የአባ እንጦንስ ልደትና የሕይወቱ ጅማሬ

1. አባ እንጦንስ በትውልዱ ግብፃዊ እንደ ነበረ እወቁ፤ ወላጆቹ ከከበረ ቤተሰብ የተገኙና ብዙ ሀብት ያላቸው ነበሩ፤ ክርስቲያኖችም ስለ ነበሩ እርሱም በዚያው እምነት አደገ። በሕፃንነቱ ከወላጆቹ ጋር አደገ፤ ከእነርሱና ከቤቱ በቀር ሌላ ነገር አያውቅም ነበር። ባደገና ልጅነት ላይ በደረሰ ጊዜ፣ በዕድሜውም እየገፋ በሄደ ጊዜ፣ ከሌሎች ልጆች ጋር መዋል ስላልፈለገ ፊደል መማርን ሊታገሥ አልቻለም፤ ነገር ግን ስለ ያዕቆብ እንደ ተጻፈ፣ ምኞቱ ሁሉ ጭምት ሰው ሆኖ በቤቱ መኖር ነበር። ከወላጆቹ ጋር ወደ ጌታ ቤት ይሄድ ነበር፤ በልጅነቱ ሥራ ፈት አልነበረም፤ ባደገም ጊዜ ይህን አልናቀም፤ ነገር ግን ለአባቱና ለእናቱ የሚታዘዝ ነበረ፤ የሚነበበውንም በጥንቃቄ ያደምጥ ነበር፤ ከሰማውም ውስጥ የሚጠቅመውን በልቡ ይጠብቅ ነበር። በመጠነኛ ምቾት ያደገ ልጅ ቢሆንም ልዩ ልዩ ወይም የተንደላቀቀ ምግብ እንዲያቀርቡለት ወላጆቹን አላስቸገረም፤ ይህም ደስታ አልሰጠውም ነበር፤ ባገኘው ነገር ብቻ ይረካ ነበር እንጂ ከዚያ የበለጠ አይፈልግም ነበር።

2. አባቱና እናቱ ከሞቱ በኋላ ከአንዲት ትንሽ እኅቱ ጋር ብቻውን ቀረ፤ ዕድሜውም ከአሥራ ስምንት እስከ ሃያ ዓመት ገደማ ነበር፤ የቤቱም የእኅቱም ኃላፊነት በእርሱ ላይ ወደቀ። ወላጆቹ ከሞቱ ገና ስድስት ወር ሳይሞላ፣ እንደ ልማዱ ወደ ጌታ ቤት ሲሄድ በመንገድ ላይ ከራሱ ጋር እየተነጋገረ ያሰላስል ነበር፤ ሐዋርያት ሁሉን ትተው መድኃኒታችንን እንዴት እንደ ተከተሉ፣ በሐዋርያት ሥራ የተጠቀሱትም ሰዎች ንብረታቸውን ሸጠው ለችግረኞች እንዲከፋፈል አምጥተው በሐዋርያት እግር አጠገብ እንዴት እንዳኖሩ፣ በሰማይም ምን ያህል ታላቅ ተስፋ እንደ ተዘጋጀላቸው ያስብ ነበር። ይህን እያሰላሰለ ወደ ቤተ ክርስቲያን ገባ፤ በዚያን ጊዜም ወንጌል ይነበብ ነበር፤ ጌታም ለባለ ጠጋው፦ «ፍጹም ልትሆን ብትወድ፥ ሂድና ያለህን ሸጠህ ለድሆች ስጥ፥ መዝገብም በሰማያት ታገኛለህ፥ መጥተህም ተከተለኝ» ሲል ሰማ። አባ እንጦንስም እግዚአብሔር ቅዱሳንን እንዳሳሰበውና ያ ክፍል ስለ እርሱ እንደ ተነበበ ቈጥሮ ወዲያውኑ ከቤተ ክርስቲያን ወጣ፤ የአባቶቹንም ርስት ለመንደሩ ሰዎች ሰጠ፤ ርስቱ ሦስት መቶ ኤከር የሚሆን፣ ፍሬያማና እጅግ ያማረ መሬት ነበረ፤ ይህንም ያደረገው ለራሱም ለእኅቱም ከእንግዲህ እንቅፋት እንዳይሆንባቸው ነው። የቀረውንም ተንቀሳቃሽ ንብረት ሁሉ ሸጠ፤ ብዙ ገንዘብም ሰብስቦ ለድሆች ሰጠ፤ ነገር ግን ለእኅቱ ሲል ጥቂት አስቀረ።