግዲህ የማስረጃ ክርክር አትሹም፤ ነገር ግን በክርስቶስ ያለው እምነት በቂ እንደ ሆነ ትቈጥራላችሁ።» የእንጦንስ ቃሎች እነዚህ ናቸው። እነርሱም በዚህ ደግሞ ተደንቀው እጅ ነሡት፤ ከእርሱ ያገኙትንም ጥቅም እየመሰከሩ ሄዱ።