የእምነትና የእንግዳ ተቀባይነት ዋጋ

ጋለሞታይቱ ረዓብ ከእምነቷና ከእንግዳ ተቀባይነቷ የተነሣ ዳነች። የነዌ ልጅ ኢያሱ ሰላዮችን ወደ ኢያሪኮ በላከ ጊዜ፣ የአገሩ ንጉሥ ምድራቸውን ሊሰልሉ እንደ መጡ ስላወቀ፣ ተይዘው እንዲገደሉ ሊይዙአቸው ሰዎችን ላከ። እንግዳ ተቀባይዋ ረዓብ ግን ተቀብላ በቤቷ ሰገነት ላይ በተልባ እግር ቍጥቋጦ ሥር ሰወረቻቸው። ንጉሡ የላካቸው ሰዎችም መጥተው፦ «ምድራችንን የሚሰልሉ ሰዎች ወደ አንቺ መጥተዋል፤ አውጪአቸው፤ ንጉሡ እንዲህ ያዝዛልና» ባሉአት ጊዜ፣ እርሷ፦ «የምትፈልጉአቸው ሁለቱ ሰዎች ወደ እኔ መጥተው ነበር፤ ነገር ግን ፈጥነው ተመልሰው ሄደዋል» ብላ መለሰችላቸው፤ በዚህም ሰላዮቹን አልገለጠችባቸውም። ከዚያም ሰዎቹን እንዲህ አለቻቸው፦ «አምላካችሁ እግዚአብሔር ይህችን ከተማ እንደ ሰጣችሁ በእርግጥ አውቃለሁ፤ ፍርሃታችሁና ድንጋጤአችሁ በነዋሪዎቿ ላይ ወድቆአልና። ስለዚህ በያዛችኋት ጊዜ እኔንና የአባቴን ቤት በሰላም ጠብቁ።» እነርሱም፦ «እንዳልሽን ይሁን። ስለዚህ እንደ ቀረብን ባወቅሽ ጊዜ ቤተሰብሽን ሁሉ ከጣራሽ በታች ትሰበስቢያለሽ፤ እነርሱም ይጠበቃሉ፤ ከቤትሽ ውጭ የሚገኙት ሁሉ ግን ይጠፋሉ» አሉአት። ደግሞም ከቤቷ ቀይ ፈትል እንድታንጠለጥል ምልክት ሰጡአት። በዚህም በእግዚአብሔር ለሚያምኑና ተስፋ ለሚያደርጉ ሁሉ ቤዛነት በጌታ ደም እንደሚፈስ ገለጡ። ወዳጆች ሆይ፥ በዚህች ሴት እምነት ብቻ ሳይሆን ትንቢትም እንደ ነበረ ታያላችሁ።