ለፊላደልፊያ ከተማ ከንቲባ ለክቡር ማቲው ክላርክሰን

ጌታዬ — ለእርስዎ ባለን የግል አክብሮትና ከንቲባውን ለማርካት ስንል፣ በተቻለን መጠን

እንደምናስታውሰው የሚከተሉትን አልጋዎች ብቻ እንጂ ከዚያ የበለጠ በእጃችን እንዳልነበረ እንገልጻለን።

የጄምስ ስታር የሆኑትን ሁለት አልጋዎች ቀበርን፤ ስናወጣቸውም አንዱ ተበላሽቶ አገኘነው፤ የእርሱ የሆኑት ብርድ ልብሶችና ሌሎች ዕቃዎች ተሰርቀው ነበር። ልጁ ሙሴ ሊቀበለው እምቢ አለ። እንደገና ተቀበረ፤ እኛ እስከምናውቀው ድረስም እንደ ተቀበረ ነው፤ ሌላው ግን ተመልሶ ተቀባይነት አገኘ።

የነጋዴው የሳሙኤል ፊሸር የሆኑትን ሁለት አልጋዎች ቀበርን፤ ከእነርሱ አንዱን አንድ ሕመምተኛ ወደ ቡሽ ሂል ለመውሰድ ብለን አወጣነው፤ በዚያም ተተወ፤ ሌላው በአንድ መቃብር ውስጥ ከአንድ አስከሬን በታች ተቀበረ።

ለቶማስ ዊሊንግ ሁለት አልጋዎች ተቀበሩ — አንዱ በአትክልት ቦታው ውስጥ ስድስት ጫማ ጥልቀት ተቀብሮ ኖራና ውኃ ተደፋበት፤ ሌላው በሸክላ ሠሪው መሬት (የድሆችና የእንግዶች መቃብር) ነበር፤ ስለ እርሱ ከዚያ የበለጠ የምናውቀው ነገር የለም።

የሟቹ የቀድሞ ከንቲባ የሳሙኤል ፓውል የሆነውን አንድ አልጋ ከሌሎች የቤት ዕቃዎችና ልብሶች ጋር በስኩልኪል ወንዝ ምዕራባዊ ዳርቻ በሚገኘው እርሻቸው ላይ አቃጠልን። ከአልጋዎቻቸውም አንዱን ቀበርን።

ለ— ዲኪንሰን በሪቻርድ አለን ቦታ ውስጥ አንድ አልጋ ቀበርን፤ እርሱም እንደ ተሰረቀ የምናምንበት በቂ ምክንያት አለን።

ስሙን ለማናውቀው በፍሮንት ጎዳና ለሚኖር ሰው አንድ አልጋ ተቀበረ — ለዚሁ ሥራ በተቀጠረ ሰው በሸክላ ሠሪው መሬት ተቀበረ። ያ ሰው በቅርቡ ከሆስፒታል ተሰናብቶ የሚተኛበት እንደሌለው ስለ ነገረን፣ አልጋው ለአንድ ሳምንት ከተቀበረ በኋላ ቆፍሮ አውጥቶ ለራሱ ጥቅም ሊያውለው እንደሚችል ነገርነው።

የቶማስ ላይፐር ሁለት አልጋዎች በሸክላ ሠሪው መሬት ተቀብረው ለአንድ ሳምንት በዚያ ቆዩ፤ ከዚያም ወደ ቡሽ ሂል ለወሰድናቸው ሕሙማን ጥቅም እንዲውሉ አውጥተናቸው በዚያው ተዉ።

ለ— ስሚዝ አንድ አልጋ በሸክላ ሠሪው መሬት ቀበርን፤ እርሱም ተመለሰ፤ ከአልጋው ዕቃዎች በቀር፤ እነርሱ እንደ ተሰረቁ እናምናለን።

በቫይን ጎዳና ለሚኖረው ለ— ዴቪስ ሌላ አንድ አልጋ ቀበርን፤ በስኩልኪል አጠገብ ተቀበረ፤ እስከ አሁንም እንደ ተቀበረ እንዳለ እናምናለን።

በሰከንድ ጎዳና ከሚኖረው ከ— ጌስት የመጣ አንድ አልጋ በሸክላ ሠሪው መሬት ተቀበረ፤ እኛ እስከምናውቀው ድረስ እስከ አሁን በዚያው አለ።

አንድ አልጋ በፓይንና በፎርዝ ጎዳናዎች መገናኛ ጥግ ላይ በሚገኘው በፕሬስቢቴሪያን መቃብር ስፍራ ቀበርን፤ ባለቤቱ ቶማስ ሚቸል እንዳወጣው እናምናለን።

በሰከንድ ጎዳና የሚኖረው — ሚሊጋን አንድ አልጋ በሸክላ ሠሪው መሬት እንድንቀብርለት አደረገ። ስለ እርሱ ከዚያ የበለጠ የምናውቀው ነገር የለም።

እኛን እስከሚመለከተን ድረስ ስለ አልጋዎቹ ጉዳይ የቀረበው እውነተኛ ዘገባ ይህ ነው። ክፉ አሳብ ባላቸው ሰዎች ሊወሰዱ እንደሚችሉ ስለምናውቅ ከመቅበር የበለጠ ኃላፊነት ወስደን አናውቅም። አንድ ታማኝ ሰው (ክፉዎችና ምቀኞች ሰዎች ስሙን ቢያጎድፉትም እንኳ) መልካም ስሙን በመሐላ ወይም በሕጋዊ ማረጋገጫ ለመከላከልና ለመደገፍ መሞከሩ ከክብሩ በታች እንደ ሆነ እናስባለን። ጠላቶቻችንን አንፈራም — ክሶቻቸውን ይዘው ወደ ፊት ይምጡ — ወደ ኋላ አንልም፤ ማናቸውንም ወንጀል በእኛ ላይ ማረጋገጥ ከቻሉም መከራን ለመቀበል እምቢ አንልም።

ጌታዬ፣ በቅርቡ በደረሰው የሞት መቅሠፍት ጊዜ ሕይወታችን ከአንድ ጊዜ በላይ አደጋ ላይ እንደ ወደቀ፣ እንዲሁም እጅግ ተስፋ ቆርጠን ስለ ነበር እርስዎ ባያግባቡን ኖሮ ደስ የማያሰኘውንና አደገኛውን ሥራችንን እንተወው እንደ ነበር የሚያምኑበት ምክንያት አለዎት፤ እርስዎ እስከሚያውቁት ድረስ ለአካሄዳችን ያለዎትን ይሁንታ የሚገልጽ የምስክር ወረቀት እንዲሰጡን መጠየቃችን ተገቢ ያልሆነ ነገር እንዳልሆነ ተስፋ እናደርጋለን።

በፍቅርና በአክብሮት፣
ወዳጆችዎ ነን፤

አብሳሎም ጆንስ፣

ሪቻርድ አለን።

ጃንዋሪ 7 ቀን 1794።

በቅርቡ የተስፋፋው አደገኛ በሽታ በነበረበት ወቅት የአብሳሎም ጆንስንና የሪቻርድ አለንን፣ እንዲሁም ሙታንን እንዲቀብሩ የቀጠሯቸውን ሰዎች አካሄድ በየዕለቱ ማለት ይቻላል የማየት ዕድል ስለ ነበረኝ — እኔ እስከተመለከትኩት ድረስ ለተግባራቸው ያለኝን ይሁንታ የሚገልጸውን ይህን ምስክርነት በደስታ እሰጣለሁ። ትጋታቸው፣ ጥንቃቄያቸውና ጨዋ ጠባያቸው በዚያን ጊዜ እጅግ አርክቶኝ ነበር።

ማቲው ክላርክሰን፣ ከንቲባ።

ፊላደልፊያ፣ ጃንዋሪ 23 ቀን 1794።