ወደ እርሱ የመጡትን በምን ያህል ርኅራኄ ይመክራቸው እንደ ነበር

55. ስለዚህ ከጥቂት ቀናት በኋላ እንደ ገና ወደ ተራራው ገባ። ከዚያን ጊዜ ጀምሮም ብዙዎች ወደ እርሱ ይመጡ ነበር፤ በሕመም የሚሠቃዩ ሌሎችም ለመግባት ደፈሩ። ስለዚህ ወደ እርሱ ለሚመጡት መነኮሳት ሁሉ ይህን ምክር ዘወትር ይሰጥ ነበር፦ «በጌታ እመኑ፤ ውደዱትም፤ ራሳችሁን ከርኩስ ሐሳብና ከሥጋዊ ተድላ ጠብቁ፤ በምሳሌም እንደ ተጻፈ ‹በሆድ ጥጋብ› አትታለሉ። ሳታቋርጡ ጸልዩ፤ ከንቱ ውዳሴን ራቁ፤ ከመተኛታችሁ በፊትና ስትነቁ መዝሙር ዘምሩ፤ የመጻሕፍትን ትእዛዛት በልባችሁ ያዙ፤ ነፍሳችሁ ትእዛዛቱን በማስታወስ ከቅዱሳኑ ቅንዓት ጋር እንድትስማማ የቅዱሳንን ሥራ አስቡ።» ይልቁንም «በቁጣችሁ ላይ ፀሐይ አይግባ» የሚለውን የሐዋርያውን ቃል ዘወትር እንዲያሰላስሉ መከራቸው። ይህም ስለ ትእዛዛት ሁሉ በአንድነት እንደ ተነገረ፣ በቁጣ ላይ ብቻ ሳይሆን በሌላ በማናቸውም ኃጢአታችን ላይ ፀሐይ ሊገባ እንደማይገባ ያስብ ነበር። ፀሐይ በቀን ስለ ክፋት፣ ጨረቃም በሌሊት ስለ ኃጢአት፣ ወይም ስለ ክፉ ሐሳብ እንኳ እንዳይፈርዱብን መልካምና አስፈላጊ ነበርና። ይህም ሁኔታ በእኛ እንዲጠበቅ ሐዋርያውን መስማትና ቃሉን መጠበቅ መልካም ነው፤ እርሱ፦ «ራሳችሁን መርምሩ፤ ራሳችሁን ፈትኑ» ይላልና። ስለዚህ እያንዳንዱ በቀንም በሌሊትም ያደረገውን ሥራ ዕለት ዕለት ከራሱ ሒሳብ ይቀበል፤ ኃጢአት ሠርቶ ከሆነ ከእርሱ ይከልከል፤ ካልሠራም አይመካ። ነገር ግን ብፁዕ ሐዋርያው ጳውሎስ እንደሚለው «በጨለማ የተሰወረውን ደግሞ ወደ ብርሃን የሚያወጣ … ጌታ እስኪመጣ ድረስ» ቸልተኛ ሳይሆን፣ ባልንጀሮቹንም ሳይኰንን፣ ራሱንም ሳያጸድቅ በበጎው ይኑር። ብዙ ጊዜ ሳናውቀው የማናውቀውን ነገር እናደርጋለንና፤ ጌታ ግን ሁሉን ያያል። ስለዚህ ፍርዱን ለእርሱ አሳልፈን እየሰጠን እርስ በርሳችን እንራራ። አንዳችን የአንዳችንን ሸክም እንሸከም፤ ነገር ግን ራሳችንን እንመርምር፤ የጎደለንንም ለመሙላት እንቸኩል። ከኃጢአትም እንደ መጠበቂያ የሚከተለው ይከበር፦ እያንዳንዳችን ለሌላው ልንነግር እንዳለን አድርገን ሥራችንንና የነፍሳችንን ግፊቶች እናስተውል፤ እንጻፍም። ሌሎች እንዲያውቁት እጅግ የምናፍር ከሆነ ከኃጢአት እንደምንከለከል፣ በአእምሮአችንም ውስጥ ክፉ ሐሳብን እንደማናኖር እርግጠኞች ሁኑ። ኃጢአት ሲሠራ መታየትን የሚወድድ ማን ነው? ወይስ ኃጢአትን ከሠራ በኋላ ለመሰወር ፈልጎ ከመዋሸት የማይመርጥ ማን ነው? እንግዲህ እርስ በርሳችን እየተያየን ሳለን የሥጋ ኃጢአትን እንደማንሠራ፣ እንዲሁ ሐሳባችንን እርስ በርሳችን ልንነግር እንዳለን አድርገን ብንጽፍ፣ እንዳይታወቅብን በኀፍረት የተነሣ ራሳችንን ከርኩስ ሐሳብ በቀላሉ እንጠብቃለን። ስለዚህ የተጻፈው ነገር በአብረውን ባሉት ባሕታውያን ዓይኖች ፋንታ ይሁንልን፤ ይኸውም ተይዘን እንደምናፍር ያህል ለመጻፍ እያፈርን፣ ያልተገባውን ነገር ከቶ እንዳናስብ ነው። ራሳችንን እንዲህ ብንቀርጽ ሥጋን ለማስገዛት፣ ጌታን ደስ ለማሰኘትና የጠላትን ሸንገላ ለመርገጥ እንችላለን።

56. ወደ እርሱ ለመጡት የሰጠው ምክር ይህ ነበር። ከሕመምተኞችም ጋር ይራራና ይጸልይ ነበር። ብዙ ጊዜም ጌታ ስለ ብዙዎች ሰማው፤ ነገር ግን ስለ ተሰማ አልተመካም፤ ባይሰማም አላጕረመረመም። ነገር ግን ሁልጊዜ ጌታን ያመሰግን ነበር፤ ሕመምተኛውንም እንዲታገሥ፣ ፈውስም የጌታ ብቻ እንጂ የእርሱ ወይም የማንም ሰው እንዳልሆነ፣ ጌታም በወደደው ጊዜና ለወደደው በጎ እንደሚያደርግ እንዲያውቅ ይለምነው ነበር። ስለዚህ ሕመምተኞቹ ተስፋ እንዳይቈርጡ ይልቁንም እንዲታገሡ እየተማሩ የአረጋዊውን ቃል እንደ መድኃኒት ይቀበሉ ነበር። የተፈወሱትም አባ እንጦንስን ሳይሆን እግዚአብሔርን ብቻ እንዲያመሰግኑ ተማሩ።