ውሳኔያቸውን ለሌላ ጊዜ ማስተላለፍ ከሚፈልጉ ሰዎች ጋር መነጋገር

1. ውሳኔያቸውን ለሌላ ጊዜ ማስተላለፍ የሚፈልጉ ሰዎች በብዙ ወገን ይከፈላሉ። ከእነዚህም ከሁሉ የሚበልጠው ወገን «መጠበቅ እፈልጋለሁ»፣ ወይም «ዛሬ ማታ አይሆንም»፣ ወይም «አስብበታለሁ»፣ ወይም «ነገ ማታ እመጣለሁ» ወይም ይህን የመሰለ ነገር የሚሉ ሰዎች ናቸው። ኢሳይያስ 55:6ን ተጠቀም። ጠያቂው ክፍሉን ካነበበ በኋላ ጌታን መፈለግ ያለበት መቼ እንደ ሆነ ጠይቀው፤ «ልታገኙት ስትችሉ» ብሎ ሲመልስልህም ያ ጊዜ መቼ እንደ ሆነ ጠይቀውና ነገሩን በልቡ ውስጥ አስርጽበት። ዛሬ ባይፈልገው ነገ እንደሚያገኘው እርግጠኛ መሆኑን ጠይቀው። ወይም ምሳሌ 29:1ን ልትጠቀም ትችላለህ። ይህን ቁጥር ካነበበ በኋላ የምታነጋግረውን ሰው «ብዙ ጊዜ እየተገሠጸ አንገቱን የሚያደነድን» ሰው ምን እንደሚሆን መጠየቅ መልካም ነው፤ «ይጠፋል» ብሎ ሲመልስልህ እንዴት እንደሚጠፋ ጠይቀው፤ «በድንገት» ብሎ ሲመልስልህም ይህን አደጋ ለመጋፈጥ ፈቃደኛ መሆኑን ጠይቀው። ወይም ማቴዎስ 25:10-12ን ልትጠቀም ትችላለህ። ወደ ሰርጉ የገቡት እነማን እንደ ነበሩ ጠይቀው፤ «ተዘጋጅተው የነበሩት» ብሎ ሲመልስልህም እርሱ ራሱ ተዘጋጅቶ እንደ ሆነ ጠይቀው። ከዚያም ተዘጋጅተው የነበሩት ከገቡ በኋላ ምን እንደ ሆነ ጠይቀው። ከዚያም «ያልተዘጋጁት» የት እንደ ነበሩ ጠይቀው። ከዚያም፦ «አንተ በውጭ ለመቅረት ፈቃደኛ ነህን?» ብለህ ጥያቄውን በፊቱ አቅርብለት። ወይም ሉቃስ 12:19-20ን ልትጠቀም ትችላለህ። ይህ ሰው ለምን ያህል ጊዜ የሚበቃ ዝግጅት ያደረገ መስሎት እንደ ነበረ ጠያቂውን ጠይቀው። ከዚያም፦ «እግዚአብሔር ዛሬ ማታ ቢጠራህ ዝግጁ ትሆናለህን?» ብለህ ጠይቀው። «ገና ዝግጁ አይደለሁም» የሚሉትን ሰዎች ለማነጋገር ማቴዎስ 24:44 በተለይ ውጤታማ ነው። 1ኛ ነገሥት 18:21ንም በመልካም ውጤት መጠቀም ይቻላል። ይህን ቁጥር ለመጠቀም እጅግ ጥሩ የሆነው መንገድ፣ ሰውየውን ምንም ቢመጣ በምንም ሁኔታ ክርስቶስን የመቀበል አጋጣሚ ሳያገኝ አንድ ዓመት ሙሉ ለመጠበቅ ፈቃደኛ መሆኑን መጠየቅ ነው። «አይሆንም፤ በዓመት ውስጥ ልሞት እችላለሁ» ብሎ ሲመልስልህ፣ አንድ ወር ለመጠበቅ ፈቃደኛ መሆኑን ጠይቀው። ከዚያም ወደ አንድ ሳምንት፣ በመጨረሻም ወደ አንድ ቀን ዝቅ አድርገህ፣ እግዚአብሔርና መንፈስ ቅዱስ ክርስቲያኖችም ሁሉ ለአንድ ቀን እንዲተዉትና በዚያ ቀን በምንም ሁኔታ ክርስቶስን የመቀበል አጋጣሚ እንዳይኖረው ይወድ እንደ ሆነ ጠይቀው። አስተዋይ የሆነ ሰው ሁሉ ማለት ይቻላል «አልወድም» ይላል። እንግዲያውስ ነገሩ እንዲህ ከሆነ ክርስቶስን ወዲያውኑ ቢቀበል እንደሚሻለው ንገረው። ይህን ዘዴ በመጀመሪያ የተጠቀመበት ዶክተር ቻልመርስ ነበር፤ ከእርሱም በኋላ ብዙዎች በታላቅ ስኬት ተከትለውታል። ምሳሌ 27:1፤ ያዕቆብ 4:13-14፤ ኢዮብ 36:18፤ ሉቃስ 13:24-28፤ 12:19-20፤ ዮሐንስ 8:21፤ 12:35፤ 7:33-34ም ለዚህ ወገን ሊጠቅሙ ይችላሉ።

2. «አስቀድሜ ሥራዬን ማደላደል አለብኝ፤ ከዚያ በኋላ ክርስቲያን እሆናለሁ»፣ ወይም «አስቀድሜ ሌላ ነገር ማድረግ አለብኝ» የሚሉ። በእንዲህ ያሉ ሁኔታዎች የሚጠቀሙበት ዋነኛው ክፍል ማቴዎስ 6:33 ነው፤ «አስቀድማችሁ የእግዚአብሔርን መንግሥት ጽድቁንም ፈልጉ» ተብሎ እንደ ተጻፈ የእግዚአብሔርን መንግሥት አስቀድመን መፈለግ እንዳለብን ያሳያልና።

3. «የእግዚአብሔርን ጊዜ እየጠበቅሁ ነው» የሚሉ። አንድ ሰው ይህን ቢል፣ የእግዚአብሔር ጊዜ መቼ እንደ ሆነ ብታሳየው በእግዚአብሔር ጊዜ ክርስቶስን ይቀበል እንደ ሆነ ጠይቀው። ከዚያም ወደ 2ኛ ቆሮንቶስ 6:2 ወይም ወደ ዕብራውያን 3:15 ውሰደው።

4. «ገና ልጅ ነኝ»፣ ወይም «ዕድሜዬ ከፍ እስኪል ድረስ መጠበቅ እፈልጋለሁ» የሚሉ። ለእነዚህ መክብብ 12:1 ከበቂ በላይ መልስ ነው። ማቴዎስ 19:14 እና 18:3ም ለመጠቀም መልካም ክፍሎች ናቸው፤ ወደ ክርስቶስ ለመምጣት ከሁሉ የተሻለው ጊዜ የወጣትነት ዘመን መሆኑን፣ ሽማግሌዎች ቢሆኑም እንኳ ሰዎች ሁሉ ወደ መንግሥተ ሰማያት ከመግባታቸው በፊት እንደ ሕፃናት መሆን እንዳለባቸው ያሳያሉና። ውሳኔያቸውን ወደፊት ለሚመጣ ጊዜ ማስተላለፍ ከሚፈልጉ ሰዎች ጋር ስንነጋገር፣ ክርስቶስ ምን ያህል እንደሚያስፈልጋቸው በልባቸው ውስጥ ክርስቶስን መቀበልን ለማዘግየት ፈቃደኛ እስከማይሆኑ ድረስ ጥልቅ ስሜት እስኪያድርባቸው «ግድ ለሌላቸው» የተሰጡትን ክፍሎች መጠቀም ብዙ ጊዜ ጥበብ ነው።

ከላይ በ«1» ሥር ካሉት ጋር ስንነጋገር፣ አንድ ክፍል ብቻ መጠቀምና ያንኑ ደጋግሞ በማንሣት በልባቸው ውስጥ ማስረጽ ከሁሉ ይሻላል። አንድ ምሽት ለጉዳዩ በጣም የተሳበ ነገር ግን «ዛሬ ማታ መወሰን አልችልም» ማለቱን ያልተወ አንድ ሰው እያነጋገርሁ ነበር። ምሳሌ 29:1ን ጠቀስሁለት። ለሰጠኝ መልስ ሁሉ ወደዚሁ ክፍል እመለስ ነበር። ሰውየው ክርስቶስ እንደሚያስፈልገው ብቻ ሳይሆን የማዘግየትን አደጋና ፈጥኖ የመወሰንን አስፈላጊነት እስኪሰማው ድረስ በንግግራችን ውስጥ ያን ክፍል እጅግ ብዙ ጊዜ ደጋግሜ ሳልጠቅስ አልቀረሁም። ከዚያ ክፍል ለመሸሽ ሞከረ፤ እኔ ግን በዚህች አንዲት ነጥብ ላይ ያዝሁት። ክፍሉ ከእርሱ ጋር ቀረ፤ በእግዚአብሔርም መግቦት ይበልጥ ጎላ፤ በዚያችው ምሽት ጥቃት ደርሶበት ክፉኛ ቆሰለ፤ በማግሥቱም ምሽት ጭንቅላቱን በፋሻ ተጠቅልሎ መጥቶ ክርስቶስን ተቀበለ። የመጽሐፍ ቅዱስ ቃል በአእምሮው ውስጥ ተደጋግሞ ባይመታ ኖሮ፣ ከአጥቂው የደረሰበት ድብደባ ምናልባት እምብዛም ባልጠቀመው ነበር።