አርዮሳውያንን እንዴት እንደ ረታቸው

69. ደግሞም አንድ ጊዜ አርዮሳውያን የአባ እንጦንስ አስተሳሰብ ከእነርሱ ጋር አንድ ነው ብለው በሐሰት በተናገሩ ጊዜ፣ ተከፋ፤ በእነርሱም ላይ ተቈጣ። ከዚያም በኤጲስ ቆጶሳቱና በወንድሞች ሁሉ ተጠርቶ ከተራራው ወረደ፤ ወደ እስክንድርያም ገብቶ አርዮሳውያንን አወገዘ፤ ኑፋቄያቸውም ከኑፋቄዎች ሁሉ የመጨረሻውና የክርስቶስ ተቃዋሚ ቀዳሚ እንደ ሆነ ተናገረ። ለሕዝቡም የእግዚአብሔር ልጅ ፍጡር እንዳልሆነ፣ ካለመኖርም ወደ መኖር እንዳልመጣ፣ ነገር ግን እርሱ ከአብ ባሕርይ የሆነ ዘላለማዊ ቃልና ጥበብ እንደ ሆነ አስተማረ። ስለዚህ፦ «እርሱ ያልነበረበት ጊዜ ነበረ» ማለት ክህደት ነው፤ ቃል ሁልጊዜ ከአብ ጋር አብሮ ነበረና። ስለዚህ እጅግ ከከሓዲዎቹ ከአርዮሳውያን ጋር ምንም ኅብረት አይኑራችሁ። ብርሃን ከጨለማ ጋር ምንም ኅብረት የለውምና። እናንተ መልካም ክርስቲያኖች ናችሁና፤ እነርሱ ግን የአብ ልጅ፣ የእግዚአብሔር ቃል፣ ፍጡር ነው ሲሉ ከአሕዛብ በምንም አይለዩም፤ በፈጣሪ በእግዚአብሔር ፈንታ የተፈጠረውን ያመልካሉና። ፍጥረት ራሱ በእነርሱ ላይ እንደሚቈጣ እመኑ፤ ፈጣሪን፣ የሁሉን ጌታ፣ ሁሉ በእርሱ የሆነውን፣ ከተፈጠሩት ነገሮች ጋር ይቈጥሩታልና።