ከእልኸኞችና ከተታለሉ ሰዎች ጋር መነጋገር

1. እልኸኞች

እልኸኞች ብዙ ዓይነት ናቸው። ለምሳሌ «እንድታነጋግረኝ አልፈልግም» የሚሉ አሉ። በእንዲህ ያለ ሁኔታ አብዛኛውን ጊዜ ልብን የሚወጋ አንድ የመጽሐፍ ቅዱስ ክፍል ሰጥቶ ቃሉ ራሱ እንዲናገር መተውና ከዚያም ሰውየው በዚያ ላይ እንዲያሰላስል ብቻውን መተው ይሻላል። ሮሜ 6:23፤ ዕብራውያን 10:28-29፤ ዕብራውያን 12:25፤ ማርቆስ 16:16፤ ምሳሌ 29:1 እና ምሳሌ 1:24-33 ለዚህ ዓላማ መልካም የሆኑ ክፍሎች ናቸው።

ደግሞም «ይቅር ማለት አልችልም» የሚሉ አሉ። ይቅር ማለት እንዳለባቸው፣ አለዚያ እንደሚጠፉ ስለሚያሳዩ ማቴዎስ 6:15 እና 18:23-35 ለመጠቀም መልካም ናቸው። ፊልጵስዩስ 4:13 እና ሕዝቅኤል 36:26 ደግሞ እንዴት ይቅር ማለት እንደሚችሉ ያሳዩአቸዋል። ይቅር የማይል መንፈስ ከክርስቶስ ያራቃቸው እጅግ ብዙ ሰዎች አሉ። አንዳንድ ጊዜ ሰውየው ተንበርክኮ እንዲጸልይና ይቅር የማይለውን መንፈሱን እግዚአብሔር እንዲያስወግድለት እንዲለምን በማድረግ ይህን ችግር ማስወገድ ይቻላል። በአንድ ወቅት በኃጢአቷ ጥልቅ ወቀሳ ውስጥ የነበረችን፣ ነገር ግን የበደላትን አንድ ሰው በልቧ በመጥላቷ ክርስቶስን ከመቀበል የተከለከለችን አንዲት ጠያቂ ለረጅም ጊዜ አስረዳኋት። ይቅር ማለት እንደማትችል አጥብቃ ትናገር ነበር። በመጨረሻም፦ «እንንበርከክና ስለዚህ ጉዳይ ለእግዚአብሔር እንንገረው» አልኋት። በዚህ ተስማማች፤ ገና እንደ ተንበረከክንም እንባዋ እንደ ጎርፍ ፈሰሰ፤ ችግሩ ተወገደ፤ ወዲያውም ክርስቶስን ተቀበለች።

ደግሞም «ዓለምን እጅግ እወዳለሁ» የሚሉ አሉ። ለዚህ ወገን የሚጠቀሙበት ዋነኛው ጥቅስ ማርቆስ 8:36 ነው። ሉቃስ 14:33 ዓለምን መተው ፍጹም አስፈላጊ መሆኑን ያሳያል። ሉቃስ 12:16-20፤ 1ኛ ዮሐንስ 2:15-17 ዓለምን አጥብቆ መያዝ ምን ያህል ሞኝነት እንደ ሆነ ያሳያሉ፤ መዝሙር 84:11 እና ሮሜ 8:32 ደግሞ ጌታ ምንም መልካም ነገር እንደማይከለክላቸው ያሳያሉ።

«የሠራሁትን በደል አምኜ መቀበል አልችልም» የሚሉ አሉ። ምሳሌ 28:13 በደሉ ካልታመነ በስተቀር የሚከተለው ጉስቁልናና ወዮታ የማይቀር መሆኑን ያሳያል። ሌሎች ደግሞ «በሰው ፊት በይፋ መመስከር አልፈልግም» ይላሉ። ሮሜ 10:10፤ ማቴዎስ 10:32-33 እግዚአብሔር ከዚህ ሌላ ምንም እንደማይቀበል ያሳያሉ። ማርቆስ 8:38፤ ዮሐንስ 12:42-43 እና ምሳሌ 29:25 በይፋ አለመመስከር ያለውን አደጋ ያሳያሉ። «የራሴን መንገድ መከተል እፈልጋለሁ» የሚሉ አሉ። ኢሳይያስ 55:8-9 የእግዚአብሔር መንገድ ምን ያህል የተሻለ እንደ ሆነ ያሳያል፤ ምሳሌ 14:12 ደግሞ የራሳችንን መንገድ መከተል የሚያስከትለውን ውጤት ያሳያል። በመጨረሻም «ክርስቶስን አልቀበለውም፤ አልጥለውምም» የሚሉ አሉ። ማቴዎስ 12:30 ከሁለቱ አንዱን ማድረግ እንዳለባቸው ያሳያል። ይህ ቁጥር እጅግ ብዙ ሰዎችን ለኃጢአታቸው እንዲወቀሱ አድርጓል።

2. የተታለሉ

ሀ. በዚህ ርዕስ ሥር የሮማ ካቶሊክ ምእመናን ይገኛሉ። ከሮማ ካቶሊክ ምእመን ጋር ለመነጋገር መልካም የሆነው መንገድ ዳግመኛ መወለድ አስፈላጊ መሆኑንና ዳግመኛ መወለድ ምን እንደ ሆነ ማሳየት ነው። ዮሐንስ 3:3፣ 5፣ 7 ዳግመኛ መወለድ አስፈላጊ መሆኑን ያሳያል። ዳግመኛ መወለድ ምን እንደ ሆነ በሕዝቅኤል 36:25-27፤ በ2ኛ ቆሮንቶስ 5:17፤ በ2ኛ ጴጥሮስ 1:4 ተገልጧል። ብዙ የሮማ ካቶሊክ ምእመናን ዳግመኛ መወለድ ማለት ጥምቀት እንደ ሆነ ያስባሉ፤ ነገር ግን በዚያ የተጠቀሰው አነጋገር ከጥምቀት ጋር እንደማይስማማ በቀላሉ ማሳየት ይቻላል። ከዚህም በላይ ጳውሎስ በ1ኛ ቆሮንቶስ 4:15 በቆሮንቶስ ለነበሩት ክርስቲያኖች በወንጌል እንደ ወለዳቸው ይነግራቸዋል። ዳግመኛ መወለድ ጥምቀት ማለት ቢሆን ኖሮ እርሱ አጥምቋቸው መሆን ነበረበት፤ ነገር ግን በ1ኛ ቆሮንቶስ 1:14 እንዳላጠመቃቸው ይናገራል። የሐዋርያት ሥራ 8:13፣ 21፣ 23 አንድ ሰው ተጠምቆ ሳለ ልቡ ግን «በእግዚአብሔር ፊት የቀና» ላይሆን እንደሚችልና በዚህም «ከዚህ ነገር ዕድል ወይም ፈንታ» እንደሌለው ያሳያል። አንድ እርምጃ ወደፊት ሄዶ ዳግመኛ የመወለድ ማስረጃዎች ምን እንደ ሆኑ ለጠያቂው ማሳየት መልካም ነው። 1ኛ ዮሐንስ 2:29፤ 3:9፣ 14-17፤ 5:1፣ 4 ዳግመኛ የመወለድን መጽሐፍ ቅዱሳዊ ማስረጃዎች ይሰጣሉ። ቀጥሎ የሚነሣው ጥያቄ «ዳግመኛ መወለድ የሚቻለው እንዴት ነው?» የሚለው ነው። ለዚህ ጥያቄ መልሱ በዮሐንስ 1:12፤ በ1ኛ ጴጥሮስ 1:23፤ በያዕቆብ 1:18 ተሰጥቷል።

የንስሐንና የመለወጥን አስፈላጊነት ስለሚያሳይ የሐዋርያት ሥራ 3:19 ከሮማ ካቶሊክ ምእመናን ጋር ለመጠቀም መልካም ጥቅስ ነው። ንስሐ ምን እንደ ሆነ ኢሳይያስ 55:7፤ ዮናስ 3:10 ያሳያሉ። ከሮማ ካቶሊክ ምእመናን ጋር ለመነጋገር ሌላው መንገድ ደግሞ የዘላለም ሕይወት እንዳለው ማወቅ የአማኙ መብት መሆኑን ማሳየት ነው። የሮማ ካቶሊክ ምእመናን ሁልጊዜ ማለት ይቻላል የመዳን ማረጋገጫ የላቸውም። ይቅር እንደ ተባሉ አያውቁም፤ ነገር ግን አንድ ቀን ይቅር እንደሚባሉ ተስፋ ያደርጋሉ። ይቅር እንደ ተባልንና የዘላለም ሕይወት እንዳለን ማወቅ እንደምንችል ብታሳያቸው፣ በብዙዎቻቸው ውስጥ ይህን ማረጋገጫ የማግኘት ምኞት ይቀሰቅሳል። 1ኛ ዮሐንስ 5:13 ማወቅ የአማኙ መብት መሆኑን ያሳያል። የሐዋርያት ሥራ 13:38-39፤ 10:43፤ ዮሐንስ 3:36 ወደዚህ ማረጋገጫ ለመምራት እጅግ ጠቃሚ ናቸው። ከእነርሱ ጋር ለመነጋገር ሌላው መንገድ ደግሞ (ነገር ግን ከእነርሱ ጋር የተወሰነ እድገት እስክታደርግ ድረስ ባትጠቀምበት ይሻላል) መጽሐፍ ቅዱስን ማጥናት ያለውን ጥቅም ማሳየት ነው። ለዚህ ዓላማ መልካም የሆኑ ጥቅሶች ዮሐንስ 5:39፤ 1ኛ ጴጥሮስ 2:1-2፤ 2ኛ ጢሞቴዎስ 3:13-17፤ ያዕቆብ 1:21-22፤ መዝሙር 1:1-2፤ ኢያሱ 1:8፤ ማርቆስ 7:7-8፣ 13፤ ማቴዎስ 22:29 ናቸው። ከ1ኛ ጴጥሮስ 2:1-2 በቀር እነዚህ ጥቅሶች ሁሉ በ«ዱዌ» ማለትም በሮማ ካቶሊክ መጽሐፍ ቅዱስ ውስጥ በፕሮቴስታንት መጽሐፍ ቅዱስ ውስጥ እንዳሉት ከሞላ ጎደል አንድ ናቸው፤ ከካቶሊክ ምእመን ጋር ስትነጋገርም ብዙ ጊዜ የካቶሊክን መጽሐፍ ቅዱስ መጠቀም መልካም ነው።

ከሮማ ካቶሊክ ምእመን ጋር ለመነጋገር ሌላው መንገድ ደግሞ ንስሐ ካልገባ ኃጢአተኛ ጋር ስትነጋገር የምትጠቀምበትን መንገድ መጠቀም ነው—ይኸውም ኃጢአተኛ መሆኑንና ክርስቶስ እንደሚያስፈልገው እንዲሰማው ማድረግ ነው። ለዚህ ዓላማ ማቴዎስ 22:37-38፤ ገላትያ 3:10፣ 13፤ ኢሳይያስ 53:6ን ተጠቀም።

ብዙ ሰዎች ከሮማ ካቶሊክ ምእመናን ጋር መነጋገር ጥቅም እንደሌለውና ወደ ክርስቶስ ሊመጡ እንደማይችሉ ያስባሉ። ይህ ታላቅ ስሕተት ነው። ብዙዎቹ በሮማ ካቶሊክ ቤተ ክርስቲያን ውስጥ ያላገኙትን አንድ ነገር ይናፍቃሉ፤ ያንንም እንዴት እንደሚያገኙት ከእግዚአብሔር ቃል ብታሳያቸው በቀላሉ ይመጣሉ፤ እጅግ ትጉ ክርስቲያኖችም ይሆናሉ። የሮማ ካቶሊክን ቤተ ክርስቲያን አታጥቃ። እውነቱን ስጣቸው፤ ስሕተቶቹም ከጊዜ በኋላ በራሳቸው ይወገዳሉ። ብዙ ጊዜ ጥቃታችን የሚገልጠው የራሳችንን አላዋቂነት ብቻ ነው።

ከሮማ ካቶሊክ ምእመን ጋር ስንነጋገር ሁልጊዜ ብልጫ የምናገኝበት አንድ ነጥብ አለ፤ ይኸውም እኛ በምናውቀው ክርስትና ውስጥ እነርሱ በሚያውቁት ክርስትና ውስጥ የሌለ ሰላምና ኃይል መኖሩ ነው፤ እነርሱም ልዩነቱን ይገነዘባሉ።

ለ. አይሁድ። ከአይሁዳዊ ጋር ለመነጋገር ከሁሉ የተሻለው መንገድ የገዛ መጽሐፍ ቅዱሱ ወደ ክርስቶስ እንደሚያመለክት ማሳየት ነው። ለመጠቀም ከሁሉ ይበልጥ የሚረዱት ክፍሎች ኢሳይያስ 53፤ ዳንኤል 9:26፤ ዘካርያስ 12:10 ናቸው። በአዲስ ኪዳንም ጠቃሚ ክፍሎች አሉ፤ የዕብራውያን መጽሐፍ በሙሉ፣ በተለይም ምዕራፍ 9 እና 10 እንዲሁም ምዕራፍ 7 ከቁጥር 25 እስከ 28፣ የማቴዎስ ወንጌልም በሙሉ። በዛሬው ጊዜ እጅግ ብዙ አይሁድ የናዝሬቱ ኢየሱስ የሚናገራቸውን ነገሮች እየመረመሩ ነው፤ በዚህ ጉዳይም ለመቅረብ ልባቸው ክፍት ነው። አይሁዳዊው ክርስቲያን መሆኑን በግልጽ እንዳይገልጥ የሚያግደው ትልቁ ችግር ይህን ቢያደርግ የሚደርስበት አስፈሪ ስደት ነው። ይህን ችግር «ስደትን የሚፈሩ ሰዎች» በሚለው ርዕስ ሥር ቀደም ብለው በተሰጡት ክፍሎች መፍታት ይቻላል።

(ማስታወሻ፦ ለአይሁድ የሚሆኑ በርካታ መልካም በራሪ ጽሑፎች ከማይልድሜይ የአይሁድ ሚስዮን፣ 79 ማይልድሜይ ሮድ፣ ለንደን ማግኘት ይቻላል።)

ሐ. መናፍስት ጠሪዎች። ዘሌዋውያን 19:31፤ 20:6፤ ዘዳግም 18:10-12፤ 2ኛ ነገሥት 21:1-2፣ 6፤ 1ኛ ዜና መዋዕል 10:13፤ ኢሳይያስ 8:19-20፤ 1ኛ ዮሐንስ 4:1-3፤ 2ኛ ተሰሎንቄ 2:9-12 ለዚህ ወገን የሚጠቅሙ ክፍሎች ናቸው።

ከተታለሉ ሰዎች ሁሉ ጋር ስንነጋገር በዮሐንስ 7:17 መጀመርና እውነትን ለማወቅ ከልብ ወደሚመኙበት ደረጃ ማድረስ መልካም ነው። ሰው እውነትን ለማወቅ ካልተመኘ ከተታለለበት ነገር የማውጣት ተስፋ የለም።