ወደ እስክንድርያ እንዴት እንደ ሄደ፣ ብዙዎችን እንዴት እንደ ፈወሰና ወደ ክርስትና እንደ መለሰ፣ የእስክንድርያው አትናቴዎስም ከከተማዪቱ እንዴት እንደ ሸኘው

70. ሕዝቡ ሁሉ የክርስቶስ ተቃዋሚ የሆነው ኑፋቄ እንዲህ ባለ ሰው ሲወገዝ በሰሙ ጊዜ ደስ አላቸው። በከተማዪቱ ያሉ ሰዎች ሁሉ አባ እንጦንስን ለማየት ተሰበሰቡ፤ ግሪኮችና ካህናቶቻቸው የሚባሉትም ወደ ቤተ ክርስቲያን መጥተው፦ «የእግዚአብሔርን ሰው ለማየት እንሻለን» አሉ፤ ሁሉም እንዲህ ብለው ይጠሩት ነበርና። በዚያም ስፍራ ደግሞ ጌታ ብዙዎችን ከአጋንንት አነጻ፤ ያበዱትንም ፈወሰ። ብዙ ግሪኮችም እንደሚጠቀሙ አምነው አረጋዊውን እንኳ ብቻ ሊነኩት ለመኑ። በእርግጥም አንድ ሰው በአንድ ዓመት ውስጥ ሊያይ የሚችለውን ያህል ብዙዎች በእነዚያ ጥቂት ቀናት ክርስቲያኖች ሆኑ። ከዚያም አንዳንዶች በሕዝቡ ብዛት የሚቸገር መስሏቸው በዚህ ምክንያት ሁሉንም ከእርሱ ሊመልሷቸው ሲሞክሩ፣ እርሱ ሳይታወክ፣ እነዚህ በተራራው ላይ ከሚታገላቸው አጋንንት እንደማይበዙ ተናገረ።

71. ሊሄድ ሲነሣና እኛም ስንሸኘው፣ ወደ በሩ በደረስን ጊዜ አንዲት ሴት ከኋላ እንዲህ ብላ ጮኸች፦ «አንተ የእግዚአብሔር ሰው ሆይ፣ ቆይ፤ ልጄን ጋኔን ክፉኛ ይዞአታል። እባክህ ቆይ፤ እኔም ስሮጥ ራሴን እንዳልጐዳ።» አረጋዊውም በሰማት ጊዜ፣ እኛም ስንለምነው፣ በፈቃዱ ቆመ። ሴቲቱም በቀረበች ጊዜ ልጅቱ በመሬት ላይ ተጣለች። እንጦንስ ግን ጸልዮ የክርስቶስን ስም በጠራ ጊዜ ልጅቱ ደኅና ሆና ተነሣች፤ ርኩሱ መንፈስ ወጥቶ ነበርና። እናቲቱም እግዚአብሔርን ባረከች፤ ሁሉም አመሰገኑ። እንጦንስም ራሱ ደስ አለው፤ ወደ ገዛ ቤቱ እንደሚሄድ ሆኖ ወደ ተራራው ተመለሰ።