መልካም ሥራና ትጋት

መልካም ሥራ

የሰው ልብ አንድ ጊዜ በመጽሐፍ ቅዱስ ማጉያ መነጽር ሥር ሲቀመጥና በመንፈሳዊ ዓይን ስናየው፣ እጅግ ርኩስ ሆኖ እናገኘዋለን፤ ስለዚህም ጻድቅ ባልሆነና ባልተለወጠ ሰው ዘንድ መልካም ሥራ ለማግኘት መጠበቅ በውቅያኖስ መካከል እሳት ሲነድ ለማየት እንደ መመኘት የማይቻል መሆኑን በእርግጥ እናውቃለን። ሁለቱ ነገሮች ፈጽሞ አይጣጣሙም። መልካም ሥራ ቢኖረን፣ የሚመነጨው ከእውነተኛ መለወጥ ነው፤ ከዚህም በላይ፣ ከተለወጥንበት ጊዜ አንሥቶ እስከ ሞት ሰዓት ድረስ በእኛ ላይ ከሚሠራ የማያቋርጥ መንፈሳዊ ኃይልም ይመነጫል። አቤቱ ክርስቲያን ሆይ፣ ዕለት ዕለት አዲስ ጸጋ ባይኖርህ ኖሮ መልካም ሥራ ባልኖረህ ነበር! በመጀመሪያው ሰዓት የተሰጠህ ጸጋ ዛሬ ፍሬ ለማፍራት በቂ ሆኖ አታገኘውም። ይህ በልባችን እንደ ተተከለና በተፈጥሮው በራሱ ፍሬ እንደሚያፈራ ዛፍ አይደለም፤ ነገር ግን ሕይወት ሰጪው ጭማቂ ከሥሩ ከኢየሱስ ክርስቶስ ይወጣል። እኛ ለብቻችን ዛፎች አይደለንም፤ ነገር ግን በሕያው የወይን ግንድ ላይ የተተከልን ቅርንጫፎች ነን።

መልካም ሥራችን ከክርስቶስ ጋር ካለን አንድነት ይመነጫል። አንድ ሰው ከኢየሱስ ጋር አንድ መሆኑን ይበልጥ ባወቀና በተሰማው መጠን ይበልጥ ቅዱስ ይሆናል። የክርስቲያን ባሕርይ የክርስቶስን ባሕርይ የሚመስለው ለምንድር ነው? ከጌታ ኢየሱስ ጋር ስለ ተጣመረና አንድ ስለ ሆነ ብቻ ነው። ቅርንጫፉ ወይን የሚያፈራው ለምንድር ነው? በወይኑ ግንድ ላይ ስለ ተጸገነና ስለዚህም የግንዱን ባሕርይ ስለሚካፈል ብቻ ነው። ክርስቲያን ሆይ፣ አንተም እንዲሁ ለእግዚአብሔር ፍሬ ልታፈራ የምትችልበት ብቸኛው መንገድ በክርስቶስ ላይ ተጸግነህ ከእርሱ ጋር አንድ በመሆን ነው። ከክርስቶስ ጋር የማያቋርጥ ኅብረት ሳታደርግ በቅድስና መመላለስ የምትችል መስሎህ ከሆነ ትልቅ ስሕተት ሠርተሃል። ቅዱስ ልትሆን ብትወድ ከኢየሱስ አጠገብ መኖር አለብህ። መልካም ሥራ የሚመነጨው ከዚያ ብቻ ነው። ከዚህም የተነሣ በሥራ መታመንን በሚመስል ነገር ሁሉ ላይ እጅግ ብርቱ ምክንያቶችን እናገኛለን፤ ሥራ የእግዚአብሔር ስጦታ ብቻ ከሆነ፣ ያልተለወጠ ሰው እንደዚህ ያለውን መልካም ሥራ በራሱ ማፍራት ምንኛ ፈጽሞ የማይቻል ነው! የእግዚአብሔር ስጦታዎች ከሆኑ ደግሞ በውስጣቸው የእኛ ብቃት ምንኛ ጥቂት ሊሆን ይችላል!

በመልካም ጀምር

የሃይማኖትን ሩጫ በሙሉ ኃይላቸው የሮጡ፣ ነገር ግን በትክክል ስላልጀመሩ የተሸነፉ ሰዎችን አውቃለሁ። «እንዴት ሊሆን ይችላል?» ትላለህ። እንግዲህ ስማ፤ በድንገት ወደ ሃይማኖት ዘለው የሚገቡ አንዳንድ ሰዎች አሉ። በፍጥነት ያገኙታል፣ ለጥቂት ጊዜም ይይዙታል፣ በመጨረሻ ግን ሃይማኖታቸውን በትክክለኛው መንገድ ስላላገኙት ያጡታል። አንድ ሰው ከመዳኑ በፊት በመንፈስ ቅዱስ ትምህርት የኃጢአትን ክብደት ሊሰማው፣ ኃጢአቱን ሊናዘዝ፣ በራሱ ሥራ ላይ ያለውን ተስፋ ሁሉ ሊተውና ወደ ኢየሱስ ክርስቶስ ብቻ ሊመለከት እንደሚገባው ሰምተዋል። እነዚህን ሁሉ እንደ አስቸጋሪ ቅድመ ሁኔታዎች ይቆጥሯቸዋል፤ ስለዚህም ንስሐ ከመግባታቸው በፊት፣ መንፈስ ቅዱስ በውስጣቸው መልካም ሥራ ከመሥራቱ በፊት፣ ሁሉን ትተው በክርስቶስ ወደ መታመን ከመድረሳቸው በፊት፣ ሃይማኖት እንዳላቸው ይመሰክራሉ። ይህ ያለ ምንም ሸቀጥ ንግድ እንደ መክፈት ነው፤ መክሰሩም አይቀርም። አንድ ሰው የሚጀምርበት ካፒታል ከሌለው ለጥቂት ጊዜ ያማረ ትዕይንት ሊያሳይ ይችላል፤ ነገር ግን ከድስት በታች እንደሚንጣጣ እሾህ ይሆናል፤ — ለጥቂት ጊዜ ብዙ ጩኸትና ብዙ ብርሃን፣ በመጨረሻ ግን በጨለማ ይጠፋል። በውስጥ የልብ ሥራ ሊኖር እንደሚገባ ፈጽሞ አስፈላጊ የማይመስላቸው ስንቶች ናቸው! ሆኖም ይህን እናስታውስ፤ አስቀድሞ የተጨነቀ ልብ ሳይኖረው የተለወጠ ልብ ያገኘ ሰው ከቶ የለም። ከፍ ወዳለው የቅዱስ ደስታ መደላድል ከመውጣታችን በፊት በዚያ በጨለማው የወቀሳ ዋሻ ውስጥ ማለፍ አለብን፤ በመዳን ቅጥሮች ላይ ከመሮጣችን በፊት አስቀድመን በተስፋ መቁረጥ ረግረግ ውስጥ ማለፍ አለብን። ከመዝራት በፊት ማረስ ያስፈልጋል፤ ከማጨድ በፊትም ብዙ ውርጭና ብዙ ኃይለኛ ዝናብ ማለፍ አለበት። እኛ ግን ብዙ ጊዜ ከቁጥቋጦዎቹ አበቦችን ቀጥፈው ያለ ሥር በአትክልት ቦታቸው እንደሚተክሉ ሕፃናት እናደርጋለን፤ ከዚያም ትንሿ የአትክልት ቦታቸው ምንኛ ያማረችና የተዋበች እንደ ሆነች ይናገራሉ፤ ጥቂት ቆይተህ ግን ተመልከት፣ ሥር ስለሌላቸው አበቦቻቸው ሁሉ ደርቀዋል። ይህ ሁሉ በትክክል ያለመጀመር፣ «የነገሩ ሥር» ያለመኖር ውጤት ነው። «የነገሩ ሥር» በውስጣችን ከሌለ — በመንፈስ ማረሻ ካልታረስንና ከዚያም የተትረፈረፈ መከር እናፈራለን በሚል ተስፋ በተቀደሰው የወንጌል ዘር ካልተዘራን — የውጫዊ ሃይማኖት፣ የአበባውና የቅጠሉ ጥቅም ምንድር ነው? የክርስትናን ሩጫ ስንሮጥ መልካም አጀማመር ሊኖር ይገባል፤ አጀማመሩ ትክክል ካልሆነ የማሸነፍ ተስፋ የለምና።

በነጻ ስጥ

አቤቱ ክርስቲያን ሆይ፣ ከእግዚአብሔር ቤተ ክርስቲያን በስስት ለመከልከል ባዘነበልህ ጊዜ ሁሉ፣ አዳኝህ አንተን ለማገልገል ያለውን ሁሉ እንደ ሰጠ አስብ! እንዲህ ያለውን ክቡር ራስን መካድ እያየህ — የመንጋው ድሆች ጥያቄ በፊትህ በቀረበ ጊዜ — ራስ ወዳድ ልትሆን፣ ጣፋጭ ምግብህንም ከእነርሱ ችግር አብልጠህ ልትቆጥር ትችላለህን? ኢየሱስን አስብ፤ እርሱ ወደ አንተ እየተመለከተ እንዲህ ሲል የምታየው ይመስልህ፦ «እኔ ስለ አንተ ራሴን ሰጠሁ፤ አንተስ ራስህን ከእኔ ትከለክላለህን? እንዲህ ብታደርግ ፍቅሬን በቁመቱና በጥልቀቱ፣ በርዝመቱና በስፋቱ ሁሉ አታውቀውምና።»

ለእግዚአብሔር ፈቃድ መታዘዝ

ለክርስቲያን እንደ እግዚአብሔር ፈቃድ ያለ ብርቱ ምክንያት የለም። የእግዚአብሔር ፈቃድ የአማኙ ሕግ ነው። «ምን ይጠቅመኛል? በሌሎችስ ላይ የሚያመጣው መልካም ውጤት ምንድር ነው?» ብሎ አይጠይቅም፤ ነገር ግን በቀላሉ «አባቴ ያዝዘዋልን?» ይላል። ጸሎቱም «አቤቱ መንፈስ ቅዱስ ሆይ፣ ለእኔ እንዴት መልካም እንደሚሆን ስለማይ ሳይሆን፣ አንተ ስለምታዝዝ ብቻ እታዘዝ ዘንድ እርዳኝ» የሚል ነው። «የቃሉን ድምፅ እየሰሙ» የእግዚአብሔርን ትእዛዛት መፈጸም የክርስቲያን መብት ነው።

ደስ የሚያሰኘው ትእዛዝ

«በእግዚአብሔር ደስ ይበልህ»። ይህ አንድ ትእዛዝ ብቻ ያለው ሕግ በበረድ ድንጋይ ጽላት ላይ የሚጻፍ ድንጋያማ ሕግ አይደለም፤ ነገር ግን በሚያንጸባርቀው ብሩህነቱ በአሜቴስጢኖስና በዕንቁ ላይ ሊጻፍ የሚገባው ትእዛዝ አለበት። «በእግዚአብሔር ደስ ይበልህ»። ደስታ ግዴታ በሆነ ጊዜ፣ ግዴታ በእርግጥ ደስታ መሆን አለበት። ደስተኛ መሆን ግዴታዬ ሲሆን፣ ደስ እንዲለኝም ግልጽ ትእዛዝ ሲኖረኝ፣ የራሴን ደስታ እምቢ ብል፣ ከራሴም ብፅዕና ፈቀቅ ብል በእውነት ሞኝ ነኝ። ኦ፣ ደስተኛ መሆንን ግዴታችን ያደረገ እንዴት ያለ አምላክ አለን! በደስተኛ ልብ ከሚቀርብ በደስታ የተሞላ መታዘዝ ይበልጥ ተቀባይነት የሚገባው መታዘዝ እንደሌለ የሚቆጥር እንዴት ያለ ቸር አምላክ ነው! «በእግዚአብሔር ደስ ይበልህ»።

ሥራ ፈትነት

አንዳንድ ፈተናዎች ወደ ትጉሃን ይመጣሉ፤ ሥራ ፈቶችን ግን ፈተናዎች ሁሉ ያጠቃሉ። ሥራ ፈት ክርስቲያኖች በዲያብሎስ የሚፈተኑትን ያህል ዲያብሎስ እንዲፈትናቸው እነርሱ ራሳቸው ይፈትኑታል። ሥራ ፈትነት የልብን በር ገርበብ አድርጎ ሰይጣንን «ግባ» ይለዋል፤ ከጠዋት እስከ ማታ በሥራ ከተያዝን ግን፣ ሰይጣን ቢገባ እንኳ በሩን ሰብሮ መግባት አለበት። ከሉዓላዊ ጸጋ በታች፣ ከእምነትም ቀጥሎ፣ «ለሥራ ከመትጋት አትለግሙ፤ በመንፈስ የምትቃጠሉ ሁኑ፤ ለጌታ ተገዙ» የሚለውን ትእዛዝ ከመታዘዝ የተሻለ ከፈተና መከላከያ ጋሻ የለም።

ጠቃሚነት

ጌታዬ ክርስቶስ መልካም እያደረገ ይዞራል፤ ከእርሱ ጋር ልትመላለስ ብትወድ አንተም በዚያው ተልእኮ መዞር አለብህ።

በሕይወት የሚገለጥ ሃይማኖት

የማይታይ ከሆነ ለሃይማኖትህ ብዙ ዋጋ አልሰጥም። መብራቶች አይናገሩም፤ ነገር ግን ያበራሉ፤ የመብራት ማማ ከበሮ አይመታም፣ ደወልም አያሰማም፤ ሆኖም ወዳጃዊ ብልጭታው በውኆች ላይ እጅግ ርቆ ለመርከበኛው ይታያል። እንዲሁ ሥራዎችህ ሃይማኖትህን አብርተው ያሳዩ። የሕይወትህ ዋና ስብከት በአካሄድህ ሁሉ ይገለጥ፤ ያን ጊዜም የከበረ ከመሆን አይቀርም።

የክርስቲያን ትጋት

በመጽሐፍ ቅዱስ ውስጥ ለታላላቅ ቅዱሳን ከተገለጡት ታላላቅ መገለጦች አብዛኞቹ የተገለጡት በሥራ ተጠምደው ሳሉ መሆኑን እናገኛለን። ሙሴ የሚነደውን ቍጥቋጦ ባየ ጊዜ የአባቱን መንጋ ይጠብቅ ነበር፤ ኢያሱ የእግዚአብሔርን መልአክ ሲገናኝ በኢያሪኮ ከተማ ዙሪያ እየዞረ ነው፤ ያዕቆብ በጸሎት ላይ ሳለ የእግዚአብሔር መልአክ ተገለጠለት፤ ጌዴዎን ሲያበራይ፣ ኤልሳዕም ሲያርስ ጌታ ጠራቸው፤ ማቴዎስ ኢየሱስን እንዲከተል ሲጠራ በመቅረጫው ተቀምጦ ነበር፤ ያዕቆብና ዮሐንስም ዓሣ እያጠመዱ ነበር። የሰዎችን ነፍሳት የሚወድ ሁሉን ቻዩ አምላክ ራሱን ለሥራ ፈቶች የመግለጥ ልማድ የለውም። ሰነፍና ሥራ ፈት የሆነ ሰው የአዳኙን ጣፋጭ ኅብረት ሊጠብቅ አይችልም።