ዕብራውያን 11

ዕብራውያን 11 የእምነት ጀግኖች ዝርዝር ሆኖ ያልተጻፈልን ከሆነ ዓላማው ምንድር ነው? የቅዱሳት መጻሕፍት ሁሉ ደራሲ የሆነው መንፈስ ቅዱስ ይህን ምዕራፍ በዚህ ስፍራ ያኖረው ለምንድር ነው?

መጽሐፍ ቅዱስን በመተርጐም ረገድ በሁሉም ጉዳይ እንደምናደርገው የጽሑፉን ዐውድ ማጤን ያስፈልገናል። እስከ ዕብራውያን 10:18 ድረስ ጸሐፊው ስለ ብሉይ ኪዳን ቃል ኪዳን፣ ሕግ፣ ቤተ መቅደስና መሥዋዕቶች ሥርዓቶችና ዓላማዎች ሲጽፍ ቆይቷል። እነዚህም በክርስቶስ ከሚገኙት ከተሻሉ ነገሮች ጋር ይነጻጸራሉ።

የተሻለ መዳን (ዕብራውያን 2)፣ የተሻለ ሕግ ሰጪ (ዕብራውያን 3)፣ የተሻለ ዕረፍት (ዕብራውያን 4)፣ የተሻለ ሊቀ ካህናት (ዕብራውያን 5)፣ የተሻለ ቃል ኪዳን (ዕብራውያን 8)፣ የተሻለ የተስፋ ቃል (ዕብራውያን 8) እና የተሻለ መሥዋዕት (ዕብራውያን 9) አለን።

ከዕብራውያን 10:19 ጀምሮ ጸሐፊው አዲስ ጭብጥ ያስተዋውቃል።

«እንግዲህ፥ ወንድሞች ሆይ፥ በኢየሱስ ደም ወደ ቅድስት ለመግባት ድፍረት ስላለን… በተረዳንበት እምነት በቅን ልብ እንቅረብ… እንዳይነቃነቅ የተስፋችንን ምስክርነት እንጠብቅ… ለፍቅርና ለመልካምም ሥራ እንድንነቃቃ እርስ በርሳችን እንተያይ» (ዕብራውያን 10:19፣ 22-24)።

አሁን የሚጽፈው በክርስቶስ የሚገኙትን «የተሻሉ ነገሮች» የተለማመዱ ሰዎች መገለጫ ሊሆን የሚገባውን የአኗኗር ዘይቤ አጽንኦት ለመስጠት ነው።

«ነገር ግን ብርሃን ከበራላችሁ በኋላ በብዙ መከራ ትግል የታገሣችሁበትን የቀደመውን ዘመን አስቡ… እንግዲህ ታላቅ ብድራት ያለውን ድፍረታችሁን አትጣሉ። የእግዚአብሔርን ፈቃድ አድርጋችሁ የተሰጣችሁን የተስፋ ቃል እንድታገኙ መጽናት ያስፈልጋችኋልና።

‹ገና በጣም ጥቂት ጊዜ ነው፥ ሊመጣ ያለውም ይመጣል አይዘገይምም፤ ጻድቅ ግን በእምነት ይኖራል ወደ ኋላም ቢያፈገፍግ፥ ነፍሴ በእርሱ ደስ አይላትም።› እኛ ግን ነፍሳቸውን ሊያድኑ ከሚያምኑቱ ነን እንጂ ወደ ጥፋት ከሚያፈገፍጉ አይደለንም» (ዕብራውያን 10:32፣ 35-39)።

የሚቀጥለው ምዕራፍ የተጻፈው «በእምነት መኖርን» የሚያሳዩ ምሳሌዎችን ሊሰጠን ነው። ካሌብ፣ ኤልሳዕና ዳንኤል አለመጠቀሳቸው፣ ሙሴ (ነፍሰ ገዳይ)፣ ሣራ (በእግዚአብሔር የተስፋ ቃል የሳቀች) እና ረዓብ (ውሸታም) ግን መጠቀሳቸው ትኩረትን ይስባል። በእምነት ለመመላለስ መንፈሳዊ ግዙፍ መሆን አያስፈልግም። ማንም ሰው፣ የመንፈሳዊ ብስለቱ ደረጃ ምንም ይሁን ምን፣ ይህን በእምነት የመመላለስ አስደሳች ጕዞ ዛሬውኑ ሊጀምር ይችላል፤ ያለ እምነት ደግሞ እግዚአብሔርን ደስ ማሰኘት አይቻልም። ይህም ሌላው የእግዚአብሔር አስደናቂ ጸጋ ምሳሌ ነው!

«እምነትም ተስፋ ስለምናደርገው ነገር የሚያስረግጥ፥ የማናየውንም ነገር የሚያስረዳ ነው» (ዕብራውያን 11:1)። ቁጥር አንድን የእምነት ትርጕም፣ ስጦታና ፍሬ አድርገን ቀደም ብለን ተመልክተነዋል።

«ለሽማግሌዎች የተመሰከረላቸው በዚህ ነውና» (ዕብራውያን 11:2)። በእምነት የተመላለሱ የጥንት ወንዶችና ሴቶች መልካም ምስክርነት፣ መልካም ስም ነበራቸው። ሌሎች ሰዎች ተመልክተዋቸው እነዚህ ሰዎች ከእግዚአብሔር ጋር እንደሚመላለሱ ያውቁ ነበር። እግዚአብሔር በሕይወታቸው ውስጥ እንዴት እንደ ሠራ በመመልከት የሚማሩ ትምህርቶች ነበሩ። እንደዚሁም ሕይወታችን የእግዚአብሔርን አመራርና ለዚያ አመራር ያለንን መታዘዝ የሚገልጥ የእምነት ምስክርነት ሊሆን ይገባዋል። ዓለም የማመናችንን ቃል መስማት አይፈልግም፤ ምክንያቱም ለእነርሱ ከምክንያታዊነት ውጭ ነው። ማየት የሚፈልጉት የሕይወታችንን ምስክርነት ነው።

የተጠራነው በዓለም ውስጥ ቆመን ስለ ክርስቶስ ለመመስከር አይደለም፤ የተጠራነው በክርስቶስ ውስጥ ቆመን ለዓለም ለመመስከር ነው።

«ዓለሞች በእግዚአብሔር ቃል እንደ ተዘጋጁ፥ ስለዚህም የሚታየው ነገር ከሚታዩት እንዳልሆነ በእምነት እናስተውላለን» (ዕብራውያን 11:3)። ሃይማኖቶች ሁሉ ስለ ፍጥረት የየራሳቸው ታሪኮች አሏቸው።

የእምነታችን መሠረት ፍጥረትን ሁሉ በቃሉ ወደ መኖር በጠራው፣ ባልተፈጠረው አምላክ ላይ ነው። ይህ ከሰው ማስተዋልና ከሳይንሳዊ ማብራሪያ በላይ ነው። ሳይንስ ሊያደርግ የሚችለው ቀድሞ ያለውን መመርመርና የተጻፈውን እውነታ ሲያረጋግጥ በአድናቆት ቆሞ መመልከት ብቻ ነው! ይህ ሊገባን የሚችለው እግዚአብሔር ውስጣዊ መገለጥን፣ ማለትም እንድናምን የሚያስችለንን እምነት፣ ሲሰጠን ብቻ ነው። ይህ ምክንያታዊነትን የሚተካ አይደለም፤ ከምክንያታዊነት ሁሉ በላይ ነው፤ «ወደ እግዚአብሔር የሚደርስ እግዚአብሔር እንዳለ ለሚፈልጉትም ዋጋ እንዲሰጥ ያምን ዘንድ ያስፈልገዋልና» (ዕብራውያን 11:6)።

በእምነት በመመላለስ ጌታ እንዴት እንደ መራቸው ለማየት በዕብራውያን 11 የተጠቀሱትን ገጸ ባሕርያት አንድ በአንድ አሁን መመልከት እንጀምራለን። መንፈስ ቅዱስ ሰብዓዊ ጸሐፊውን የተጠቀሱትን ሰዎች በመምረጥ ሆን ብሎ እንደ መራው በመነሣት፣ እርሱ በእነዚህ ምሳሌዎች ውስጥ ግልጽ ያደረጋቸውን ከእግዚአብሔር ጋር የመመላለስ መርሖች ለማየት ከቃላቱ ባሻገር እንዳነብ ራሴን እጠይቃለሁ። የእምነታችን ታላላቅ እውነቶች ሲገለጡ ሳይ እጅግ እደሰታለሁ።

የሚቀጥሉት ምዕራፎች አብረን ስንመለከታቸው እንዲያስደስቱህ እጸልያለሁ። ቅዱሱ ደራሲ እዚህ ስለ ጻፈው ነገር ለነፍስህ ይናገር።