ወደ ኢየሱስ መመልከት

ወደ ላይ ተመልከት

ክርስቲያን ሆይ! በመከራህ ሁሉ ወደ እግዚአብሔር ተመልከት፥ ትድናለህም። በፈተናህና በጭንቀትህ ሁሉ ወደ ክርስቶስ ተመልከት፥ መዳንንም ታገኛለህ። በሥቃይህ ሁሉ፥ ስለ በደልህ በምታደርገው ንስሐ ሁሉ ወደ ክርስቶስ ተመልከት፥ ይቅርታንም ታገኛለህ። ዓይኖችህን ወደ ሰማይ፥ ልብህንም ደግሞ ወደ ሰማይ ማቅናትን አስታውስ። የወርቅ ሰንሰለት በራስህ ዙሪያ እሰር፥ አንዱንም ቀለበቱን በሰማይ ባለው ማያያዣ ውስጥ አስገባ። ወደ ክርስቶስ ተመልከት፤ አትፍራ። ሰው ዓይኖቹን ወደ ኢየሱስ አቅንቶ ሲሄድ መሰናከል የለም። ወደ ክርስቶስ የሚመለከት በደኅና ይሄዳል።

ጌታችን ኢየሱስ

ከጌታ ኢየሱስ ፍጹም መታዘዝ፥ ከተፈጸመው ማስተስሪያው፥ ከትንሣኤው፥ ከዕርገቱ ወይም ከምልጃው የሚፈሱ ብፁዓን ውጤቶች ምንም ቢሆኑ፥ ሁሉም በራሱ ስጦታ የእኛ ናቸው። አሁን በልብሰ እንግድዓው ላይ ስሞቻችንን ተሸክሟል፤ በዙፋኑ ፊት በሥልጣን በሚያቀርበው ልመናም ያስበናል፥ ጉዳያችንንም ይሟገትልናል። የከፍተኛ ስፍራውን ጥቅሞች፥ በአለቅነትና በሥልጣናት ላይ ያለውን ግዛቱን፥ በሰማይም ያለውን ፍጹም ግርማውን በእርሱ ለሚታመኑት ጥቅም ያውለዋል። የተዋረደበት ሁኔታ ለእኛ አገልግሎት እንደ ነበረ፥ ከፍ ያለው ክብሩም እንዲሁ ለእኛ አገልግሎት ነው። በመከራና በሞት ጥልቀት ውስጥ ራሱን ስለ እኛ የሰጠ እርሱ፥ አሁን በሰማያት በላይ በዙፋኑ ስለ ተቀመጠ ስጦታውን አይመልስም። ክርስቶስ እኛን ከፍ ለማድረግ የማይጠቀምበት ክብር፥ እኛንም ለመከላከል የማይሠራበት መብት የለውም። ክርስቶስ በየትም ስፍራና በማናቸውም መንገድ ከዘላለም እስከ ዘላለም በብዛት የምንደሰትበት ዕድል ፈንታችን ነው።

የክርስቶስ ምልጃ

ጌታ ኢየሱስ ምርኮን ማረከ፤ አሁንም በእግዚአብሔር ቀኝ ተቀምጦ ለዘላለም ስለ እኛ ይማልዳል። እምነትህ ሊያስበው ይችላልን? እንደ ጥንቱ የሌዋውያን ሊቀ ካህናት እጆቹን ዘርግቶ ይቆማል፤ በመልኩ ግርማ አለ፥ በሥልጣንም ይለምናል። በራሱ ላይ የክህነቱ ብሩህ የሚያንጸባርቅ መጠምጠሚያ አለ፤ በደረቱም ላይ የሕዝቡ ስሞች ለዘላለም የተቀረጹባቸው የከበሩ ድንጋዮች ያብረቀርቃሉ። ሲለምን ስማው—የሚለው ምን እንደ ሆነ አትሰማምን? በዙፋኑ ፊት የሚጠቅሰው ያ ጸሎትህ ነውን? ዛሬ ጠዋት ያቀረብኸውን ጸሎት ክርስቶስ አሁን በአባቱ ዙፋን ፊት ያቀርበዋል። አሁን የተሳልኸውን ስእለት እርሱ አሁን በዚያ ይናገረዋል። እርሱ መሠዊያውም ካህኑም ነው፤ በራሱም መሥዋዕት ጸሎቶቻችንን መዓዛ ያለበሳቸዋል። ነገር ግን ምናልባት ለረጅም ጊዜ ስትጸልይ ቆይተህ መልስ አላገኘህ ይሆናል። አንተ የምታለቅስ ምስኪን ለማኝ! ጌታን ፈልገሃል፤ እርሱ ግን የሰማህ አይመስልም፥ ወይም ቢያንስ ነፍስህ ደስ እስኪላት ድረስ አልመለሰልህም፤ በዚህም ምክንያት በጨለማና በክብደት ተሞልተሃል። «ወደ እርሱ ተመልከት፥ ብርሃንንም ታገኛለህ»። አንተ ባይሳካልህ እርሱ ይሳካለታል፤ ምልጃህ ቸል ቢባል የእርሱ ግን ሊታለፍ አይችልም፤ ጸሎቶችህ ተመልሶ እንደማይታፈስ በምድር ላይ እንደ ፈሰሰ ውኃ ቢሆኑ እንኳ፥ የእርሱ ጸሎቶች ግን እንደዚያ አይደሉም፤ እርሱ የእግዚአብሔር ልጅ ነው—ይለምናል፥ ማሸነፍም አለበት። እግዚአብሔር አንድ ጊዜ ምሕረቶችን በደሙ የገዛውን የራሱን ልጅ አሁን የሚለምነውን ሊከለክለው አይችልም። ወይ፥ አይዞህ፥ ልመናህን ቀጥል፤ ኢየሱስ ስለ አንተ «ሊያማልድ ዘወትር በሕይወት ይኖራልና»።

ክርስቶስን ማየት

ክርስቶስን ማየት ለክርስቲያን ሁልጊዜ ይጠቅመዋል—ክርስቶስ ሊበዛብን አይችልም—ስሙ በሚጠራበት ስፍራ ድግግሞሽ አሰልቺ አይሆንም። ሁልጊዜ ክርስቶስን፥ ዘወትር ክርስቶስን ስጡን። የክርስቶስ አንድ ዓይነትነት ጣፋጭ ልዩነት ነው፤ የክርስቶስ አንድነትም እንኳ የስምምነትን ነገሮች ሁሉ በውስጡ ይዟል። ክርስቶስ በመስቀሉና በዙፋኑ፥ በግርግሙና በመቃብሩ—ክርስቶስ በየትም ስፍራ ለእኛ ጣፋጭ ነው። ስሙን እንወዳለን፥ ማንነቱን እናመልካለን፥ ስለ ሥራዎቹ መስማት ደስ ይለናል—ርእሱ ሁልጊዜ አዲስ ነው።

ለአዳኙ ያላቸው ፍቅር ደካማና ቀዝቃዛ ነው ብለው የሚያማርሩ አሉ። ነገር ግን ከኢየሱስ ጋር ይበልጥ ቢሆኑ ይህ ባልሆነ ነበር። ለክርስቶስ ይበልጥ ቀርበህ በኖርህና ይበልጥ ባወቅኸው መጠን ይበልጥ ትወደዋለህ። በአንዳች ልዩ ዘዴ ለክርስቶስ የተወሰነ መጠን ያለው ፍቅር በራስህ ውስጥ ለማስገኘት አትሞክር፤ ይልቁንም ወደ ፊቱ ግባ፥ ዘወትር አሰላስለው፥ ስለ አንተ የተቀበለውን መከራ በዓይነ ልቡናህ ሳለው፤ ያን ጊዜ ትወደዋለህ—ቀላልም ይሆንልሃል፤ እንዲህ ስታስበው እርሱ ምስኪኑን ልብህን ወደ ራሱ ያቀርበዋልና፤ ለእርሱ ያለህ ፍቅርም ለአንተ ያለውን ፍቅሩን በምታስተውልበት መጠን ያድጋል።

ክርስቶስን መፈለግ

ተጠባባቂ ነፍስ ሆይ፥ ምሕረቱ ሊጠበቅለት የሚገባ መሆኑን አስብ። መዳን አይደለምን—የነፍስህ ከገሃነም መዳን? ንጉሡ በመጨረሻ ይህን እጅግ የከበረ ዕንቍ ቢሰጥህ በምሕረት ደጅ ላይ ለረጅም ጊዜ መቆየት ዋጋው በሚገባ ይከፈላል።

ደግሞም ለምሕረቱ ምን ያህል ፈጽመህ የማትገባ እንደ ሆንህ አስብ፤ ስለዚህ ራስህን ለማዋረድ ወይም የእግዚአብሔርን ሉዓላዊ ፈቃድ በትዕግሥት ለመጠበቅ ቸል አትበል። ትዕቢተኞች ሰዎች ወዲያውኑ ትኩረት ሊሰጣቸው ይገባል፥ አለዚያ ይሄዳሉ፤ አንተ ግን የምትመካበት ምንም የለህም፤ ለረጅም ጊዜ ቸል ቢልህ እንኳ አለመገባትህ ስለ መዘግየቱ ምንም ማብራሪያ ሊጠይቅ እንደማይችል ሊሰማህ ይገባል። ከዚህም በላይ በመጨረሻ እንደሚሰማ አስታውስ። አንዲት የምትጸልይ ነፍስ ብትጠፋ የተስፋ ቃሉ በተሻረ ነበር፤ «ፈልጉ፥ ታገኙማላችሁ»—«የጌታን ስም የሚጠራ ሁሉ ይድናል» ብሎአልና። መዘግየቱ ለአንተ ጥቅም ሊሆን ይችላል፤ በራስ መዋረድ አፈር ውስጥ ይበልጥ ዝቅ እንድትል፥ ወይም ለበረከቱ ይበልጥ እንድትተጋ። ምናልባት ጌታ እንደ ሲሮፊኒቃዊቷ ሴት በእርሱ በመታመንህ ለእርሱ ክብር እንድታመጣ እምነትህን ሊፈትን አስቦ ይሆናል። ጸሎትህን ቀጥል፤ «እግዚአብሔር ተስፋ ለሚያደርጉት፥ ለምትፈልገውም ነፍስ መልካም ነው»።

እርሱን አስብ

ስለ መንገዱ ሸካራነት የደከምህና ተስፋ የቆረጥህ አማኝ ሆይ፥ የጌታህን ፍለጋ ተመልከት፥ እርሱም እንዴት መከራ እንደ ተቀበለ እይ። ተፈትነሃል ታውከሃልም፤ መጽናናትንም ትለምናለህ። ኢየሱስ ክርስቶስ በባሕርይ ከአንተ ጋር አንድ መሆኑ—አሁን የምትቀበለውን መከራ ሁሉ መቀበሉ—መንገድህ ቀድሞ በተቀደሰው እግሩ መረገጡ—የምትጠጣው ጽዋ እርሱ እስከ ታች ድረስ የጨለጠው ጽዋ መሆኑ—የምትሻገረው ወንዝ እርሱ በዋና የተሻገረው መሆኑ፥ በራስህ ላይ የሚንከባለለው ማዕበልና ሞገድ ሁሉ በጥንት ጊዜ በእርሱ ላይ መንከባለሉ—በዚህ እውነት ከሚቀርብልህ የተሻለ ምን መጽናናት ሊሰጥህ ይቻላል? ና! ጌታህ የተቀበለውን መከራ ለመቀበል ታፍራለህን፥ አትፈቅድምን? ደቀ መዝሙር ከመምህሩ፥ ባሪያም ከጌታው ይበልጣልን? እርሱ በመስቀል ላይ ይሞታልን፥ አንተስ መስቀልን አትሸከምምን? እርሱ የእሾኽ አክሊል ይጫንን፥ አንተስ የክብር ጕንጕን ትጫናለህን? እርሱ በእጆቹና በእግሮቹ ይወጋልን፥ ተከታዮቹስ ምንም ሕመም አይሰማቸውምን? ወይ፥ ያን ከንቱ ቅዠት ጣለው። «ነውርን ንቆ መስቀልን የታገሠውን» ተመልከት፤ እርሱም እንዳደረገው ለመታገሥና መከራን ለመቀበል ዝግጁ ሁን። የሚመራህ ምሳሌው፥ የሚያጽናናህም ርኅራኄው አለህ።

ቅዱሱ አዳኝ

ሐዋርያው ጳውሎስ ስለ ጌታ ኢየሱስ የተጠቀመበት እጅግ ውብና ጥልቅ ትርጉም ያለው አገላለጥ አለ—«ኃጢአት ያላወቀውን»። ኃጢአት ያላደረገ ብቻ አይልም፥ ኃጢአት ያላወቀ ይላል እንጂ። ኃጢአት ለእርሱ የሚያውቀው ትውውቅ አልነበረም፤ ሕማምን ያውቅ ነበር፥ ከኃጢአት ጋር ግን ትውውቅ አልነበረውም። ኃጢአት በብዛት በሚመላለስባቸው ስፍራዎች መካከል መሄድ ነበረበት፥ ነገር ግን አላወቀውም። ባሕርዩን አላወቀም ወይም ቅጣቱን አልተረዳም ማለት አይደለም፤ ነገር ግን አላወቀውም፤ ለእርሱ እንግዳ ነበር፤ በቃልም፥ በራስ ንቅናቄም፥ በፈገግታም ከቶ ትንሽ እንኳ እውቅና አልሰጠውም። እርሱ እውነተኛ አምላክ ነበርና ኃጢአት ምን እንደ ሆነ በእርግጥ ያውቅ ነበር፤ ከኃጢአት ጋር ግን ምንም ኅብረት፥ ምንም ተካፋይነት፥ ምንም ወንድማማችነት አልነበረውም። በኃጢአት ፊት ፍጹም እንግዳ ነበር፤ ባዕድ ነበር፤ ኃጢአት በሚታወቅበት ምድር ነዋሪ አልነበረም። በመከራ ምድረ በዳ ውስጥ አለፈ፤ ወደ ኃጢአት ምድረ በዳ ግን ከቶ ሊገባ አልቻለም። «ኃጢአት ያላወቀ»፦ ያን አገላለጥ ልብ በል፥ በልብህም አኑረው፤ ስለ ምትክህ በምታስብበትና በመስቀል ላይ ሲደማ በምታየው ጊዜ፥ በእነዚያ የደም መስመሮች ውስጥ «ኃጢአት ያላወቀ» ተብሎ ተጽፎ እንደምታይ አስብ። ከደሙ ቀይነት ጋር—ከዚያ የሳሮን ጽጌረዳ ጋር—የባሕርዩን ንጽሕና ተመልከት—የቈላውን አበባ—«ኃጢአት ያላወቀ»።

ክርስቶስ ምሳሌያችን

የጌታችንንና የአዳኛችንን የኢየሱስ ክርስቶስን የተባረከ ምሳሌ አስቡ። ይህ በእርግጥ ለራሳችሁ እንዳትኖሩ ያስተምራችኋል! «የጌታችንን የኢየሱስ ክርስቶስን ቸር ስጦታ አውቃችኋልና፤ ሀብታም ሲሆን፥ እናንተ በእርሱ ድህነት ባለ ጠጎች ትሆኑ ዘንድ ስለ እናንተ ድሀ ሆነ።» ልቡ ከርኅራኄ የተሠራ ነው፤ አንጀቱ በፍቅር ይቀልጣል። በመከራችን ሁሉ እርሱ ይጨነቃል። ከሥጋችን ሥጋ ከሆነበት ቀን ጀምሮ ከመከራችን ራሱን ከቶ አልሰወረም። ክቡሩ ራሳችን ብልቶቹን በሚያስጨንቁ ኀዘኖች ሁሉ ይነካል። አሁን ዘውድ የደፋ ቢሆንም አንድ ጊዜ የለበሰውን እሾኽ አይረሳም፤ በገነት ባለው የንግሥናው ግርማ መካከል በዚህ በታች ያሉትን ልጆቹን አይዘነጋም። ሳውል ቅዱሳንን ሲያሳድድ አሁንም እርሱ ይሰደዳል፤ ወንድሞቹ አሁንም እንደ ዓይኑ ብሌን ናቸው፥ ለልቡም እጅግ ቅርብ ናቸው። በክርስቶስ ውስጥ የራስ ወዳድነት ቅንጣት ማግኘት ብትችሉ ራሳችሁን ለምኞቶቻችሁ ቀድሱ፥ ገንዘብም አምላካችሁ ይሁን። በክርስቶስ ውስጥ የልብ ድንዳኔንና የመንፈስ ግድ የለሽነትን አንዲት ብናኝ እንኳ ማግኘት ብትችሉ፥ እናንተ ልባችሁ ለተጨነቁት ዋይታ እንደ ድንጋይ የሆነ፥ ራሳችሁን አጽድቁ። ነገር ግን የናዝሬቱ ሰው ተከታዮች ነን ብትሉ ርኅራኄ የሞላባችሁ ሁኑ፤ እርሱ የተራቡትን በመንገድም እንዳይዝሉ ይመግባቸዋል፤ ልባቸው የተሰበረውን ይጠግናል፥ ቍስላቸውንም ሁሉ ይፈውሳል፤ የችግረኛውን ጩኸት ይሰማል፥ ሊረዳውም ይነሣል። ደቀ መዛሙርቱ ከሆናችሁ ሂዱ፥ እናንተም እንዲሁ አድርጉ።

ወደ ክርስቶስ ተመልከት

ከጥርጥር ነጻ መሆን ትፈልጋለህን? በማይናወጥ እምነትና በማይነቃነቅ መታመን በጌታ ደስ ሊልህ ትወዳለህን? እንግዲያስ ወደ ኢየሱስ ተመልከት! ከኢየሱስ ጋር ይበልጥ ብንኖር፥ ኢየሱስን ይበልጥ ብንመስል፥ በኢየሱስም ላይ ይበልጥ ብንታመን፥ ጥርጥርና ፍርሃት እጅግ ጥቂትና ብርቅ ነገሮች እንደሚሆኑ እርግጠኛ ነኝ።

ፍጹም አዳኝ

«ከእርሱ የተነሣ ሁሉ በእርሱም ሁሉ ለሆነ» አምላክ ያልተሟላ አዳኝ ቢልክ ኖሮ ከባሕርዩ ጋር የማይስማማ በሆነ ነበር፤ ማለትም ከፊሉን እኛ ራሳችን እንድንሠራ፥ የቀረውንም ክርስቶስ እንዲሠራ ትቶን ቢሆን። ፀሐይን ተመልከት። እግዚአብሔር ፀሐይ ምድርን እንድታበራ ይወዳል፤ ታዲያ የምድርን ጨለማ ለብርሃኑ አስተዋጽኦ እንዲያደርግ ይጠይቃልን? ሌሊቱን ጠይቆ በጨለማ ጥላዎቹ ውስጥ ለቀትር ብሩህነት የሚያበረክተው አንዳች ነገር ይኖረው እንደ ሆነ ይመረምራልን? አይደለም፤ ፀሐይ ሩጫዋን ለመሮጥ እንደ ኃያል ሰው በጠዋት ትወጣለች፥ ምድርም ብሩህ ትሆናለች። ታዲያ እግዚአብሔር ወደ ጨለማው ኃጢአተኛ ዞሮ ለዘላለም ብርሃን የሚያበረክተው አንዳች ነገር በውስጡ ይኖር እንደ ሆነ ይጠይቀዋልን? አይደለም፤ ኢየሱስ በክንፎቹ በታች ፈውስ ያለበት የጽድቅ ፀሐይ ሆኖ ይወጣል፤ በመምጣቱም ጨለማ ብርሃን ይሆናል። እርሱ ብቻ «የዓለም ብርሃን» ነው፤ የራሱ ክንድ መዳንን አመጣ፤ ከሰው ምንም እርዳታ አይጠይቅም፥ ነገር ግን ከራሱ ባለ ጠጋ ጸጋ ሁሉን ይሰጣል፥ ሁሉንም ያደርጋል፤ ፍጹምና ሙሉ አዳኝም ነው።