የሐሰት ተስፋ ከያዙ ሰዎች ጋር መነጋገር

1. የሐሰት ተስፋ ከያዙት ሰዎች መካከል ምናልባት ትልቁ ክፍል በጽድቅ ኑሮአቸው እንድናለን ብለው የሚጠብቁ ሰዎች ናቸው። እነዚህ ሰዎች እንደሚከተሉት ባሉ አነጋገሮቻቸው በቀላሉ ይታወቃሉ፦ «የምችለውን ያህል መልካም እያደረግሁ ነው።» «ከክፉው ይልቅ የማደርገው መልካም ይበልጣል።» «እኔ ታላቅ ኃጢአተኛ አይደለሁም።» «እጅግ የከፋ ነገር ከቶ አድርጌ አላውቅም።» ገላትያ 3:10 ለዚህ የሚጠቅም እጅግ ጥሩ ክፍል ነው፤ በሥራቸው የሚታመኑ ሁሉ ከሕግ እርግማን በታች እንደ ሆኑ፣ እንዲሁም «በሕግ መጽሐፍ በተጻፉት ሁሉ ጸንቶ የማይኖር የማያደርግም» ሰው ሁሉ በሕግ በኩል አንዳች ተስፋ እንደሌለው ያሳያልና። ያዕቆብ 2:10 ደግሞ ጠቃሚ ነው። ገላትያ 2:16 እና ሮሜ 3:19፣ 20 የሕግን ሥራ በመሥራት ሥጋ የለበሰ ሁሉ በእግዚአብሔር ፊት እንደማይጸድቅ በማሳየት እጅግ ውጤታማ ናቸው። ማቴዎስ 5:20 — እነዚህ ክፍሎች ሁሉ እግዚአብሔር የሚጠይቀው ጽድቅ ምን ዓይነት እንደ ሆነ፣ የማንም ሰው ጽድቅ እግዚአብሔር ወደሚጠይቀው ደረጃ እንደማይደርስ፣ ሰውም መዳን ቢፈልግ ከራሱ ሥራ ሌላ የመዳኛ መንገድ መፈለግ እንዳለበት ያሳያሉ። እነዚህን ክፍሎች በምትጠቀምበት ጊዜ አንዳንድ ጊዜ ጠያቂውን እንዲህ ማለት መልካም ነው፦ «እግዚአብሔር የሚጠይቀው ጽድቅ ምን ዓይነት እንደ ሆነ አልተረዳህም፤ ብትረዳ ኖሮ እንዲህ አትናገርም ነበር። እስቲ አሁን ወደ ቃሉ ዞረን እግዚአብሔር የሚጠይቀው ጽድቅ ምን ዓይነት እንደ ሆነ እንመልከት።» እነዚህን ሰዎች የምንይዝበት ሌላም መንገድ አለ፤ ይኸውም እንደ ሉቃስ 16:15፤ ሮሜ 2:16፤ 1ኛ ሳሙኤል 16:7 ያሉትን ክፍሎች መጠቀም ነው። እነዚህ ክፍሎች እግዚአብሔር ልብን እንደሚመለከት ያሳያሉ። ጠያቂውን በዚያው ነጥብ ላይ አጽንተህ ያዘው። ማንም ሰው ከዚህ እውነት ጋር ፊት ለፊት ሲገናኝ መንቀጥቀጡ አይቀርም፤ ውጫዊ ኑሮው ምንም ዓይነት ቢሆን ልቡ የእግዚአብሔርን ዓይን ምርመራ መቋቋም እንደማይችል ያውቃልና። አንድ ሰው ምንም ያህል ራሱን ጻድቅ አድርጎ ቢቆጥር ተስፋ መቍረጥ አያስፈልገንም፤ በእያንዳንዱ ሰው ልብ ጥልቀት ውስጥ በአንድ ስፍራ የኃጢአት ስሜት አለና፤ እኛ ማድረግ ያለብን ያንን ስፍራ እስክንነካ ድረስ በትጋት መሥራት ብቻ ነው። የሰው ሁሉ ሕሊና ከእኛ ጎን ነው። አንድ ሰው «የምችለውን ያህል መልካም እያደረግሁ ነው፤ ወይም ከክፉው ይልቅ የማደርገው መልካም ይበልጣል» ሲል ማቴዎስ 22:37፣ 38ን መጠቀም ይቻላል። እንዲህ በለው፦ «በዚህ ነገር እጅግ ተሳስተሃል፤ ከክፉው ይልቅ መልካም ማድረግ ይቅርና ከእግዚአብሔር ሕግጋት ሁሉ ፊተኛይቱንና ታላቂቱን እንደ ጣስህ ታውቃለህን?» ከዚያም ክፍሉን አሳየው። ዕብራውያን 11:6 እና ዮሐንስ 6:29 እግዚአብሔር የሚጠይቀው አንዱ ነገር እምነት እንደ ሆነና ያለ እምነት እግዚአብሔርን ደስ ማሰኘት እንደማይቻል ያሳያሉ፤ ዮሐንስ 16:9 ደግሞ በክርስቶስ አለማመን ከኃጢአት ሁሉ የሚበልጥ ኃጢአት እንደ ሆነ ያሳያል። ዮሐንስ 3:36 የዘላለም ሕይወት ጉዳይ የተመካው ሰው ኢየሱስ ክርስቶስን በመቀበሉ ወይም በመጣሉ ላይ ብቻ እንደ ሆነ ያሳያል፤ ዕብራውያን 10:28፣ 29 ደግሞ ከሁሉ የከበደውን ቅጣት የሚያመጣው ኃጢአት የእግዚአብሔርን ልጅ መርገጥ እንደ ሆነ ያሳያል። ይህን የመጨረሻውን ክፍል ከመጠቀምህ በፊት እንዲህ ብትል መልካም ነው፦ «አንተ እጅግ መልካም ሰው እንደ ሆንህ ታስባለህ፤ ነገር ግን ሰው ሊሠራው ከሚችለው ኃጢአት ሁሉ በእግዚአብሔር ፊት እጅግ የሚያስፈራውን ኃጢአት እየሠራህ እንዳለህ ታውቃለህን?» «አላውቅም» ብሎ ቢመልስ፣ «እንግዲያውስ እየሠራህ እንዳለህ ከእግዚአብሔር ቃል ላሳይህ» በለው፤ ከዚያም ወደዚህ ክፍል ዞረህ በታላቅ ግርማና በጽኑ ልባዊነት አንብብለት።

2. የሐሰት ተስፋ ከያዙት ሌላው ክፍል እንዲህ ብለው የሚያስቡ ሰዎች ናቸው፦ «እግዚአብሔር ማንንም ለመኰነን እጅግ ቸር ነው።»

አንድ ሰው ይህን ሲል እንዲህ ብለህ ልትመልስለት ትችላለህ፦ «ስለ እግዚአብሔር ቸርነት ከመጽሐፍ ቅዱስ ከምንማረው በቀር ምንም አናውቅም፤ ስለዚህ የእግዚአብሔር ቸርነት ምን ዓይነት እንደ ሆነ ለማወቅ ወደዚያው መጽሐፍ መሄድ አለብን። እስቲ ሮሜ 2:2፣ 4፣ 5ን እንመልከት።» ቍጥሮቹን ካነበብህ በኋላ እንዲህ የመሰለ ነገር ልትለው ትችላለህ፦ «እንግዲህ ወዳጄ ሆይ፣ የእግዚአብሔር ቸርነት ዓላማው ወደ ንስሐ እንዲመራህ እንጂ በኃጢአት እንድትቀጥል ሊያበረታታህ እንዳልሆነ ታያለህ፤ ቸርነቱን ስንረግጥ ግን የእግዚአብሔር ቅን ፍርድ በሚገለጥበት በቍጣ ቀን ቍጣን በራሳችን ላይ እናከማቻለን።» ዮሐንስ 8:21፣ 24 እና 3:36 እግዚአብሔር ምንም ያህል ቸር ቢሆን ልጁን የሚጥሉትን ሁሉ እንደሚጥል ለሰውየው ያሳዩታል። እነዚህን ሰዎች የምንይዝበት ሌላም መንገድ አለ፤ ይኸውም ሰዎችን የሚኰንናቸው እግዚአብሔር ከመሆኑ ይልቅ፣ ወደ ክርስቶስ መጥተው በነጻ የቀረበላቸውን ሕይወት ለመቀበል ስለማይወዱ የእግዚአብሔር ቸርነት እያለ ራሳቸውን የሚኰንኑት ሰዎቹ ራሳቸው እንደ ሆኑ ከዮሐንስ 5:40፤ 2ኛ ጴጥሮስ 3:9-11 ወይም ሕዝቅኤል 33:11 ማሳየት ነው። እንዲህ ልትል ትችላለህ፦ «እግዚአብሔር ማንም እንዲጠፋ አይወድም፤ ሕይወትንም በነጻ ያቀርብልሃል፤ ነገር ግን በመንገዱ ላይ አንድ እንቅፋት አለ። እንቅፋቱ ምን እንደ ሆነ ለማየት ወደ ዮሐንስ 5:40 እንሂድ።» ከዚያም ክፍሉን አንብብ፦ «ሕይወት እንዲሆንላችሁ ወደ እኔ ልትመጡ አትወዱም»፤ እንዲህም በለው፦ «ወዳጄ ሆይ፣ እንቅፋቱ ይህ ነው፤ ልትመጣ አትወድም። ሕይወት በነጻ ቀርቦልሃል፤ ነገር ግን ልትቀበለው ካልወደድህ መጥፋትህ አይቀርም።» 2ኛ ጴጥሮስ 2:4-6፣ 9፤ ሉቃስ 13:3 «ቸሩ» እግዚአብሔር በኃጢአት በሚጸኑ ሰዎች ላይ እንዴት እንደሚያደርግ ያሳያሉ። ይህ የመጨረሻው ክፍል አንዳንድ ጊዜ እንዲህ ባለ መንገድ በውጤታማነት ሊሠራበት ይችላል፦ «እግዚአብሔር ማንንም ለመኰነን እጅግ ቸር ነው ትላለህ። እስቲ አሁን እግዚአብሔር ራሱ በቃሉ ምን እንደሚል እንመልከት።» ከዚያም ወደ ክፍሉ ዞረህ «ንስሐ ባትገቡ ሁላችሁ እንዲሁ ትጠፋላችሁ» የሚለውን አንብብለት። ቃሉ ልቡ ውስጥ ጠልቆ እስኪገባ ድረስ ክፍሉን ደጋግመህ ንገረው።

3. የሐሰት ተስፋ ከያዙት ሦስተኛው ክፍል «ክርስቲያን ለመሆን እየሞከርሁ ነው» የሚሉ ሰዎች ናቸው። ዮሐንስ 1:12 እግዚአብሔር ከእኛ የሚፈልገው ክርስቲያን ለመሆን «መሞከርን»፣ ወይም የተሻለ ኑሮ ለመኖር «መሞከርን»፣ ወይም እርሱ የሚጠይቀንን ማንኛውንም ነገር ለማድረግ «መሞከርን» ሳይሆን፣ ሁሉን የፈጸመውን ኢየሱስ ክርስቶስን በቀላሉ መቀበልን ብቻ እንደ ሆነ ያሳያቸዋል፤ ጠያቂውንም «አሁን መሞከርህን ትተህ ኢየሱስን በቀላሉ አዳኝህ አድርገህ ትቀበለዋለህን?» ብለህ ልትጠይቀው ትችላለህ። የሐዋርያት ሥራ 16:31 እግዚአብሔር የምንችለውን ለማድረግ እንድንሞክር ሳይሆን በኢየሱስና እርሱ ባደረገውና በሚያደርገው እንድንታመን እንደሚጠይቀን ያሳያል። ሮሜ 3:23-25 የምንጸድቀው ለማድረግ በመሞከር ሳይሆን፣ በእምነት ብቻ በሆነው ቀላል ቅድመ ሁኔታ «በኢየሱስ ክርስቶስም በሆነው ቤዛነት በኩል እንዲያው በጸጋው» እንደ ሆነ ያሳያል።

4. የሐሰት ተስፋ ከያዙት ሌላው ክፍል ደግሞ እንዲህ የሚሉ ሰዎች ናቸው፦ «ወደ ሰማይ እንደምሄድ ይሰማኛል»፣ ወይም «እንደ ዳንሁ ይሰማኛል»። ጉዳዩ የሚሰማቸው ነገር ሳይሆን እግዚአብሔር የሚለው ነገር እንደ ሆነ ከዮሐንስ 3:36 አሳያቸው፤ እግዚአብሔርም በቃሉ በግልጽ የሚለው «በልጁ የማያምን ግን የእግዚአብሔር ቍጣ በእርሱ ላይ ይኖራል እንጂ ሕይወትን አያይም» የሚል ነው። አንድ ቀን ከሰዓት በኋላ ከጥቂት ሳምንታት በፊት አንድያ ልጅዋን ካጣች አንዲት ሴት ጋር እነጋገር ነበር። ልጅዋ በሞተበት ጊዜ በነገሩ በጥልቅ ተነክታ ነበር፤ አሁን ግን ያ የከበደ ስሜቷ በአብዛኛው ለቅቋት ነበር። እኔም «ትንሹ ልጅሽ ወደ ሄደበት መሄድ አትፈልጊምን?» ብዬ ጠየቅኋት። እርሷም ወዲያው «እሄዳለሁ ብዬ እጠብቃለሁ» ብላ መለሰች። «እንደምትሄጂ እንድታስቢ ያደረገሽ ምንድን ነው?» አልኋት። እርሷም «እንደዚያ ይሰማኛል፤ ስሞት ወደ ሰማይ እንደምሄድ ይሰማኛል» ብላ መለሰች። ከዚያም ስትሞት ወደ ሰማይ እንደምትሄድ እንድታምን ምክንያት የሚሰጣት፣ ከእግዚአብሔር ቃል ልታመለክተው የምትችለው አንዳች ነገር ይኖር እንደ ሆነ ጠየቅኋት። «የለም» አለች፤ «ምንም የለም።» ከዚያም ዞር ብላ እኔን ጠየቀችኝ፦ «አንተስ ስትሞት ወደ ሰማይ እሄዳለሁ ብለህ ትጠብቃለህን?» «አዎን» ብዬ መለስሁ፤ «እንደምሄድ አውቃለሁ።» «እንዴት ታውቃለህ?» አለች። «ለዚህ ከእግዚአብሔር ያገኘኸው ቃል አለህን?» «አዎን» ብዬ መለስሁ፤ ወደ ዮሐንስ 3:36ም መራኋት። በዚህ ሁኔታ በስሜቷ ላይ በተመሠረተ እምነትና በእግዚአብሔር ቃል ላይ በተመሠረተ እምነት መካከል ያለውን ልዩነት ለማየት ቻለች።

ሉቃስ 18:9-14ንም በሚከተለው መንገድ መጠቀም ይቻላል፤ እንዲህ ልትል ትችላለህ፦ «በመጽሐፍ ቅዱስ ውስጥ ሁሉ ነገሩ ትክክል እንደ ሆነ የተሰማው፣ ነገር ግን ሁሉ ነገሩ የተሳሳተ የነበረ አንድ ሰው አለ። ስለ እርሱ ላንብብልህ።» ከዚያም ሁሉ ነገሩ ትክክል እንደ ሆነ እርግጠኛ ስለ ነበረው፣ ነገር ግን በዚያው ጊዜ ሁሉ ይቅር ያልተባለ ኃጢአተኛ ስለ ነበረው ፈሪሳዊ አንብብ፤ ጠያቂውም ስሜታችን ምን ያህል የማይታመን እንደ ሆነና የማረጋገጫው መሠረት ምን እንደ ሆነ፣ ማለትም የእግዚአብሔር ቃል እንደ ሆነ እንዲያይ አድርግ። ምሳሌ 14:12 ደግሞ «ለሰው ቅን የምትመስል መንገድ አለች፤ ፍጻሜዋ ግን የሞት መንገድ ናት» የሚለውን በማሳየት ሊሠራበት ይችላል።

5. የሐሰት ተስፋ ከያዙት የመጨረሻው ክፍል የኃጢአት ኑሮ እየኖሩ ሳሉ ድነናል የሚሉ ሰዎች ናቸው። ለብዙ ዓይነት ኃጢአቶች የሚጠቅም መልካም ክፍል 1ኛ ቆሮንቶስ 6:9-10 ነው። 1ኛ ዮሐንስ 2:29 ደግሞ በብዙ ሁኔታዎች ይህን የሐሰት ተስፋ ጠራርጎ ያስወግዳል። 1ኛ ዮሐንስ 5:4-5 በእውነት ከእግዚአብሔር የተወለደ ዓለምን እንደሚያሸንፍ በማሳየት ይጠቅማል፤ እነዚህ ሰዎች በኃጢአት እየኖሩ ዓለምን አለማሸነፋቸውም ከእግዚአብሔር እንዳልተወለዱ ማስረጃ ነው።