ሰላምና ዕረፍት

ጸጥ ያለ ልብ

ልብ በሰላም ካልተጠበቀ ሕይወት ደስተኛ አይሆንም። የሕይወታችንን ወንዞች በሚመግበው በነፍሳችን ውስጥ ባለው በዚያ ሐይቅ ላይ ጸጥታ ካልነገሠ፣ ወንዞቹ ራሳቸው ዘወትር በማዕበል ውስጥ ይሆናሉ። ውጫዊ ሥራዎቻችን ራሳቸው ማዕበላዊ በመሆናቸው በማዕበል ውስጥ እንደ ተወለዱ ዘወትር ይመሰክራሉ። ሁላችንም ደስተኛ ሕይወት ልንኖር እንመኛለን፤ ብሩህ ዓይንና ቀልጣፋ እግር እያንዳንዳችን የምንመኛቸው ነገሮች ናቸው፤ የረካ አእምሮ ይዞ መኖር አብዛኞቹ ሰዎች ዘወትር የሚናፍቁት ነገር ነው። ሕይወታችንን ሰላማዊና ደስተኛ አድርጎ ለመጠበቅ ብቸኛው መንገድ ልብን በዕረፍት መጠበቅ እንደ ሆነ እናስታውስ፤ ድህነት ቢመጣ፣ ሀብት ቢመጣ፣ ክብር ቢመጣ፣ ውርደት ቢመጣ፣ ጥጋብ ቢመጣ ወይም እጦት ቢመጣ፣ ልብ ጸጥ ካለ በየትኛውም ስፍራ ደስታ ይኖራል። ነገር ግን የፀሐዩ ብርሃንና ብሩህነቱ የቱንም ያህል ቢሆን፣ ልብ ከታወከ ሕይወትም ሁሉ መታወኩ አይቀርም።

ሰላም

አማኝ በተወደዱ ወቅቶች ልቡን በተትረፈረፈ ሰላም የሚሞላ ከጌታ ኢየሱስ ጋር እንዲህ ያለ ቅርበት ያጣጥማል። ኦ! ኢየሱስ በሕዝቡ ጆሮ የሚያንሾካሹካቸው ጣፋጭ ቃላት አሉ፤ ሰው ቢነገረው እንኳ የማያምናቸው የፍቅር ጉብኝቶችንም ያደርግላቸዋል። ይህን ሊረዳ የሚወድ ሰው ከአባት ጋር ከልጁም ከኢየሱስ ክርስቶስ ጋር ኅብረት ማድረግ ምን እንደ ሆነ በገዛ ልቡ ሊለማመድ ይገባዋል። ክርስቶስ ለዓለም ሳይሆን ራሱን ለእኛ የሚገልጥበት ነገር በእርግጥ አለ። በዚያን ጊዜ ጥርጣሬ ያለበት አሳብ ሁሉ ይባረራል፤ እኛም «እኔ ለውዴ ነኝ፥ ውዴም ለእኔ ነው» ማለት እንችላለን። ይህ ሁሉን የሚውጥ ብቸኛው ስሜት ነው። ክርስቶስ እንዲህ በልብ ሲያድርና ያለ ተቀናቃኝ በዚያ ሲነግሥ አማኙ እንዲህ ያለ ጥልቅ ሰላም ቢኖረው ምን ያስደንቃል? ሰላም ባይኖረን ኖሮ ግን የተአምራት ተአምር በሆነ ነበር። ታዲያ ሰላማችን ይበልጥ የማያቋርጥ ያልሆነው ለምንድን ነው? ሰላማችንን ደጋግመን ለምናጣበት ብቸኛው ማብራሪያ ኅብረታችን መቋረጡና ግንኙነታችን መበላሸቱ ነው፤ ያለዚያማ ሰላማችን እንደ ወንዝ፣ ጽድቃችንም እንደ ባሕር ሞገድ በሆነ ነበር። ከመስቀሉ አጠገብ ኑር፤ ሰላምህም ዘወትር ይሆናል።

የመታመኛ ስፍራ

የምትወዳቸውን ሁሉ በእግዚአብሔር እጅ ማኖርህን እርግጠኛ ሁን። የራስህን ነፍስ በዚያ አኑረሃል፤ የእነርሱንም ነፍስና ሥጋ እንዲሁ በእርሱ ጥበቃ ሥር አኑር። ለራስህ ለምድራዊ ነገሮች በእርሱ ልትታመን ትችላለህ፤ ዕንቁዎችህንም ለእርሱ አደራ ስጥ። የአንተ እንዳልሆኑ፣ ነገር ግን እግዚአብሔር ያዋሰህ እንደ ሆኑ ይሰማህ—በማንኛውም ጊዜ ሊመለሱ የሚችሉ ብድሮች ናቸው—ለአንተ በርስትነት ያልተሰጡ፣ አንተ ባለቤቱ እስከ ፈቀደ ድረስ ብቻ ተከራይ የሆንክባቸው ውድ የሰማይ ነዋሪዎች ናቸው። ንብረቶችህ ልትተዋቸው ፈቃደኛ ስትሆን ያህል ፈጽሞ ደኅንነታቸው የተጠበቀ አይሆንም፤ ያለህንም ሁሉ በጌታ እጅ ስታኖር ያህል ፈጽሞ ባለጠጋ አትሆንም። ሞት ከመምጣቱ በፊት እጅግ የምትወዳቸውን ነገሮች ሁሉ በየቀኑ ለቸሩ አምላክህ ጥበቃ አሳልፈህ መስጠትን ብትማር፣ የሞት ኀዘንን እጅግ እንደሚያቀልልህ ታገኛለህ።

የአዳኙ ውርስ

«ሰላምን እተውላችኋለሁ።» አዳኛችን እዚህ የሚለው ሰላም ከእግዚአብሔር ጋር ያለውን ሰላምና ከገዛ ሕሊናችን ጋር ያለውን ሰላም ነው። ከእግዚአብሔር ጋር ሰላም—እርሱ «በክርስቶስ ከራሱ ጋር ካስታረቀን» ወዲህ አሁን «ሰላምም በምድር» አለ፤ «ለሰውም በጎ ፈቃድ» ደግሞ አለ። ክርስቶስ ኃጢአታችንን አስወግዷል፤ ስለዚህ በእግዚአብሔርና በነፍሳችን መካከል በሥራ ላይ ያለ ጽኑ ሰላም ተመሥርቷል። ይህ ግን እኛ በግልጥ ሳንረዳውና ሳንደሰትበት ሊኖር ይችላል። ስለዚህ ክርስቶስ ይህን ተጨማሪ ምስክር ሰጥቷል—በሕሊና ውስጥ ሰላም። ከእግዚአብሔር ጋር ያለው ሰላም የሰላም ስምምነቱ ነው፤ ከሕሊና ጋር ያለው ሰላም የስምምነቱ ዐዋጅ ነው። ከእግዚአብሔር ጋር ያለው ሰላም ምንጩ ነው፤ ከሕሊና ጋር ያለው ሰላም ደግሞ ከእርሱ የሚፈልቀው እንደ መስተዋት የጠራ ጅረት ነው። በሰማይ ባለው በመለኮታዊ ፍትሕ ችሎት ሰላም ይወሰናል፤ ወሬው እንደ ታወቀም ወዲያውኑ በማይቀር ውጤት፣ ሕሊና እንደ ሥራችን ሊፈርድብን በዙፋን በሚቀመጥበት በታችኛው የሰው ፍርድ ችሎት ሰላም ይከተላል። እንግዲያስ የክርስቶስ ውርስ ሁለት እጥፍ ሰላም ነው፤ በተመረጡትና በእግዚአብሔር መካከል የወዳጅነት፣ የስምምነት፣ የፍቅር፣ የዘላለም አንድነት ሰላም፤ እንዲሁም ለማስተዋልና ለሕሊና የጣፋጭ ደስታና የጸጥ ያለ ዕረፍት ሰላም። በላይ ነፋሳት በሌሉ ጊዜ በታች ማዕበል አይኖርም፤ ሰማይ ጸጥ ሲል ምድር ትረጋጋለች። ሕሊና የእግዚአብሔርን ደስታ ያንጸባርቃል። «እንግዲህ በእምነት ከጸደቅን በእግዚአብሔር ዘንድ በጌታችን በኢየሱስ ክርስቶስ ሰላምን እንያዝ።»